Берестов, Пётр Филиппович

Пётр Филиппович Берестов
Пётр Филиппович Берестов
Вордӥськем дырыз	21-тӥ толсуре 1898
Вордӥськем интыез	Малмыж утем, Ватка губерния, Росси империя[d];
Кулэм дырыз	26-тӥ шуркынмонэ 1961 (62 года)
Кулэм интыез	Запорожье, Украин ССР, СССР;
Кунмуртлыкез	Росси империя; СССР
Кыӵе войскоез	пехота[d]
Служить карон аръёсыз	1917—1955
Званиез	; генерал-майор
Командовать кариз	82-тӥ мотострелковой дивизия ; 331-тӥ стрелковой дивизия ; 72-тӥ гвардейской стрелковой дивизия
Ожмаськонъёс/ожъёс	Россиысь Граждан ож[d]; Советско-польской ож[d]; Советско-финляндской ож (1939—1940)[d]; Быдӟым Атыкай ож;
	Медиафайлъёс РувикиМедиа пушкын

Пётр Филиппович Берестов (21-тӥ толсуре 1898, Малмыж утем, Ватка губерния — 26-тӥ шуркынмонэ 1961, Запорожье) — совето военачальник, генерал-майор (1.09.1943). Совето Союзлэн Героез (27.06.1945).

Улон сюресэз

Пётр Филиппович Берестов вордӥськиз 1898-тӥ арын 21-тӥ толсуре Берестово гуртын^{[К 1]} трос нылпиё крестьян семьяын.

14 аресысен медоын ужаз, сапег гындылӥз, атаеныз ӵош зӧк корпумъёсты кузялэс бычкыен пулъёслы вандылылӥзы.

Нырысетӥ дунне но Граждан ожъёс

1917-тӥ арын тулыспал толэзе Ӟуч императорской армие басьтӥзы. Симбирск губерниысь Сенгилей карын 165-тӥ запасной стрелковой полкын рядовой луыса служить кариз. 1917-тӥ арын куарусён толэзе полклэсь учебной командазэ йылпумъямез бере, полклэн штабаз младшой унтер-офицер званиен писаре кутӥзы. Симбирскын но Петроградын ортчись демонстрациосы пыриськиз. 1918-тӥ арын тулыспалэ Берестовез демобилизовать каризы. Гуртаз бертыса, атаезлэн юртъер котыраз юрттӥськиз.

1918-тӥ арын шуркынмон толэзе выльысь Горд Армие басьтӥзы но красноармеец чотын 38-тӥ стрелковой полке ыстӥзы (Глазов). Со арын ик толсур толэзе полкез, 12-тӥ стрелковой дивизие пыртыса, Шундыӝужанпал фронтэ келязы. Отын Берестов пулемётной взводлэн командирез чотын адмирал А. В. Колчаклэн войскоезлы пумит ожмаськиз. 1919-тӥ арын гудырикошкон толэзьысен дышетскыны келязы, 1920-тӥ арын горд командиръёсты дасясь 1-тӥ пехотной курсъёсты быдтӥз (Казань). 1920-тӥ арын куартолэзьысен — маршевой роталэн командирез, соин ӵош Шундыпуксёнпал фронтэ вуыса, 4-тӥ стрелковой дивизилэн 12-тӥ стрелковой полкезлэн пулемётной командаезлэн взводэзлы командире юнматӥзы, гудырикошкон толэзьысен — роталэн командирез. Советско-польской оже пыриськиз. 1920-тӥ арын куарусёнэ нош ик дышетскыны келязы.

Ожъёс вискын

1921-тӥ арын Шундыпуксёнпал фронтысь батальонъёслы командиръёсты дасясь курсъёсты йылпумъяз (Витебск). 1921-тӥ арын гудырикошконысен — 6-тӥ стрелковой дивизилэн 18-тӥ стрелковой полкезлэн ротаезлэн командирез, 1922-тӥ арын инвожоысен — 2-тӥ Белорусской стрелковой дивизилэн 4-тӥ стрелковой полкезлэн ротаезлэн командирез (Минск). 1924-тӥ арын Физической образования вылӥ школаез йылпумъяз (Ленинград), дышетскемез бере 4-тӥ стрелковой полке батальонлэн командирез луыса берытскиз но куать ар пала соин командовать кариз.

