Иж Лада

Википедиысь материал
«Ижысь ЛАДА автомобиль поттон завод» ООО
Изображение логотипа
IzhAuto.jpg
Типез Сюбегатэм кылкутонэн огазеяськон (ООО)
Кылдытэмын 1965
Азьвыл нимъёсыз «ИжАвто» (1965—2017)
Интыяськемез РоссияFlag of Russia.svg Россия: Ижевск
Валтӥсь адямиос Денис Вячеславович Носов
(валтӥсь директор)[1]
удысэз Машина поттон
Вузэз (бизнес) LADA автомобильлы тӥрлык
Ужасьёслэн лыдзы 1100 кузя (2023)
Анай луись компаниез АВТОВАЗ
Сайт ladaizhevsk.ru
Логотип РУВИКИ.Медиа Медиафайлъёс РувикиМедиа пушкын

Иж Лада («Ижысь ЛАДА автомобиль поттон завод» ООО) — автомобиль лэсьтонъя росси предприятие, Ижкарын интыяськемын. 2011-тӥ арысен «АВТОВАЗ» АО-лэн быдэсак предприятиез луэ, «Огазеям автомобиль группа» компания чаклам улсын ужа. Азьвыл обороная ИЖМАШ концернэ пыре вал.

Историез

Компанилэн 2017-тӥ арозь кутӥськись пусэз

1965-тӥ—1992-тӥ аръёс

Ижын машина поттон завод 1965-тӥ арын СССР-ысь оборонаысь промышленностья министр Д. Ф. Устинов чаклам улсын пуктыны кутскемын вал. Та ужпум кунысь АЗЛК но ВАЗ автомобильёс куспын вожвылъяськон кылдытон, ӟечгес улыны кутскем калыклэсь кулэяськонъёссэ быдэстон вылысь мытэмын вал. 1966-тӥ арын 12-тӥ толсуре Ижын бичам нырысетӥ автомобиль конвейерысь потӥз — со «Москвич-408» вал. Автомобиль «Ижмашлэн» пуктэм но выльдэм «Прогресс» корпусэзлэн площадьёсаз лэсьтэмын. Та пичи юртын «огдырлы» чаклам производствоез интыяськылӥз, татын ик дурон, буян но бичан участокъёсыз вал. Автомобильлы вань детальёссэ но комплектъёссэ АЗЛК-ысь вуттылӥзы. Но 1971-тӥ арын ини «бадӟым» автозаводлэсь валтӥсь конвейерзэ лэзизы, таин валче автомобильёсты «Прогрессын» поттэмысь дугдӥзы. Со дырысен корпуслэн площадьёсаз пуконъёс лэсьтыны ӧдъязы.

Автозаводлы «Renault» компания проект лэсьтӥз. Со ик заводэз пуктон но техникаен узырмытон понна кылкутӥсь валтӥсь подрядчик вал. Прессэн ужан вылысь амалъёсты быдэстон понна 40 автомат но потокен ужась механизированной линиос пуктэмын вал. Соос пӧлысь куатез 33 прессъёсын ужась линиос «Renault» фирмалэсь куремын вал, таиз линиослы тӥрлык лэсьтон понна Erfurt, Bliss, Spirtz, Kliring (Германия), Komatsu (Япония, мукет бадӟым тӥрлыкез вуттон вылысь) фирмаослы вазиськиз. 26 линиосты «Эрфурт» фирма вуттоно кариськиз. Вань та линиосты француз ӧнерчиос 1967-тӥ арысен 1971-тӥ арозь эксплуатацие лэзьыны выризы. Франциысь монтажникъёс «пытсам» Удмуртие кунгож сьӧрысь пырыны лэзем адямиос пӧлысь нырысетӥосыз вал[2][3].

Заводлэн валтӥсь но тужгес трос потӥсь вузэз «Москвич-412» вал, сое 1967-тӥ арын бичаны кутскизы но 1999-тӥ арозь лэсьтӥзы, таӵе машинаосты ог 2 миллионлэсь ятыр поттӥзы — СССР-ысь тужгес трос лыдъем автомобиль.

