Насибуллин, Риф Шакрисламович
| Риф Шакрисламович Насибуллин | |
|---|---|
 | |
| Вордӥськем дырыз | 15-тӥ коньывуонэ 1936 (89 арес) |
| Вордӥськем интыез | Четырман гурт, Янаул ёрос, Башкир АССР |
| Кун | СССР, Россия |
| Тодос удысэз | диалектология, литературоведение |
| Ужан интыез | Удмурт кун университет |
| Учёной степенез | Филологи наукаосъя доктор |
| Учёной званиез | профессор |
| Научной руководитель | В. И. Лыткин |
Риф Шакрисла́мович Насибу́ллин (1936-тӥ ар, Четырман, Янаул ёрос, Башкир АССР) — тодмо удмурт кылчи, берыктӥсь, диалектология но кылтодон география удысысь специалист, Удмурт кун университетысь математической кылтодонъя лабораториен кивалтӥсь. Филологи наукаосъя доктор, профессор.
Удмуртиысь наука удысын дано ужась (1996), Россиысь вылӥ дышетон удысын дано ужась (2001)[1].
Улон сюресэз
Вордӥськиз Башкириысь Янаул ёросысь Четырман гуртын. Покчи классъёсын тодон-валан басьтӥз удмурт кылын, 5-7 классъёсын – бигер кылын, 8-10 классъёсын – ӟуч кылын[2][3].
1960-тӥ арын, Бирскысь педагогикая кун инситутэз йылпумъямез бере, ужаны интыяськиз Башкириысь Татышлы ёрос газетэ бигерысь удмуртэ берыктӥсь луыса[1][2][3].
1961–1968-тӥ аръёсы ӟуч, удмурт но немец кылъя дышетӥсь луыса Янаул но Калтасы ёросъёсысь школаосын ужаз. Башкириысь удмурт вераськетъёсъя фольклор материал бичаз, кыллюкам радъяз, кудӥз Риф Шакрисламовичлы наукае сюрес усьтӥз[2][3].
Т.И. Тепляшиналэн но В.И. Алатыревлэн дэмламъёсызъя Ижкаре выже, аспирантурае пырыны дасяське. Ужа «Дась лу!» газетын[1][2].
1969–1972-тӥ аръёсы В.И. Лыткинлэн кивалтэмез улсын Мускоысь Кылтодонъя институтын аспирантураын дышетске[2].
1972–1983-тӥ аръёсы Удмуртиысь кылъя НИИ-ын тырше.
1983-тӥ арысен Удмурт кун университетысь археологъёслэн тодос лабораториязы Р.Д. Голдиналэн кивалтэмез улсын ужа.
1992-тӥ арысен кивалтэ УдГУ-ысь лингвистикая лабораториен. Кема дыр ӵоже люкам материалъёссэ радъяны кутске Удмурт кылъя Диалектической атласэ[3].
1999-тӥ арын филологи наукаосъя доктор луэ[2][3].
Кивалтэмез улсын Кузебай Гердлэн творчествоез математической амалъя эскеремын вал[2][3].
Тодос дуннеын Риф Шакрисламовичез удмурт диалектъёсты эскерисен тодо. 2009-тӥ арын куартолэзе Р. Ш. Насибуллинлэн лабораториез поттэ трос томъем Удмурт кыллэсь диалектологической атласэзлэсь нырысетӥ книгазэ. Кыкетӥез книга потэмын 2011-тӥ арын[2].
300-лэсь ятыр статьяослэн авторзы[3].
Линкъёс
- ↑ 1 2 3 М.В.Зайнуллин (10.10.2019) Насибуллин Риф Шакрисламович [ӟуч] Энциклопедический портал "Башкортостан". Эскеремын 25.09.2025 арын
- ↑ 1 2 3 4 5 6 7 8 Насибуллин Риф Шакрисламович [ӟуч] udm.travel. Эскеремын 25.09.2025 арын
- ↑ 1 2 3 4 5 6 7 Насибуллин Р.Ш. [ӟуч] Финно-угорский мир. Эскеремын 25.09.2025 арын