Азьвыл Окружной судлэн юртэз (Сарапул)
| Азьвыл Окружной судлэн юртэз | |
|---|---|
 | |
| Юрт сярысь ивортон | |
| Интыяськемез | Сарапул |
| Кун | |
| Архитекторез | тодмотэм |
| Заказчикез | куинетӥ гильдиысь купеч Е. Татаринов |
| Архитектураысь стиль | бер классицизм |
| Статусэз |
 ОКН № 1800162000 |
 |
|
 Медиафайлъёс РувикиМедиа пушкын | |
Азьвыл Окружной судлэн юртэз (ӟуч: Здание бывшего Окружного суда (Сарапул)) — Удмуртиысь Сарапул шоры 1850-тӥ аръёсы пуктэм ньыль этажъем юрт. Трос пол выльдэмын вал. Лулчеберет удысысь улосэн утёно объектъёс пӧлы пыре. Адресэз: Горд площадь, 8. 2024-тӥ арын югдуръя, юртын карлэн администрациез интыяське.
Историез
1850-тӥ аръёсы 3-тӥ гильдиысь сарапул купеч Евстрат Татаринов Сарапулысь Вознесенской площадьын аслыз корка пуктыны кутскиз, но, пумозяз вуттытэк ик, сое карлы 7 сюрс азьвесь манетэн вузаз. Кар кивалтэт «ульча палась борддорзэ кесяно но выльысь ӝутоно» кариськиз: юртлэн вылтусыз но берпуметӥ, куинетӥ, этажысь планировкаез ӧз яра. Выльдӥськон борды 1853-тӥ арын басьтӥськизы. Тупатъян ужъёс кык ар ӵоже мынӥзы, но йылаз-пумаз вуттэмын ӧй вал. 1874-тӥ арын гинэ сарапул архитекторлэн Николай Акимовлэн проектэзъя выльысь лэсьтӥськон борды кутскизы[1][2]. Юртъерез окружной судлы сётоно кариськизы — со вакытэ судъёс тужгес усто юртъёсын интыяськылӥзы[3].
1874-тӥ арын 1-тӥ пӧсьтолэзе усьтӥськиз Сарапулысь окружной суд. Татын Ватка губерниысь куинь уездъёсысь ужъёсты эскерылӥзы: Сарапул, Алабго но Малмыж[4]. Суд кык ёзъёслэсь вал: уголовной но граждан[3]. Ӵапак татын XIX даур пумын данэ потэм Мултан ужъя суд ортчиз: адями курбон сётонын янгыше уськытэм удмуртъёс пала дурбасьтыса Владимир Короленко вераськиз[5][6].
1908-тӥ арын Сарапулысь окружной судлэн коллегиез юртэз выльдонъя ӵектонэн потӥз, соя куинетӥ этажзэ выль сямен лэсьтыны, шундыӝужуан но шундыпуксён ласянь ризалитъёс пуктыны, озьы пушсэ паськытатыны чакламын вал. Та вазиськонэн валче Ватка губерниысь правление архитекторъёслэсь нимысьтыз комиссия кылдытӥз, отчы пыризы Я. П. Максимович, М. А. Бухгольц но И. А. Чарушин. 1909-тӥ арын Окружной судлэн юртэз выльдэмын вал: вылтусыз быдэсак воштӥськиз (туала югдрулы тупа), озьы ик пушкысьтыз планировкаез мукет луиз[1][2].
1912-тӥ—1913-тӥ аръёсы ньылетӥ этаж ӝутэмын[3].
1917-тӥ арын, винаен лавкаосты куашкатыкузы-бушатыкузы, юртъерын тылпу пуромиз. Сарапуллэн историяз та вакыт «Сморкалов мятеж» сямен кылиз[5][6]. 1926-тӥ—1927-тӥ аръёсы юртъерез М. В. Арнштам окружной инженерлэн проектэзъя выльысь тупатъязы[5]. Татын Советъёслэн юртсы интыяськиз.