1968-тӥ— 1973-тӥ аръёсы заводын «Москвич-434» фургонэз бичазы. Валтӥсь вормонъёсыз но выль разработкаосыз ӵапак сизьымдонэтӥ аръёслэн кутсконэнызы герӟаськемын, ӵапак соку конвейере лифтбек кузовен нырысетӥез Иж-2125 («Иж-Комби») машина пуктэмын вал, уно дасо аръё ӵоже со СССР-ысь таӵе кузовен огназ легковой автомобиль вал. Заводын араз 200 сюрсозь машинаос бичало вал, проектъя кужымез ӧжытгес вал ке но. 1972-тӥ арысен завод фургонэн Иж-2715 но татын малпам пикап кузовен Иж-27151 автомобильёсты поттыны ӧдъяз. Со сяна, заводлэн конструктор бюроез 1970-тӥ—1980-тӥ аръёсы азинлыко автомобильёсты, Иж-5 но Иж-14 внедорожникъёсты, озьы ик кык люкетэн кузовен Иж-13, Иж-19 легковой машинаосты поттонэз чаклалляз, бератаз таос Иж-2126 «Орбита» сериысь модельёслы пӧрмизы.

Завод нырысь-валысь «Ижмашлэн» лыдъяськылӥз, нош 1975-тӥ арысен производствоя «Ижмаш» огазеяськонэ пырись ёзэз луиз.

1989-тӥ арын 17-тӥ толшоре завод куинь миллион луись автомобиль поттӥз[4].

1992-тӥ—2008-тӥ аръёс

1990-тӥ аръёслэн кутсконазы завод нимаз кадь висъяськиз, «Ижмаш-Авто» акционер огазеяськон луиз. Вань акциосыз Ижысь пыӵалтӥрлык поттон заводлэн ужасьёсызлэн лыдъяськизы. Отӥяз заводын уж гуньдӥз, машина поттон кулэсмиз. Та вакытэ ИжАвто вужмем Москвич-412-028ИЭ легковой автомобильёсты, коммерческой Иж-2715-01/27151-01 но оскон вайисьтэм Иж-2126 машинаосты поттӥз. 1997-тӥ арын машина поттон удыс воксё пуксиз, со аре «Иж-Авто» 8000 автомобиль гинэ бичаз, араз 250 сюрс машина проектъя бичаны быгатӥз ке но.

1998-тӥ арын дефолт  [ӟуч] (удм. луэмен но манет дунтэмамен гинэ, югдур воштӥськиз, угось машинаослы но дунъёс но шуак лэзиськизы[5][6]. 1999-тӥ арын «Ижмаш-Автолэн» акционерез луиз Юрий Качмазов кивалтэмез улсын ужась группаослэн «СОК» компанизы. Заводысь выль валтӥсь конструктор А. К. Миллер (азьвыл ВАЗовец, ВАЗ-21081 модельлэн валтӥсь конструкторез) кивалтэм улсын, вань производствоя тӥрлыкез выльдыса, роботэн ужась-дурись цех пуктыса, предприятиез «улӟытыны» быгатӥзы, уно верано Иж-2126 машина поттыны йӧн-йӧн кутскизы, та машина со вакытэ классика амалэн ветлонъя классика схемаен пичи классъем атыкай легковой машина вал. Озьы 2003-тӥ арлы Ижын автомобиль поттон тямыс поллы йылӥз.

2005-тӥ арын гудырикошконэ заводын малпам «Иж» модельёсты поттэмысь дугдӥзы, Иж-27175 (ВАЗ-2104 инъетэз вылын лэсьтэм но Иж-2126 машиналэсь герӟетъёссэ кутыса бичам фургон) гинэ кельтэмын вал. Нош толсуре 2001-тӥ арысен потӥсь ВАЗ-2106 Жигули поттэмысь дугдӥзы. KIA Motors Corporation корей компанилэсь Spectra машиназэ промышленной амалэн поттыны ӧдъязы. 2006-тӥ арысен кыкетӥ поколениысь KIA Rio бичаны кутскизы. 2007-тӥ арын ВАЗ-21043, Иж-27175 машинаосты лэсьтонэз азинтӥзы, KIA Sorento автомобилез бичаны ӧдъязы.

