Буммаш завод
| «Буммаш» завод | |
|---|---|
 | |
 | |
| Типез | сюбегатэм кылкутонэн общество |
| Кылдэм арез | 1959 |
| Интыяськемез |
Ижкар, Удмурт Элькун, Россия, почта адресэз: 426050, Удмурт Элькун, Ижкар, Вотка шоссе, 170-тӥ юрт |
| Удысэз | машиностроение |
| Поттэм вузэз (бизнес) | бумага поттонын кутӥськись тӥрлык |
| Данъетъёсыз |
  [1] |
| Сайт | bummash.ru |
«Бумага лэсьтонын кутӥськись машина поттон» ООО («Буммаш» ООО, азьвыл «Ижтяжбуммаш») — кагаз лэсьтонъя секыт машинаосты но целлюлоза, кагаз, картон поттыны тӥрлык лэсьтонъя предприятие. Ижкарын интыяськемын.
Историез
1959-тӥ арын 28-тӥ толсуре СССР-ысь Министръёслэн Кенешсы Ижкарын кагаз лэсьтонъя паськыт форматэн ӝог ужась машинаосты поттон завод пуктон сярысь решение кутӥз. 1960-тӥ арын южтолэзе пуктӥськон уж мытэмын вал.
1963-тӥ арын заводлы «Ижысь бумага лэсьтонъя секыт машинаосты поттон завод» ним сётӥзы, предприятиын бичам нырысетиез тӥрлык — со фольга но бумага вылэ клей кисьтыны чаклам машина вал.
1966-тӥ арын 19-тӥ куартолэзе Акубов Глеб Самсонович «Ижтяжбуммаш» заводлы директоре юнматэмын. Завод соку гинэ ӝутӥське вал ай, но нырысетӥ вуззэ вӧлмытэ ни вал. Арлэн нырысетӥ палараз бумага поттонын кутӥськись куасьтон ёзъёсыз ӵыжатэмын, кулэ адресъёсъя куронъёссыя вуттэмын. Со сяна, цехъёсын станокъёслы аспӧртэм тӥрлык лэсьтэмын[2].
1967-тӥ арын Пермьысь целлюлоза но бумага лэсьтон комбинатэ вуттэмын-юнматэмын «Ижтяжбуммашын» бичам но эксплуатацие лэзем нырысетӥез бумага лэсьтон Б-21 машина.
1975-тӥ арын паськыт форматэн но ӝог ужась Б-15 машина — газет поттонын кутӥськись нырысетӥез кунын бичам машина, со 6 720 мм пасьталаем кагаз полотноез поттыны чакламын вал. Туж секыт механизмен (пресс люкетаз гинэ 20 сюрс деталез) но маке быдӟа машинаез (кузьдалаез — 115 м, пасьталаез — 8 м ятыр, ӝуждалаез — ог 13 м; секталаез — 3,5 сюрс т) интыян понна нимысьтыз корпус ӝутэмез кулэ кариз.
1977-тӥ арын куартолэзе бичамын картон поттон КП-10 машина, уй-нунал куспын со 850 тонна картон поттыны быгатылӥз.
1980-тӥ арын авторъёслэн коллективзы наука но техника удысын вормонъёс басьтэмез понна СССР-ысь Кун премиен пусъемын.
1981-тӥ арын 12-тӥ южтолэзе бадӟым вормонъёсыз понна но кагаз но картон ӝог лэсьтӥсь машинаосты поттэмез понна заводлэн коллективез СССР-ысь Вылӥ Кенешлэн Президиумезлэн указэныз Ужысь Горд Знамя нимо орденэн пусъемын.
1993-тӥ арын 3-тӥ южтолэзе «Буммаш» НПО усьтэм акционер огазеяськонлы пӧрмытэмын — «Буммаш» АО.
2011-тӥ арын оштолэзе заводлэн кивалтӥсез воштӥськиз шуыса, тодмо луиз. Выль директоре Александр Капустинэз юнматӥзы[3].
2011-тӥ арын 28-тӥ толсуре «Буммаш» заводлэн производствоя площадьёсаз «Ижысь металлургияя но машиностроениея завод» ЗАО кылдытэмын вал.
2018-тӥ арын 9-тӥ коньывуонэ «БУММАШ» завод ООО регистрация пыр потӥз.
2020-тӥ арын «Буммаш» заводын 1,8 млрд манет тыр тӥрлык поттэмын вал, ӵошатон вылысь: 2018-тӥ арын 75,2 млн манет тыр вуз лэсьтӥз[4].
2022-тӥ арын «БУММАШ» завод «Сибирьысь Промышленной Группа» АО-е пыриз.
Валэктонъёс
- ↑ История предприятия
- ↑ Он считал эти годы лучшими Известия Удмуртской Республики. Эскеремын 2020-08-21 арын
- ↑ Удмуртский "Буммаш" сменил гендиректора
- ↑ В 22 раза увеличился объем производства завода «Буммаш» за 3 года
Чӧлсконъёс
- Буммаш — предприятилэн сайтэз