Мамонтов, Анатолий Васильевич

Анатолий Васильевич Мамонтов
Анатолий Васильевич Мамонтов
Вордӥськем нуналыз	7-тӥ оштолэзе 1937
Вордӥськем интыез	Изгурт, Дэри ёрос, Удмурт Автономной Советской Социалистической Республика, РСФСР, СССР;
Кулон нуналыз	23-тӥ оштолэзе 2019 (82 года)
Кулэм интыез	Иж, Россия;
Кун	СССР; Россия;
Ужудысэз	музыкант
Данъетъёсыз	;

Анатолий Васильевич Мамонтов — Удмурт Элькунысь кырӟанъя но эктонъя кун академической «Италмас» ансамбльлэн чеберлыкъя кивалтӥсез. Удмуртиысь Калык артист, РСФСР-ысь Калык артист, Удмурт Республикаысь Кун премилэн лауреатэз, «Орден дружбы» пусэн данъямын. Ужысь Горд Знамя орденлэн кавалерез но Удмурт Элькунлэн дано гражданинэз.

Ныльдон ареслэсь ятыр кивалтӥз та коллективен. Вордӥськиз 7 апреле 1937-тӥ арын Завьял ёросысь Изгуртын (Каменное).

Пинал дырысеныз кырӟан борды кыстӥськиз. Сюлмаз вунонтэм кылизы гурт калыклэн секыт уж бере ӵукнаозь арганэн ветлэмзы. Эктӥсь-кырӟась пиосмуртъёс но кышномуртъёс сьӧры чуртнаськыса, шунды ӝужанозь поръяз пичи Толик но.

Дас куинь арес тырмыса, 1950-тӥ арын Ижысь крезьгуръя училищее пыре. Мыло-кыдо дышетскемзэ, быгатонлыкъёссэ пусъё тросэз дышетӥсьёс. Азинскон мылыкыдъёсыз вутто Татарстан Республикае. Татын со 1960-тӥ арын Кузонысь кун консерваториысь дирижёр люкетсэ йылпумъя. Аспирантураын дышетскыны луонлыкез ке но вал, берытске вордӥськем палъёсаз. «Италмас» ансамбльлэн хормейстерез луыса ужаны кутске. Кык ар ортчыса, со дыре ини быдэс Россилы тодмо коллективлэн чеберлыкъя кивалтӥсе юнмато. Арысь аре «Италмаслэн» данэз Россиын гинэ ӧвӧл, кунгож сьӧры но вӧлмыны кутскиз. Та нуналлы крезъгурья но эктонъя ансамбль пӧртэм калыккуспо конкурсъёслэн вормисез, дуннеын радъяськись фестивальёслэн лауреатсы луэ. А. В. Мамонтовлэн кивалтэмез улсын та коллектив шаермылэн но Россимылэн одӥгез дано коллективез луиз.

Кышноез Леонора Викторовна Мускоысь артист выжысь потэмын. Анатолий Васильевичез ӧтё вылэм кунмылэн шоркараз, Муское, ужаны, но кышноеныз ӵош пумит луизы, Иже кылизы. Вань улонзэс герӟазы «Италмас» ансамблен. Кык пизы вордӥськиз. Бадӟымез, Виктор, Мускоысь университетэз йылпумъяса, Мускоын ик ужа. Пичиез, Константин, йылпумъяз Ижысь университетэз, улэ но ужа Ижын.

Дэриысь историяя но лулчеберетъя музей А. В. Мамонтовлэн 1000-лэсь ятыр арбериосыныз коллекциез уте, адӟытонъёс радъя.