Миннигараева, Елена Васильевна

Рувикиын таӵе фамилиен мукет муртъёс сярысь гожтосъёс вань. Учке: Миннигараев.

Елена Васильевна Миннигараева
Вордӥськем дырыз	25-тӥ гудырикошконэ 1976({{padleft:1976|4|0}}-{{padleft:8|2|0}}-{{padleft:25|2|0}}) (49 лет)
Вордӥськем интыез	Пичи Пурга, Удмурт Автономной Советской Социалистической Республика, РСФСР, СССР
Кунмуртлыкез (подданство)	СССР  Россия
Ужудысэз	гожъяськись, журналист

Еле́на Васи́льевна Миннигара́ева (ворд. Панфи́лова; ворд. 25-тӥ гудырикошконэ 1976, Пичи Пурга, Удмурт Автономной Советской Социалистической Республика — росси гожъяськись, журналист, публицист, мерлыко ужась. «Удмурт дунне» элькун газетлэн валтӥсь редакторез. Удмурт Элькунысь дано журналист, Россиысь Журналистъёслэн огазеяськонысьтызы ёзчи, Удмуртиысь Гожъяськисьёслэн огазеяськонысьтызы ёзчи.

Улон сюресэз

Дышетскемез

Вордӥськиз 1976-тӥ арын 25-тӥ гудырикошконэ Удмурт АССР-ысь Пичи Пурга черкогуртын. Пичи Пурга ёросысь Сосновка гуртын будӥз. Ильинскысь шор ёзо школаез йылпумъяз. Школаын дышетскон вакытаз литературая но творчествоя «Пурга гуръёс» ёрос огазеяськонэ ветлӥз, кивалтӥз соин удмурт писатель Владимир Самсонов.

1991-тӥ арысен Можга педучилищеын дышетскиз. Сое горд дипломен йылпумъяз но 1995-тӥ арын Удмурт кун университетысь удмурт филологияя факультетэ пыриз. Пӧртэм пумо научно-практической студент конференциосы пыриськиз. «Кенеш» журналын но мукет элькун изданиосын печатласькиз. Гожтэм ужъёсыз «Финн-угор калыкъёслэн историзы но лулчеберетсы» (ӟуч: «История и культура финно-угорских народов») бичетэ сюризы.

Ужез

2001-тӥ арын Елена Миннигараева ужан сюрессэ «Удмурт дунне» газетлэн редакцияз мытӥз, политикая но экономикая ёзын тыршиз, ӝоген парламент корреспондент луиз. Толэзьлы быдэ потӥсь кӧня ке полосаосты кылдытӥз но нуиз: егитъёсты дышетонлы, нодъянлы, финн-угор калыкъёслэн но Удмуртиысь калыкъёслэн историзылы но лулчеберетсылы сӥзем «Тангыра», «Ӧрак» но мукет.

2000-тӥ аръёслэн кутсконазы Саранскын потӥсь «Финн-угор газетлэн» (ӟуч: «Финно-угорская газета») Удмурт Элькунлэсь собкорез но координаторез вал.

2010-тӥ арысен Миннигараева «Удмурт дунне» газетлэн валтӥсь редакторезлэн воштӥсез луиз. Озьы ик 2010-тӥ—2012-тӥ аръёсы «Удмурт дунне» газетлэн «Герд» ватсэтэзлэн (вань удмуртъёслэн «Удмурт Кенеш» ассоциацизылэн газетэз) валтӥсь редакторез вал.

2016-тӥ арын «Удмурт дунне» редакциын егит гожъяськисьёс понна кылдытӥз литературая но творчествоя «Ингож» студия. Студилэн ужамез улсын карысь пӧртэм интыосын олокыӵе но темаослы сӥзем пумиськонъёс но котырес ӝӧкъёс радъяськизы, отчы профессиональной гожъяськисьёс, кылбурчиос, драматургъёс, литературоведъёс пыриськылӥзы.

2021-тӥ арысен Елена Миннигараева «Удмурт дунне» газетлэн валтӥсь редакторез луэ.

Мерлыко ужез

Елена Миннигараева студент вакытысеныз мерлыко уже пыриськиз. Педучилищеын дышетскыкуз ик, сое «Удмурт Кенеш» ассоциацилэн студентъёслэсь кылдытэм ёзэзлы тӧрое бырйизы. 1994-тӥ арын вань удмуртъёслэн ӧтчамазы со тужгес егитэз делегат вал.

Бератаз уно пол финн-угор ужрадъёсы пыриськылӥз, Россиысь финн-угор калыкъёслэн ассоциацизылэн ӧтчамъёсаз сое эксперт но доклад лыдӟись чот ӧтчаллязы, ревизияя комиссияз ёзчие бырйылӥзы. Вань удмуртъёслэн «Удмурт Кенеш» ассоциацизылэн ужаз пыриське, тӧролэн воштӥсез но правленилэн ёзчиез луэ, озьы ик Мускоысь «Огазеям гуманитарной издательстволэн» (ӟуч: «Объединённое гуманитарное издательство») ужаз пыриське.

