Ватка барокко
| Ватка барокко | |
|---|---|
 | |
| Кун |
 Россия |
| Кылдон дырыз | 1690-тӥ аръёс |
| Куашкан дырыз | XVIII—XIX дауръёсы выжон |
Ватка барокко (ӟуч: Вятское барокко) — XVIII даурысь Ватка музъем вылысь черк архитектуралэн огъя тодметэз, ватка архитектурая школалэн оглюкетэз. Со ӟуч пужыен (пужыятэмен; ӟуч: узорочье), муско барокколэн компоцизициосъя формаеныз[1] но артысь устюг, куддыръя кузон музъем вылысь архитектураосын сураськиз. Озьы ик азинскемез вылын пытьызэ кельтӥз петровской барокко. 1690-тӥ аръёсы кылдӥз, Ваткаын каменщикъёслэн асьсэлэн нырысетӥ никон артельзы усьтӥськемен.
1690-тӥ—1720-тӥ аръёсысь вазь пуктӥськемъёс ӵемысь муско но устюг бароккоослэн люкетъёсынызы полэстӥськем ӟуч пыжыятэм стильлы укшало. XVIII даурысь 40-тӥ но 60-тӥ аръёсысен кутскыса, петровской барокко улонэ пыӵамен, ватка барокко трослы капчия, чурытгес луэ. Фасадъёсысь ышо «шудон выллем» калык орнаментъёс. 60-тӥ арысен чеберъянын выль ӧр кутске, стиль выльысь ӟуч пужы пала берыктӥськыны выре.
Пӧртэм формаосын XVIII даур пумозь утиськиз, сое классицизм палэнтытозь. Та пумен ортчиз, куд-ог вакытэ барокко стиль классикаен полэстӥськылӥз.
Архитектурая стильлэн инъетэз
Кылдэмез
Нимысьтыз ватка стиль кылдыны ӧдъяз 1690-тӥ аръёсы, Хлыновын (Ваткаын) асьсэлэн каменщикъёссы ужаны кутскемен.
Трапезной выллем черкъёс ӝутӥзы. Соослэн инъетсы луиз вить (шергес одӥг) йырен ӝутэм юбоостэк лэсьтэм четверик, кудӥз борды кык юбоен паськыт трапезной пуктылӥзы. Отын службаосты ӵемысь толалтэ ортчытъязы, таин валче сое шуныт черк нималлязы. Шундыпуксён ласянь юбоос вылэ арка выллем усьтэм корказен паперть пуктылӥзы. Нырысь-валысь та черкъёс гырлы ӝугонтэк (ӟуч: колокольня) лэсьтӥськылӥзы. Соосты пулэсь жингыртонъёс (ӟуч: звонницы) вошъязы, вылды. Та порма композиция 1720-тӥ арозь утиськиз. Трапезной выллем черклы яркыт пример луиз Никонлэн артеленыз 1695-тӥ—1700-тӥ аръёсы ӝутэм Воскресенской собор[2].
Нырысь-валысь ватка стиль вылын тужгес шӧдскылӥз кошкись XVII даур. Озьы вашкала шатёр архитектура но, ӟуч пыжыятэм но пытьызэ кельтылӥз. Муско барокко XVIII даур кутсконын адӟиськыны кутскизы, петровской вакыт вуэмен[3].
Пу архитектуралэн шӧдскемез
«Нарышкин» стильын мыло-кыдо кутӥськись восьмерик ӵемысь вашкала пу шатёр архитектуралэсь пӧрмемын вал. Сыӵе восьмерик умой адӟиське 1705-тӥ—1712-тӥ аръёсы пуктэм Сретенье нимо черклэн примерез вылын. Тямыс сэрго ӝутэм мугорыз одӥг гинэ, но паськыт но секыт. Та выллем ик 1699-тӥ арын Слободскойын пуктэмын Преображенской собор.
Пу архитектуралэн пытьыез эшшо но яркытгес адӟиське вить сэрго алтарен «музъемысь восмерик» принципъя пуктэм ватка черкъёсысь. Писпу гырке озьы кораллязы шатёр храмъёсты. Соослэсь композицизэс, шатёрез вератэк, 1714-тӥ—1723-тӥ аръёсы пуктэм Иоанн Предтечалэн черкез возьматэ. Та выллем ик тямыс сэрго черк юртэз кыко арлы бергес ӝутэм Вань святойёслэн черкысьтызы пумитаны луэ.
