Выль ар тодметъёс

Выль ар тодметъёс ӟуч: Си́мволы Но́вого го́да — Россиын кутӥськись тодметпусъёс но Выль ар пумитан сям-йылолъёс.

Чеберман

Кыз

Толсур азьын кызэз чеберман сям Россие XIX даурлэн шораз немец калыклэсь вуиз. Нош немец калыклэн со сямыз XV—XVI дауръёсы кылдӥз. Соку соос кызэ шудон интые ческыт сиёнъёс но сюсьтылъёс ошылӥзы, кыз улэ нылпиослы кузьым кельтылӥзы. Россие немец сям император семья пыр вуиз. Александра Фёдоровна (Николай I кузпалыз) праздник азьын Зимний дворецын нылпиосыз понна кыз пуктытъяз. Император семьялэсь адӟем карыса, дворянство пӧлын вӧлмиз ^[1]. Огшоры калык понна нырысетӥез кыз пуктэмын вал Петербургын 1852-тӥ арын. Революци бере кызэз чеберман сям религиозной Рождестволэн тодметэз шуыса палэнтэмын вал. Выльысь 1935-тӥ арын берытскиз, Кремльын нылпиослы выль ар шулдыръяськон ортчытыку^[2]. Озьы ик кыз котыртӥ кырӟаса киын кутӥськыса берган сям вань^[3].

Кремль Дворецын Выль ар шулдыръяськонъёс дыръя, 1970-тӥ арын 30-тӥ толсуре

Выль ар венок

Выль ар тодмет чотын кыз вайёслэсь пунэм венок XIX даурын вуиз. Гамбургысь богослов Иоганн Хинрих Вихерн куанер семьяосысь кӧня ке нылпиез вордыны дораз басьтэм. Тол вуэмен нылпиос ялан, ку Толсур (Рождество) вуоз ни шуыса ёртылӥллям. Соку 1839-тӥ арын толсуре Вихерн пу питран борды кыз вай думылыса, 20 пичи горд сюсьтыл но 4 бадӟымзэ тӧдьы буёлозэ юнматэм. Ӵукналы быдэ, Толсурозь кылем нуналъёсты лыдъяса, со пичи сюсьтылъёсты ӝуатъям, нош арнянуналъёсы — бадӟымъёссэ^[4].

Выжыкыл геройёс

Тол Бабай

XVIII—XIX дауръёсы крестьян калык пӧлын Тол Бабай нимо персонаж яке кезьыт куазь понна кул кутӥсь мукет кыӵе ке лулосъёс тодмо ӧй вал. Со выллем веранъёс, кылсярысь, "кезьытэз" куно карон сям шундыӝужанпалан пумиськылэ. Тол укыр медаз лекъяськы, валэс юосты медаз кынты шуыса, сое одно ик сюдоно-утялтоно шуыса, оскылӥзы. Мукет нимъёсыз Трескун но Студенец^[5]. XIX даурын Владимир Одоевский "кезьыт лулллэсь" туссэ кӧня ке воштӥз но кузьым кузьмась Мороз Ивановичлы пӧрмытӥз^[6]. Туала Тол Бабайлэн образэз 1937-тӥ арын кылдӥз. Соку Тол Бабай нырысьсэ Союзъёсъёслэн юртазы Выль ар шулдыръяськонэ кузьымъёсын вуиз^[7].

Тол Бабайлэн поездэз

Тол Бабайлэн поездэз — Тол Бабайлэн кӧчылӥсь чебермам юртъерез, «РЖД» ОАО-лэн но Вологда улослэн кивалтэтэзлэн валче проектсы. Россилэн пӧртэм сэрегъёсаз мынон-ветлонэ Тол Бабай нырысьсэ 2021-тӥ арын потӥз, куинь ар ӵоже 170-лэсь трос каръёсы вуылӥз, 78 сюрс иськемез ортчиз но 190 нунал сюрес вылын ортчытӥз. 2023-тӥ арын, куинь толэзь куспын 33 686 искем ортчеменыз, Тол Бабайлэн поездэз Россилэн рекордъёсын книгаяз пыртэмын вал^[8].