1931-тӥ арын толсуре Ярославль улосысь Ростовын интыяськем 18-тӥ стрелковой дивизилэн 54-тӥ стрелковой полказ командире юнматӥзы. 1939-тӥ арын куарусёнэ Берестовез соку кылдытӥськись 168-тӥ стрелковой дивизие снабжениен кивалтыны юнматӥзы. 1939-тӥ арын толсуре со дивизиез 8-тӥ армилэн пушпӧлаз пыртӥзы но советско-финской оже ыстӥзы. Толсур пумын Ладожской тылэсь уйпалагес котретэ шедем со дивилэн ик 402-тӥ стрелковой полкеныз командованиез Берестов ас вылаз басьтӥз. 1940-тӥ арын 28-тӥ толсуре котретысь потыны турттӥсь дивизилэн азьпал мынӥсь отрядэныз командовать каронъяз сӧсырмыса но отрядэз азьпал валтӥз. Та операциез азинлыко быдэстэмзы понна Горд Знамялэн орденэныз пусъемын но дырызлэсь вазь полковник звание сётэмын (5.03.1940).^[2]

Госпитальын йӧнатӥськемез бере ас полказ берытскиз. 1940-тӥ арын шуркынмон толэзе «Выстрел» пехоталэсь офицер составзэ умоятонъя стрелково-тактической вылӥ курсъёсы дышетскыны ыстӥзы. Война кутскемлэсь кӧня ке нунал азьпал со курсъёсты отличиен йылпумъяз.

Быдӟым Атыкай ож

1941-тӥ арын 2-тӥ пӧсьтолэзе полковник П. Ф. Берестов Москваысь Ленин ёросысь калык ополченилэн 1-тӥ полкезлы командире юнматэмын. Со полк 26-тӥ куарусёнэ 60-тӥ стрелковой дивизилэн 1281-тӥ стрелковой полкезлы пӧрмытэмын. 1941-тӥ арын пӧсьтолэзьысен Резервной фронтлэн 33-тӥ армиезлэн пушпӧлаз пыртэмын , со Спас-Деменск котырын оборонительной рубежъёс пуктон бордын тыршиз, 9-тӥ куарусёнысен Ельня дорысь ожъёсы пыриськиз. Немецлэн Москва вылэ наступление потэмез бере, вань секытэз Берестовлэн полкез вылэ усиз («Тайфун» операция). 33-тӥ армия «Вяземской котёлэ» ӧз ке но шедьы, немецез дугдытыны тыршыса, тушмонлэн кужмо шуккетэз улэ шедиз. 1941-тӥ арын коньывуон толэзе полк выльдӥськылытэк но боеприпасъёслы кулэяськыса, йыгмыт сылӥз ас позициосаз. Куинь пол котретэ шедьылыса, куинь полаз ик ож пыр асьмеос пала потыны быгатӥз. Ньылетӥзэ тушмонлы лябӟем полкез пазьгыны удалтӥз, соку асьме боецъёс тушмон котретысь пичи огинъёсын потылыны кутскизы. Огзэ сыӵе огинэз полклэн командирез ас киулаз басьтыса, фронт линиез Тула котырын гинэ выжыны быгатӥз.

1941-тӥ арын 8-тӥ шуркынмонэ, нокыӵе шутэтскон вис карытэк Берестовез Шундыпуксёнпал фронтысь 5-тӥ армилэн 82-тӥ мотострелковой дивизиезлэн 601-тӥ мотострелковой полкезлы командире юнматӥзы. Москва понна ожъёслэн оборонительной вадесаз дивизия Кубинка станция котырысь Минской шоссеез утиз. Свето войскоослэн контрнаступление потэмзы бере, дивизия мукет частьёсын ӵош Дороховоез, Бородиноез, Можайскез но мукет улон интыосты мозмытонэ пыриськиз.^[3] 1942-тӥ арын 10-тӥ тулыспалэ П. Ф. Берестов дивизилэн командирезлэн воштӥсез луиз. 1942-тӥ арын ВКП(б)-лэн радаз пыриз.

1942-тӥ арын 22-тӥ тулыспалэ 5-тӥ армилэн 50-тӥ стрелковой дивизиезлы командире пуктӥзы (дивизия Гжатск котырысь утён позициосын сылӥз).

1942-тӥ арын 10-тӥ оштолэзе полковник Берестовез 331-тӥ стрелковой дивизилы командире юнматӥзы (война бырытозь со дивизен командовать кариз). Дивизия Шундыпуксёнпал фронтысь пӧртэм армиослэн пушпӧлазы ожмаськиз, 1944-тӥ арын оштолэзьысен — 3-тӥ Белорусс, 1945-тӥ арын оштолэзьысен — 1-тӥ Украин фронтъёсын но Москва котырын ожмаськиз, Ржевско-Сычёвской, Ржевско-Вяземской (1943), Смоленской, Оршанской, Белорусской, Гумбиннен-Гольдапской, Восточно-Прусской но Пражской наступательной операциосы пыриськиз. Сэзь ожмаськемез понна 1943-тӥ арын инвожо толэзе дивизия Горд Знамялэн орденэныз пусъемын, 1943-тӥ арын куарусён толэзе дивизилы «Смоленской» дано ним сётӥзы, 1944-тӥ арын пӧсьтолэзе Березина шур вамен выжемез но Ново-Борисов карез тушмонлэсь киултэмез бере Суворовлэн 2-тӥ степенё орденэныз пусъемын, пӧсьтолэзь пумын ик, Минск карез мозмытэмез понна, Горд Знамялэсь кыкетӥ ордензэ сётӥзы. 1943-тӥ арын куарусёнэ Пётр Берестовез контузить кариз, полковник госпитальын кыллёнлэсь аналскыса, ачиз ик дивизиен кивалтӥз.