Ваткаос сугон йыр выллем лэсьтэм пулэсь тямыс гранё липетъёс вӧлдылӥзы, сое «курма» нималлязы. Та липет тямыс сэрго черк мугорез йылсалляз, куддыръя ньыль сэргозэ но. Та порма «курмаосты» Трифонов монастырьлэн Благовещенье черкысьтыз, Пасегово гуртысь Знаменско-Богородской черкысь но мукет черкъёсысь адӟыны луэ. Никонлэн артелез но, вылды, та выллем ик «курмаосты» уже кутылӥзы[3].
Ӟуч пужылэн шӧдскемез
Ваткаысь XVII даур пумысь—XVIII даур кутсконысь вань из черкъёс, нырысетӥ кыкъёсыз сяна, ӟуч пужыятэм сямъя быдэстэмын. Фасадъёсыз пӧртэм пумо чеберъям но вӧлэм кирпичлэсь калейдоскоп выллем лэсьтэмын. Артысь кык налишникъёсыз ӵемысь пӧртэмесь луо, суредзы огкадь ке но, соос аспӧртэмлыкоесь. Тазьы чеберъян со аръёсысь ватка калык творчествоен быгатыса герӟаськемын.
Ньыль сэрго черк юртлэн борддоръёсыз ӵемысь куинь люкетлы люкемын луо. Со понна кык полэс, нош сэрегъёсаз куинь полэс юбоос юнматӥсько. Куд-ог черкъёслэн юбооссы «ошиськемын», мукетъёсыз — гулбечозь лэземын. Юбоос вадьсы одно ик балясэн юматэм паськыт пояс лэсьтылӥзы. Йырйылэн (ӟуч: карниз) валче та пояс борддор пумысь кокошникъёслэсь ӝыныё котырзэс висъя. Ньыль сэрго мугор вылэ ӝутэм «восмерикен» черкъёсын кокошникъёс восьмерик выллем быдэстэмын.
Укноосты котыртонын юбоос шер кутӥськылӥзы. Ӵемысь укно пасьлэн дуръёсаз пичиесь балясъёслэсь яке роза выллем котыресъёслэсь чеберъянъёсты шуккылӥзы, таос куддыръя кыкетӥ я куинетӥ янак выллем луылӥзы. Уноез налишникъёс инӟы кадь пунэм ӟугыриослэсь (ӟуч: жгут) быдэстэмын вал, таослэсь уно уступъёсын кокошникъёс лэсьтэмын вал. Кокошник куинь люкетлэсь вал, йылыз шораз учкылӥз. Яке со небыт, бекче кадь абрис выллем вал.
Куддыръя пумиськыло вить сэрго, вайяськем «кисточка» выллем вставкаен йылпумъяськись ӧжытак «кесяськем» налишникъёс. Соосты пумитаны луэ 1710-тӥ—1717-тӥ аръёсы пуктэм Трифонов монастырьысь Куинь святойёслэн черкысьтызы. Налишникъёс ватка архитектуралэн тужгес аспӧртэм люкетэз луо. Архитекторъёсыз куспын творчествоя зэмос ӵошатскон ортчиз кожалод[3].
Муско барокколэн шӧдскемез
XVIII даур кутсконын Ватка музъем вылэ шор Россиысь вуиз муско (нарышкин) барокко, ӵемысь — ньыль сэрго черк мугор вылэ ӝутэм восьмерик композиция сямен. Мускоын со центрической, симметричной вал. Кылсярысь, Филяысь тодмо Покров черк выллем. Ваткаос сое асьсэ сямен улонэ пыӵатӥзы. Трапезной выллем лэсьтэм асимметричной черкъёсы ньыль сэрго йылэ восьмерик ватсазы. «Нарышкин» синпелетъёслы тупась декорлэн радлыкез ваткаослы ӧз яра. Со кӧня ке адӟиське Трифон монастырьлэн Никольской черкезлэн капка йылаз гинэ, со ӧрысь вылтусыз но стандартлы тупась котырыз.
Муско барокколэн мотивъёсыз Ваткаын ляб пыӵазы, ваньмыз декоративной чеберъянэн полэстӥськиз. Кокошникъёсты раковинаосын узырмытӥзы, кытӥ-отӥ позыръям юбоос пуктылӥзы. Но ӵемысь соос адӟисько ваче берин бабыльтэмъёсын (ӟуч: завитоки) быдэстэм налишникъёсысь. Ватка «бабылес» налишникъёс, нимаз радэ висъямын ке но, старозаветнойёсын валче улонэ выжыяськизы. Вылаз ик, соос ордертэмесь: юбоос интые котьку сямен тягаосты потто, тимпан нимо люкетаз кисточка ошиське.
