Ивортодэт экономика (йӧскалык проект)
| «Ивортодэт экономика» йӧскалык проект | |
|---|---|
 Правительствоын «Ивортодэт экономика» йӧскалык проектлы сӥзем сессия (2023) | |
| Кутскемын | 2024-тӥ арын |
| Йылпумъямын | 2030-тӥ арын |
| Кулэлыкез | Владимир Путин Президентлэн киӵолэмезъя улонэ пыӵа |
| Быдтосъёс | 700 млрд манет |
| Сайтэз | национальныепроекты.рф |
«Ивортодэт экономика» (ӟуч: экономика данных) — Россиысь Президентлэн Владимир Путинлэн кичӧлтэмезъя улонэ пыӵась йӧскалык проект[1]. Нырысьсэ 2023-тӥ арын «Лыдъян-чотан но связь. Квантовой дунне» форумын шараямын[2]. Россиысь Цифра ласянь азинсконъя, Экономика ласянь азинсконъя министерствоос но «Цифровой экономика» АНО чаклам улсын быдэсме[3].
Чакламъёссыя, йӧскалык проектлы луыса, искусственной интеллект но квантовой компьютер технологиос удысъёсъя кунмы юнманы но мукет кунъёслэсь та ласянь эрико луыны кулэ[4]. Со сяна, цифровой технологиос улонэ пыӵамен, ӵектос улсын улон-вылонын но экономикаын кылдэм шуг-секытъёслэсь мозмытскыны луоз[5]. Проектэз быдэстон вылысь 2030-тӥ арозь 700 млрд манет висъямын[6].
Бадӟым квант тэтчон
2023-тӥ арын «Лыдъян-чотан но связь. Квантовой дунне» форум дыръя Владимир Путин «Ивортодэт экономика» йӧскалык проектэн тодматӥз, соку ик СССР-ысь 20-тӥ даурлэн 30-тӥ-40-тӥ аръёсаз «промышленностьысь бадӟым ӝутсконлы» укшась ужпум пуктӥз: кунысьтымы технология, экономика, дышетон но кивалтон удысъёсын зол воштӥськонъёс ортчытоно[7]. Кызьы валэктӥз кунлэн Азьмуртэз, йӧскалык проектлэн валтӥсь стратегиез цифровизациен гинэ герӟаськемын ӧвӧл — воксё мукет экономикаез лэсьтыны, озьыен, кунысь улон-вылонлэсь ӟечлыксэ будэтыны кулэ:
Цифровой экономикаез, искусственной интеллектэз но вылӥ технологиосъя проектъёсты азинтыны юрттон вылысь туала тӥрлыкъёсты уже кутон, со пӧлын квантовой технологиосты азинтонъя «сюрес картаосты» юнматон сярысь гинэ вераськон уг мыны… Выль малпанъёсты, лэсьтоно проектъёсты азинтыны но котыр улонэ пыӵатыны огъя механизм кылдыты кулэ. Со, зэмзэ ик, вань технологиос но улонысь вань ӧръёс вылын шӧдӥськоз[8].
Йӧскалык проектэз быдэстонын Президентэн нимысьтыз вамышъёс пусъемын:
- ивортодэтэз бичан сӧзнэтэз умоятон (зол ужась квантовой сенсоръёс кылдытон, соос спутник системаосын но музъем вылысь связьын кулэ луись объектэз ӝог мед шараялозы, озьы ик тазалыкез утён удысын висёнъёсты вазь ик мед шедьтозы);
- ивортодэтэз али дырын вӧлмытыны юрттӥсь сӧзнэтэз умоятон (таиз промышленной робототехникаын, пилоттэк ветлӥсь транспортын, город улонэз автоматизировать каронын кулэ);
- ивортодэтэз лыдъян-чотанъя, эскеронъя но утёнъя нимысьтыз инфраструктура кылдытон (облачной платформаос но ивортодэтэз эскеронъя центръёс, кун ёзъёслы, предприятиослы, связья операторъёслы капчиен но ӝог уже кутымон мед луозы);
- квант но фотон технологиос вылын ужась компьютеръёс кылдытон но поттон;
- ивортодэтъёсты утён сӧзнэтэз умоятон (квантовой коммуникациос но квантовой шифръёс кылдытон);
- ивортодэтъёсын ужан вылысь йӧскалык стандартъёс но протоколъёс лэсьтон;
- ивортодэтъёсты бичаны но эскерыны алгоритмъёс кылдытон (татчы искусственной интеллект удысысь ужпумъёс, озьы ик кунамы кылдытэм программной обеспечение пыртэмын);
- кодъёслы хранилищеос лэсьтон (Россиысь но кунгож сьӧрысь программистъёслы ужан вылысь сервисъёс)[8].
Быдэстоно пусъем йӧскалык проектъёслы коньдон висъяськыку, озьы ик азьмынӥсь технологияя стартапъёслы инвестор кун луэ. Mobile Research Group компаниысь валтӥсь аналитик Эльдар Муртазин ивортэмъя, цифра ласянь азинсконын Россия дуннеысь кужмоосыз вить кунъёс пӧлы пыре (2024-тӥ ар понна лыдпусъёсъя). Со пусъемъя, йӧскалык проектлэн валтӥсь ужпумъёсыз пӧлысь огез мукет кунъёсын технологиосъя ӵошатскон ӧвӧл — кунысьтымы улосъёсты цифра ласянь огкадь ӝутон:
Висъяськись коньдон бадӟым воштӥськонъёсы вуттыны юрттэ. Валтӥсь малпан туж огшоры: азинскон понна ӵапак та ик кулэ. Мускоен ӵошатыса, цифра ласянь азинсконын улосъёс бере кылё. Нош паськытгес учконо ке, быдэс дуннеын Россия азьмынӥсьёс радын возиське[9].
