Тюлькин, Михаил Николаевич

Википедиысь материал
Михаил Николаевич Тюлькин
Тюлькин Михаил Николаевич.jpg
Вордӥськем дырыз 22-тӥ шуркынмонэ 1918(1918-11-22)
Вордӥськем интыез Ижевск, РСФСР
Кулэм дырыз 10-тӥ южтолэзе 1999(1999-03-10) (80 арес)
Кулэм интыез Москва, Россия
Кунмуртлыкез СССРFlag of the Soviet Union.svg СССР
Кыӵе войскоез Flag of the Soviet Air Force.gif ВВС
Служить карон аръёсыз 1940—1960
Званиез Полковник
Ожмаськонъёс/ожъёс Быдӟым Атыкай ож
Данъетъёсыз
Совето Союзлэн Героез
орден Ленина орден Красного Знамени орден Александра Невского орден Отечественной войны I степени орден Красной Звезды орден «Знак Почёта»

Михаил Николаевич Тюлькин (1918-1999) — ас-лётчик, Быдӟым Атыкай оже пыриськем мурт, война вакытэ 1-тӥ Белорус фронтысь 16-тӥ омыр армиысь 193-тӥ авиацияя истребительной дивизиысь 515-тӥ авиацияя истребительной полкезлэн штурманэз. Совето Союзысь Герой.

Улон сюресэз

Вордскиз 1918-тӥ арын 22-тӥ шуркынмонэ (мукет ивортодэтъя — 21-тӥ шуркынмонэ) Ижын ӟуч семьяын. Атаез, Николай Тюлькин (1893-1930), НЭП вакытэ пекарнялэн кузёез, нош индустриализация кутсконысен рабочий вал. Анаез, Зинаида Степанова (1896-1976), юртъер котыраз бергаз, Москваысь купец семьяысь потэмын[1][2].

Николай Тюлькин 7 классэз йылпумъяз, аэроклубе ветлӥз, отын лётчик-инструктор луыса ужаз.

Горд армиын 1940-тӥ арысен. 1941-тӥ арын Ульяновскысь лётчикъёслэсь ожгар училищезэс йылпумъяз. Быдӟым Атыкай ожын 1942-тӥ арын куартолэзьысен. Ожмаськиз 876-тӥ но 515-тӥ авиацияя истребительной полкъёсын Брянск, Лымшор-Шундыпуксён, Сталинград, Воронеж, Степной, 2-тӥ Украин, 1-тӥ Белорус фронтъёсын. Сталинград но Курск ожъёсы пыриськиз.

1943-тӥ арысен коммунистъёслэн партиязы пыриз. Одӥгаз омыр ожын Тюлькинлэсь самолётсэ мертчизы, сӧсырмыса со тушмонэн киултэм музъем вылэ пуксиз. Совето частьёс доры кӧт вылаз ныж мынонъяз, солэн партийной билетэз гимнастёрка кисыяз ӵушылӥськыса бырем. Соин сэрен партие выльысь пыроно луиз. Со вакытэ сое кык пол ӵектылӥллям кун данъетлы, но партбилеттэк номырин ӧз данъялэ.

1944-тӥ арын 1-тӥ толшорысен полклэн штурманэз луыса службазэ нуиз. 1-тӥ Белорус фронтын наступлениос дыръя ожмаськыкуз (1944-тӥ арын пӧсьтолэзьысен 1945-тӥ арын южтолэзёзь) 2 гинэ учыр вал, куке лётчикъёс, алама куазен ожгар заданиосты быдэсъякузы, омырысен кытӥ лобемзэс сураллязы[3].

1945-тӥ арын южтолэзьлы Михаил Тюлькин 254 пол ожгар заданиосы лобалляз, 64 омыр ожъёсын тушмонлэсь 11 самолётсэ ачиз но 3-зэ группаен уськытӥз[4].

Ож бере СССР-ысь омыр войскоосын службазэ азьланьтӥз: нырысь ГДР-ын, собере — Москваын. 1954-тӥ арын Офицеръёс понна лобанъя тактической курсъёсты йылпумъяз. 1960-тӥ арын полковник званиен запасэ потӥз.

Москваын улӥз. Пенсие потон азяз ДОСААФ-лэн валтӥсь комитетаз старшой инспектор-лётчик луыса ужаз.

Улонысь кошкиз 1999-тӥ арын 10-тӥ южтолэзе. Ватэмын Мускоысь Черневское шайвылын (1-тӥ участокын).

Подвигез

1943-тӥ арын, Полтава палан ожгар задание быдэстыкуз, Михаил Тюлькин, 4 самолётъёсыз валтыкуз, асьме частьёсты ыбылыны лобӟись 18 тушмон бомбардировщикъёсты синйылтиз. Совето лётчикъёс тушмонъёс вылэ атакае ӝутскизы, соин йырин немецъёслы бомбаоссэс асьсэ частьёссы вылэ куштоно луиз. Со ожын Тюлькинлэн группаез тушмонлэсь 3 самолётсэ уськытӥз, кыксэ соос пӧлысь мертчиз ачиз Тюлькин[2].

1943-тӥ арын 29-тӥ гудырикошконэ ожгар заданиысен совето лётчикъёс тушмонлэн 27 бомбардировщикъёсыныз пумиськизы, соосты утьыса эшшо 8 истребительёс лобӟо на вал. Омыр ожын асьме ожгарчиос тушмонлэсь 4 самолётсэ быдтӥзы[2].

1944-тӥ арын 27-тӥ пӧсьтолэзе совето лётчикъёс Тюлькин кивалтэм улсын тушмонлэсь 8 самолётсэ синйылтӥзы. Омыр ожмаськонын 3-зэ соос пӧлысь уськытӥзы, одӥгзэ мертчиз ачиз Тюлькин[2].

Одӥгез берпум заданиосыз пӧлысь — рейхстаг палась самолёт лобӟон площадкаез быдтон, отысен Гитлерез но солэсь штабзэ нуыны чакламын вал. Асьме штурмовикъёс пуктэм ужпумез ӟеч быдэстӥзы, площадка интые бадӟым гуос гинэ кылизы[2].

Семьяез

Кузпалыз — Валентина Сало (нылдыр фамилиез). Нылпиоссы Елена но Борис.

Данъетъёсыз

  • «Зарни Кизили» медаль (15.05.1946);
  • Ленин орден (15.05.1946);
  • Горд Знамя кык орден (23.10.1942; 26.10.1943);
  • Александр Невскойлэн орденэз (28.10.1944);
  • Отечественной ожлэн I степенё куинь орденэз (05.04.1943; 15.06.1945; 11.03.1985);
  • Горд Кизили орден (16.03.1943);
  • «Знак Почёта» орден (10.08.1967);
  • медальёс[5].

Буре ваён

«Ижсталь» заводэ пырон дорын М. Тюлькинлы сӥзем буре ваён пул ошемын[6].

Валэктонъёс

  1. ↑ 75 мгновений войны. Небо — наш родимый дом ИжГТУ им. М.Т. Калашникова
  2. ↑ 1 2 3 4 5 Тюлькин Михаил Николаевич Герои Отечества
  3. ↑ Тюлькин Михаил Николаевич Красные соколы. Эскеремын 2012-11-20 арын
  4. ↑ Быков М. Ю. Все асы Сталина
  5. ↑ Тюлькин Михаил Николаевич Память народа
  6. ↑ Тюлькин Михаил Николаевич Герои страны

Чӧлсконъёс

«https://udm.ruwiki.ru/w/index.php?title=Тюлькин,_Михаил_Николаевич&oldid=486474»-ысь басьтэмын