Биологи пӧртэмлыклы сӥзем калыккуспо нунал
| Биологи пӧртэмлыклы сӥзем нунал | |
|---|---|
 | |
| Типез | Калыккуспо |
| Юнматэмын | ООН-лэн генеральной Ассамблеяезлэн резолюциеныз |
| Пусъё | арлы быдэ |
| Дырыз | 22-тӥ куартолэзе |
Биологи пӧртэмлыклы сӥзем калыккуспо нунал (ӟуч: Междунаро́дный день биологи́ческого разнообра́зия, ООН-лэн мукет официальной кылъёсаз: англ. International Day for Biological Diversity, араб اليوم الدولي للتنوع البيولوجي, исп. Día Internacional de la Diversidad Biológica, кит. 生物多样性国际日, фр. Journée internationale de la diversité biologique ) — ООН-лэн калыккуспо нуналыз, пусйиське арлы быдэ 22-тӥ куартолэзе.
Юнматэмын1994-тӥ арын 19-тӥ толсуре ООН-лэн Генеральной Ассамблеяеныз (A/RES/49/119-тӥ номеро Резолюция)[1], нырысь 29-тӥ толсуре пусйиське вал, берло 22-тӥ куартолэзе выжтэмын[2].
Нунал сярысь
Биологи пӧртэмлык— со улэп организмъёслэн пӧртэмлыксы: бактериос бордысен кутскыса, экосистемаос дорозь[3]. Лулосъёслэн трос пӧртэм луэменызы утиське огъя баланc, улонын мар кулэ, ваньмыз вань (ву, сиён-юон, вошъяськисьтэм куазь, экономикалэн азинскемез но мукет)). Кылсярысь:
- быдэс дуннеысь ВВП-лэн бадӟым люкетэз меӵак инкуазь ваньбурен герӟаське;
- тросэз улӥсьёс понна зарезь —улон луонлык;
- адямилэн 80 %-эз сиёнэз будосъёслэсь луэ;
- мулэн но океанлэн экосистемаосыз «углеродэз быдтӥсьёс» чотын луо но мукет[4][5].
Улэп организмъёслэн пӧртэмлыксы кулэсмемен, быгатоз шӧдӥськыны сютэм улон, йылоз висён вӧлмытӥсь батериослэн лыдзы, кутскозы инкуазь воштӥськонъёс но мукет[6].
Биологи пӧртэмлыклэн кулэсмемезлэн валтӥсь мугез — адямилэн инкуазь узырлыкез жалятэк тус-тас каремез[6][4], калыклэн йылэмез, котырысь инкуазез кырсёмытэмез но сое укыр зол киултыны турттэмез[7].
Биологи пӧртэмлыклы сӥзем калыккуспо нуналлэн валтӥсь ужпумез — мерлыклэсь саклыксэ куд-ог будосъёслэн но луло макеослэн бырон калэ вуэменызы герӟаськем ужпумъёслы висъян[8][9].
ЮНЕСКО-лэн генеральной директорез Одрэ Азуле[10]:
Асьмелы быдэсак воштыны кулэ инкуазен но та дуннеын улӥсь луло макеосын кусыпъёсмес. Ваньмы понна зэмзэ но огъя луись улонэз лэсьтыны кутсконо ини .
Историез
«Биологи пӧртэмлык» термин 1970-тӥ аръёсы кылдӥз[11]. Дас ар ортчыса, со паськыт кутӥськыны кутскиз прикладной но фундаментальной биология удысын[12].
1992-тӥ арын 22-тӥ куартолэзе Рио-де-Жанейро карын Биологи пӧртэмлыкъя Конвенция кутэмын вал[8] — со биологи пӧртэмлыкез утёнлы сӥзем калыккуспо катрадлыко документ[13]. Кужымлыко луиз 1993-тӥ арын 29-тӥ толсурысен[2]. 2025-тӥ арозь со документэз 196 кун асъяз тупатыса юнматӥз[14].
