Короленко, Владимир Галактионович

Владимир Галактионович Короленко
Владимир Галактионович Короленко
Вордӥськем дырыз	15-тӥ (27‑тӥ) пӧсьтолэзе 1853 (173 арес)
Вордӥськем интыез	Житомир, Росси империя[d];
Кулон дырыз	25-тӥ толсуре 1921[…] (68 лет)
Кулэмын	Полтава, Украин ССР;
Кунмуртлыкез	Росси империя→; УССР
Ужудысэз	прозаик, журналист, редактор, публицист
Гожъяськон кылыз	ӟуч
Кинюртэмез
	Медиафайлъёс РувикиМедиа пушкын

Влади́мир Галактио́нович Короле́нко (15‑тӥ (27-тӥ) пӧсьтолэзе 1853^[3], Житомир^[3] — 25-тӥ толсуре 1921^[1]^[2]^[…], Полтава) — ӟуч гожъяськись, публицист, журналист, редактор, мерлыко ужась. Тодмо публицист, эксэйлыко но совето вакытъёсы, озьы ик Граждан ож аръёсы аслаз катрадлыкез утён уженыз дано луиз. Революци движениен герӟаськеменыз трос пол пытсэт улэ но ссылкаосы шедьылӥз. Тросэз литературной произведениосыз Житомирын ортчытэм пичи дырысь тодэ ваёнъёсызлы но Сибирь ссылкаын улэмезлысӥземын.

Наукаосъя Императорской Академилэн изящной словесностья дано академикез (1900—1902-тӥ аръёсы, 1918-тӥ арысен).

Улон сюресэз

Корленко вордӥськиз Житомирын, уездысь судьялэн семьяяз. Атаез казак выжыысь вылэм. Галактион Афанасьевич висъяськиз чурыт сямыныз, пиезлэн улон шоры учконаз со бадӟым инты басьтӥз. Бӧрысьгес атаезлэсь образзэ В. Г. Короленко «В дурном обществе» повестяз возьматӥз.

Володя Короленко дышетскиз Житомирысь гимназиын, атаез улонысь кошкем бӧрсьы, дышетсконзэ азьланьтӥз Ровенской гимназиын. 1871-тӥ арын дышетскыны пыриз Санкт-Петербургысь технологияя институтэ. Но ёрмыса улэменыз, 1874-тӥ арын Москваысь музъем ужъёсъя Петровской академие выжоно луиз. Пинал дырысеныз ик Короленко калык движение борды итӥськиз. Студентъёслэн лушкем огазеяськонъёсазы пыриськемез понна 1876-тӥ арын академиысь уллязы но Кронштадт каре келязы. Отын со, полиция чаклам улсын, типографиын корректор луыса тыршиз, пиналъёслы урокъёс сётъялляз. Срокез йылпумъяськем бере, Короленко Петербурге берытскиз. 1877-тӥ арын Питерысь Горной институтэ дышетскыны пыриз. Ӵапак та вакытэ литературае кыстӥськыны кутскиз. 1879-тӥ арын Питерын потӥсь «Слово» журналын вуоно гожъясьчилэн нырысетӥ ужез — «Из жизни искателя» новеллаез печатласькиз. Со арын ик революция тулкыме пыриськемез понна нош ик институтысь уллязы но Ватка губерниысь Глазкаре келязы^[4].

1881-тӥ арын В. Короленкоез Сибире, Якутия котыре келязы. Куать ар ссылкаын улэмез гожъяськисьлэсь улон шоры учконзэ юнматӥз, вуоно произведениосызлы инъет кылдытӥз.

1885-тӥ арын В. Короленко Нижний Новгородэ улыны интыяськиз. 1885—1895-тӥ аръёсы — Короленколэн тужгес яркыт вакытэз, соку со трос произведениоссэ кылдытӥз. 1895—1896-тӥ аръёсы Короленко «Мултан ужын» юнме янгыше уськытэм удмуртъёсты утьыны быгатӥз^[5]..