331-тӥ стрелковой дивизилэн командирез (3-тӥ Белорусс фронтысь 31-тӥ армия) генерал-майор П. Ф. Берестов Восточно-Прусской наступательной операциын геройлыко сэзь луэмзэ возьматӥз. 1945-тӥ арын 21-тӥ толшоре дивизия тушмон оборонаез пазьгыса, армилэн мукет частьёсызлэсь азьпал потӥз но тушмонлэсь опорной пунктъёссэ: Растенбург, Россель, Хайльсберг каръёсты киултӥз. 31-тӥ толшоре дивизилы Ландсберг карез киултыны косэмын вал (али дыре Гурово-Илавецке, Польша). Операциез уйин кутскизы. Озьы тушмонэз шуге-леке вуттыса, Берестов, тушмон мышкытӥ азьлань мынӥз, 2-тӥ тулыспалэ выжон уе дивизизэ кар доры вуттӥз. Сое штурмен басьтыса, тушмонлэсь валтӥсь герӟет пунктсэ киултӥз. Ландсберг карез утьыны быгатымтэеныз пурӟем тушмонэн дивизия куинь уй-нунал ӵоже дугдылытэк ожмаськиз. 7-тӥ тулыспалэ кыдёкысен ожалскыса, тушмон Ландсберг котырысь совето частьёсты армилэн валтӥсь кужымъёсызлэсь висъяз. Со шимес югдурын генерал-майор Берестов ас кивалтон улсаз 331-тӥ но 88-тӥ стрелковой дивизиосты, 140-тӥ артиллерийской бригадаез но танковой полкез огазеяса, круговой оборона кылдытӥз но эшшо куинь уй-нунал ӵоже быдэсак котретын, соос доры 33-тӥ армилэн кужымъёсыз вуытозь, геройлыко ожмаськиз. Берестовлэн войскоезлэн 1-тӥ этапын сэрыт наступление потэменыз но йыгмыт оборона воземеныз, 33-тӥ армилы матэктыны луонлык кылдӥз. Та операциез азинлыко быдэстэмзы понна армилэн командующиез П. Г. Шафранов генерал П. Ф. Берестовлы Совето Союзлэн Героез ним сётон понна куронэн вазиськиз.

СССР-ысь Вылӥ Кенешлэн Президиумезлэн 1945-тӥ арын 27-тӥ инвожое гожтэм Косэтэныз командованилэсь боевой заданиоссэ ӟеч быдэсъямез но фронтын герман фашизмен сэзь ожмаськемез понна генерал-майор Пётр Филиппович Берестов Совето Союзлэн Героез дано нимын пусъемын но Ленин орден (№ 52532) но «Зарни Кизили» медаль сётэмын (№ 7906).

Немецк войскоослэсь прусской группировказэс пазьгем бере, 1945-тӥ арын оштолэзе 331-тӥ стрелковой дивизиез 1-тӥ Украин фронтэ келязы. Отын дивизия Пражской операцие но Гёрлиц, Зоненберг, Фринлянд, Яблонец каръёсты мозмытонэ пыриськиз, боевой сюрессэ Прагаозь вуытэк йылпумъяз.

Война бере

Война бере П. Ф. Берестов Совето Армиын службазэ азьланьтӥз. 1945-тӥ арын пӧсьтолэзьысен Войскоослэн шор группаяз (Венгрия) 72-тӥ гвардейской стрелковой дивизиен командовать кариз, 1946-тӥ арын толшоре дивизизэ Киевысь военной округе выжтӥзы. 1946-тӥ арын куартолэзьысен — Киев военной округысь 7-тӥ отдельной гвардейской стрелковой бригадалэн командирез. 1947-тӥ арын толшорысен толсурозь — Одесса военной округысь 59-тӥ гвардейской стрелковой дивизилэн командирез. 1948-тӥ арын М. В. Фрунзе нимо военной академиысь стрелковой дивизиослэсь командиръёссылэсь быгатонлыкъёссэс будэтонъя курсъёсты ортчиз. 1948-тӥ арын толсурысен — 43-тӥ отдельной гвардейской стрелковой бригадалэн командирез (Таврической военной округы), 1953-тӥ арын коньывуон толэзьысен — со округысь ик 113-тӥ гвардейской стрелковой дивизилэн командирез.