Берлогес конвенци борды юнматэмын: биокышкыттэмлыкъя Картахенской протокол (2000), Генетической ресурсъёс доры сюрыны но соосты уже кутонлэсь пайдалыксэ ваньмыз куспын огкадь люкылонъя Нагойской протокол (2010), биокышкыттэмлыкъя картеханской протокол борды кылкутытон сярысь ватсам Нагойско-куала-лумпурской протокол (2010)[2].
1994-тӥ арын 19-тӥ толсуре ООН-лэн Генеральной Ассамблеяез 29-тӥ толсурез Биологи пӧртэмлыклы сӥзем калыккуспо нуналэн ялӥз (биологи пӧртэмлыкъя Конвенцилэн кужымлыко луон нуналыз)[1]
2000-тӥ арын толсур толэзе Генеральной Ассамблея пусъён нуналэз 22-тӥ куартолэзе выжтыны дэмлаз (Конвенциез юнматон нунал)[15].
2015-тӥ арын дуннеысь азьветлӥсьёс биопӧртэмлыкез утёнъя но азинтонъя 17 ужпум пуктӥзы (соос ваньмыз пусъемын 2030-тӥ арозь яланлыко азинтонъя Порвесткаын). Со ужпумъёс пӧлысь одӥгез валтӥсез — биологи пӧртэмлыклэсь кулэсмемзэ дугдытон[16].
2022-тӥ арын толсур толэзе 196 кун биопӧртэмлыкез утёнъя Куньмин-Монреальской глобальной рамочной программаез юнматӥз[4]. Со ужкагазын инкуазь узырлыкез эсэпсэ валаса кутонъя, биопӧртэмлыкез утёнъя но экосистемаосты выльдонъя 23 ужпум пуктэмын. Ужпумъёсты быдэстон понна, улосъёсын биопӧртэмлыкез утёнъя йӧскалык стратегиос но ужан планъёс кылдытыны кулэ[17].
Сям-йылолъёс
Биологи пӧртэмлыклэн калыккуспо нуналэзлы арлы быдэ кыӵе ке но тема ялэмын луэ.
Та нуналэ быдэс дуннеын пӧртэм ужрадъёс ортчыло: котырысь инкуазез утёнъя лекциос, экологи нуналъёс, адӟытонъёс[18], вутымъёсты но нюлэсъёсты чылкытатонъя акциос но мукет.
Озьы ик та нуналлы сӥзьыса, нимысьтыз пӧртэм изданиос печатласькыло[2].
Пӧртэм аръёсы юнматэм темаос
- 2002 — «Нюлэсъёслэн биологи пӧртэмлыксы»[19].
- 2003 — «Биопӧртымлык но ёрмыса улонэн нюръяськон: ӝог азинскон понна кылдэм шуг-секытъёс»[2].
- 2004 — «Биопӧртэмлык: сиён-юон, ву но ваньмыз понна тазалык».
- 2005 — «Биопӧртэмлык: вошъяськись дуннеын асьме улонмес утён».
- 2006 — «Кӧс куазё ёросъёсын биопӧртэмлыкез утён»[2].
- 2007 — «Биопӧртэмлык но куазьлэн воштӥськемез».
- 2008 — «Биопӧртэмлык но гурт удыс».
- 2009 — «Инвазивной пӧртэмлыкъёс».
- 2010 — «Биопӧртэмлык азинскон но ёрмыса улонэз кулэстон понна»[2].
- 2011 — «Нюлэсъёслэн биопӧртэмлыксы».
- 2012 — «Зарезьёслэн биопӧртэмлыксы».
- 2013 — «Ву но биопӧртэмлык».
- 2014 — «Шормуӵъёслэн биопӧртэмлыксы».
- 2015 — «Яланлыко азинсконлэн куронъёсызлы тупась биопӧртэмлык»[2].