Тол Бабайлэн поездэз

Лымыныл

Лымынылэз ӵемысь чагырпыръем тӧдьы дӥськутэн возьмато. Выжыкылъёсын со Тол Бабайлэн внучкаез но юрттӥсез луэ^[2]. Лулъяськем йӧ нылашлэн образэз уйпал выжыкылъёсын но ӵем пумиськылэ. Александр Островский 1873-тӥ арын, Афанасьевлэн выжыкылъёсыз вылэ инъяськыса, «Снегурочка» пьеса гожтӥз. Нош Николай Александрович Римский-Корсаковлэн сыӵе нимын ик опера гожтэмез бере эшшо тодмогес луиз. Лымыныллэн туала тусыз 1935-тӥ арын Совето Союз вакытэ кылдӥз. Соку со нырысьсэ Тол Бабаен ӵош Кремльын нылпиослы ортчись Выль ар шулдыръяськонэ вуиз^[9]^[10].

Лымыпог

Лымыпог ― толлэн но лымылэн тодметпусэз, одно ик Выль ар шулдыръяськонэн герӟаськемын луэ^[11].

Выль ар ӝӧквыл

Выль ар ӝӧквылъя кунлэсь историзэ эскерыны луэ. Трос дауръёс ӵоже выль ар ӝӧк вылэ бакча сиёнъёс, кеньыръёс, чорыгъёс но пӧртэм емышъёс пуктылылӥзы. Куанер но узыр юртъёсын сиёнъёс огкадесьгес вал. XVIII—XIX дауръёсы бай муртъёслэн ӝӧк вылазы ананас, виктория, устрица, трюфель но сыръёс вуизы. Революци бере пӧртэм пирогъёс пыжыны но холодец лэсьтыны дышизы. Быдӟым Атыкай ож бере Выль ар ӝӧк вылэ мандарин, банан, «Наполеон» торт, оливье салат но Советской шампанской вуиз. 1980-тӥ—1990-тӥ аръёсы заливной чорыг пӧраны кутскизы^[2].

Мандарин

СССР вакытэ толсур толэзь пумын фруктъёс басьтыны уг шедьы ни вал, нош бускель кунъёсын ӵапак со вакыт мандаринъёс вуо ини. Мандаринъёсын Выль арез пусъён сямез 1963-тӥ арын Ленинградысь портэ Мароккоысь мандаринэн сухогруз вуэмен герӟало^[12].

Тамара Бессонова. Выль ар, 1955-тӥ ар

Оливье салат

«Оливье» салатэз кылдытэм француз повар Люсьен Оливье. Одӥг веранъя, салат Мускоысь «Эрмитаж» ресторанысь нимысьтыз чеберъям сиён лыдъяське вылэм, нош отчы ветлӥсьёс сое ӝукез сямен сураса сииллям, соку повар пӧранэ кутӥськись продуктъёсты ӧжытак воштоно луэм^[13]. 1939-тӥ арын СССР-ысь «Книга о вкусной и здоровой пище» нимо пӧраськон рецептъёсын нырысетӥ книгаын оливье салат «Салат из дичи» шуыса нимамын вал. Нырысь-валысь пӧраськонеын деликатесъёс кутӥсько вылэм: сяла но кырсяла, кисло-кусло но скал кыл. Берлогес салатэ кутӥськыны кутскизы огшоры кунян яке курег сӥль, колбаса^[14].

Оливье салатлэн оригиналэз

Шампанской но тостъёс

Выль аре шампанскоен бокал ӝутон сям дорамы дворянъёслэсь вуиз. Нокыӵе светской вечеринка шампанскойтэк уг ортчы вылэм. Нош выль ар юонлы шампанской 1812-тӥ арын Атыкай ож аръёсы пӧрмиз. Французъёс, Росси вылэ лыктыкузы, сиён-юонэн валче сюрс ящикъёсын шампанской сьӧразы вайиллям. Наполеонлэн армиез Россиез вормемез понна Мускоын шампанской юыны малпа вылэм. Нош шампанскоен ӟенеликъёсты вормем понна ӟуч солдатъёс усьтоно луизы. 1813-тӥ но 1814-тӥ аръёсы вормемзэс нош ик та юонэн пусйизы, озьы ик берло сяме пыӵаз. Нош бокалъёсын жин карон но тост веран сям Александра II вакытэ вордӥськиз^[15].

Выль ар открытка,1940-тӥ ар

1920-тӥ аръёслэн кутсконаз парти но совето ужчиос выль элита кылдытӥзы. Сиён-юон поттон удысысь наркомлэн Анастас Микоянлэн верамезъя (1936-тӥ ар):

Весело стало жить, значит, и выпить можно, но выпить так, чтобы рассудка не терять и не во вред здоровью

Со арын ик ЦК ВКП(б) но СССР-ысь Совнарком аракы поттонэз азинтонъя Пуктэт кутӥз. Со Пуктэтъя шампанскоез поттон 5 ар куспын 60 поллы унояны кулэ вал. Соку «Абрау-Дюрсоысь» вашкала заводын но мукетъёсаз заводъёсын юонлэсь вуттон дырзэ 25 нуналозь кулэсмытыса, шампанской поттонэз дунтэм амалъя поттон сярысь решени кутэмын вал. Озьы та юон ваньмызлы басьтымон луиз^[16].

