Глебов, Виктор Сергеевич

Виктор Сергеевич Глебов
Виктор Сергеевич Глебов
Вордӥськем дырыз	9-тӥ (22‑тӥ) толсуре 1906
Вордӥськем интыез	Ижевск, Ватка губерния, Росси империя
Кулэм дырыз	30-тӥ куарусёнэ 1985 (78 арес)
Кулэм интыез	Воронежын, РСФСР, СССР
Кунмуртлыкез	СССР
Кыӵе войскоез	Пехота
Служить карон аръёсыз	1928 — 1959
Званиез
Командовать кариз	242-тӥ стрелковой дивизия ; 130-тӥ стрелковой бригада ; 27-тӥ гвардейской стрелковой дивизия
Ожмаськонъёс/ожъёс	КВЖД-ын вачевуон; Хасан ожмаськонъёс ; Быдӟым Атыкай ож

Виктор Сергеевич Глебов (9 [22] толсуре 1906, Ижкар — 30 куарусёнэ 1985-тӥ ар, Воронеж) — совето ожгар ужчи, Совето Союзлэн Героез (29.05.1945). Генерал-майор (27.11.1942).

Улон сюресэз

Виктор Сергеевич Глебов вордӥськиз 1906-тӥ арын 9 (22) толсуре Ижкарын крестьян семьяын. 6 аресказ семьяез Ваткае (Киров) улыны кошкиз, татын 9 классэз йылпумъяса, Ватка станциысь чугун сюрес станциын депоын ужаз.

Ожлэсь азьпал ожгар службаез

1928-тӥ арын гудырикошкон толэзе Горд армие басьтӥзы. Служить кариз Дальней Востокын 1-тӥ Тихоокеанской стрелковой дивизиын. 1929-тӥ арын 2-тӥ Нерчинской стрелковой полкысь одногодичникъёслэсь командазэ йылпумъяз. 1929-тӥ арын КВЖД-ын луэм ожгар действиосы пыриськиз. 1930-тӥ арын Иркутскысь Пехоталы командиръёсты дасясь курсъёсты йылпумъяз. 1930-тӥ арын инвожо толэзьысен Дальней Востокын 40-тӥ стрелковой дивизилэн 120-тӥ стрелковой полказ взводлы командире но пулемётной роталы командире пуктӥзы. 1937-тӥ арын толсур толэзьысен дивизилэн штабезлэн оперативной частезлэн кивалтӥсезлэн юрттӥсез луиз. 1938-тӥ арын Хасан ты дурысь ожмаськонъёсы пыриськиз. Сэзь луэменыз висъяськемез понна Горд Знамялэн орденэныз пусйизы. 1939-тӥ арын дышетскыны келязы.

1941-тӥ арын РККА-лэсь М. В. Фрунзе нимо военной академизэ йылпумъяз.

Быдӟым Атыкай ож

1941-тӥ арын пӧсьтолэзе майор В. С. Глебовез Шундыпуксёнпал фронтэ келязы. Татын кӧня ке дыр ӵоже фронтэн командующиезлэн Совето Союзлэн Маршалэзлэн С. К. Тимошенколэн быдэсъясь офицерез чотын служить кариз. Гудырикошконысен — Демяха черкогурт дорын оборонаын сылӥсь 30-тӥ армилэн 242-тӥстрелковой дивизиезлэн штабезлэн кивалтӥсез луиз. Смоленск понна ожмаськонын но Батурино каргуртэз мозмытонын дивизия кема дыр ӵоже оборонительной ожъёс нуоно луиз. Куарусён толэзе одӥгаз ожмаськонын дивизилэн командирез генерал-майор К. А. Коваленко сӧсырмыны шедиз, со интые дивизиез подполковник Глебов йыръяз.

Муско понна ожмаськонъёс кутскыку, коньывуон толэзьлэн кутсконаз, дивизия Вяземской котёлэ шедиз, соку Глебов котретысь Ржев палтӥ потон сярысь решение кутӥз. Вакчи дыр куспын артиллерийской подготовкаез ортчыса, дивизия Осуга станциез киултӥз. Уйпала мынонзэ азьланьтыса, 10 нунал куспын Старица кар котырын котретысь потыны быгатӥз.

Дивизизэ тушмон котретысь поттэмез бере, 17-тӥ коньывуонэ Глебовез Калининской фронтысь 22-тӥ армилэн 220-тӥ стрелковой дивизиезлэн штабеныз кивалтыны пуктӥзы. Пыриськиз Калининской оборнительной операцие.

1941-тӥ арын толсуре Глебовез Урал военной округе келязы, 1942-тӥ арын толшоре 130-тӥ отдельной стрелковой бригадалы командире юнматӥзы. Южтолэзе бригада Калининской фронтысь 30-тӥ армие вуиз, соин валче Ржевско-Вяземской наступательной операцие пыриськиз. Со операци бере Глебовлы полковник звание сётӥзы.

