Толстая, Вера Васильевна

Рувикиын таӵе фамилиен мукет муртъёс сярысь гожтосъёс вань. Учке: Толстой.

Вера Васильевна Толстая
Вордӥськем нуналыз	1-тӥ гудырикошконэ 1879({{padleft:1879|4|0}}-{{padleft:8|2|0}}-{{padleft:1|2|0}})
Вордӥськем интыез	Курмыш уезд[d], Симбирск губерния[d], Росси империя[d]
Кулон нуналыз	20-тӥ коньывуонэ 1968({{padleft:1968|4|0}}-{{padleft:10|2|0}}-{{padleft:20|2|0}}) (89 лет)
Кулэм интыез	Муско, СССР
Кун	Росси империя[d]  СССР
Ужудысэз	берыктӥсь
Данъетъёсыз

Вера Васильевна Толстая (1-тӥ гудырикошконэ 1879, Курмыш уезд^[d], Симбирск губерния^[d] — 20-тӥ коньывуонэ 1968, Муско) — Ватка губерниысь Алабго уездысь кылысь кылэ берыктӥсь но калык дышетӥсь. 25 ар ӵоже 1901-тӥ арысен 1925-тӥ арозь — Бадӟым Сибы гурт школаысь визьнодась. Удмурт АССР-ысь дано дышетӥсь.

Улон сюресэз

Вордӥськиз 1879-тӥ арын Симбирск губерниысь Курмыш уездысь Деяново черкогуртысь помещик-дворянинлэн, земской управаысь служащийлэн но дворян опекаысь тӧролэн В. С. Толстойлэн семьяяз.

1898-тӥ арын Симбирскысь нылкышно гимназиысь педагогикая курсъёсты йылпумъяз.

1899-тӥ арын Ватка губерниысь Алабго уездысь Биляр черкогуртысь школаын дышетыны ӧдъяз. Школа ӟуч вал, занятиосты кык дышетӥсьёс нуизы, ужазы шуг-секытъёсын ӧз пумиськылэ.

Бадӟым Сибы

Калык училищеосъя инспекторлэсь тодӥз, Можгалэсь куинь версталы кыдёке интыяськем Бадӟым Сибы гуртысь соку гинэ усьтӥськем школаез пытсаны медо шуыса.

Бадӟым Сибыын 70—80 юртъер вал, со трос калыкъем лыдъяськылӥз, 1900-тӥ арозь гуртын школа ӧз ужалля, нош грамотноез 5 адямилэсь трос ӧй вал.

1901-тӥ арын В. Толстая Бадӟым Сибые вуиз. Школалы чаклам юрт занятиос ортчытъяны ӧз тупалля, таин валче со Иван Малков кучер ӵектэмъя мукет юрт шедьтӥз — артысь Пичи Сибы гуртысь Головенкинлэсь корказэ. Интыысь кивалтӥсьёс, калык пӧлын революция ӝутон мылкыдъёс бугырскемен но «толстовщина» вӧлмемен, Толстаялэн выросъёсыз шоры кырыж учкыны ӧдъязы, осконэн герӟаськем кивалтӥсьёслэн куремзыя, дышетӥсез лушкем чакланы ӧдъязы.

Дышетскисьёс 15 кузя пиос вал, соос пӧлысь огез артысь гуртысь ӟуч вал, мукетъёсыз — удмуртъёс, таос радысь куинез гинэ кӧня ке кыл ӟуч сямен валаллязы. Занятиосы нылъёс воксё ӧз ветлэ — «Гуртын кин ке зол йыразы пыӵатэм, кышномурт визь — дышетскон понна ӧвӧл шуыса», но Толстая куд-ог анай-атайёсты ас палаз берыктыны быгатӥз, соос дыдыоссэс школае мед сётозы шуыса.

«Пиналъёс кышкатскемын, мӧзмытэсь. Школа йӧспӧртэм но курдыт. Улӥяз — пудо, вылӥяз — ньыль квадрат метръем комната. Со дышетӥсьлэн классэз но, квартираез но. Выльысь кутсконо вал. Куинь дышетӥсьёс пегӟизы. Ӧз чидалэ».