Бабляосын шӧдиське барокколэн кужымез. Нолинскысь Николаевской соборлэн шоретӥ алтарь налишкниказ киотэн висъям бабляосыз зол позыртэмын но «спиральлы» укшало. Соослэн формазы эшшо но тунсыкогес луэ Иоанн Предтечалэн черказ — бабляослэн «модосъёссы» палэнэ учко кадь, юбоосын шонер гож кылдытытэк, нош куасалтӥськон интыязы ог-огзы борды пыкисько.
Устюглэн шӧдскемез
Ватка музъем вылысь уйпал каръёс Великий Устюген ӟеч кусып возизы. Устюгъёс пыр Ваткае вуиз черкез пичи ярусъёслэсь восьмерикъёсын йылсан сям, соос «ӝыны йыро» (четвериклэн борддоръёсыз вылтӥ буко выллем выступъёс) кадь быдэстэмын. Устюг вариантъя восьмерик трослы пичиятэмын вал, со югдытӥсь фонарь выллем вал. Та порма композиция кылдӥз Мускоын XVIII даур кутсконын но Устюгозь ӝоген вуиз, татысен выжиз Ваткае. Восьмерикъёсын ватка черкъёс пӧлысь нырысетӥез луиз, вылды, Владимирской черк.[3]
Поволжьелэн шӧдскемез
Ватка музъемлэн лымшор палаз (Яранск, Уржум, Малмыж, Алабго, Сарапул) зол шӧдӥськиз Поволжьелэн архитектураез. Уйпалэн ӵошатыса, татын излэсь пуктӥськон трослы вазьгес кутскиз, вылды.
Огез версияя, Яранскысь Вознесенской монастырьысь нырысетӥез излэсь Благовещенье нимо черк 1653-тӥ арын ӝутэмын вал[4]. Мускоын барокко архитектурая стиль 1680-тӥ аръёсы гинэ кылдэмын бере, тусын тупа ке но, сое та вакытлы укшатыны луонлык уг сёты. Благовещенье нимо черк даур пумын Ватка музъем вылысь мукет черкъёсын ӵош пуктэмын вал, вылды.
Яранск котырысь Инмар Инайлэн Рождествоезлы сӥзем черкын адӟиське четверик вылын восьмерик амалъя ӝутэм тямыс гранё гырлы жугонэн, жингыртыны куинь ярусэн лэсьтэм муско барокколэн юнмам сямыз. Но черклэн оглом котырыз матын луэ кузон но чебоксар черкъёслы яке солы аналогъёс воксё но ӧвӧл[3].
Петровской барокколэн шӧдскемез
1730-тӥ аръёсы ӟуч пыжыятэм вылэ пыкиськыса быдэстэм ватка «шудон выллем» калык стиль шуак ышиз. Великий Устюг пыр Вяткае вуиз пачкес но капчитэм котырын петровской барокко. Выль стильлэсь йылолъёссэ ваткаос асьсэ сямен уже кутӥзы. Ньыль сэрго черк мугорлэн трапезной но алтарь вадьсаз кронштейнъёс вылын кылдӥз йырйыл. Йырйыллэн паськыт мычиськылӥз бере сое липетэн утьылӥзы. Фасадлэн кыкез но ярусэз каннелированной пилястраосын куинь люкетлы висъяськиз. Урдэсъёсысьтыз люкетъёсыз ӵемысь паськытэсьгес, шорысеныз ӵошатыса. Нырысетӥ но кыкетӥ ярусъёсысь пилястраослэн вамышсы огкадь луытэк быгатэ вал, ӵемысь укноосты но, ритмез сураса кадь, пӧртэм пуктылӥзы.
Бадӟым композицие излэсь восьмерикез пыртыса, четвериклэсь борддоръёссэ «триглифъёсын» лэсьтэм йырйылэн йылсаллязы. Сяме пырем кокошникъёсты восьмерике выжтылӥзы. Черкез мукет сямен йылсаны малпакузы, со выллем ик йырйыл вадьсы куинь кокошник лэсьтылӥзы. Но ӝоген шоретӥ кокошник интые пилястраез огазеясь аркаос выллем йырйыл кылдӥз. Таин валче четвериклэсь кыкетӥ яруссэ ӝутӥзы, нош укнооссэ улӥегес лэзизы. Со вадьсысь борддоре фасад кузя йырйыллэн гожез вадьсытӥ одӥг гинэ котырес пась лэсьтэмын. Таӵе амалъя нырысьсэ пуктӥськизы Великорецкое черкогуртысь Преображенской черкез лэсьтӥсьёс. Солэсь адӟем карыса ӝутэмын Кумёныысь Спас, Сырьяныысь Николаевской, Чудиновоысь Троича но мукет черкъёс.
