Прикампромпроект

«Прикампромпроект» АО
Типез	Акционер огазеяськон
Кылдэм арез	19-тӥ южтолэзе 1966
Интыяськемез	Россия Россия: Ижкар
Валтӥсь адямиосыз	Зеленин Алексей Викторович — валтӥсь директор
Удысэз	Промышленной но граждан объектъёслы проект лэсьтон
Сайт	ppproekt.ru

«Прикампромпроект» АО  — Удмурт Элькунысь Ижкарысь проектъёсъя институт. Промышленной но граждан объектъёслы проектъёс лэсьтэ. Институтлэн валтӥсь ужез — выль пуктӥськонлы чаклам обороная но промышленностья комплексысь, ракета но инсьӧр вӧлмет поттон удысъёсысь предприятиосты выльдонъя проект лэсьтон.

Историез

1966-тӥ арын 19-тӥ южтолэзе СССР-ысь Огъя машиностроениея министрлэн С. А. Афанасьевлэн приказэзъя Ижкарын автомобиль поттон заводэз лэсьтон вылысь проектъя но сметая ужкагазъёсты огъя дасян понна кылдытэмын вал Нимысьтыз проектъёсъя кун институтлэн (ГСПИ-7) 4 номеро ёзэз.

Со аре ик куартолэзе нимзэ воштӥзы, со луиз Мускоысь машина лэсьтон удысысь предприятиослы проект дасянъя институтлэн («Ипромашпром») Удмурт ёзэз.

1986-тӥ арын гужем «Ипромашпромлэн» Удмурт ёзэз проектъёсъя нимаз институт сямен ужаны ӧдъяз, нимыз «Промышленной предприятиослы проект лэсьтонъя Прикамьеысь институт» яке «Прикампромпроект» луиз.

1994-тӥ арын институт выльдӥськон пыр потӥз, усьтэм акционер огазеяськонлы пӧрмиз, 2011-тӥ арын ворсам акционер огазеяськон луиз.

2015-тӥ арысен — «Прикампромпроект» АО.

Кивалтӥсьёсыз

• Валерьян Михайлович Сакулин — 1966-тӥ—1973-тӥ аръёсы институтэн кивалтӥсь. Со кивалтэм улсын Ижысь автозаводлэн, Воткаысь машзаводлэн, Вятские Поляныысь машзаводлэн, Воткаысь газ тӥрлык поттонъя заводлэн корпусъёссылы проектъёс лэсьтэмын.
• Владимир Александрович Савенков — 1973-тӥ—1991-тӥ аръёсы институтэн кивалтӥсь. СССР-ысь Министръёслэн Кенешсылэн премиезлэн лауреатэз (1981). Со кивалтэм улсын Ижысь автозаводлы проект йылаз-пумаз вуттэмын, Ижысь мотозаводын но Ижысь радиозаводын микроэлектроникаез поттонлы проект лэсьтэмын, «Энергия—Буран» программая проект ужъёс быдэстэмын.
• Валерий Яковлевич Фоменко — 1992-тӥ—2003-тӥ аръёсы институтлэн валтӥсь директорез. Со кивалтэм улсын «РФ-ысь химияя ожтӥрлык запасъёсты быдтон» программаез быдэстон вылысь Удмурт Элькунын объектъёс пуктон понна проектъёс лэсьтэмын, озьы ик Заполярьеын газ поттонъя объектъёслы проектъёс дасямын.
• Владимир Александрович Семенов — 2004-тӥ—2016-тӥ аръёсы институтлэн валтӥсь директорез. Кӧня ке инсьӧр программаосты быдэстонэ мыло-кыдо пыриськиз. Россиысь дано лэсьтӥськись, Удмурт Элькунысь дано лэсьтӥськись.
• Зеленин Алексей Викторович — 2017-тӥ арын 1-тӥ толшорысен «Прикампромпроект» АО-лэн валтӥсь директорез.