Заводэн кивалтоно юрт 2012-тӥ арын

2008-тӥ—2009-тӥ аръёсысь кризис но югдурысь потон

2009-тӥ арозь «ИжАвто» ОАО «СОК» группа компание пыре вал. 2009-тӥ арын «СОК» компания «ИжАвтоез» ог 200 млн доллар тыр менеджментэзлы вузаз[7]. Бератаз бадӟым пунэмъёсын предприятиез басьтэм Россиысь Сбербанклэн кивалтӥсьёсыз «СОК» компаниез автозаводлэсь активъёссэ озьы поттэмез понна янгыше уськытӥзы[8], «ИжАвтоез» юромо банкротэ вуттэмез понна уголовной уж ӝутэмын вал. 2011-тӥ арын тулыспалэ «СОК» компанилэн кузёез Юрий Качмазов, СОК-лэн но ИжАвтолэн мукет кивалтӥсьёсыз розыске ялэмын вал[9].

2009-тӥ арлэн кутсконаз экономикаын кризисэн сэрен вузкарон усиз, заводын туж секыт югдур кылдӥз. Южтолэзьлэн пумаз ни завод арняяз куинь нунал куать час ӵоже ужалляз, кивалтӥсьёсыз производствоез быдэсак дугдытон но 90 процентсэ ужасьёсты, ог 5 сюрс муртэ, кулэстон сярысь вераллязы[10].

2009-тӥ арын южтолэзе предприятие ужамысь дугдытэмын. Кредиторъёс азьын заводлэн огъя пунэмез 13,5 млрд манет люкаськиз. Со аре ик гудырикошконэ компания Удмурт Элькунлэн Арбитраж судаз банкрот кылемез пумысен куриськонэн вазиськиз[11], толэзь ортчыса, сое банкротэн ялӥзы.

2010-тӥ арысен предприятие пумен «улӟыны» кутскиз. 2010-тӥ арын гудырикошконэ ар ӵоже токма сылэмез оборудованиез выльысь лэзёно кариськизы, чакланы ӧдъязы, кыӵе модельёсты, кӧня но ку поттыны быгатозы.

ИжАвтолэн огез цехез, 2010-тӥ арын куарусёнэ

2010-тӥ арын 27-тӥ куарусёнэ Ижысь автозавод нырысетӥоссэ ВАЗ-2104 дас автомобильёсты бичаз. Коньывуонлы планъя ВАЗ-2104 но Иж-27175 машинаосты 2 сюрс 484 штука поттыны медо вал.

Банкрот кылем Ижавтолэсь пунэмзэ валтӥсь возись Сбербанк вал. Азьвыл со Ижавтоез азинтонъя кык бизнес-планэз эскериз: корей Hyundai — Kia концерн но АвтоВАЗ—Renault—Nissan альянс. Корейецъёс малпало вал 2010-тӥ арын коньывуон — шуркынмон толэзьёсы заводын Kia Spectra машинаез бичаны кутскыны, 2011-тӥ ар шорын — Kia Sorento машинаез. Толсуре Hyundai грузовикъёсты бичанлы кутскон сётэмын вал. Озьы ке но 2010-тӥ арын 17-тӥ толсуре «Ростехнологиос  [ӟуч] (удм.» но та огазеяськон кивалтэм улсын ужась «АвтоВАЗ  [ӟуч] (удм.» Владимир Путин азьын «Сбербанкен» меморандум юнматӥзы, соя банкрот кылем «ИжАвто» заводлэсь пунэмъёссэ но активъёссэ басьтон пумысен кенешизы. Меморандумын пусъемын: «Сбербанк» «Ростехнологиослы» Ижысь автозаводлэсь бадӟым люкетсэ пунэмъёссэ — 5,23 млрд манет — сётэ. «Ростехнологиос» «Сбербанк» киысь «ИжАвтолэсь» пунэмъёссэ басьто, та понна федерал бюджетысь коньдон куто. «Классика» машинаез бичан 2011-тӥ ар пумозь ик дугдытэмын луоз, «ИжАвтолэн» кужыменыз «Renault-Nissan» альянслэсь коммерцияя машинаоссэ бичаны кутскыны быгатозы ни шуыса, чакламын[12].