Озьыен, ватка усточиос вашкала ӟуч чеберъян амалъёслэсь палэнскизы, огъя типологиен тупатэм люкетъёсын, пичигес гинэ пачкес рельефез уже кутыны кутскизы[5].
Выль чеберъян амал
Пужыятэмлэсь но чеберлыклэсь палэнскон, чурыт куронъёслы тупатӥськон заказчикъёслы но, зодчийёслы но ӧз яралля. 1760-тӥ аръёсы лэсьтӥськемъёсысь адӟыны луэ выль декоративной ӧрлэсь кылдыны кутскемзэ. Узыр рельеф декоре берытскыны мылкыд сётӥзы Горынцевъёслэн произведениоссы. Соосын ӝутэм Истобенскысь Николаевской черк но Макарьеын, Юрьевын но мукет черкогуртъёсын пуктэм черкъёс выль сямен йылсаськеменызы гинэ паймытыны кулэ ӧй вал — вылтусысьтызы пластикаен но. Горынцевъёслэсь адӟем карыса, соослэсь азьвыл пуктыны кутскем черкъёсты выль сямен йылаз-пумаз вуттылӥзы. Сыӵе «адӟем каремъёсыз» луо Совьеысь Спас но Вылӥ Кумёныысь Владимирско-Богородицкой черкъёс. 70-тӥ аръёсы Пантылысь, Холуницко-Ильинскысь но Пичи Сунысь черкъёслэн котырзы быдэсак выльдӥськиз.
Горынцевъёс Ваткае устюг чеберъян амалъёсты трос пыӵатӥзы. Озьы асэстэмын вал вольыт гумыё пиллястраос но «дорической» капитель, кудӥз йылэ ӵемысь вадсаськылӥз куасалтэм плита. Устюгысь меӵак асэстэмъёс адӟисько Истобенскысь черклэн налишникъёсаз, озьы ик Раменьеысь Преображенско-Сретенской черкысь «позыръям» пилястраосын.
Налишникъёс выльысь объёмной луизы, но пӧртэмлыксыя, Никон артель ужаку сямен, сокем зол ӧз висъяськылэ ни. Налишникъёсты типъёссъя но интыянъя тодмо дифференциация кылдӥз. Озьы, аспид вылысь налишникъёслэн бровказы вал. Аспидалэн шор укнояз гинэ налишникез позыръяськем юбоослэсь лэсьтэмын луыны быгатылӥз. Кыкетӥ радын юбоос пыкиськизы уллань сюбегась люкето постамент вылэ. Улӥяз котьку юнматэмын гирлянда, бровкалэн вылӥяз сямен ик, солэн пумъёсаз суредамын тодмо «туглэн» мотивез. Укно улысь музъем валлин гутёын — «баллюстрада». Таӵе схемаен трос пумо налишникъёс кылдытыны луэ вал.
Соосты пумитаны луэ Пантыл черкогуртысь Дмитриевской черкын. Улысьтыз укноосызлэн юбоосыз чурыталэс янак борды юнматэмын. Со понна вылысьёсыз вадьсы, бровкалэсь суредзэ кужмоятыса, тыремын розеткаосын чеберъям аспӧртэм филёнкаос-картушъёс. Юрьево черкогуртысь черклэн кыкетӥ рад налишникъёсысьтыз юбоос каннелировать карем пилястраозь дорозь вуо но фронтонлы пӧрмись бровкаез куто. Отын ик «балюстрадоас» интые аппликацилэсь выллем картушъёс юнматэмын. Горынцевъёс черклэсь котырзэ лэсьтонын выльысь ӟуч пыжыятэм амал пала быркытӥськизы. Соос фасадъёсты Ваткаысь но Слободскойысь нырысетӥ из черкъёслы матын луись люкетъёсын узырмытӥзы.
XVIII даурысь 60-тӥ арозь излэсь гырлы жугонъёсты туж сук чеберъязы. Ӝоген соосты но трослы узырмытыны ӧдъязы. Истобенскысь Николаевской черклэн гырлы жугонэзлэн декорез мултэс «нап». Вань сэрегъёсы вакчиятэм пропорциосын куинь полэс «коринфской» юбоос пуктылэмын. Четверикысь пӧечи укноосысь налишникъёс ӵем пуктылэмын, нош нырысетӥ восьмерикысь юбоос вискысь быдэс борддорез тырмытэмын картушъёсын. Макарьеысь валтӥсь гырлы жугон восьмигранниклэн но куинь полэс юбоосыз вань, но соос коринфской капительёс сярысь огшорыгес лэсьтэмын. Уноез чеберъян люкетъёс черклэн люкетъёсызлэсь трослы яркытгес адӟисько. Но прямоугольной картушен филёнкаос юромо гырлы жугонэз чеберъян понна малпамын вал. Ӝоген пӧртэм пумо картушъёсты кутон ӵапак гырлы жугонъёсты лэсьтонын валтӥсь мотив луиз[5].