— В. В. Толстая

Ӝыны ар кошкиз дышетӥсьлы но дышетскисьёслы ог-огзэс валан понна кылэз дышетыны. Ӟуч кылэз тодӥсь но ӧжытак грамотной азьвыл солдатъёс дышетӥсьлы словарь кылдытыны юрттӥзы, кӧня ке тужгес кулэ веранъёсты берыктӥзы. Удмурт кылэ берыктӥз Тихомировлэсь Букварьзэ но «Лыдӟон книгаез» (ӟуч: Книга для чтения). Ар ӵоже дышетскисьёс букварез дышетӥзы но 1902-тӥ арын ини ньыль адями нырысьсэ школаез йылпумъяз.

1903-тӥ арын Бадӟым Сибыын школалы выль юрт пуктэмын вал (али татын В. В. Толстаялы сӥзем музей-юрт ужа), нырысетӥ тямыс арзэ вань 4 классъёсты огназ дышетӥз.

Дыр ортчемъя, нылпиос визьнодасьсэс «дышетӥсь» гинэ ӧз нималлялэ — «анай» шуыса но вазиськылӥзы. Гуртын улӥсьёс пӧлын дышетӥсь сямен гинэ гажамон ӧз луы. Медицинаысь валтӥсь куронъёсты тодэменыз, ачиз но юрттэт сётыны быгатылӥз, удмурт кылэз валаменыз, гуртэ вуылӥсь земской врачлы кылысь кылэ берыктыны быгатылӥз. Но трос шуг-адӟонъёс пыр но потӥз. Озьы 1908-тӥ арын тулыс кин ке уйин школаысь но дышетӥсьлэн квартираысьтыз укно пиялаосты пыльылэм. Толстая гуртысь кошкиз, интыяз земство мукет визьнодасез ыстӥз. Бадӟым Сибыын улӥсьёс Толстаяез берытскыны куризы, земской управае прошение гожтӥзы, визьнодась сьӧры 12 подводъёсын вуыса. Граждан ож вакытэ дышетӥсьёслы уждун тырымтэ дыръя гуртоос визьнодасьлы сиён-юонэн юрттэт сётонэз быдэсак ас вылазы басьтӥзы.

Удмурт гуртысь сям-йылолъёсын рос-прос тодматскиз, калыклэсь психологизэ валаз. Гожъямъёсыз этнографияя дуно материал луо. 1915-тӥ арын волостьысь дышетӥсьёслэн кенешазы со пусйиз: вотской школаосысь дышетӥсьёслэн пегӟон мугзы бытовой но материальной ужпумъёс луо — удмурт кылэз яке интыысь йылолъёсты тодымтэзы ӧвӧл, со йылолъёс «маин ке но кӧшкемыт, курдыт пото, нош зэмзэ ке, асьсэос улӥсьёс но соослы азьвыл сямен бадӟым религиозной пуштрос уг сёто ни, школалэн улонын бадӟым инты басьтэменыз шӧдӥське, сямъёслы тунсыксы кулэсме шуыса».

1921-тӥ арын Можга уездысь дышетӥсьёслэн нимынызы вераськиз Глазовын ортчем югдытӥсьёслэн ӧтчамазы, докладэз сӥземын вал кылэз дышетонлы, ужен визьноданлы но калык дышетӥсьлэн интыезлы. Ужъя школалэн программаяз шаертодонъя курсъёсты пыртонъя нимо-дано дышетӥсьлы но методистлы И. С. Михеевлы дурбасьтӥз.

1925-тӥ арозь Бадӟым Сибы гуртысь школаын дышетӥз, та ужезлы 25 арзэ сӥзьыса. Сое Н. Н. Медведева воштӥз.

Азьланез улонэз

1925-тӥ арысен Чумойтло гуртысь школаын но Можга ёросысь мушкасьёсты дасянъя курсъёсын дышетӥз.

