Заболотский, Анатолий Иванович

Анатолий Иванович Заболотский
Анатолий Иванович Заболотский
Вордӥськем дырыз	19-тӥ южтолэзе 1911
Вордӥськем интыез	Малмыж[d], Ватка губерния, Росси империя[d];
Кулэм дырыз	5-тӥ куарусёнэ 1962 (51 год)
Кулэм интыез	Иж, РСФСР, СССР;
Кунмуртлыкез	СССР
Кыӵе войскоез	пехота[d]
Служить карон аръёсыз	1933—1936; 1939—1940; 1942—1946
Званиез
Частез	Юго-Западный фронт; 119-й гвардейский стрелковый полк 40-й гвардейской стрелковой дивизии; 1369-й стрелковый полк 417-й стрелковой дивизии; 3-й Белорусский фронт;
Ожмаськонъёс/ожъёс	Советско-финляндской ож (1939—1940)[d]; Быдӟым Атыкай ож;

Анатолий Иванович Заболотский (1911-тӥ арын 19-тӥ южтолэзе Малмыжын (Ватка губерния) — 1962-тӥ арын 5-тӥ куарусёнэ Ижкарын) — совето ожгар ужчи. Советско-финской но Быдӟым Атыкай оже пыриськем мурт. Совето Союзлэн Героез (1945). Гвардилэн майорез^[1].

Улон сюресэз

Анатолий Иванович Заболотский вордӥськиз 1911-тӥ арын 6-тӥ(19)-тӥ южтолэзе Ватка губерниысь Малмыж уезд карын (али Киров улосысь Малмыж ёрослэн административной центрез луэ, кар) ужасьлэн семьяяз. Национальностезъя ӟуч. Берлогес Заболотскийёслэн семьязы Ватка губерниысь Мулчанской черкогуртэ улыны выжиз (Али Выль Мултан нимаське), татысь гуртын школаез йылпумъяз но дышетсконзэ лесной техникумын азьланьтӥз. Сое йылпумъяса, 1929-тӥ арын Ижысь металлургической заводэ ужаны интыяськиз. 1933-тӥ —1936-тӥ аръёсы Горд Армиын службазэ ортчиз. Армиысь бертыса, Ува каргуртын улӥз, отысь лесхозын ужаз. 1939-тӥ арын толсур толэзе, мобилизаци улсынын, Ува ёрос военкомат Заболоцкийез выльысь армие басьтӥз. Советско-финской оже пыриськиз. Война бырем бере службазэ Уваысь НКВД-ын азьланьтӥз.