1942-тӥ арын пӧсьтолэзе В. С. Глебов 27-тӥ гвардейской стрелковой дивизилы командире юнматэмын но гудырикошкон толэзе Сталинград котыре келямын. Дивизия 1-тӥ гвардейской армилэн но 4-тӥ танковой армилэн пушпӧлаз Сталинград понна ожмаськиз. Шуркынмон толэзьысен Сталинградской наступательной операцие пыриськиз, 66-тӥ но 65-тӥ армиосын ӵош 150 иськемлэсь ятыр ож сюресэз ортчиз, кӧня ке улон интыосты но Сталинград ёросъёсты мозмытӥз.

Сталинград понна ожъёс йылпумъяськем бере, дивизиез 62-тӥ армилэн пушпӧлаз пыртӥзы но ӝоген 8-тӥ гвардейской армилы пӧрмытӥзы. Соин ӵош дивизилэн командирез Глебов Изюм-Барвенковской, Донбасской, Запорожской, Днепропетровской, Березнеговато-Снигирёвской, Одесской, Люблин-Брестской, Висло-Одерской, Берлинской наступательной операциосы пыриськиз.

1943-тӥ арын 17-тӥ пӧсьтолэзе дивизия, Сталинград дорысен кутскыса, Барвенково, Запорожье, Днепропетровск но Никополь пыр Одесса пала наступление потӥз. Запорожье котырын дивизия куинь нунал вис карытэк ожмаськиз. Азьпал мынӥсь полк тушмонлэн танкъёсыз вылэ ӝимиз. Соку Глебов, со полке вуыса, танкъёсты но со бӧрсьы мынӥсь артиллериез лэзьыны, нош пехотаез дугдытыны косӥз. Озьы дивизия Запорожьее пырыны быгатӥз.

1944-тӥ арын гужем Глебовлэн дивизиез тушмонлэн Ковельлэсь шундыпуксёнпалагес интыськем юнматэм оборонаез вылэ ожалсконэ, озьы ик Западный Буг но Висла шуръёсты выжонэ пыриськиз. Дивизия Висла шурлэн шундыпуксёнпал ярдураз Пулава поляк кар дорысь плацдармез паськытатон понна азинлыко ожмаськиз.

1945-тӥ арын толшоре Висло-Одерской операци улсын дивизия Лодзь карез киултонэ но Варта шурез ожмаськыса выжонэ пыриськиз, озьы Познань кар дорозь вуиз. 26-тӥ толшоре Глебовлэн косэмезъя дивизилэн кык полкез, мукетъёсыныз огазеяськыса, кар фортъёс вылэ Варта шур дурысен ожалскизы но вакчи дыр куспын соосты киултӥзы. Тушмон укреплениосты пазьгон но соосты басьтон понна, Глебов полкъёс пушкын штурмовой группаос кылдытыны косӥз. 23-тӥ толсуре Познаньысь гарнизон сётӥськиз.

Дивизилэн командирез В. С. Глебов Берлинской наступательной операциын сэзь ожмаськеменыз но быгатыса командовать каременыз висъяськиз. 16-тӥ оштолэзе уйин, прожекторъёсын югдытытыса, дивизия Зеловские высоты котырын наступление потӥз но 21-тӥ оштолэзе окружной берлинской автострада вылэ потӥз. 23-тӥ оштолэзе дивизия Шпре шур дуре вуиз но Адлерсхоф дорысь выжез киултыса, шур вамен выжиз. Ӝоген дивизия эшшо одӥг плацдармез но Даме шур вамен поттӥсь выжез киултӥз.

Берлинын 27-тӥ гвардейской стрелковой дивизия Ландвер-канал кузя Тиргартен пала мынӥз. 27-тӥ оштолэзе шор чугун сюрес герӟетлэсь ог люкетсэ киултыны быгатӥз. Урам ожъёс мыныку, Глебов полкъёсын ӵош асьме частьёсын герӟаськон лунлыкъёс кылдытъяны тыршиз. Ӝоген дивизия Потсдам вокзалэз басьтӥз. 2-тӥ куартолэзе Глебов почтамтлэн юртысеныз 29-тӥ гвардейской стрелковой корпуслэн штабеныз герӟаськыса, генерал А. Д. Шеменковлы боевой ужпум быдэстэмын шуыса ивортӥз…

СССР-ысь Вылӥ Кенешлэн Президиумезлэн 1945-тӥ арын 29-тӥ куартолэзе гожтэм Косэтэзъя гвардилэн генерал-майорезлы Виктор Сергеевич Глебовлы командованилэсь боевой ужпумъёссэ ӟеч быдэсъямез но фронтын немец захватчикъёсын сэзь ожмаськемез понна Совето Союзлэн Героез ним сётэмын, Ленин орденэн но «Зарни Кизили» медален пусъемын (№ 5797).