2020-тӥ арын Елена Миннигараева «Удмурт нылкышно кенеше» тӧрое быръемын. Со кивалтэм улсын огазеяськон Удмуртилэн Тӧроезлэн «Данъян» (ӟуч: «Признание») премиеныз пусъемын.

Семьяез

Елена Миннигараева (ныл фамилиез — Панфилова) быземын. Кык пиналъёсыз.

Творчествоез

Елена Миннигараева кылбуръёс, веросъёс, выжыкылъёс, повестьёс, новеллаос гожъя, таӵе газетъёсын но журналъёсын печатлаське: «Кенеш», «Инвожо», «Удмурт дунне», «Литературная газета». Нимысьтыз произведениосыз пыризы антологиосы: «Антология удмуртской литературы (прозы) 1890—2010 годов» (Таллин, 2012), «Современная литература народов России» (Муско, 2019), «Туала удмурт проза» (Ижкар, 2020), «Туала удмурт нылпи литература» (Ижкар, 2020), «Современный удмуртский рассказ. Антология» (Муско, 2022) но мукет. Куд-ог веросъёсыз ӟуч, эстон, финн кылъёсы берыктэмын. Мукет кылын гожъяськись авторъёслэсь произведениоссэс удмурт кылэ берыкъя.

2009-тӥ арын Сургутын ортчем Россиысь егит гожъяськисьёслэн кенешоназы пыриськиз.

Библиография

Е. Миннигараева ньыль книгаослэн авторзы луэ. Нырысетӥ кык книгаосыз Панфилова ныл фамилиеныз потэмын.

• Панфилова Е. В. Мумы. — Ижевск: Удмуртия, 2008. — 63 с. — 500 экз. — ISBN 978-5-7659-0435-0.
• Панфилова Е. В. Мон — улӥсько!. — Ижевск: Инвожо, 2010. — 83 с. — 500 экз.
• Миннигараева Е. В. Сьӧд сюлык. — Ижевск: Удмуртия, 2016. — 142 с. — ISBN 978-5-7659-0878-5.
• Миннигараева Е. В. 69 ар ортчыса, яке кытчы кошко дэймонъёс?. — Ижевск: Удмуртия, 2019. — 93 с. — 500 экз. — ISBN 978-5-7659-1022-1.

Данъетъёсыз

• 1998 — Удмурт Элькунысь Егитъёсын ужанъя кун комитетлэн Данъян грамотаез;
• 2002 — М. Кастрен нимо финн лулчеберетъя обществолэн журналистикая премиез;
• 2002 — Журналистъёс куспын радъям «Трос выжы калыко Удмуртия» премилэн I степенё лауреатэз;
• 2003 — Удмурт Элькунысь Йӧскалык политикая министерстволэн Данъян грамотаез;
• 2007 — Удмурт Элькунысь Лулчеберетъя, печатья но ивор вӧлмытонъя министерстволэн Данъян грамотаез;
• 2009 — М. Кастрен нимо финн лулчеберетъя обществолэн журналистикая валтӥсь премиез;
• 2009 — Удмурт Элькунысь Кун Кенешлэн Таукаронэз;
• 2010 — Удмурт Элькунысь Правительстволэн Данъян грамотаез;
• 2011 — «Этносфера» журналэн радъям «Йӧскалык темаез тужгес ӟеч возьматэм понна» конкурслэн лауреатэз;
• 2015 — Россиысь Журналистъёслэн огазеяськонзылэн Данъян грамотаез;
• 2015 — «Удмурт Элькунысь Кун Кенешлы 20 ар» синпель медаль;
• 2016 — Э. Батуев нимо йӧскалык премилэн лауреатэз;
• 2017 — Удмурт Элькунлэн Тӧроезлэн Таукаронэз;
• 2018 — Удмурт Элькунысь Правительстволэн литературая премиезлэн лауреатэз;
• 2019 — Марий Эл Республикаысь калык писательлэн В. Абукаевлэн синпель медалез;
• 2021, 2023 — Удмурт Элькунлэн Тӧроезлэн Таукаронэз.

Валэктонъёс

Литература

• Писатели и литературоведы Удмуртии / Уваров А. Н.. — Ижевск: Научная книга, 2006. — С. 168. — 219 с. — ISBN 5-9631-0005-4.
• Г. Д. Красильников и тенденции развития прозаических жанров в национальных литературах Урало-Поволжья / Ванюшев В. М., Глухова Г. А.. — Ижевск: Издательство Удмуртского университета, 2005. — С. 70—73. — 162 с.

Чӧлсконъёс

• Елена Миннигараева: для удмуртской женщины творчество — способ сказать что-то важное [ӟуч]