Воскресенский, Александр Васильевич

Рувикиын таӵе фамилиен мукет муртъёс сярысь гожтосъёс вань. Учке: Воскресенский.

Александр Васильевич Воскресенский
Вордӥськем нуналыз	29-тӥ толшоре 1928(1928-01-29)
Вордӥськем интыез	Кострома губерниысь Чухломской уездысь Пуминово гурт, РСФСР, СССР
Кулон нуналыз	5-тӥ оштолэзе 2014(2014-04-05) (86 арес)
Кулэм интыез	Ижкар, Удмуртия, Россия
Кунмуртлыкез	СССР СССР → Россия Россия
Ужудысэз	инженер
Данъетъёсыз

Алекса́ндр Васи́льевич Воскресе́нский (1928-тӥ арын 29-тӥ толшоре Кострома губерниысь Чухломской уездысь Пуминово гуртын — 2014-тӥ арын 5-тӥ оштолэзе Ижын) — совето инженер, ракета техникалы тӥрлыкез промышленной производствое радъясь-поттӥсь, Ижысь электромеханикая «Купол» заводлэн директорез (1964—1988). Социалистической Ужысь Герой (1971), СССР-ысь Кун премилэн лауреатэз (1978).

Улон сюресэз

1928-тӥ арын 29-тӥ толшоре Кострома губерниысь Чухломской уездысь Пуминово гуртын служащийлэн семьяяз вордӥськиз.

1952-тӥ арын Мускоысь Н. Э. Бауман нимо вылӥ техникая училищеез йылпумъяз, отӥяз Удмурт АССР-е ужаны ыстэмын вал. 1953-тӥ арысен Юкаменскысь машина но трактор станцилэн валтӥсь инженерез, собере Бадӟым Юндыысь машина но трактор станцилэн директорез луиз, отӥяз Балезино ёросысь техникая станцилэн директорез вал. 1955-тӥ арын КПСС-э пыриз.

1958-тӥ арын Иже выжыяськиз, Ижысь мотозаводын ужаны кутскиз, конструктор бюролэн кивалтӥсез, цехлэн кивалтӥсезлэн воштӥсез, валтӥсь инженерлэн воштӥсез, валтӥсь инженер вал.

1964-тӥ арын Ижысь электромеханикая заводлэн (бератаз — «Ижысь электромеханикая «Купол» завод» производственной огазеяськонлэн) директорез луиз.

Со вакытэ завод секыт югдуре шедемын вал, зенитно-ракетной «Круг» комплекслы чаклам радиоуправленияя аппаратура поттонэз радъян ужъёс куашкан калэ вуизы.

Тӥрлык малпасьёслэн огазеяськонысьтызы заводэ вуэм конструкторъёслэн ужкагазъёссы ужаны ярантэм вал: отчы ялан воштонъёс пыртылӥзы, троссэ сӧзнэтъёсты но блокъёсты выльысь лэсьтоно луылӥзы, нош бичам прибор блокъёс валтӥсь эскеронъёс пыр ӧз потылэ. 1964-тӥ арын нырысетӥ кварталлэн ужъя планэз 50 процентлы ичигес быдэстэмын вал. Заводлэсь азьвыл директорзэ куштӥзы, интыяз Воскресенскиез пуктӥзы.

Выль директор предприятиын югдурез тупатыны кутскиз, ас азяз валтӥсь ужпум пуктӥз: производствоысь культураез ӝутон. А. В. Воскресенский оскымон лаборатория кылдытӥз: со приборъёслы чаклам тӥяськем блокъёсты котыр ласянь эскерылӥз но конструкциез, технологиез умоятонъя но производствоез радъянъя ӵектонъёс дасялляз.

Отӥяз предприятиын интыысь интые вошъяны луоно мастерскойёс сериен поттыны ӧдъязы, со «Круг» ракета системаосты чаклан но лэзён станциез, танкъёслы пумит ужась кивалтоно «Дракон» снарядлы радиоуправлениея блокъёсты но мукет тӥрлыкез тупатъяны яралляз.

СССР-лэн Вылӥ Советэзлэн Президиумезлэн 1971-тӥ арын 26-тӥ оштолэзе юнматэм Указэзъя вить аръем планлэсь ужпумъёссэ ӟеч быдэстэмез но выль техника поттонэз радъямез понна Воскресенский Александр Васильевичлы Социалистической Ужысь Герой ним сётэмын, озьы ик Ленин нимо орденэн но «Серп и Молот» зарни медален пусъемын.

Ижысь А. В. Воскресенский нимо бульварысь буре ваён пул

А. В. Воскресенский кивалтон вакытэ завод паськытаз, валтӥсь площадкалы ужан вылысь выль корпусъёс лэсьтӥзы, ӵыжатон завод но «Метеор» завод пуктӥзы. Ачиз предприятие зэмзэ но городысь одӥгез валтӥсез завод луиз.

Электромеханикая заводэз производственной огазеяськонэ выжтӥзы, нош Александр Васильевичез огазеяськонлы валтӥсь директоре юнматӥзы. 1988-тӥ арын пенсие кошкиз. 1996-тӥ арын сое предприятие валтӥсь директорлэн визь-кенеш сётӥсез луыса ужаны ӧтизы.

2014-тӥ арын 5-тӥ оштолэзе Ижкарын улонысь кошкиз.

7-тӥ оштолэзе Ижысь Хохряки шайвылын ватэмын.

2017-тӥ арын Ижысь Радиоэлектроникая но ивортодэт технологиосъя техникумлы Александр Воскресенскийлэсь нимзэ сётӥзы.

Данъетъёсыз но дано нимъёсыз

• «Серп и Молот» медаль;
• Ленин нимо орден;
• Октябрь Революци нимо орден (1977);
• Ужысь Горд Знамялэн орденэз;
• «Знак Почёта» орден;
• СССР-ысь Кун премия (1978);
• Ижкарлэн дано кунмуртэз (2003);
• Удмурт Элькунысь промышленность удысысь дано ужась.

Валэктонъёс

Чӧлсконъёс