Ож бере

Вормон бере со дивизиез Германиысь совето оккупационной войскоослэн пушпӧлазы пыртӥзы. Дивизиеныз Глебов ачиз ик командовать кариз. 1945-тӥ арын шуркынмонэ сое 21-тӥ гвардейской механизированной дивизилы пӧрмытӥзы, гвардилэн генерал-майорез В. С. Глебов соин 1946-тӥ арын толсур толэзёзь командовать кариз, собере дышетскыны кошкиз. 1948-тӥ арын К. Е. Ворошилов нимо Вылӥ военной академиез йылпумъяз. 1947-тӥ арын КПСС-лэн ёзчиез луиз. 1948-тӥ арын шуркынмон толэзьысен 31-тӥ гвардейской воздушно-десантной дивизилэн командирез вал. 1950-тӥ арын куарусёнысен Валтӥсь военной советник — СССР-ысь Посольство улсын Албаниысь военной атташе. 1953-тӥ арын пӧсьтолэзьысен — Урал военной округысь 63-тӥ стрелковой корпуслэн командирезлэн воштӥсез, 1954-тӥ арын пӧсьтолэзьысен — Северо-Кавказской военной округысь 12-тӥ стрелковой корпуслэн командирез. 1956-тӥ арын гудырикошкон толэзьысен — Тамбов улосысь Мичуринск карын И. В. Мичурин нимо плодоовощной институтысь военной кафедраен кивалтӥз.

1959-тӥ арын куарусёнэ генерал-майор Виктор Глебов запасэ лэземын. Улӥз Воронежын. Улонысь кошкиз 1985-тӥ арын 30-тӥ куарусёнэ. Ватэмын Воронежын.

Северо-Осетинской АССР-ысь Вылӥ Кенешлэн 4-тӥ ӧтчамаз депутатэ бырйиськылӥз (1955—1959).

Данъетъёсыз

Совето Союзлэн Героез (29.05.1945)
Кык Ленин орденэз (29.05.1945, 3.11.1953)
Горд Знамялэн ньыль орденэз (25.10.1938, 14.02.1943, 8.08.1944, 20.06.1949)
Суворовлэн II степенё орденэз (26.10.1943)
Кутузовлэн II степенё орденэз (19.03.1944)
Богдан Хмельницкийлэн II степенё орденэз (6.04.1945)
Быдӟым Атыкай ожлэн I степенё орденэз (11.03.1985)
Горд Кизили орден (3.11.1944)
«Сталинградэз утем понна» медаль (22 декабря 1942)
«Рабоче-Крестьянской Горд Армилы XX ар» (22.02.1938)
«Бойцу ОКДВА» знак
«Хасан ожъёсы пыриськемез понна» знак
СССР-лэн мукет медальёсыз;
Кунсьӧр орденъёс но медальёс.

Буре ваён

2005-тӥ арын Воронежысь Кольцовская урамысь 2-тӥ номеро юртын буре ваён пул юнматэмын (отын 1960-тӥ арысен 1985-тӥ арозь улӥз).

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
Великая Отечественная. Комдивы : военный биографический словарь / [Д. А. Цапаев и др. ; под общ. ред. В. П. Горемыкина] ; М-во обороны Российской Федерации, Гл. упр. кадров, Гл. упр. по работе с личным составом, Ин-т военной истории Военной акад. Генерального штаба, Центральный архив. — М. : Кучково поле, 2014. — Т. III. Командиры стрелковых, горнострелковых дивизий, крымских, полярных, петрозаводских дивизий, дивизий ребольского направления, истребительных дивизий (Абакумов — Зюванов). — С. 603—605. — 1102 с. — 1000 экз. — ISBN 978-5-9950-0382-3.
Наши земляки: Герои Советского Союза, Герои Российской Федерации, Полные кавалеры ордена Славы. — Ижевск, 1995. — С.30.
Удмуртская Республика. Энциклопедия. — 2-е изд., испр. и доп. — Ижевск, 2008. — С.280.
27-я стрелковая дивизия у стен Сталинграда : из воспоминаний командира дивизии Героя Советского Союза В. С. Глебова // Не щадя жизни, презирая смерть… — Ижевск, 2005. — С.47-49.
Кузнецов Н. С. Великой славы светлая память. — Ижевск, 2012. — С.81.
Кулемин И. Г. Героев наших имена. — Ижевск, 1975. — С.18-20.

Чӧлсконъёс

Валерий Воробьёв Виктор Сергеевич Глебов [ӟуч] «Герои страны» сайт.