Историез
Излэсь пуктӥськонлэн кутсконэз
1656-тӥ арын Ватка но Быдӟым Пермь епархия кылдытэмын вал, солэн центрез луиз Хлынов. 1674-тӥ арын ужинтыяз пуксем Иона Баранов епископ Ватка музъем вылын излэсь черк пуктонъя соку ик ужрадъёс кутӥз. 1676-тӥ арын 10-тӥ оштолэзе Хлынов кремльлэн шораз ик излэсь нырысетӥ Дун-чылкыт Троича соборез ӝутыны ӧдъязы. 1683-тӥ арын пуктӥськон йылпумъямын вал. Черк вить йыро но асимметричной пӧрмиз. Со XVII даурлэн кыкетӥ люкетысьтыз культовой архитектурая адӟем карымон лэсьтос луиз[6].
Кыкетӥез излэсь юрт луиз Трифонов монастырьысь 1684-тӥ—1689-тӥ аръёсы ӝутэм Успенской собор. Со бадӟым, куать сэрего монастырь храмлэн типез, кудӥз Мускоысь Успенской соборлэсь куд-ог тодметъёссэ утиз. Со ӝот-ӝот симмертиен, сук декорен но ярусэн пуктэмын, та ик сое шӧдскымон висъя нырысетӥ ватка черклэсь. Та тодметъёс XVI даурысь архитектуралыгес тупало. Юрт вашкала дырысен татчыозь азьвыл тусын ик утиськиз, туннэ нуналлы карысь тужгес вужез черк луэ[7].
Со дыре ик, 1693-тӥ арын, излэсь нырысетӥ лэсьтэм Спас собор вуттэмын вал. Юрт одӥг этажъем пӧрмиз. Солэн вылтусыз но архитектурая стилез тодмотэм. Но Спас соборез Царёво-Константиновской черкез пуктон понна адӟем карон вылысь кутӥзы. Трифонов монастырьысь куинь нырысетӥосыз из черкъёс пӧлысь утиськиз Успенской собор гинэ. Ялан тылпу гомамен, Троича собор уродмиз, таин валче сое 1759-тӥ арын кесязы, Спас собор озьы ик начармиз, тазэ 1785-тӥ арын сэрттӥзы. Соосты соку ик выльысь излэсь ӝутӥзы[8].
Ватка барокколэн кылдэмез
Ватка музъем вылысь излэсь кык нырысетӥ черкъёсты мукет каръёсысь артельёс ӝутӥзы. Чакламъя соосты Мускоысь яке Ярославльысь усточиос быдэстӥзы. Но 1690-тӥ аръёсы лэсьтӥськисьёс сярысь ивортонъёс ӧз шеде. Со вакытэ, вылды, карын асьсэлэн пуктӥськисьёссы кылдӥзы ни. Каменщикъёслэн ватка артеленызы кивалтӥсь луиз Иван Иванович Никонов. Солэн матысь юлтошъёсыз Михайло Нефёдович Старков, Тихон Родионович Чернятев но Исак Петрович Москвитинов вал. Дэмен соос Никон артель кылдытӥзы[2].
1696-тӥ—1700-тӥ аръёсы артель Воскресенской соборез выльысь излэсь лэсьтӥз, мукет аръёс ӵоже озьы ик выльдӥз Ваткаысь (Хлыновысь) но Слободскойысь Царёво-Константиновской, Преображенской, Богоявленской, Екатерининской но мукет черкъёсты. Отӥяз Пётр I дыръя ӵем мобилизациен сэрен артельлэн ужез дугдылӥз, лэся. Ватка каменщикъёсты Новодвинской черкез пуктонэ кутылӥзы. Петербургез ӝутонын ужаны кышкытлык кылдэмен, ватка каменщикъёс профессизэс ватоно кариськизы. Соин ик 1710-тӥ арын ортчем калыкез чотанын Никонов но солэн ӵош ужась эшъёсыз каменщикъёс чот пусйымтэ. 1710-тӥ арысен 1721-тӥ арозь шараям каменщикъёслэн лыдзы 16-сен 5-озь кулэсмиз. Котьма ке но, Петербургын сяна, котькытын излэсь пуктӥськон алэмын вал ке но, Ваткаын но солэн котыраз выль из черкъёс та вакытэ но ӝутӥськизы.