2011-тӥ арын тулыспалэ суд «ИжАвтоез» нош ик банкротэн ялӥз, предприятиын конкурс амалъя кивалтонэз юнматӥз.

2011-тӥ арын оштолэзьысен «ИжАвто» ВАЗ 2107 машинаосты поттӥз. 2012-тӥ арын 17-тӥ оштолэзе та автомобильёсты поттон дугдытэмын вал[13]. 2011-тӥ арын гужем кӧня ке толэзь ӵоже «Kia Spectra» (1700 шт.) но «Kia Sorento» (800 шт.) машинаосты выльысь бичазы — комплектъёс бырытозь.

2011-тӥ арын «ИжАвтолэсь» активъёссэ но предприятие пырись мукет компаниосты «Огазеям автомобиль группа» басьтӥз[14]. Со аре ик коньывуонэ «ОАГ» компания 1,7 млрд манетэн «АвтоВАЗ» огазеяськонэз басьтӥз[15]. Со дыре ик «ИжАвтолэн» пунэмез 13 млрд манетлэсь ятыр вал. Заводын выльдӥськон ортчем бере «LADA Granta» бичаны медо вал. Озьы ик татын Renault-Nissan машиналэсь кӧня ке модельёссэ поттыны чаклаллязы, но 2012-тӥ арын оштолэзе Санкт-Петербургысь заводъёсазы ик производствозэс юнматыны малпазы[16].

2012-тӥ арын куартолэзе АвтоВАЗ-лэн кивалтӥсьёсызлэн кенешсылэн тӧроез Игорь Комаров ивортӥз, «Renault-Nissan-АвтоВАЗ» альянс Ижкарысь автозаводэз выльдонлы оглом 10 миллиард манет висъяны чакла шуыса. 2016-тӥ арозь предприятилэн кужыменыз араз 300 сюрс автомобильёсты бичанъя ужпум пуктэмын, та заводлэсь статуссэ кунысь тужгес бадӟым машина поттон сямен утьыны юрттысал.

2012-тӥ арын 25-тӥ пӧсьтолэзе предприятиын LADA Granta модель лэсьтыны кутскизы. Машина поттонэз радъян понна 1,36 млрд манет бытэмын[17]. 2014-тӥ арын 14-тӥ куартолэзе завод конвейерысь «лифтбек» кузовлэн модификациеныз нырысетӥез LADA Granta васькиз[18].

2012-тӥ арын 17-тӥ куарусёнэ «ИжАвто» ВАЗ-2104 универсаллэсь берпуметӥ экземплярзэ бичаз, таин валче Россиын «классика» машинаосты поттонлы пум понэмын вал.

2015-тӥ арын тулыспалэ заводын LADA Vesta автомобилез эскерон сямен бичазы[19].

2015-тӥ арын 25-тӥ куарусёнэ LADA Vesta автомобилез серия амалэн поттыны кутскизы.

2017-тӥ арын 11-тӥ куарусёнэ LADA Vesta маркаен потӥсь машинаослэн семьязы йылӥз — LADA Vesta SW но LADA Vesta SW Cross автомобильёсты поттыны ӧдъязы[20].

2018-тӥ арын 25-тӥ оштолэзе LADA Vesta Cross седан поттыны кутскизы[21].

Кузёосыз но кивалтӥсьёсыз

2012-тӥ арын тулыс ивортонъёсъя, ИжАвтолэсь активъёссэ АвтоВАЗ-лэн «Огазеям автомобиль группа» компаниез чакласа возе[14]. 2014-тӥ арын 24-тӥ тулыспалэ[22] «Огазеям автомобиль группа» ООО-лы валтӥсь выль директоре Михаил Сергеевич Рябов юнматэмын, со АвтоВАЗ-лэн вузъёсыз но программаосыз понна кылкутӥсь вице-президентэз вал.