Быдӟым Атыкай ож

1942-тӥ арын тулыспал толэзе А. И. Заболотскийез выльысь армие басьтӥзы. Отын вакчи дыр куспын офицер курсъёсты ортчиз. Со арын ик куартолэзе младшой лейтенантэз Юго-Западной фронтэ келязы но стрелковой взводлы командире юнматӥзы. Ожмаськыкуз кык пол сӧсырмыны шедиз. Кыктэтсэ госпитальын йӧнатскемез бере, 40-тӥ гвардейской стрелковой дивизие выжтӥзы но 119-тӥ стрелковой полклэн стрелковой взводэзлы командире пуктӥзы. 1942-тӥ арын гудырикошкон толэзьысен аслаз дивизеныз, нырысь 1-тӥ гвардейской, собере 21-тӥ армилэн пушпӧлаз пыртӥзы, Сталинград ожмаськонын оборонительной фазаяз пыриськиз . 1942-тӥ арын шуркынмонэ гвардилэн младшой лейтенантэз Заболотский Дон фронтысь 65-тӥ армилэн пушпӧлаз пыртэм дивизиеныз «Уран» операци улсын наступление потӥз, собере ик дивизиез Юго-Западной фронтэ выжтӥзы, 5-тӥ танковой арми улсын «Малый Сатурн» операцие пыриськиз. 1943-тӥ арын толшоре дивизия Южной фронтысь 5-тӥ ударной армилы улсатэмын вал. А. И. Заболотскийлэн взводэз Ростов операциын Северский Донец шур вылын ожмаськонъёсын висъяськиз . 1943-тӥ арын 17-тӥ толшоре младшой лейтенант аслаз ожгарчиосыныз Ростов улосысь Константинов ёросысь Нижнепотапов хутор котырысь тушмон оборонаез пазьгыса, хуторе пыриз но фланговой шуккет сётыса, тушмонэз шуге-леке вуттӥз. Немец ожгарчиос кык 75 миллиметръем пыӵал тӥрлыксэс но солы дасям 200-лэсь уно снарядъёссэс, кык ручной но кык зенитной пулемётъёссэс кельтыса пегӟизы. Киултэм пыӵал тӥрлыкенызы Заболоцкийлэн гвардеецъёсыз Северский Донец шурез выжыса, солэн бурпал ярдураз асьме полклэн валтӥсь кужымъёсызлы интыяськыны плацдарм дасязы. Совето войскоез выльысь сопал ярдуре чигнатыны турттыса, тушмон Заболоцкийлэн взводэзлы пумит 19 танк лэзиз. Гвардеецъёс быгатыса пехотаез танкъёслэсь висъязы но ассэ тушмонэз берлань чигнатӥзы. Со вакыт гвардилэн младшой лейтенантэз А. И. Заболотский трофейной пушкаысь урмыса ыбылӥз, боеприпасъёсын автомашинаез но взвод тыр тушмон пехотаез быдтӥз. 1943-тӥ арын 5-тӥ тулыспалэ наступлениез азьланьтыса, Анатолий Заболоцкий секыт сӧсырмыны шедиз. Сое госпитале нуизы. Йӧнатскемез бере фронтэ гвардилэн лейтенантэз званиен берытскиз. Немецлэн Миус-фронт обороная линияз ожмасьиз. 1943-т ӥ арын пӧсьтолэзе секыт контузить каремен, выльысь госпитале шедиз.

Госпиталь бере гвардилэсь лейтенантсэ А. И. Заболотскийез Южной фронтысь 44-тӥ армилэн 417-тӥ стрелковой дивизияз ыстӥзы. Отын 1369-тӥ стрелковой полклэн 2-тӥ стрелковой батальонэзлэн 4-тӥ стрелковой ротаезлы командире юнматӥзы. Мелитопольской операци улсын Анатолий Заболоцкий аслаз ожгарчиосыныз Молочная шур дурын Восточной валэз басьтон ожъёсы но Каховкаез мозмытонэ пыриськиз. Днепр шур дурын ожмаськонлэн сокем ик азинлыко мынымтэеныз, 1944-тӥ арын 19-тӥ толшоре 417-тӥ стрелковой дивизия Вылӥ Главнокомандованилэн Ставкаяз резерве поттэмын вал. Тулыспалэ дивизиез Украин фронтэ Крым направление выжтӥзы но 51-тӥ й армилэн пуш пӧлаз пыртӥзы. Гвардилэн лейтенантэз А. И. Заболотский Крым операциын уката юн висъяськиз.

1944-тӥ арын оштолэзе совето войскоос Крым мукожын юнматӥськем немец но румын подразделениос вылэ наступление потӥзы. Ожъёсын Сиваш вамен выжыса, 1944-тӥ арын 9-тӥ оштолэзе 417-тӥ стрелковой дивизилэн подразделениосыз лымшорпал ярдурысь немец укреплениос вылэ урдскизы. Лыдзыя рота мында тушмон автоматчикъёс лушкемак 2-тӥ батальонлэн мышпалаз потыны турттыкузы, батальонлэсь паллян флангзэ возись Заболотскийлэн ротаез, контратакае потыса, тушмонэз берлань чигнатӥз. Пегӟись тушмон сьӧры уиськыса, сое танкъёслы пумит гудэм гу дорын сутӥз но тушмонэн синмысь синме ожмаськоно луиз. Со киын ожмаськонын 46-ез немец солдатъёс но офицеръёс быдтэмын, 31-ез пленэ басьтэмын вал.