Шулдыръяськонъёс

Кино но телевизионной программа

Туала выль ар шулдыръяськонлэн радыз 1960-тӥ аръёсы кылдӥз. Соку гуртын Выль арез пумитанлэн одӥгез валтӥсь тодметэз телевизор луиз. Сое выль ар ӝӧк октэм бере ӝуатъязы но совето программаосты но фильмъёсты учкылӥзы^[17]:

Чародеи;
Карнавальная ночь;
Джентльмены удачи;
Ирония судьбы, или с лёгким паром;
Операция «Ы» и другие приключения Шурика.

Щелкунчик балет

«Щелкунчик» балетлэн премьераез XIX даурлэн пумаз ортчиз. Дыр ортчемъя со выль ар но толсур шулдыръяськонъёслэн эшшо одӥгез тодметэз луиз. Выль ар нуналъёсы Пётр Ильич Чайковскийлэн ужъёсыз быдэс дуннеын чузъясько: концертъёсын, представлениосын, толсур ярмаркаосын^[18].

Фейерверкъёс

1700-тӥ арын Россиын арлэсь кутсконзэ 1-тӥ толшорысен лыдъяны кутскизы, фейерверкъёс ӟуч шулдыръяськонлэн валтӥсь люкетэзлы пӧрмизы. 1699-тӥ арын 20-тӥ толсуре Пётр I «Выль арез пусъён сярысь» косэт гожтӥз, отын ог-огдэ ӟечкылано, юртъердэ кыз но пужым вайёсын чебермано но тыл представлениос ортчытъяно шуыса пусъемын. Пётр I «Выль арез пусъён сярысь» 1736-тӥ номеро Косэтэз:

Когда на большой Красной площади огненные потехи зажгут и стрельба будет, потом по знатным дворам, боярам и окольничим, и думным и ближним, и знатным людям полатного, воинского и купецкого чина, знаменитым людям, каждому на своём дворе из небольших пушечек, буде у кого есть, и из нескольких мушкетов или иного мелкого ружья учинить трижды стрельбу и выпустить несколько ракетов, сколько у кого случится, и по улицам большим, где пространство есть, генваря с 1 по 7 число, по ночам огни зажигать из дров или хворосту, или соломы, а где мелкие дворы, собрався пять или шесть дворов, такой огонь класть, или, кто похочет, на столбиках поставить по одной, по две или по три смоляные и худые бочки, и наполня соломою или хворостом, зажигать, перед бурмистрскою ратушею стрельбе и таким огням и украшению, по их рассмотрению быть же^[19].

Валэктонъёс

Чӧлсконъёс

[1] «Никому в голову не придет, что она не русская»: история елки и Нового года в России

[:0-2] ¹ ² ³ Откуда пошли новогодние символы

[3] Дед Мороз, хоровод у елки, шампанское под бой курантов: Откуда появились современные новогодние традиции, КП (29 толсуре 2023). Эскеремын: 29 шуркынмонэ 2024 арын.

[4] Как мандарины, карамельная трость, венок и носки с подарками стали символами Нового года и Рождества

[5] От злого старика до доброго волшебника. История Деда Мороза в России

[6] Откуда пошли новогодние символы

[7] Тайна Деда Мороза. Как Снегурочка стала сиротой, и кто ее родители

[8] Поезд Деда Мороза отправился в новогоднее путешествие из Великого Устюга. Состав посетит более 60 населенных пунктов менее чем за два месяца

[9] Откуда пошли новогодние символы

[10] Кто такая и откуда взялась Снегурочка: история происхождения внучки Деда Мороза

[11] Символы Нового года: их значение и история.

[12] Как в России появились мандарины и почему они стали атрибутом нового года?

[13] Оливье многоликий

[14] Ёлка, оливье и "Советское шампанское". Откуда пришли главные символы Нового года

[15] Откуда пошла традиция открывать на Новый год шампанское?

[16] Ёлка, оливье и "Советское шампанское". Откуда пришли главные символы Нового года

[17] Обернуться назад: Как в России и Москве праздновали Новый год в 1960-е

[18] «Это балет о мечте»: как «Щелкунчик» стал одним из символов Нового года и Рождества

[19] «Увеселительные», или бенгальские огни: история возникновения главного атрибута Нового года

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]