Технологиос ласянь азинскон
Йӧскалык проектэз быдэстонын кунысьтымы инженеръёс но тодосчиос азе пуктэм ужпумъёсты но кылкутонэз метафораез сямен огпол валэктӥз «Росатомлэн» кивалтӥсез Алексей Лихачёв. Корпорацилэн йырыз квант компьютер кылдытонэз ӵошатӥз нырысетӥ совето ядер бомбаен, угось соиз но, таиз но «нольысен» кылдытэмын, кунлэн азинсконаз бадӟым инты басьтэ:
Тонэ Правительствое ӧтё но куинь-ньыль ар ӵоже ужамлэсь емышсэ возьматыны косо, нош солэн тусыз валантэм, технологиос кылдытымтэ, но тонэ Правительство но Наукаосъя академия эскерозы, шуо. Сыӵе дыръя, конешно, атом удыс кылдон понна кылкутӥсь Лаврентий Павлович Берия тодэ лыктэ, совето но росси атом промышленностьлэсь вылӥ ӝутэм знамязэ возьытэ уськытэм уг поты. Со, конешно, бугыръяськись мылкыд гинэ[8].
Атыкай квант компьютер «Росатом» чаклам улсын нимысьтыз лабораториын лэсьтӥськиз. Сое кылдытӥсь Илья Семериков ачиз ласянь Алексей Лихачёвлэсь малпанзэ азинтӥз, валэктӥз, макем сюлмысь но ӝог ужа та удысын ачиз физик но солэн ужъюлтошъёсыз Илья Заливако но Саша Борисенко — ас мылкыд каремзыя «шарашкаысь» выль узникъёс. Таӵе ӵошатон токма шорысь ӧз кылды, угось ӵапак конструктор бюроосын, кытын тыршизы Туполев, Королёв, Термен, авиостроениын, двигательёс поттонын, ракета лэсьтонын бадӟымесь вормонъёс басьтэмын вал[10]. 2023-тӥ арын Илья Семериков вуоноысь технологиослы сӥзем форум дыръя ивортӥз, ионной квант процессор кылдытыкузы, лабораториын тросгес улӥз, семьяез пӧлын сярысь шуыса:
Со дырысен ог куинь арзэ ни ми лабораториын улӥськомы, шуыны луоз – кӧснуналъёсы но, арнянуналъёсы но, вордӥськонъёсы но. Милемыз огез гинэ уте: ФИАН дас одӥг часын пытсаське. Ӧй пытсаськысал ке, ми отын ик кӧласалмы но[8].
Квант компьютерлэсь прототипсэ кылдытэмзылэсь азьвыл Илья Семериковлы котыраз аспӧртэм коллектив бичано-люкано луиз. 2023-тӥ арын сётэм интервьюаз ивортэмъя, та понна дасо ар кулэ луиз. Инженерлэн дунъетэзъя, эшшо дас ар кулэ луоз вань малпанъёсты улонэ пыӵатон понна:
Ми понна валтӥсез но шумпотымонэз: со [квантовой компьютер – ред.] пайдаё арбериос лэсьтэ, молекулаослы модельёс кылдытэ, наукаысь абстракциен уг выры. Ми понна та туж дуно но кулэ. Конешно, милям льӧль малпанмы – пайдаё ужась квантовой компьютер лэсьтыны. Со пуктэм ужпумъёсты суперкомпьютерлэсь но ӝоггес мед быдэстыны быгатоз, трос адямиослы пайдалыко мед луоз[8].
Цифровой экономикалэн пиртэшъёсыз
«Ивортодэт экономика» йӧскалык проектэз быдэстон улсын Экономика ласянь азинсконъя но Ужъя министерствоос азе арлы быдэ ужъя рынокез эскерыны ужпум пуктэмын, искусственной интеллект улонэ пыӵамен, кылдэм ыштонъёс, пиртэшъёс но кышкытлыкъёс Россиысь ужась калык вылын медаз шӧдӥське шуыса[3].
Озьы ик учке
Валэктонъёс
- ↑ Послание Президента Федеральному Собранию
- ↑ В России появится новый нацпроект — «Экономика данных»
- ↑ 1 2 Михаил Мишустин дал поручения по итогам стратегической сессии, посвящённой нацпроекту «Экономика данных»
- ↑ Михаил Мишустин провёл стратегическую сессию по формированию национального проекта «Экономика данных»
- ↑ Путин объявил о запуске нацпроекта «Экономика данных», РБК. Эскеремын: 18 южтолэзе 2024 арын.
- ↑ Путин анонсировал нацпроект «Экономика данных», Коммерсантъ (29 тулыспалэ 2024). Эскеремын: 18 южтолэзе 2024 арын.
- ↑ Путин предложил подготовить нацпроект по формированию экономики данных, РИА Новости (13.07.2023). Эскеремын: 19 южтолэзе 2024 арын.
- ↑ 1 2 3 4 5 Пленарное заседание Форума будущих технологий
- ↑ Эксперт: Нацпроект "Экономика данных" позволит сделать рывок во внедрении ИИ - Российская газета, Российская газета (29 тулыспалэ 2024). Эскеремын: 18 южтолэзе 2024 арын.
- ↑ Писаренко, Дмитрий. Гении сталинских шарашек. Даже в лагерях учёные совершали прорывы в науке, AiF. Эскеремын: 19 южтолэзе 2024 арын.
Россиысь йӧскалык проектъёс | |||||||||||||
|---|---|---|---|---|---|---|---|---|---|---|---|---|---|
| |||||||||||||
