Н. В. Смагинлэн юртэз
| Н. В. Смагинлэн юртэз | |
|---|---|
 | |
| Юрт сярысь ивортон | |
| Интыяськемез | Сарапул |
| Кун | |
| Архитекторез | Чарушин Иван Аполлонович |
| Лэсьтыны кутскемын | 1910-тӥ аръёс |
| Архитектураысь стиль | модерн |
 |
|
Н. В. Смагинлэн юртэз (ӟуч: Дом Н. В. Смагина) — Сарапулысь 1910-тӥ аръёсы ӝутэм улыно-вылыно излэсь юрт. Лулчеберетысь федерал инлыкен утёно лэсьтосъёс пӧлы пыре. Интыяськем адресэз: Первомайской ульча, 18-тӥ юрт.
Историез
Николай Васильевич Смагин город йырлэн юртэз 1910-тӥ аръёсы пуктэмын вал, Сарапулысь со вакытысь пуктӥськемъёслэсь со висъяськылӥз. Соку ик корка ву, канализация, тыл но телефон пыртэмын ни вал, пыласькон висъетъёс лэсьтэмын вал — тазьы тужгес узыръёс гинэ улыны быгатылӥзы. Нырысетӥ этажын сиён пӧран кышнопал, юрттӥсьёслэн-ляльчиослэн висъетъёссы, коммерция ужпумъёсъя кенешыны вуэмъёсын пумиськыны кабинетъёс вал[1][2].
Но Смагинъёс особнякын кема ӧз улэ: 1917-тӥ арын пуромем революция бере юртэз национализация чотын кунлы сётӥзы, со одӥг ведомствоысь мукетаз выжылӥз. Озьы Граждан ож вакытэ татын РККА-лэн кыкетӥ армиезлэн штабез интыяськылӥз, отчы докладэн Надежда Крупская вуылӥз[3]. Отӥяз юртын таӵе ведомствоослэн ужасьёсы пукылӥзы: ЧК, ОГПУ, НКВД, КГБ, милиция, ГИБДД[1]. Смагин юртлэн вӧл-вӧл висъетъёсыз пичи ужан кабинетъёслы пӧрмытэмын вал, та юртъерлэсь пушсэ уродмытӥз[4].
Россиысь Президентлэн 1995-тӥ арын 20-тӥ тулыспалэ кутэм «Историысь но лулчеберетысь федерал инлыкен утёно лэсьтосъёслэсь списоксэс юнматон сярысь» 176 номеро Указэныз Н. В. Смагинлэн юртэз лулчеберет удысысь федерал инлыкен утёно лэсьтосъёс пӧлы пыртэмын[5].
2024-тӥ арын ивортонъёсъя, историысь юрт буш улэ, со тупатъямез кулэ каре[2].
Архитектураез
Сарапулысь Смагинлэсь юртъерзэ лэсьтыны проект гожтӥз лыдъяське Ваткаысь тодмо архитектор Иван Чарушин. Юртъер модерн стилья пуктэмын[1]. Со ассиметричной луэменыз, аспӧртэм быдӟалаеныз но тумошо силуэтэныз висъяське. Валтӥсь пыронэз ӝыныё колоннаосын чеберъям композициен, лякылэм декорен но аспӧртэм укноосын котыртэмын. Юртысь укноос ог-огзылэсь пӧртэм пасьталаенызы висъясько, наличникъёссы ӧвӧл[2][1].
Башнялэн липетэз вандэм шатёр выллем лэсьтэмын. Юртлэн бур палаз из балюстрадалэсь кык бадӟым верандаос пуктэмын, солэн кутӥськонэз но корт ньӧрлэсь кенерез вань. Нырысь-валысь корка вӧзын бадӟым сад но трос пуктӥськемъёс вал: складъёс, кеносъёс, гулбечъёс, чуланъёс, вал гид, сиён пӧран сэрег, мисьтаськон висъет но мукет[1].
Валэктонъёс
- ↑ 1 2 3 4 5 Дом купца Смагина (1910 год) [ӟуч] МО "Город Сарапул".
- ↑ 1 2 3 Дом Николая Васильевича Смагина — особняк начала XX века в стиле модерн, Историческийбагаж.рф. Эскеремын: 4 пӧсьтолэзе 2025 арын.
- ↑ Городской особняк Н.В. Смагина [ӟуч] Сарапульский политехнический институт.
- ↑ Объекты культурного наследия федерального и регионального значения МО "Город Сарапул".
- ↑ Дом Смагина в городе на ощупь Фонд президентских грантов.