А. В. Воскресенский нимо радиоэлектроникая но ивортодэт технологиосъя техникум
| А. В. Воскресенский нимо радиоэлектроникая но ивортодэт технологиосъя техникум | |
|---|---|
 | |
| Ужъюртлэн типез | техникум[d] |
| Кивалтӥсьёсыз | |
| директор | Кривоногова Екатерина Анатольевна |
| Кылдэмез | |
| Кылдон дырыз | 1967 |
| Сайтэз | trit.biz |
А. В. Воскресенский нимо радиоэлектроникая но ивортодэт технологиосъя техникум (ӟуч: Техникум радиоэлектроники и информационных технологий имени А. В. Воскресенского) — Ижкарысь шоро-куспо профессиослы дышетон ужъюрт. Электроника, машина лэсьтон но ивортодэт технологиос удысъёсъя ӧнерчиосты дася.
Историез
1967-тӥ арын Ижысь электромеханикая заводлы (али — «Купол» ИЭМЗ) ужасьёсты дасян вылысь 19 номеро техникая училище усьтэмын вал. 1984-тӥ арын нимзэ воштӥзы, со луиз шоро-куспо профессиослы дышетонъя техникая 19 номеро училище, угось ужъюрт шоро-куспо дышетон программаосъя ужаз[1].
1994-тӥ арын РФ-ысь Дышетонъя министерство 19 номеро СПТУ-лы вылӥ профессиональной училище инлык сётӥз — солэсь азьвыл элькунын одӥг суз но таӵе инлыкен ӧй вал на[2]. Училище 19 номеро «Радиотехникая лицей» нимаськыны кутскиз, нош 2000-тӥ арысен — ГОУ НПО «19 номеро радиотехникая лицей»[1].
2010-тӥ арысен лицей выльдӥськон пыр потӥз: дышетон ужъюртлэсь нимзэ Радиоэлектроникая но ивортодэт технологиосъя техникум (ТРИТ) каризы. Со электроника, машина лэсьтон но ивортодэт технологиос удысъёслы ӧнерчиосты дася[3].
2017-тӥ арын техникумлы Ижысь электромеханикая заводлэн азьвыл директорезлэсь Александр Воскресенскийлэсь нимзэ сётӥзы[3][4].
Арлы быдэ техникумлэсь дипломзэ басьто ог 150 ӧнерчиос: станочникъёс, радиоэлектроникая аппаратураез но тӥрлыкъёсты пуктӥсь-радъясьёс, радиомеханикъёс, цифровой ивортодэтэз радъясь-выльдӥсь усточиос[2]. 2017-тӥ арын ивортонъёсъя, техникум оглом 11 сюрслэсь ятыр ӧнерчиосты дасяз ни[4]. Соос пӧлысь котькуд куинетӥез «Купол» ИЭМЗ-э уже интыяське[3]. Та заводын ик дышетскисьёс практика ортчо, устоосызлы предприятие стипендия тыре[5].
Тӥрлыкез
Радиоэлектроникая но ивортодэт технологиосъя техникумлэн 19 кабинетэз, 3 компьютер залэз, 4 лабораториез но 3 мастерскоез. Огез лабораториез заводлэн пичи моделез выллем лэсьтэмын. Занятиосын студентъёс зэмос станокъёслэн ужаменызы тодматско[5].
Техникумлэн студентъёс понна огъяулонниез ӧвӧл[6].
Дасян ӧръёс
- Цифровой ивортодэтэз радъясь-выльдӥсь усточиос;
- Ивортодэт сӧзнэтъёсты радъясь оператор;
- Радиоэлектроникая аппаратураез но тӥрлыкъёсты пуктӥсь-радъясь;
- Радиомеханик;
- Электро тӥрлыкез тупатъясь но уже кутӥсь электромонтёр (удысъёсъя);
- Программаен кивалтоно станокъёсъя оператор;
- Компьютер сӧзнэтъёс но комплексъёс;
- Радиоэлектроникая техникаез утялтон но тупатон (удысъёсъя);
- Электронной тӥрлыкез но сӧзнэтэз кылдытон[7].
Тужгес даноосыз ӧръёс радиоэлектроника но металлообработка лыдъясько[7].
Техникуме дышетскыны 9-тӥ но 11-тӥ классэз йылпумъямъёсты куто[7]. Пырон азьын абитуриентъёслэсь оглом баллъёссэс учко, экзамен уг ортчыто[6].
Техникумын тодон-валанэз муромытонъя но квалификациез будэтонъя курсъёс радъямын[5].
Валэктонъёс
- ↑ 1 2 Государственное образовательное учреждение начального профессионального образования «Радиотехнический лицей № 19» [ӟуч] Фондовый каталог УР. Эскеремын 21-10-2025 арын
- ↑ 1 2 Знаменательные и памятные даты [ӟуч] dates.unatlib.ru. Эскеремын 21-10-2025 арын
- ↑ 1 2 3 Кузница востребованных кадров: от рабочих до операторов БПЛА [ӟуч] Деловой квадрат (09-11-2022). Эскеремын 21-10-2025 арын
- ↑ 1 2 Юлия Стерхова (07-04-2017) Ижевскому техникуму присвоили имя бывшего директора завода «Купол» Александра Воскресенского [ӟуч] izhlife.ru. Эскеремын 21-10-2025 арын
- ↑ 1 2 3 Наталья Сорокина В Удмуртии празднует юбилей одно из старейших учебных заведений [ӟуч] izh.kp.ru. Эскеремын 21-10-2025 арын
- ↑ 1 2 Альбина Шайхутдинова (03-10-2025) Самый быстрый карьерный путь: системе среднего профобразования исполнилось 85 лет [ӟуч] Удмуртская правда. Эскеремын 21-10-2025 арын
- ↑ 1 2 3 Техникум радиоэлектроники и информационных технологий имени Александра Васильевича Воскресенского [ӟуч] izhevsk.postupi.online. Эскеремын 21-10-2025 арын
Литература
- АПОУ УР «Техникум радиоэлектроники и информационных технологий» (рус.) // Профессиональное образование в Удмуртской Республике. — 2015. — № 3. — С. 22. — ISSN 2220-9514.
Чӧлсконъёс
 |
|---|