Озьы Ваткаын усьтӥськизы Пятницкой, Покров, Владимир нимо, Иоан Предтеча нимо но Вань святойёслэн черкъёссы, озьы ик Слободскойын Преображенской собор но Сретеньелы сӥзем черк. Пумен быдэс Ватка музъем вылын излэсь черкъёс пуктыны ӧдъязы. Та вакытэ Пасегово черкогуртын Знаменской черк ӝутэмын.
Сяськаян вакытыз
Ватка барокколэн сяськаян вакытыз 1740-тӥ аръёсысен кутскиз но XVIII даурлэн кыкетӥ люкетаз тупаз. Та вакытэ, петровской барокколэн улонын инты басьтэменыз сэрен, пуктӥськон амал ӟуч пужыятэм элементъёслэсь палэнске но барокколы матынгес чурыт тусо луэ. Нырысьсэ лэсьтэмын вал улыно-вылыно черкъёс. Та вакытэ Макарье черкогуртын ӝутэмын Троича черк (1770)[9].
Вятка барокко Удмуртиын
Ватка губерниысь лымшор уездъёсы, туала Удмуртие, ватка барокко XVIII—XIX дауръёс вискын вуиз. Со вакытэ ваткаос барокко стильлы дышизы, соин ик классицизм канонъёсты бадӟым шумпотонэн ӧз пумиталэ. Губерниысь архитектор Филимон Росляков классицизм но барокко йылолъёсты полэстыны ӧдъяз, та со дыре лэсьтэм черкъёсын шӧдске. Тае адӟыны луэ Кулюшево гуртысь Георгий Победоносецлы сӥзем черкысь[10], Яр ёросысь Кузё-Инмарлэн Ӝутӥськонэзлы сӥзем черкысь[11] но Еловоысь Живоначальной Троичалэн черкысьтыз[12].
Барокколэн куд-ог кужымез озьы ик шӧдске архитектор Семён Дудинлэн ужъёсаз, но соос классицизм стиле пыро ни.
Барокко стилен пуктэм калык юртъёс
Юон корка
Ватка барокко пӧлы со аръёсысь излэсь лэсьтэм ӧжыт гинэ калык юртъёсты пыртыны луэ. Огез соос пӧлысь луэ Спасской ульчае XVIII даурлэн нырысетӥ люкетаз пуктэм Юон корка. Куинь люкетлэсь планировкаеныз со XVII даурысь пу зодчествоысь вуэм архитектурая йылолъёслы тупа. Огшоры декорен быдэстэм юрт барокко стилен лэсьтэмын. Люкетъёсыз висъямын пьедесталъёс вылын сылӥсь пилястраосын. Укно налишникъёс янакъёс выллем лэсьтэмын. Липетэз ньыль сэрего, пулэсь[13].
Вӧлмемез
Нырысь-валысь ватка барокко Ваткаын (Хлыновын) кылдӥз, пумен со Ватка музъем вылэ вӧлмиз, тужгес но — уйпал уездъёсаз (Котельнич, Орёл, Ватка, Слободской). Озьы ик Нолинск но Уржум уездъёсын пумиськылӥз, шергес — Яранск, Глазов но Сарапул уездъёсын. Ваткаез но Слободскоез вератэк, гуртъёсын но слободаосын ӵемысь кутӥськылӥз.
Ватка бароккоысь синпелетъёс
Азьвыл ватка барокко стилья ӝутэм нырысетӥез излэсь черк луыны быгатэ, вылды, 1693-тӥ арын ӝутэм Спас собор. XVIII даурлэн кыкетӥ люкетаз со сэрттэмын вал, интыяз али но ужась классицизм амалъя черк лэсьтэмын.
