Хохряки

Гурт
Хохряки
56°54′50″ с. ш. 53°19′20″ в. д.
Кун	Россия
Историез но географиез
Часовой поясэз	UTC+4:00
Улӥсез
Улӥсез	▲6283 мурт (2020)
Цифровой идентификаторъёс
Телефон кодэз	3412
Почта индекс	427011
mo-hohryaki.ru
Хохряки

Хохряки́ (ӟуч: Хохряки) — Удмурт Элькунысь Дэри ёросысь гурт, Хохряки гурт поселенилэн кивалтон центрез. Удмуртиысь тужгес бадӟымез гурт. Нырысь-валысь Спасской починка шуыса нимаськиз.

Интыяськемын Ижкарлэсь 11 иськемын уйпалэн шундыӝужан вискын, Воткинской шоссе бордын.

Историез

Ватка губернилэн 1892-тӥ арын печатлам статистикая материалъёсысьтыз басьтэм подворной описьын, Спасской починка 1884-тӥ арын кылдытэмын, шуыса пусъемын. Отчы улыны интыяськемъёс — со Шаркан волостьысь Вуж Шегьян гуртысь, Сосновка волостьысь Пантюхино починкаысь но Иж заводысь лыктэм ӟуч православной крестьянъёс. Нырысь-валысь улӥсез 12 мурт гинэ вылэм, ваньмыз-ӧвӧлыз кык юртъер.

Вотской автономной областьысь улон интыосын лыдметын кунысь вань улон интыослэн официальной но вашкала нимъёссы гожтэмын, соя Спасской но Хохряки — со одӥг улон интылэн нимыз шуыса валаны луэ. 1898-тӥ арын Хохряки починкаысь крестьянъёс, соосты Ижкарысь Александро-Невской Соборлэн приходаз мед юнматозы шуыса Ваткаысь Духовной Консистенцие куронэн вазиськизы. Вазиськемъёс пӧлысь одӥгезлэн нимтулыз — Михаил Хохряков. Вань малпан, Хохряки гуртлэн нимыз та крестьянлэн фамилиез бордысь кылдэмын шуыса. Школа библиотекаын ужасьлэн Надежда Рыловалэн верамезъя (пересь ӵыжы-выжыосызлэн мадемзы вылэ пыкиськыса), азьвыл аръёсы матысь гуртъёсысь поставкае ю-нянь Спасской починка пыр нуллӥзы, сӥзьыл кынмем му вылтӥ уробоен туж зуркыт вал, соин калык: «Нош ик хохряк вылтӥ мыноно луоз шуыса!» ӟурылӥз. В. И Дальлэн кыллюкамаз «Хохряк» кыл лёг, вырйыл шуыса валэктэмын.

Ку Спасской починкалэн нимыз Хохряки нимын воштэмын шуыса нокытын зэмос дырыз пусъемын ӧвӧл. 20-тӥ аръёслэн кутсконаз гуртлэн нимыз нош ик Спасской починка шуыса гожтэмын. 1924-тӥ арын волостной экспертизалэн лыдметъёсызъя отын 54 юртъер пусъемын, улӥсез — 275 мурт, ваньмыз ӟучъёс. Со документын ик мукетыз нимыз — «Хохряки починка» шуыса верамын. Быдэсак Спасской починка Хохряки гурт нимын 1924—1929-тӥ аръёсы воштэмын.

Совето вакытэ гуртэз вошъяськыса Ягул (1924-тӥ ар), Смирново (1925-тӥ арын), Якшур (1932-тӥ арын), выльысь Ягул (1975-тӥ арын) но Хохряки (1988-тӥ арын) сельсоветъёслэн пушпӧлазы пыртылӥзы, но озьы ик Завьял волосте (1924-тӥ арын), Ижижкар ёросэ (1929-тӥ арын) но Дэри ёросэ пырылӥз (1937-тӥ арын 1-тӥ инвожоысен). 40—50-тӥ аръёсы гуртын 24 хозяйство вал.

60-тӥ аръёс пумын гуртын леспромхоз кылдытэмын, солы луыса, соку ик куать выль ульча кылдӥз, тямыс аръем школа, нылпи сад усьтӥськиз. Тепличной комбинат кылдытэм бере, улӥсьёслэн лыдзы шуак йылӥз, соку куать трос этажъем корка пуктэмын вал.

1988-тӥ арын Хохряки сельсовет кылдытэмын, кивалтон центрез Хохряки гуртын. 1994-тӥ арын со интые Хохряки гурт администрация кылдытэмын, 2005-тӥ арын — Хохряки муниципал кылдытэт (гурт поселение).

2006-тӥ арын Трактовой урамын, Хохряки шайвыл котырын Вӧсьлыко Василий Великийлы, Каппадокийской Кесариысь Архиепископлы сӥзем черк усьтэмын. Черк улсын Воскресной школа ужа. Ортчытъясько тюремной служениос.

Улӥсез

Улӥсь калыклэн лыдыз

2002	2010	2012	2020
3584	↘3420	↗5076	↗6283

1000

2000

3000

4000

5000

6000

7000

2002

2010

2012

2020

2025-тӥ арын 1-тӥ коньывуонэ басьтэм тодэтъёсъя, Хохряки гуртын улӥсез 5 809 мурт, соос пӧлын 6 аресозь нылпиос — 579 мурт, 7-ысен 17 аресозь — 687 мурт, 18-ысен 29 аресозь — 696 мурт, 30-ысен 60 аресозь — 2 499 мурт, 60 ареслэсь мӧйыезгес — 1 266 мурт, 80 ареслэсь мӧйгес — 81 мурт.

Экономикаез

Гуртын улӥсьёслэн ог люкетэз Ижкарлэн экономикаяз пыре. Гуртлэн интывылаз таӵе ужъюртъёс ужало:

• «Хохряки леспромхоз» ОАО;
• «„Завьяловский“ Тепличной комбинат» ОАО;
• ОАО «Ижтеплоэнергосервис».

Гуртын"Россиысь УФСИН-лэн Удмурт Элькунъя чурыт режимен 8-тӥ номеро исправительной колониез" Казённой федерал ужъюрт (ФКУ) интыяськемын.

Гуртын мерлыко удысъя таӵе объектъёс ужало:

• «Чипполино» нылпи сад;
• Врачебной амбулатория;
• «„Хохряковский“ Культурной комплекс» МУЧ (библиотекалэн инъет вылаз усьтэмын);
• «Звезда» спорт клуб;
• «Хохряки шор ёзо школа» МОУ. 2025-тӥ ар пумын 1025 муртлы чаклам выль школа усьтыны чакламын, со «Молодёжь и дети» программа улсын лэсьтӥське.

Транспорт

Гурт пыр автобус ветло, соослэн маршрутсы Ижкарысь 9-тӥ январь нимо ульчаысен кутске (Буммаш Ижкар ёрос).

Валэктонъёс

Чӧлсконъёс

• Администрация муниципального образования «Хохряковское»
• Хохряки — Территория чистоты и красоты