1886-тӥ арын потэ солэн нырысетӥ книгаез — «Очерки и рассказы». Со аре ик гожтэ «Слепой музыкант» новеллазэ. Соос пыр автор тодаз вае Украинаын ортчытэм пичи дырзэ, озьы ик ссылкаосын ортчытэм аръёссэ. Шудэз шӧдыны луэ астэ ачид яратон мылкыддэ вормыса гинэ, шуэ гожъяськись. 90-тӥ аръёсы В. Короленко дуннеез котыръя. Вуылэ Россилэн пӧртэм сэрегъёсаз, Америкае. 1895-тӥ арын потэ «Без языка» повестез. Ужъёссэ берыкто пӧртэм кылъёсы, соос пото кунгож сьӧрын. 1895-тӥ −1900-тӥ аръёсы писатель Питерын улэ, «Русское богатство» журналлэн редакторез луэ. Бӧрысь Украинае — Полтавае улыны выже. Мӧйымыса В. Короленко «История моего современника» романзэ гожтон борды басьтӥське. 4-тӥ томзэ йылпумъятэк, тыэз висемен, улонысь кошке. В. Г. Короленко Петербургысь наукаосъя академилэн ёзчиез вал, но 1902-тӥ арын солэн радысьтыз потӥз, Максим Горькийлы дур басьтыса, угось М. Горькиез академиысь улляны туртто вал. В. Г. Короленко сярысь эшъёсыз тазьы шуылӥзы: Со — Россилэн сюлмыз (совесть).

Кузпалыз — Евдокия Семёновна Ивановская, будэтӥзы Наталья но Софья нылъёссэс.

Куд-ог ужъёсыз:

Чудная — 1880-тӥ арын
Яшка — 1880-тӥ арын
Убивец — 1882-тӥ арын
Сон Макара — 1883-тӥ арын
Лес шумит. Полесская легенда — 1886-тӥ арын.

Буре ваён

1961-тӥ арысен Удмуртиысь драмая ӟуч кун театрлы В. Г. Короленколэн нимыз сётэмын. Солы сӥзьыса, но Удмуртилэсь историзэ улӟытыса, сцена вылын пуктэмын «Русский друг» спектакль. Отын возьматэмын дас укмысэтӥ даурлэн 80-тӥ аръёсаз ортчем «Мултан уж». Со кема кыстӥськись югдурын Владимир Короленко адями курбон сётонын юнме янгыше уськытэм удмуртъёс пала дурбасьтыса, соосты шонере поттыны быгатӥз^[6].

Кизнер ёросысь Вуж Мултан гуртысь музей Мултан ужлы но Владимир Короленколы сӥземын, музей Кизнерысь шаертодонъя музейлэн ёзэз луэ.

Валэктонъёс

↑ ¹ ² Wladimir Galaktionowitsch Korolenko // Brockhaus Enzyklopädie (нем.) / Hrsg.: Bibliographisches Institut & F. A. Brockhaus, Wissen Media Verlag
↑ ¹ ² Владимир Короленко // Internet Speculative Fiction Database (англ.) — 1995.
↑ ¹ ² ³ Венгеров С. А. Короленко, Владимир Галактионович (ӟуч) // Энциклопедический словарь — СПб.: Брокгауз — Ефрон, 1895. — Т. XVI. — С. 314—316.
↑ Наталия Закирова (Глазов, Удмуртия) ««Глазовский цикл» В.Г. Короленко: парадоксы и закономерности». [ӟуч] http://uglitskih.ru/. Эскеремын 1.10.2025 арын
↑ Мултанское дело. К 125-летию окончания процесса. [ӟуч] Национальный музей УР. Эскеремын 1.10.2025 арын
↑ Государственный русский драматический театр Удмуртии [ӟуч] Imlight (25 января 2012). Эскеремын 14.07.2025 арын

[_22cb5da51a36932c-1] ¹ ² Wladimir Galaktionowitsch Korolenko // Brockhaus Enzyklopädie (нем.) / Hrsg.: Bibliographisches Institut & F. A. Brockhaus, Wissen Media Verlag

[_4377aa35f290b281-2] ¹ ² Владимир Короленко // Internet Speculative Fiction Database (англ.) — 1995.

[_11303bda8f6b83c4-3] ¹ ² ³ Венгеров С. А. Короленко, Владимир Галактионович (ӟуч) // Энциклопедический словарь — СПб.: Брокгауз — Ефрон, 1895. — Т. XVI. — С. 314—316.

[4] Наталия Закирова (Глазов, Удмуртия) ««Глазовский цикл» В.Г. Короленко: парадоксы и закономерности». [ӟуч] http://uglitskih.ru/. Эскеремын 1.10.2025 арын

[5] Мултанское дело. К 125-летию окончания процесса. [ӟуч] Национальный музей УР. Эскеремын 1.10.2025 арын

[6] Государственный русский драматический театр Удмуртии [ӟуч] Imlight (25 января 2012). Эскеремын 14.07.2025 арын

[3]

[1]

[2]

[4]

[5]

[6]