Свято-Троицкой черк (Мостовое)
| Православной черк | ||
| Свято-Троицкой черк | ||
|---|---|---|
-3.jpg) | ||
| 56°16′47″ с. ш. 53°42′53″ в. д.GЯO | ||
| Кун | ||
| Интыяськемез | Удмуртиысь Мостовое черкогурт | |
| Епархия | Сарапул | |
| Архитекторез | Ф. М. Росляков, С. Е. Дудин | |
| Кылдытэмын | 1763 | |
| Юртэз пуктэмын | 1809—1811 аръёс | |
| Инлыкез |
 ОКН № 1800000012 |
|
| Сайтэз | mostovoe.cerkov.ru | |
|
|
||
 |
||
 Медиафайлъёс РувикиМедиа пушкын | ||
 | Россилэн лулчеберето кылёс лэсьтосъёсыз улос инлыкен рег. № 181610421650005 (ЕГРОКН) лэсьтос № 1800000012 (БД Викигида) |
Дун-чылкыт Троича черк (Живоначальной Троицалэн черкез, Вӧсьлыко Живоначальной Троицалы сӥзем черк) — Ӟуч православной черклэн Сарапул Епархиысь черкез. Удмуртиысь Сарапул ёросысь Мостовое черкогуртын интыяськемын. Удмурт Элькунысь архитектурая утёно синпелетъёс пӧлы пыре.
Историез
1763-тӥ арын, Кузон архиепископ Вениамин бакель сётэмен, приход кылдытэмын. Отчы Мостовой гурт пыриз, азьвыл со Кигбаево черкогуртлэн приходаз юнматэмын вал. 1764-тӥ арын, Дун-чылкыт Сергий Радонежскийлы сӥзьыса, пулэсь черк ӝутэмын. 1771-тӥ арын южтолэзе Дун-чылкыт Троицалэн нимыныз шуныт придел пуктыны лэземын. Эстӥськисьтэм Сергиевский черк 1800-тӥ арын 7-тӥ коньывуонэ ӝуаз, но шунтӥськись черкез тыл ӧз иса[1].
1804-тӥ арын 30-тӥ толсуре Ватка духовной консистория Мостовоеын излэсь Сергий Радонежскийлэн нимыныз приделэн ӵош Свято-Троицкой черк пуктон сярысь храмозданной грамота сётӥз[1]. Ватка губерниысь архитекторлэн Филимон Меркурьевич Росляковлэн проектэзъя пуктӥськон ужъёс 1809-тӥ—1811-тӥ аръёс ӵоже кыстӥськизы. 1821-тӥ арын Семён Емельянович Дудинлэн проектэзъя гырлы жугон но притвор ӝутэмын[2]. Паллян палысьтыз престолэз 1811-тӥ арын 20-тӥ куартолэзе Феодосий Тотемскийлэн нимыныз вӧсямын, нош бур палысез — 1813-тӥ арын 6-тӥ шуркынмонэ Дун-чылкыт Сергий Радонежскийлэн нимыныз. 1839-тӥ арын валтӥсь престол Дун-чылкыт Троицалэн нимыныз вӧсямын. 1816-тӥ арын пулэсь вашкалаез Свято-Троицкой черк кесямын. 1870-тӥ арын черк бордын приходской попечительство усьтэмын, нош 1893-тӥ арын — приходской школа[1]. 1896-тӥ арын, Мостовое черкогурт сяна, приходэ Бисарка, Вонявка, Гари, Дремина, Дуброва, Заборье, Кондыляки (Кондыли), Куюки, Оленье Болото, Опары, Осотовка, Пинязь (Сорокина) но Северная (Тыриши) гуртъёс пыризы[3].
Черкез пытсаллямзы сярысь иворъёс ӧвӧл, но 1937-тӥ арын со ӧз ужалля ни[1]. 2000-тӥ аръёсын выльдэмын но выльысь усьтэмын.
Архитектураез
Бадӟым изъёслэсь фундамент вылэ ӝутэм кирпич черк классицизм амалэн быдэстэмын. Огъя черк ньыль сэрго пуктэмын, куполэз тямыс гранен лэсьтэмын, со вадьсын чеберъям лантерна юнматэмын. Выжез из плитаослэсь вӧлдэмын. Вить граньем лапег алтарь висъет но ньыль колоннаослэсь трапезной валтӥсь вӧсяськон юрт борды шундыпуксён но шундыӝужан палласянь пуктэмын. Сиськон висъетэз паськытатэмын, юбоосын куинь люкетлы люкемын, выжез 1816-тӥ арысь чугун плитаослэсь вӧлдэмын. Трапезной борды притвор ӝутэмын, со сиськон висъетысен куинь яруслэсь гырлы жугон интые нуэ. Гырлы жугонлы инъет луиз ньыль граньлэсь лэсьтэм юрт, кыкетӥ ярусаз пыр потӥсь аркаен пролётъёс лэсьтэмын, куинетӥ ярусэз озьы ик пыр потӥсь пролётъёслэсь тямыс граньлэсь ӝутэмын. Гырлы жугон йылэ гранё чеберъям купол юнматэмын, со вылэ киросэн шпиль пуктэмын[2].
Юртлэн огъя кузьдалаез 58 метр луэ. Гырлы жугон висъетлэн пасьталаез — 10,5 метр, притворлэн — 16,75 метр, трапезнойлэн — 20,5 метр, валтӥсь юртлэн огъя объёмезлэн — 11,5 метр, лапег алтарь висъетлэн — 9 метр[2].
Валэктонъёс
- ↑ 1 2 3 4 Свято-Троицкая церковь (1771–1937 гг.) Архивная служба Удмуртской Республики. Эскеремын 2020-02-02 арын
- ↑ 1 2 3 Троицкая церковь, село Мостовое, Сарапульский район Удмуртской Республики Эскеремын 2020-02-02 арын
- ↑ с. Мостовое, Свято-Троицкая церковь Родная Вятка. Эскеремын 2020-02-02 арын