Чувашова, Наталья Петровна
| Наталья Петровна Чувашова | |
|---|---|
 | |
| Вордӥськем нуналыз | 7-тӥ куарусёнэ 1916 |
| Вордӥськем интыез | |
| Кулон нуналыз | 24-тӥ шуркынмонэ 2003 (87 арес) |
| Кулэм интыез | |
| Кун | |
| Данъетъёсыз |
 |
Наталья Петровна Чувашова (7-тӥ куарусёнэ 1916, Катьырнакар губерния[d] — 24-тӥ шуркынмонэ 2003, Удмурт Элькун) — гурт возён удысысь азьмынӥсь. Быдӟым Атыкай оже пыриськем мурт. РСФСР-ысь Вылӥ Кенешысь 5-тӥ ӧтчамлэн депутатэз (1959—1963). Социалистической ужысь Герой (1960).
Улон сюресэз
Вордӥськиз Катьырнакар утемысь Арамиль посёлокын куанер крестьян семьяын. Атаез граждан ож дыръя быриз. Натальялы 8 арес дыръя, анаез соин ӵош Дэбес черкогуртэ выжиз, узыръёс дорын ужаз[1].
1929-тӥ арысен Наталья Чувашова узыр крестьян семьяын медъяськыса ужаны кутскиз. 1931-тӥ—1935-тӥ аръёсы «Муравейник» коммунаын кунян утись луыса ужаз, бӧрысь В. И. Ленин нимо колхозэ интыяськиз. 1935-тӥ—1936-тӥ аръёсы ёросысь колхозной школалэн курсъёсаз дышетскиз. 1936-тӥ—1939-тӥ аръёсы В. И. Ленин нимо колхозын кунян сюдӥз. 1939-тӥ—1941-тӥ аръёсы Ижысь сельхозтехникумын дышетскиз. Сое йылпумъямез бере, 1941-тӥ—1942-тӥ аръёсы, нош ик В. И. Ленин нимо колхозын кунян сюдӥсь вал[2].
1942-тӥ арын толсуре, ас мылкыдызъя, войнае пыриськон вылысь армие куриськиз. 1943-тӥ—1945-тӥ аръёсы Быдӟым Атыкай оже пыриськиз. Уйпал фронтысь Мурманскез утись противовоздушной обороная 361-тӥ зенитной артиллерийской полкын лагырчи но телефонист луыса служить кариз.
1945-тӥ арысен, Совето армиысь демобилизировать каремзы бере, Н. П. Чувашова Дэбес черкогуртэ берытскиз, В. И. Ленин нимо колхозын пудо вордон фермаен кивалтыны кутскиз. 1950-тӥ арысен ас куремезъя скал кыскисе выжтэмын вал. Наталья Петровна, скал кыскисьын ужакуз, бадӟым азинсконъёс лэсьтӥз, 1957-тӥ арын со борды юнматэм котькуд скаллэсь араз 3 сюрс 715 кило йӧл басьтӥз[3].
1958-тӥ арын 20-тӥ инвожое СССР-ысь Вылӥ Кенешлэн Президиумезлэн косэтэзъя Наталья Петровнаез «1957-тӥ арын ужын ӟеч тыршемез но пудо вордон удысын вылӥ азинсконъёс басьтэмез понна» Ленин орденэн пусйизы.
1959-тӥ арын Н. П. Чувашова Удмурт АССР-ысь дояркаос пӧлын йӧл кысконэз ӝутонъя но йӧллэсь асдунзэ кулэстонъя социалистической ӵошатсконлэн кичӧлтӥсез луиз. Н. П. Чувашова ӵошатсконын вормиз: 5 сюрс 683 кило йӧл кыскиз но центнер йӧллэсь асдунзэ 43 манетозь кулэстӥз[2].
1960-тӥ арын 7-тӥ южтолэзе СССР-ысь Вылӥ Кенешлэн Президиумезлэн косэтэзъя «Калыккуспо нылкышно нуналлэсь 50 арзэ пусйыса, уж дурын дано азинсконъёсыз но пайдаё мерлыко ужез понна» Наталья Петровна Чувашовалы Социалистической ужысь Герой ним сётэмын, Ленин орденэн но «Серп но Молот» зарни медален пусъемын[1].
1961-тӥ—1967-тӥ аръёсы Н. П. Чувашова Дэбес ёросысь В. И. Ленин нимо колхозын молочно-товарной фермаен кивалтӥз, кунян сюдӥсь но техник-осеменатор луыса ужаз.
Н. П. Чувашоваез КПСС-лэн Дэбесысь райкомаз но Дэбес ёросысь калык депутатъёслэн кенешазы трос пол бырйылӥзы. РСФСР-ысь Вылӥ Кенешлэн 5-тӥ ӧтчамезлэн депутатэз (1959—1963) вал. КПСС-лэн XXI съездысьтыз делегат (1959)[3].
1967-тӥ арын Н. П. Чувашова пенсие потӥз[3].
2003-тӥ арын 24-тӥ шуркынмонэ улонысь кошкиз. Ватэмын Дэбес черкогуртын.
Дано нимъёсыз
- Ленинлэн 2 орденэз
- Отечественной ожлэн I степенё орденэз
- «За оборону Советского Заполярья» медаль
- Дэбес ёрослэн дано кунмуртэз (15.10.1999 — «трос аръёс ӵоже усто ужамез понна, ёросысь гурт возёсын вылӥ тыршемез, шаермес утёнэ, егитъёсты визьнодан уже мыло-кыдо пыриськемез понна»).
Валэктонъёс
- ↑ 1 2 Почётные граждане [ӟуч] МО Дебесский район.
- ↑ 1 2 Чувашова Наталья Петровна
- ↑ 1 2 3 7 сентября 1916 года родилась Герой Социалистического Труда Наталья Петровна Чувашова [ӟуч] Региональный центр патриотического воспитания имени Героя России И.О. Родобольского.