| Туспуктэм | Нимыз | Улон инты | Пуктэмын | Архитекторез | Югдур | Архитектурая синпелет |
|---|---|---|---|---|---|---|
|
Воскресенской собор | Ватка | 1695-тӥ—1700-тӥ аръёсы,
1725-тӥ, 1758-тӥ, 1780-тӥ аръёсы йылаз-пумаз вуттэмын. Гырлы жугонэз — 1852-тӥ арын. |
Куашкатэмын 1937-тӥ арын | ||
|
Преображение Спас черк
(Преображение нимо монастырь) |
Ватка | 1696-тӥ арлэсь вазь ӧвӧл | Ужа |  ОКН № 4310236007
| |
|
Богоявленье нимо собор | Ватка | 1698-тӥ—1710-тӥ аръёсы | Куашкатэмын 1935-тӥ арын | ||
|
Преображение Спас собор | Слободской | 1699-тӥ арын | Куашкатэмын 1930-тӥ аръёсы | ||
|
Екатерина Великомученица нимо собор | Слободской | 1699-тӥ арын | Ужа | ОКН № 4310316000
| |
|
Константин но Елена равноапостольнойёслы сӥзем черк
(Царёво-Константиновской) |
Ватка | 1699-тӥ арын | Никон артелен пуктэмын, XVIII даур шорын кесям излэсь Спас соборлэсь адӟем карыса | Ужа | |
_%D1%86%D0%B5%D1%80%D0%BA%D0%BE%D0%B2%D1%8C_%D0%B2_%D0%92%D1%8F%D1%82%D0%BA%D0%B5.png)
|
Сретенье нимо черк | Ватка | 1705-тӥ—1712-тӥ аръёсы | Куашкатэмын 1936-тӥ арын | ||
|
Владимир нимо черк | Ватка | 1707-тӥ—1724-тӥ аръёсы | Куашкатэмын 1936-тӥ арын | ||
|
Покров черк | Ватка | 1709-тӥ арлэсь бер ӧвӧл | Куашкатэмын 1935-тӥ арын | ||
|
Мусокысь Пётр, Алексий но Иона Куинь Святительёслэн черксы (Трифонов монастырь) | Ватка | 1714-тӥ арын | Уг ужа,
но черк ваньбуре пыре |
ОКН № 4310234014
| |
|
Иоанн Предтечалэн Рождествоезлы сӥзем черк | Ватка | 1714-тӥ—1723-тӥ аръёсы, йылаз-пумаз вуттэмын
1775-тӥ, 1825-тӥ, 1898-тӥ аръёсы |
Ужа | ОКН № 4310257000
| |
|
Инмар Анайлэн «Знамение» нимо мудорезлы сӥзем черк | Пасегово | 1726-тӥ арын, сиськон люкетэз — 1818-тӥ арын,
гырлы жугонэз — 1831-тӥ арын |
Ужа | ОКН № 4310283000
| |
|
Инмар Анайлэн Донысь мудорезлы сӥзем черк | Ватка | 1754-тӥ—1773-тӥ аръёсы | Куашкатэмын 1930-тӥ арын | ||
|
Николай Чудотворец нимо черк | Сырьяны | 1747-тӥ—1754-тӥ аръёсы, гырлы жугонэз — 1773-тӥ арын,
пулэсь курмаез 1776-тӥ арын излэсезлы воштэмын, сиськон люкетэз 1900-тӥ арын выльдэмын |
Уг ужа | ОКН № 4300191001
| |
|
Живоначальной Троичалы сӥзем черк | Быстрица | 1754-тӥ—1773-тӥ аръёсы | Ужа | ОКН № 4310309000
| |
|
Преображение Спас черк | Спасское (Первомайский) | 1755-тӥ—1765-тӥ аръёсы, гырлы жугонэз — 1801-тӥ арын,
сиськон люкетэз — 1841-тӥ арын |
Ужа | ОКН № 4300000105
| |
|
Живоначальной Троичалы сӥзем кафедральной собор | Ватка | 1760-тӥ—1772-тӥ аръёсы | И. Г. Кутуков, С. И. Заикин | Куашкатэмын 1930-тӥ аръёсы | |
|
Николай Чудотворец нимо черк | Истобенск | 1764-тӥ—1794-тӥ аръёсы | Никита но Данила Горынцевъёс артелен | Уг ужа | ОКН № 4300473000
|
|
Иоанн Богослов нимо черк | Ватка | 1764-тӥ—1794-тӥ аръёсы | Куашкатэмын 1937-тӥ арын | ||
.jpg)
|
Кузё-Инмарлэн Ӝутӥськонэзлы сӥзем черк | Прокопье | 1767-тӥ—1773-тӥ аръёс, йылаз-пумаз вуттэмын
1838-тӥ арын, сиськон люкетэз выльдэмын 1911-тӥ—1913-тӥ аръёсы |
Уг ужа | ОКН № 4330004000
| |
|
Живоначальной Троичалы сӥзем черк | Макарье | 1768-тӥ—1775-тӥ аръёсы | Никита но Данила Горынцевъёс артелен | Ужа | ОКН № 4310256000
|
|