Сапун-гурезез басьтон

Немец обороналэсь кӧня ке линиоссэ пазьгыса, 417-тӥ стрелковой дивизия 1944-тӥ арын 14-тӥ оштолэзе Симферополез мозмытонэ пыриськиз, 15-тӥ оштолэзе Севастополь доры матэктӥз. Крымын тушмонэз быдэсак пазьгон ожъёсын валтӥсез ожмаськон Сапун-гурезь дорын 7-тӥ куартолэзе ортчиз. Сапун-гурезьлэн ӝуждалаез 100-150 м сяна ӧвӧл, кыстӥськемез 8 иськем пала. Гурезь йылын тушмон железобетонной лэсьтосъёсын, артиллери ожтӥрлыкен но крупнокалиберной пулемётъёсын трос ярусъем опорной пунктъёс кылдытӥз. Котькуд 25-30 метр кемын траншеяосын адсконтэм пулемётной точкаос юнматӥз. Позициоссы доры матэктон интыосты быдэсак минаосын котыртӥз. Вакчи дыр куспын артиллерийской подготовкаез ортчыса, 51-тӥ армилэн но отдельной Приморской армилэн частьёссы штурме потӥзы, немецъёс пулемётъёсысь но автоматъёсысь вис карылытэк ыбылэмен, совето пехота дугдоно луиз. Соку гвардилэн лейтенантэз А. И. Заболотский ачиз атакае ӝутскыса, ротазэ сьӧраз валтӥз. Трос ыштонъёсын ке но, рота немец траншеяосын куинь линиез киултӥз. Собере, ас палтӥзы гурезь вырйылэ тубыса, отысь но фашистэз палгытӥз, Сапун-гурезе Горд знамя юнматӥз. Гурезь вырйылэ юнматӥськыса, А. И. Заболотский 30 кузя кылем ожгарчиосыныз немецлэсь ньыль контратаказэ пазьгиз, соос пӧлысь одӥгез танковой вал. Собере ачиз наступление потӥз. Тушмонлэсь обороназэ пазьгыса, Англи шайвыл палан позициоссэ юнматӥз но уйбыт ожмаськиз. Со уй куспын вермахтлэсь 130 солдат-офицерзэ быдтӥз. 1944-тӥ арын 8-тӥ куартолэзе вазь ӵукна Заболоцкий 172,7 метръем ӝуждалаез штурмен басьтыны ожгарчиоссэ поттӥз. Вырйыллэн уйпалысьтыз соос Севастополь пала потонэз возись немецлэсь ньыль секыт пыӵал тӥрлыксэ киултыны быгатӥзы но Севастополе пыризы. 9-тӥ куартолэзе кар быдэсак мозмытэм ын вал.

Сапун-гурезьын ожмаськем совето солдатъёслэн подвигзы сярысь Совето Союзлэн Маршалэз С. С. Бирюзов тазьы вераз:

Сапун-гурезез штурмен басьтон Быдӟым Атыкай ожлэн историяз тужгес яркытэз луэ. 1942-тӥ арын гитлеровецъёс Сапун-гурезь котырын ог дас сюрс солдат-офицерзэс ыштӥзы но гурезез басьтыны ӧз быгатэ. Асьме войскоос со вырйылэз нунал куспын киултӥзы. Сапун-гурезез киултыса, Севастополе сюрес усьтӥськиз.
— Бирюзов С. С. Когда гремели пушки. С. 274.

1944-тӥ арын 12-тӥ куартолэзе Херсон мунырысь кылем фашист войскоос капитулировать каризы. СССР-лэн Вылӥ Кенешезлэн Президиумезлэн 1945-тӥ арын 24-тӥ южтолэзе гожтэм Косэтэзъя, командованилэсь боевой заданиоссэ ӟеч быдэсъямез но фашистъёсын геройлыко ожмаськемез понна, гвардилэн лейтенантэзлы Заболотский Анатолий Ивановичлы Совето Союзлэн Героез дано ним сётэмын.

