Сунцова, Дарья Юрьевна

Рувикиын таӵе фамилиен мукет муртъёс сярысь гожтосъёс вань. Учке: Сунцов.

Дарья Юрьевна Сунцова
Удмурт Элькун Кивалтэтлэн тӧроезлэн воштӥсез.Росси Федерацилэн Президентэз улсын Удмурт Элькунлэн Тӧроезлэн оскем муртэз.
2024-тӥ арысен — али дыре
Вордӥськемын	25-тӥ куартолэзе 1987({{padleft:1987|4|0}}-{{padleft:5|2|0}}-{{padleft:25|2|0}}) (39 лет) Ульяновск, РСФСР, СССР
Дышетскемез	Экономикая вылӥ школа[d] Росси Федерацилэн Кивалтэтэз улсын кылдытэм Финансовой университет[d] РАНХиГС[d]
Ужан интыез	Удмурт Элькун Кивалтэт

Дарья Юрьевна Сунцова (ворд. 25-тӥ куартолэзе 1987, Ульяновск) ― Росси Федерацилэн Президентэз улсын Удмурт Элькунлэн Тӧроезлэн оскем муртэз, Элькун Кивалтэтлэн Тӧроезлэн воштӥсез (2024).

Улон сюресэз

Вордӥськиз 1987-тӥ арын 25-тӥ куартолэзе Ульяновскын. Улэ Москваын.

Дышетскемез

2012-тӥ арын «Экономикая вылӥ школа» нимо Исследованиосъя йӧскалык университетэз «Деловая и политическая журналистика» ӧнеръя йылпумъяз. Собере Росси Федерацилэн Президентэз улсын Калык хозяйствоя но кун управления академиын но Росси Федерацилэн Кивалтэтэз улсын Финансовой университетын дышетскиз.

Ужудысэз

2010-тӥ арысен «Опора России» Огъя росси мерлыко огазеяськонлэн нырысь президиумезлэн ёзчиез луыса, ужбергатонэз вӧлмытон ужпумъёс но мерлыко проектъёс бордын тыршиз, собере правлениезлэн ёзчиез луиз. «Стратеги кичӧлтонъёсъя агентство» АНО-лэн эксперт кенешезлэн ёзчиез, «Бизнес-Успех» Йӧскалык премилэн оргкомитетэныз кивалтӥз, кудӥз 10 ар куспын быдэс Россиысь ог 100 сюрс пала покчи но шоро-куспо ужбергатонысь огмуртъёсты огазеяз.

2015—2023-тӥ аръёсы — ООО «Территория бизнеса» ООО-лэн генеральной директорез. Кун Думаысь Покчи но шоро-куспо ужбергатонъя эксперт кенешлэн ёзчиез («СВО-е пыриськемъёслы юрттэт сётонъя» проектной группалэн ёзчиез), Росси Федерациысь Кун Кенешлэн «Эффективная и конкурентная экономика» направления эксперт группаезлэн ужась группаезлэн ёзчиез. Эксперт чотын инфраструктураез азинтонъя покчи но шоро-куспо ужбергатонниослы юрттонъя проектъёсын выриз: кун программаослэсь ӟечлыксэс эскеронъя научно-исследовательской ужъёс гожтӥз. Экономикаез азинтонъя министерствоысь МСП-ослы юрттон программаосъя экспертной группалэн ёзчиез, инвестициосъя муниципал стандартэз кылдытӥсьёс пӧлысь одӥгез луэ.

Сунцовалэн бизнес-опытэз событийной маркетинген герӟаськемын. Со Россилэн пӧртэм улосъёсаз ог 100 пала деловой ужрадъёс ортчытӥз, кылсярысь, Москваын футболэн шудонъя Дунне Чемпионатэз радъянэ пыриськиз. Озьы ик асьме ужбергатӥсьёслы кунгож сьӧрын адӟытонъёс но бизнесс-миссиос ортчытыны юрттӥськылӥз.

2023-тӥ арын гудырикошконысен — Удмурт Элькунлэн Тӧроезлэн советникез.

2024-тӥ арын 18-тӥ толшоре Росси Федерацилэн Президентэз улсын Удмурт Элькунлэн Тӧроезлэн оскем муртэзлэсь огдырлы ужзэ быдэсъясе но Элькун Кивалтэтлэн Тӧроезлы огдырлы воштӥсе кутэмын. Со арын ик 26-тӥ южтолэзе Удмурт Элькунысь Кун Кенешлэн дас ньылетӥ сессиезлэн кенешоназ депутатъёс Сунцовалэсь кандидатуразэ эскеризы. Сое ӵектӥз элькунлэн тӧроез Александр Бречалов. Кун Кенешын эскеремлэсь азьпал Дарья Сунцовалэсь кандидатуразэ эскеризы Кун Кенешлэн яланлыко ӧриослэн но фракциослэн кенешонъёсазы. Лушукем куара сётонэ 40 депутат пыриськиз, соос пӧлысь 8-эз Дарья Сунцоывалы «пумит» куаразэс сётӥзы.

27-тӥ южтолэзе Дарья Сунцова Росси Федерацилэн Президентэз улсын Удмурт Элькунлэн Тӧроезлэн оскем муртэз, Элькун Кивалтэтлэн Тӧроезлэн воштӥсез интыуже юнматэмын.

Выль постпред ужоскетаз валтӥсь ужан удысъёссэ пусйиз:

• «Удмуртия» брендэз Росси но калыккуспо уровене поттон;
• Семейной туризмез азинтон;
• Удмурт землячестволы юрттон;
• Инвестициос кыскон но йӧскалык проектъёсты быдэстон.

Гожъям ужъёсыз

Газет-журналъёсы статьяос гожъям сяна, Сунцова «Никогда не сдавайся. Антикризисные стратегии российских предпринимателей» 2020-тӥ арын потэм бестселлерлэн авторез луэ.

Валэктонъёс