1955-тӥ арын толсур толэзе генерал-майор Пётр Берестов запасэ лэземын. Улӥз но ужаз Запорожье карын (Украина). Улонысь кошкиз 1961-тӥ арын 26-тӥ шуркынмонэ. Ватэмын Запорожье карысь Первомай шайвылэ.

Данъетъёсыз

Совето Союзлэн Героезлэн «Зарни Кизили» медалез (27.06.1945);
Кык Ленин орденэз (21.02.1945, 27.06.1945);
Ньыль Горд Знамялэн орденэз (20.04.1940, 28.08.1942, 3.11.1944, …);
Суворовлэн 2-тӥ степенё орденэз (28.09.1943);
Кутузовлэн 2-тӥ степенё орденэз (4.07.1944);
Богдан Хмельницкийлэн 2-тӥ степенё орденэз (19.04.1945);
Медальёсыз.

Буре ваён

Берестов Геройлэн нимыз сётэмын Можайскысь но Удмурт Элькунысь Сюмси черкогуртысь урамъёслы.
П. Ф. Берестовлэн нимыз Ижкарысь Ялан ӝуась тыл дорысь Мемориал стелаын гожтэмын.

Комментариос

↑ Деревня Берестово, относившаяся к Уватуклинской, затем — к Сям-Можгинской волости Малмыжского / Селтинского уезда, к Ново-Мултанской волости Селтинского / Ижевского уезда, в последующем входила в состав Чажинского / Гайнинского сельсоветов Удмуртиысь Сюмси ёросысь ; не сохранилась^[1].

Валэктонъёс

↑ mirus Берестово [ӟуч] Родная Вятка. Эскеремын 2019-09-29 арын
↑ Аптекарь П. Трагедия окружённых. // Военно-исторический архив. — 1998. — Выпуск 2. — С.196.
↑ Козинский А. Бои в районе Бородино в 1941—1942 годах. // Военно-исторический журнал. — № 9. — С.26-33.

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
Великая Отечественная. Комдивы : военный биографический словарь / [Д. А. Цапаев и др. ; под общ. ред. В. П. Горемыкина] ; М-во обороны Российской Федерации, Гл. упр. кадров, Гл. упр. по работе с личным составом, Ин-т военной истории Военной акад. Генерального штаба, Центральный архив. — М. : Кучково поле, 2014. — Т. III. Командиры стрелковых, горнострелковых дивизий, крымских, полярных, петрозаводских дивизий, дивизий ребольского направления, истребительных дивизий (Абакумов — Зюванов). — С. 255—257. — 1102 с. — 1000 экз. — ISBN 978-5-9950-0382-3.
Азовский А. Награды Отечества в истории Удмуртии. — Ижевск, 2007. — С. 57.
Герои огненных лет. — Ярославль: Верхне-Волжское кн. изд., 1985.
Кузнецов Н. С. Великой славы светлая память. — Ижевск, 2012. — С. 41.
Кузнецов Н. С. Славы воинской творцы. — Ижевск: Удмуртия, 2005. — 358 с. — ISBN 5-7659-0292-8.
Кулемин И. Г. Героев наших имена. — Ижевск, 1975. — С. 12-14.
Наши земляки: Герои Советского Союза, Герои Российской Федерации, Полные кавалеры ордена Славы. — Ижевск, 1995. — С. 16.
Попов В. Г. Герои земли Ярославской. — Ярославль: Индиго, 2012. — Т. 5-6.

Чӧлсконъёс

Пётр Филиппович Берестов [ӟуч] «Герои страны» сайт.

Проект Удмуртской национальной библиотеки «Ими гордится Удмуртская земля».

[2] Деревня Берестово, относившаяся к Уватуклинской, затем — к Сям-Можгинской волости Малмыжского / Селтинского уезда, к Ново-Мултанской волости Селтинского / Ижевского уезда, в последующем входила в состав Чажинского / Гайнинского сельсоветов Удмуртиысь Сюмси ёросысь ; не сохранилась^[1].

[1] rus Берестово [ӟуч] Родная Вятка. Эскеремын 2019-09-29 арын

[3] Аптекарь П. Трагедия окружённых. // Военно-исторический архив. — 1998. — Выпуск 2. — С.196.

[4] Козинский А. Бои в районе Бородино в 1941—1942 годах. // Военно-исторический журнал. — № 9. — С.26-33.

[К 1]

[2]

[3]

[1]