Ужез

«Прикампромпроект» 2 000-лэсь ятыр проектъёсты быдэстӥз. Совето вакытэ институт «Энергия — Буран» инсьӧр транспорт сӧзнэтэз кылдытонъя кун программае пыриськиз. Озьы ик «Байконур» космодромын монтажъя но заправкая комплекс пуктонъя проектэз вуттӥз, отын «Энергия-Буран» МКС-ез бичаны но лэзён вылысь дасяны, «Энергия», «Энергия-М» но мукет ракетаосты нуллӥсь блокъёсты бичан но эскерон понна лэсьтӥз вань инженер инфраструктураен производствоя проектъёсты.

Берло дас ар ӵоже Инсьӧр вӧлмет федерал агентстволэн бурд улаз ужась ракета но инсьӧр вӧлмет поттон удысын тыршись промышленной предприятиослы институт дырыз дыръя дасяз туала куронъёсъя воштӥськон но техника ласянь выльдӥськон вылысь проектъёсты. Со сяна, Алмаз-Антей, Машиностроениея наукая но производствоя огазеяськон кадь бадӟымесь корпорациослы, Пермь, Муско, Смоленск, Самара улосъёсысь, Муско, Санкт-Петербург каръёсысь ожгарын кутӥськись выль ракета техника поттонэ пыриськись заводъёслы выльдӥськонъя проектъёсты быдэстӥз. Али дыре вань ужъёсыз пӧлысь ог 80 % обороная кун заказ улсын лэсьтӥське.

Валтӥсь проектъёсыз

Промышленность удысын кутӥськись валтӥсь проектъёсыз:

• «ДКБА» ОАО-ысь нимысьтыз тӥрлыкез поттонъя производствоез техникая выльдон (Долгопрудный кар);
• «Ижысь радиозавод» ОАО-ысь гальваникая производствоез выльдон;
• «Прожектор» ГОКБ" ОАО-ез техникая выльдон (Муско);
• «МИТ» корпорация" ОАО-ысь механозаготовительной производстводствоез но сериен поттэм тӥрлыкез эскерон вылысь базаез техникая выльдон (Муско);
• «Электросталь» металлургияя завод" ЗАО-ысь андан ӵыжатон установкаез выльдон (Электросталь кар).

Предприятиосты выльдон:

• «ГОЗ Обухов завод» ОАО (Санкт-Петербург);
• «Вотка завод» АО (Удмуртиысь Вотка кар);
• Ижысь мотозавод «Аксион-холдинг» АО (Удмуртиысь Ижкар);
• «Машиностроитель» Пермь завод" ОАО (Пермь);
• «Авангард» ОАО (Смоленск улосысь Сафоново кар).

Данъетъёсыз

• СССР-ысь Министръёслэн Кенешсылэн премиез — усто проектъёс дасямез но со проектъёсъя предприятиос, юртъёс но сооружениос пуктэмез понна (28.08.1981-тӥ арын 324 номеро приказ);
• «Байконур» космодромысь объектъёслы проект лэсьтонэ пыриськем «Прикампромпроектысь» ӧнерчиос «Байконурез лэсьтӥсь» гадьпусъёсын пусъемын (1988);
• Россиысь усто проект лэсьтӥсь огазеяськонъёс пӧлын радъям конкурслэн йылпумъянъёсызъя институт 14 кужмо огазеяськонъёс радэ пыриз, «Россиысь лэсьтӥськон комплексысь элита» нимыз пусъемын (2013—2014);
• Россиысь Лэсьтӥськисьёслэн огазеяськонзылэн «Лэсьтӥськон удысысь дан» пусэз (2014);
• Россиысь «Кышкыттэм уж но мерлыко кылкутон» ӵошатсконын вормись (2013—2015);
• Росси Федерациысь Правительстволэн Таукаронэз — лэсьтӥськон комплексэз азинтэмез, ужын вормонъёсыз понна но «Прикампромпроект» АО-лы 50 ар тырмонэн валче (2016).

Валэктонъёс

Литература

• 50 лет на службе Отечеству / В. А. Семёнов. — Ижевск: Медиа Группа Парацельс, 2016. — 145 с. — ISBN 978-5-903887-15-6.

Чӧлсконъёс

• Комплексное проектирование промышленных и гражданских объектов [ӟуч]