2017-тӥ арын 24-тӥ оштолэзе «АВТОВАЗ» группалэн Ижысь производствоя площадкаезлэн нимыз воштӥськиз, «Огазеям автомобиль группа» ООО интые «Иж ЛАДА Автомобиль Завод» ООО луиз (вакчиятыса «Иж ЛАДА» ООО)[23].

Автомобильёсты поттон вакыт

  • 1966—1967 — Москвич-408, (4196 машина поттэмын);
  • 1968—2001 — Москвич-412, (2 317 439 машина поттэмын, вань модификациосыз);
  • 1968—1973 — Москвич-412;
  • 1973—2001 — Иж-2715, (1 076 954 машина поттэмын, вань модификациосыз);
  • 1973—1997 — Иж-2125, (414 187 машина поттэмын, вань модификациосыз);
  • 1982—1997 — Иж-27151;
  • 1990—2005 — Иж Ода, (141 508 машина поттэмын);
  • 2002—2005 — ВАЗ-2106;
  • 2002—2012 — LADA 2104;
  • 1997—2005 — Иж-2717;
  • 1997—2005 — Иж-27171;
  • 2003—2006 — Иж-21261;
  • 2005—2012 — Иж-27175;
  • 2005—2009, 2011 — Kia Spectra;
  • 2006—2009 — Kia Rio;
  • 2007—2009, 2011 — Kia Sorento;
  • 2011—2012 — LADA 2107;
  • 2012—2017 — LADA Granta;
  • 2014—2017 — LADA Granta liftback;
  • 2014—2017 — Nissan Sentra;
  • 2015—2017 — Nissan Tiida;
  • 2015—2022 — LADA Vesta[24];
  • 2017—2022 LADA Vesta SW и LADA Vesta SW Cross;
  • 2018—2022 LADA Vesta Cross.

Ужез

2005-тӥ арын завод 52 822 автомобиль поттӥз. 2005-тӥ арын 1810 Kia Spectra вузамын вал, 2006-тӥ арлэн нырысетӥ вить толэзез куспын — 8549 автомобиль. 2006-тӥ арын завод машина поттонзэ 23 процентлы йылтӥз — 65 024 единицаозь.

2006-тӥ арын заводлэн барышез, 2005-тӥ арен ӵошатыса 2,2 поллы будӥз —18,4 млрд манетозь; чылкыт табышез 274 млн манет луиз.

2008-тӥ ар понна компанилэн барышез 20,891 млрд манет, чылкыт ыштонэз — 908 млн манет луиз.

2010-тӥ арын завод LADA 2104 но Иж-27175 машинаосты 6 980 единица поттӥз[25].

2011-тӥ арын завод 70 176 автомобиль бичаз, соос пӧлын: 30 826 — ВАЗ-2104, 31 629 — ВАЗ-2107, 5 241 — Иж-27175, 1 680 — KIA Spectra но 800 — KIA Sorento[25].

2012-тӥ арын предприятие 48 573 автомобиль поттӥз, соос пӧлын 24 074 — LADA Granta. 2012-тӥ арын 25-тӥ пӧсьтолэзе предприятиын LADA Granta модельёсты бичаны ӧдъязы. Производствоез радъян понна 1,36 млрд манет кисьтӥзы[17]. 2012-тӥ арын 17-тӥ куаусёнэ ИжАвто LADA 2104 универсаллэсь берпуметӥ экземплярзэ бичаз, таин валче «классика» машина поттонлы пум понӥз.

2014-тӥ арын 14-тӥ куартолэзе заводлэн конвейерысьтыз нырысетӥез «лифтбек» кузов модификациен LADA Granta васькиз[18]. 2015-тӥ арын тулыспалэ заводын LADA Vesta автомобилез эскерон сямен бичазы[19]. 2015-тӥ арын 25-тӥ куарусёнэ LADA Vesta автомобилез серия амалэн поттыны кутскизы.

2017-тӥ арын 11-тӥ куарусёнэ LADA Vesta маркаен потӥсь машинаослэн семьязы йылӥз — LADA Vesta SW но LADA Vesta SW Cross автомобильёсты поттыны ӧдъязы[20].