Илия Пророк нимо черк | Юрьево | 1770-тӥ—1784-тӥ аръёсы, гырлы жугонэз —
XIX даур кутсконын, трапезноез эшшо бергес |
Никита но Данила Горынцевъёс артелен | Ужа | ОКН № 4310287000
|
|
Вань Святойёслэн черксы | Всехсвятское | 1769-тӥ—1773-тӥ аръёсы, гырлы жугонэз — 1784-тӥ арын | Уг ужа | ОКН № 4300189001
| |
|
Илия Пророк нимо черк | Ильинское | 1772-тӥ—1783-тӥ аръёсы, гырлы жугонэз —
XIX даур кутсконын |
Ужа | ОКН № 4310330000
| |
|
Живоначальной Троичалы сӥзем черк | Волково | 1772-тӥ—1779-тӥ аръёсы, гырлы жугонэз — 1796-тӥ арын | Данила Горынцев артелен,
Ф. М. Росляков (гырлы жугонэз) |
Ужа | ОКН № 4300555001
|
|
Всемилостивой Спас нимо черк | Вяз | 1773-тӥ—1777-тӥ аръёсы | Ужа | ОКН № 4310281000
| |
|
Спас Нерукотворный Образлэн черкез | Спас-Талица | 1773-тӥ—1781-тӥ аръёсы | Ужа | ОКН № 4300476000
| |
|
Дун-чылкыт Инмар Анайлэн Благовещениезлы сӥзем черк | Слободской | 1784-тӥ арын | Ужа | ОКН № 4310318002
| |
|
Живоначальной Троичалы сӥзем черк | Мостовое, Удмуртия | 1804-тӥ—1811-тӥ аръёсы, гырлы жугонэз — 1821-тӥ арын | Ф. М. Росляков, С. Е. Дудин | Ужа | ОКН № 1800000012
|
|
Георгий Победоносец нимо черк | Кулюшево, Удмуртия | 1819-тӥ арын | С. Е. Дудин | Уг ужа | ОКН № 1800118000
|
Валэктонъёс
- ↑ Пятницкая церковь в Хлынове в контексте вятского зодчества начала XVIII века [ӟуч] cyberleninka.ru. Эскеремын 2026-03-07 арын
- ↑ 1 2 А. Ю. Капитков. Энциклопедия Земли Вятской, том 5. Архитектура. — Киров: Вятка, 1996. — С. 73—83. — 475 с. — ISBN 5-86645-012-7.
- ↑ 1 2 3 4 5 А. Ю. Капитков. Энциклопедия Земли Вятской, том 5. Архитектура. — Киров: Вятка, 1996. — С. 97—102. — 475 с. — ISBN 5-86645-012-7.
- ↑ Древняя церковь [ӟуч] yaransk-biblioteka.ru. Эскеремын 2026-03-07 арын
- ↑ 1 2 А. Ю. Капитков. Энциклопедия Земли Вятской, том 5. Архитектура. — Киров: Вятка, 1996. — С. 103—111. — 475 с. — ISBN 5-86645-012-7.
- ↑ А. Г. Тинский. Энциклопедия Земли Вятской, том 5. Архитектура. — Киров: Вятка, 1996. — С. 64—68. — 475 с. — ISBN 5-86645-012-7.
- ↑ А. Г. Тинский. Энциклопедия Земли Вятской, том 5. Архитектура. — Киров: Вятка, 1996. — С. 69—72. — 475 с. — ISBN 5-86645-012-7.
- ↑ История [ӟуч] Спасский собор. Эскеремын 2026-03-07 арын
- ↑ Вятка (Киров), Троицкий Александро-Невский монастырь. Церковь Троицы Живоначальной в Макарье [ӟуч] sobory.ru. Эскеремын 2026-03-07 арын
- ↑ Кулюшево, Церковь Георгия Победоносца [ӟуч] sobory.ru. Эскеремын 2026-03-07 арын
- ↑ Сада, Церковь Вознесения Господня [ӟуч] sobory.ru. Эскеремын 2026-03-07 арын
- ↑ Елово, Церковь Троицы Живоначальной [ӟуч] sobory.ru. Эскеремын 2026-03-07 арын
- ↑ Питейный дом [ӟуч] Пешком по Вятке. Эскеремын 2026-03-07 арын
Литература
- Энциклопедия Земли Вятской, том 5. Архитектура / В. Ситников. — Киров: Вятка, 1996. — 475 с. — ISBN 5-86645-012-7.
- А. Ю. Капитков. Народные мастера-каменщики в русской архитектуре XVIII века: Великий Устюг, Вятка, Урал. — Киров: Екатеринбург, 2023. — 272 с. — ISBN 978-5-00075-332-3.
- Каптиков А. Ю. Вятско-уральские архитектурные связи в эпоху барокко // Академический вестник УРАЛНИИПРОЕКТ РААСН. — 2015. — Апрель. — С. 41—45.