1930-тӥ аръёсы Можга карын пӧртэм интыосын тыршиз: калыкез дышетонъя ёрос ёзэтысь инспектор, Можга педучилищеысь библиотекарь, Можгаысь историяя но шаертодонъя музейысь ӧнерчи вал.

1944-тӥ арын пенсие потӥз но, секыт висьыны кутскем сузэрез куремъя, Муское выжиз. 1-тӥ Брест ульчаысь 15 номеро юртын улӥз.

1968-тӥ арын Мускоын улонысь кошкиз, ватэмын Можга карысь шайвылын, ачиз куриз угось: «Можгае ватӥськеме потэ. Отын мынам кыкетӥ доре. Отын мынам землякъёсы».

«Литератураез яратын монэ дышетӥз Вера Васильевна Толстая. Урокъёс бере со милемлы, Бадӟым Сибы школаысь дышетскисьёслы, ӵемысь лыдӟылӥз Пушкинлэсь, Гогольлэсь, Толстойлэсь произведениоссэс».

— В. В. Толстаялэн Бадӟым Сибы черкогуртын вордӥськем дышетскисез, удмурт гожъяськись Игнатий Гаврилов

«Со удмурт кыллэн азьланез понна сюлмаськылӥз… Вера Васильевна йыркуръяськылӥз, «газетъёс удмурт кылэз быдто» шуыса. Солы кӧня ке юанъёс сётӥ. Вань верамысьтыз валай: журналистъёс, удмурт кыллэсь конструкцизэ тӥяса, ӟуч кылысь удмуртэ дословно берыкто, озьы текст сумбрес пӧрме — удмурт но, ӟуч но ӧвӧл».

— Удмурт АССР-ысь калык суредась Семён Виноградов

Данъетъёсыз но буре ваён

• «УАССР-ысь дано дышетӥсь» дано нимын пусъемын (1945);
• «Знак Почёта» орденэн сӥлы каремын (1946);
• Нимыз УАССР-ысь уж данлыкъя но героизмъя данъян книга пыртэмын (1966).

1979-тӥ арын кар шайвылысь гу вылысьтыз мемориал плита улосэн утёно синпелетэн ялэмын.

Солэн нимыз сётэмын Можгаысь огез ульчалы. 2015-тӥ арын Можга педучилищелэн юртэз борды солы сӥзем мемориал пул шуккемын.

Бадӟым Сибы гуртын ужа В. В. Толстаялэн музей-юртэз, кытын 1973-тӥ арозь гурт школа вал.

Сибы пыр ортчись ошмеслы солэн нимыз сётэмын. Гуртын лыдъяло, ӵапак Вера Толстая 1901-тӥ арын шараяз сое но дышетскисьёсын утялтылӥз.

Валэктонъёс

Литература

• Фролова Г. Д. Просветители удмуртского народа: очерки развития педагогической мысли / М-во нар. образования Удмурт. Респ.. — Ижевск: Удмуртия, 1996. — С. 133—142. — 222 с. — 2000 экз. — ISBN 5-7659-0692-3.
• Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 653. — 768 с. — 2200 экз. — ISBN 978-5-7659-0486-2.
• Альфред Артамонов. Школа Веры Васильевны [ӟуч] // Удмуртская правда. — 2011. — 6 сентября (№ 107). — С. 2.
• Ирина Трифонова, Ольга Ветошкина. Дышетӥсь — значит учительница. Вера Толстая (1879—1968) [ӟуч] // Православные Вести. Ижица. — 2001. — Июнь.
• Топ-8 учителей Удмуртии, внёсших большой вклад в национальное образование [ӟуч] // Комсомольская правда. — 2014. — 3 октября.

Чӧлсконъёс

• Толстая Вера Васильевна, заслуженный учитель школы УАССР [ӟуч]

• Знаменитые люди края. Толстая Вера Васильевна [ӟуч]

• Знаменательные и памятные даты Удмуртии [ӟуч]