Степанов, Иван Федорович

Иван Федорович Степанов
Иван Федорович Степанов
Вордӥськем дырыз	15-тӥ оштолэзе 1924
Вордӥськем интыез	Шаркан ёрос
Кулэм дырыз	22-тӥ коньывуонэ 1943 (19 арес)
Кулэм интыез	Ходоров[d], Мироновский район[d], Украин ССР, СССР;
Кунмуртлыкез	СССР
Кыӵе войскоез	артиллерия[d]
Служить карон аръёсыз	1942—1943
Частез	981-тӥ зенитно-артиллерийской полк
Ожмаськонъёс/ожъёс	Быдӟым Атыкай ож;
	Медиафайлъёс РувикиМедиа пушкын

Степанов Иван Фёдорович (1924—1943) — Быдӟым оже пыриськем мурт, Совето Союзысь Герой.

Улон сюресэз

Вордӥськиз 1924-тӥ арын 15-тӥ оштолэзе Заречный Билиб гуртын (али Шаркан ёросэ пыре) удмурт семьяын. 1936-тӥ арысен улӥз Вотка ёросысь Липовка гуртын. 7 классэз йылпумъямез бере колхозын ужаз^[1].

1942-тӥ арын Вотка ёросысь военкомат пыр армие басьтэмын. Фронтын — 1943-тӥ арын толшорысен. Ожмаськиз Воронеж фронтын 981-тӥ зенитной артиллерийской полкын, пыриськиз Курск но Белгород понна ожъёсы. 1943-тӥ арын 5-тӥ гудырикошконэ Степановлэн расчётэз Ю-88 немец бомбардировщикез уськытӥз, удмурт ожгарчиез «За отвагу» медален пусйизы^[1].

Бӧрысьгес 40-тӥ армия Левобережной Украинаез мозмытонэ пыриськиз, Пирятин, Яготин, Переяслав каръёсыз мозмытэмез бере, 23-тӥ куарусёнэ ӝытазе, Днепр доры вуиз. Асманов младшой сержантлэн зенитной экипажез, кудаз служить кариз Степанов, со вакытлы куинь немец самолётъёсты уськытӥз.

24-тӥ куарусёнэ ӵукналы 161-тӥ но 337-тӥ стрелковой дивизиосысь ожгарчиос, Днепр вамен выжыса, 3-4 иськеме азьлань ортчыса, Луковица но Великий Букрин гуртъёсты басьтӥзы.

1943-тӥ арын 28-тӥ куарусёнэ 981-тӥ зенитной артиллерийской полкысь 4-тӥ батарея Днепрлэн бур палаз выжон сярысь приказ басьтӥз. 29-тӥ сентябре уйин, тушмонлэн ыбылӥськонэз улын, расчёт паромен шур вамен потӥз но Зарубенцы гурт доры интыяськиз. Соос сьӧры батареяысь мукет пушкаос ортчизы, собере быдэсыз 981-тӥ полк. Со нуналэ ик тушмонъёс, мессершмиттъёслэн юрттэмзыя, плацдармысь стрелковой частьёсмы вылэ мерскизы. Зенитчикъёс самолётъёсыз ыбылыса пумитазы, Асмановлэн расчётэз одӥгзэ уськытӥз.

Иван Степанов висъяськиз Киев улосысь Ходоров черкогурт дорын Днепр понна ожын. 1943-тӥ арын 22-тӥ коньывуонэ расчёт, кудаз ожмаськиз Степанов, Днепр вамен выжыны турттӥз. Со вакытэ Ю-88 27 бомбардировщикъёс вуизы. Соос батарея вылэ бомбаос куяны кутскизы. Огзэ орудизэс пуштытӥзы, расчёт быриз. Орудилэн командирез сӧсырмиз. Степанов, огназ кыльыса, ыбылонзэ азьланьтӥз, но тушмон снаряд со вылэ но вуиз^[2].

СССР-ысь Вылӥ Кенешлэн президиумезлэн 1943-тӥ арын 24-тӥ толсуре поттэм косэтэзъя Днепрлэн ярдураз ожмаськонъёсын ассэ геройлыко но сэзь возьматэмез понна Асмановлэн быдэс расчётэз, отчы пыриз Иван Фёдорович Степанов но, Совето Союзысь Герой нимын пусъемын вал.

Иван Степановез ватӥзы Киев улосысь Мироновка ёросысь Ходоров черкогуртын^[1].

Данъетъёсыз

Совето Союзысь Герой (24.12.1943)
Ленин орден
«За отвагу» медаль^[2]

Буре ваён

Киев улосысь Мироновка ёросысь Ходоров черкогуртысь синпелет вылын, Ижысь Ялан ӝуась тыл дорысь буре ваён комплексын, Вотка ёросысь Большая Кивара гуртын, Воткаысь Слава аллеяын, Шарканысь Вормон скверысь Отечествоез утисьёслы синпелетын Совето Союзысь Геройлэн Иван Степановлэн нимыз пусъемын.
Шарканысь урам Геройлэсь нимзэ нуллэ^[1].

Валэктонъёс

↑ ¹ ² ³ ⁴ Памяти героя МО «Воткинский район»
↑ ¹ ² Степанов Иван Фёдорович Герои Отечества

Литература

Герои и подвиги. — М.: Воениздат, 1978. — Кн. 6.
Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
Герои Советского Союза. Полные кавалеры ордена Славы: биобиблиографический указатель. — Ижевск, 2015. — С. 148—150.
ГСС, ГРФ, ПКОС наши земляки. — Ижевск, 1995.
Кузнецов Н. С. Степанов Иван Федорович // Воинская слава Удмуртии / Н. С. Кузнецов. — Ижевск, 2009. — С. 295—296 : фот.
Кулёмин И. Г. Героев наших имена. — Ижевск, 1975.
Степанов Иван Федорович // Герои Советского Союза, Герои Российской Федерации, полные кавалеры ордена Славы — наши земляки. — Ижевск, 1995. — С. 162 : фот.
Степанов С. Жизнь короткая — слава вечная // Вордскем кыл. — 2005. — № 7. — С. 34-37.
Удмуртская Республика: энциклопедия. — Ижевск, 2008. — C. 631.

Чӧлсконъёс

Иван Фёдорович Степанов [ӟуч] «Герои страны» сайт. Эскеремын 2014-07-09 арын

[:1-1] ¹ ² ³ ⁴ Памяти героя МО «Воткинский район»

[:0-2] ¹ ² Степанов Иван Фёдорович Герои Отечества

[1]

[2]