- 2016 — «Биопӧртэмлык сярысь тодон-валанэз вӧлмытон, адямиослэсь улонзэс но улон-вылонзэс утён»[8].
- 2017 — «Биопӧртэмлык но туризм».
- 2018 — «Биопӧртэмлык удысын ужан кутскем дырысен 25 ар тырмонэз пусъён».
- 2019 — «Асьмелэн биопӧртэмлыкмы, асьмелэн сиён-юонмы, асьмелэн тазалыкмы»[7].
- 2020 — «Асьмелэн юнматэм малпанъёсмы инкуазь понна».
- 2021 — «Асьмеос #ForNature-лэн решениезлэн оглюкетэз».
- 2022 — «Вань улэп макеос понна огъя азьлань улонэз кылдытон»[2].
- 2023 — «Вераськон бордысь уж дорозь: биопӧртэмлыкез выльдон».
- 2024 — «Планлэн люкетэз лу».
- 2025 — «Инкуазен ог-огмес валаса улон но азинскон».
Таин герӟаськем нуналъёс
- Кыр инкуазьлэн дунневыл нуналыз (3-тӥ южтолэзе).
- Нюлэсъёслы сӥзем калыккуспо нунал (21-тӥ южтолэзе).
- Тропикъёслы сӥзем калыккуспо нунал (29-тӥ инвожое).
- Зарезьлэн дунневыл нуналыз (юнматэм нуналыз ӧвӧл; куарусён толэзь пумын пусйиське).
- Пӧйшуръёсты утёнлы сӥзем дунневыл нунал (4-тӥ коньывуонэ).
- Котырысь инкуазьлы сӥзем дунневыл нунал (5-тӥ инвожое)
Валэктонъёс
- ↑ 1 2 Document Viewer [ӟуч]
- ↑ 1 2 3 4 5 6 7 8 9 International Day for Biological Diversity - 22 May
- ↑ Биологическое разнообразие [рус.]
- ↑ 1 2 3 Что такое биоразнообразие и как его сохранить?
- ↑ International Day for Biological Diversity | United Nations, United Nations. Эскеремын: 20 куартолэзе 2025 арын.
- ↑ 1 2 Еле живая природа. По всей планете вымирают животные и растения. Чем это грозит человечеству?, Lenta.RU (6 толшоре 2023). Эскеремын: 20 куартолэзе 2025 арын.
- ↑ 1 2 Зачем празднуют Международный день биологического разнообразия, Парламентская газета (22 куартолэзе 2019). Эскеремын: 20 куартолэзе 2025 арын.
- ↑ 1 2 3 Международный день биологического разнообразия, РИА Новости (22 куартолэзе 2016). Эскеремын: 20 куартолэзе 2025 арын.
- ↑ Иван Обухов. Какой сегодня праздник: 22 мая – Международный день биологического разнообразия, Профиль (22 куартолэзе 2023). Эскеремын: 20 куартолэзе 2025 арын.
- ↑ Международный день биологического разнообразия
- ↑ Власова Е. А. Содержание понятия о биологическом разнообразии в профильном курсе биологии
- ↑ Биологическое разнообразие, Большая российская энциклопедия. Эскеремын: 20 куартолэзе 2025 арын.
- ↑ Конвенция о биологическом разнообразии [ӟуч]
- ↑ List of Parties
- ↑ 55/201. Конвенция о биологическом разнообразии
- ↑ Международный день биологического разнообразия
- ↑ 22 мая: Международный день биологического разнообразия, Экологический информационный центр «Экоинфо». Эскеремын: 20 куартолэзе 2025 арын.
- ↑ Всемирный День биологического разнообразия в ГДМ, РИА Новости (21 толсуре 2002). Эскеремын: 20 куартолэзе 2025 арын.
- ↑ International Day for Biological Diversity - 22 May 2002
Литература
- Редникова Т. В. Значение конвенции CITES для охраны биологического разнообразия: полувековой опыт реализации положений // Международное право и международные организации. — 2023. — № 1.