1979-тӥ арын толсуре Удмурт АССР-ысь Министръёслэн Кенешсылэн пуктэтсыя азьвыл Окружной судлэн юртэз лулчеберет удысысь улосэн утёнэ объектъёс пӧлы пыртэмын[7].
2024-тӥ арын югдуръя, юртын Сарапул карлэн администрациез но Сарапул кар дума интыясько[5][6].
Архитектураез
Татариновлэн юртэз аслаз быдӟалаеныз котырысь вань пуктӥськемъёслэсь зол висъяськылӥз. Со прямоугольник выллем симметричной быдӟалаем лэсьтэмын. Юртлэсь анфиладной планировказэ кылдытӥсь архитекторлэн нимыз тодмо ӧвӧл[2].
Юртлэн нырысетӥ чеберъям люкетъёсыз бер классицизм амалъя лэсьтэмын. Юрт шортӥ педпал ласянь пужыятыса быдэстэм вырйылэз (ризалит) вань, со тубато ӝужыт аттикен йылпумъяське. Со вырйыл кыкетӥ этажысь лента выллем лэсьтэм рустэн но куинетӥ этажысь осьёс куспысь лопаткаосын пусъемын. Прямоугольник выллем укноосыз, нырысетӥ этажаз сяна, наличникъёсын котыртэмын. Куинетӥ этажысь наличникъёслэн вылъёссы (ӟуч: фланги) чеберъямын лякылэм розеткаосын но кронштейнъёс вылэ юнматэм профилья быдэстэм сандрикъёсын[1][2].
Валэктонъёс
- ↑ 1 2 3 Курочкин М. В. Архитектурное наследие здания окружного суда в Сарапуле [ӟуч] Кировская областная научная библиотека им. А. И. Герцена. Эскеремын 04-11-2025 арын
- ↑ 1 2 3 4 Здание Окружного Суда (ныне Администрация города) [ӟуч] drive2.ru (16-01-2018). Эскеремын 04-11-2025 арын
- ↑ 1 2 3 Открыт Сарапульский окружной суд [ӟуч] Централизованная библиотечная система г. Сарапул. Эскеремын 04-11-2025 арын
- ↑ Объекты культурного наследия федерального и регионального значения [ӟуч] МО «Город Сарапул». Эскеремын 04-11-2025 арын
- ↑ 1 2 3 4 Здание бывшего Окружного суда [ӟуч] Центр развития туризма Удмуртской Республики. Эскеремын 04-11-2025 арын
- ↑ 1 2 3 Здание бывшего Окружного Суда [ӟуч] UDM.travel. Эскеремын 04-11-2025 арын
- ↑ Памятник архитектуры — здание бывшего окружного суда [ӟуч] kartarf.ru. Эскеремын 04-11-2025 арын
Литература
- М. Глухова. Из истории Сарапульского окружного суда // Красное Прикамье. — 2001. — 28 июля.
- Окружной суд в стиле неоклассицизма // Известия Удм. Респ.. — 2010. — 9 апреля (№ 37). — С. 3.
- Сарапул. Документы и материалы. 1596—1985 / Р. А. Ислентьева и др.. — Ижевск: Удмуртия, 1987. — 267 с.
- Н. Хуснетдинова. Сарапульский суд отметил своё 140-летие // Красное Прикамье. — 2014. — 3 июля. — С. 2.
- И. Шадрина. Наш суд был одним из первых в России // Красное Прикамье. — 2002. — 29 июня. — С. 2.
- А. А. Шепталин. Сарапул. Сарапулъ. Сарапуль: Историко-краеведческие очерки. — Ижевск: Удмуртия, 2007. — 375 с.
- М. А. Шитова. Сарапул как типичный уездный город периода капитализма. — Ижевск: Удмуртия, 1991. — 49 с.
- М. Шитова, О. Дмитриева. Купеческий Сарапул // Памятники отечества. — 1995. — № 1/2. — С. 104.