1944-тӥ арын 1-тӥ инвожое, Крым операци йылпумъяськем бере, 51-тӥ армия 1-тӥ Прибалтийской фронтэ выжтэмын вал. Заболотскийлэн ротаез, Шяуляйской операци улсын, Паневежис но Шедува литва каръёсты мозмытонэ пыриськиз. 27-тӥ пӧсьтолэзе гвардилэн лейтенантэз Шяуляй котыре интыяськем тушмон вылэ ожалсконэ нырысь ик ачиз султыса, ротазэ сьӧраз валтӥз. озьы тушмон оборонаез пазьгыса, рота каре пыриз. Со ожмаськонын лыдзыя рота мында тушмон быдтэмын, куамынэз пленэ басьтэмын вал. Со операци бере Заболоцкийлы гвардилэн старшой лейтенантэз звание сётэмын. 1944-тӥ арын коньывуон толэзе А. И. Заболотский Мемельской операцие но тушмонлэсь Курляндской группировказэ пазьгонэ пыриськиз. 28-тӥ но 29-тӥ коньывуонэ старшой лейтенант Заболотский сизьым пол ротазэ немец укреплениос вылэ ожалсконэ ӝутъяз, немец траншеяосын кык линиез киултыны быгатӥз. 30-тӥ коньывуонэ немец асьме позициос вылэ контратакае ӝутскыса, роталось командной пунктсэ котретэ басьтыны турттӥз. Соку Заболотский туж шонер круговой оборонаез радъяса, тушмонэз берлань чигнатӥз. Ачиз старшой лейтенант секыт сӧсырмыны шедиз ке но, ротаен кивалтонзэ ӧз кушты, пумозяз ожмаськиз.

1944-тӥ арын толсуре А. И. Заболотский, госпитальысь потыса, 3-тӥ Белорусс фронтэ выжтэмын вал. Батальонлэн командирез чотын Восточно-Прусской операцие пыриськиз. Ожгар сюрессэ Кёнигсберг котырын йылпумъяз. 1946-тӥ арын гвардилэн майорез А. И. Заболотский запасэ лэземын. Улӥз но ужаз Ижкарын. 1962-тӥ арын 5-тӥ куарусёнэ Анатолий Иванович Заболотский улонысь кошкиз. Ватэмын Нагорной шайвылын.

Данъетъёсыз

«Зарни Кизили» медаль (24.03.1945);
Ленин орден (24.03.1945);
Горд Знамялэн орденэз (12.05.1944);
Быдӟым Атыкай ожлэн 1-тӥ степенё орденэз (29.12.1944);
Кык Горд Кизили орденэз (07.06.1943; 14.08.1944);
медальёсыз.

Буре ваён

Геройлэн нимыз Кировысь Вормон паркысь гранит стела вылын

Удмуртской Элькунысь Ква каргуртын А. И. Заболотскийлы синпелет пуктэмын.
Выль Мултан черкогуртысь шоръёзо школалэн юртэз вылын буре ваён пул юнматэмын.
А. И. Заболотскийлэн нимыз Выль Мултанысь школалы сётэмын.
Солэн нимыз Кировысь Вормон Паркын гранит стела вылын пусъемын.

Валэктонъёс

↑ На момент представления к званию Героя Советского Союза — гвардии лейтенант.

Литература

Герои Советского Союза — наши земляки / ред.: И. П. Емельянов и др. — Ижевск: Удмуртское книжное издательство, 1962. — С. 45—48. — 212 с.
Кулёмин И. Г. Героев наших имена. 2-е изд. — Ижевск: Удмуртия, 1975. — С. 27—29. — 211 с.
Кулёмин И. Г., Сентемова Л. Ф., Ислентьева Р. А. Герои Советского Союза – наши земляки. — Устинов: Удмуртия, 1985. — С. 42—43. — 210 с.

Документы

Общедоступный электронный банк документов «Подвиг Народа в Великой Отечественной войне 1941—1945 гг.»

Герой Советского Союза

Указ Президиума Верховного Совета СССР

Орден Красного Знамени

Орден Отечественной войны 1-й степени

Орден Красной Звезды (1943)

Орден Красной Звезды (1944)

Чӧлсконъёс

А. И. Заболотский на сайте Межмуниципального отдела МВД России «Увинский»

Энциклопедия Министерства обороны Российской Федерации

[1] На момент представления к званию Героя Советского Союза — гвардии лейтенант.

[1]