2017-тӥ ар пумын ИжАвто LADA Granta liftback модель машинаосты поттонэз Тольяттие выжтӥз, таин валче LADA Vesta семьяысь машинаосты поттонлы инты бушатӥз[26]. 2017-тӥ арын 16-тӥ толсуре завод конвейерысь вить миллион луэм автомобиль васькиз. 2018-тӥ арын 25-тӥ оштолэзе LADA Vesta Cross седан поттыны кутско[21]. 2019-тӥ арын 1-тӥ южтолэзе «Лада Веста» модельлэн 300 сюрсэтӥ автомобилез поттэмын[27].

Статистика

1966-тӥ—1991-тӥ аръёсы поттэм автомобильёс:

1966 1967 1968 1969 1970 1971 1972 1973 1974 1975 1976 1977 1978
300 3029 13 826 20 822 39 109 71 154 105 210 122 100 153 200 165 600 165 600 170 900 171 300
1979 1980 1981 1982 1983 1984 1985 1986 1987 1988 1989 1990 1991
173 000 179 150 176 200 174 950 177 950 177 950 178 950 180 580 185 950 188 700 180 265 180 823 168 224

1992-тӥ—2004-тӥ аръёсы поттэм автомобильёс:

1992 1993 1994 1995 1996 1997 1998 1999 2000 2001 2002[28] 2003[28] 2004
115 204 75 190 50 156 25 618 16 238 8020 10 479 15 004 27 418 47 762 78 236 93 505 96 497

2005-тӥ ар бӧрсьы поттэм автомобильёс:

2005 2006 2007[29] 2008[30] 2009[30] 2010 2011 2012 2013[31] 2014[32] 2015[33] 2016[34] 2017[35] 2018[36][37] 2019[36]
52 822 65 024 78 802 64 200 8200 6980 70 176 48 573 57 771 74 194 73 000 96 250 119 117 130 816 128 000

Галерея

  • Производствоя корпусъёс

    Производствоя корпусъёс

  • Заводлэн администрациезлэн юртэз

    Заводлэн администрациезлэн юртэз

  • Прессэн ужась цех

    Прессэн ужась цех

  • Комплектъёсын склад

    Комплектъёсын склад

  • Дуронъя пост

    Дуронъя пост

  • Дуронъя пост

    Дуронъя пост

  • Дуронъя пост

    Дуронъя пост

  • Роботъёсын дурись пост

    Роботъёсын дурись пост

  • Бичанъя конвейер

    Бичанъя конвейер

  • Бичанъя конвейер

    Бичанъя конвейер

  • Бичанъя конвейер

    Бичанъя конвейер

  • Бичанъя конвейер

    Бичанъя конвейер

  • Поттэм вуз

    Поттэм вуз

  • Ижысь автозаводлэн музеяз

    Ижысь автозаводлэн музеяз

Валэктонъёс

  1. ↑ На автозаводе в Ижевске сменился гендиректор
  2. ↑ Ижевский автозавод. История.
  3. ↑ ОАО "Ижмаш-Авто"
  4. ↑ Ежегодник Большой Советской Энциклопедии, 1990 (вып. 34). М., «Советская энциклопедия», 1990. стр.50
  5. ↑ Российский автопром находится на пороге кризиса — новости Екатеринбурга E1.ru
  6. ↑ Приехали — ВЕДОМОСТИ
  7. ↑ Елена Киселёва, Дмитрий Беликов. «Ижавто» переехал в руки менеджмента Архивная копия от 18 оштолэзе 2009 на Wayback Machine // Коммерсантъ, № 67 (4122) от 15.04.2009  [Дата обращения: 25 толсуре 2010]
  8. ↑ Прописать ижицу // news.mail.ru  [Дата обращения: 10 тулыспалэ 2011]
  9. ↑ Экс-владелец «ИжАвто» объявлен в розыск по делу о преднамеренном банкротстве завода Архивная копия от 17 тулыспалэ 2011 на Wayback Machine // gazeta.ru  [Дата обращения: 14 тулыспалэ 2011]
  10. ↑ Ирина Цырулева. Одной ногой над пропастью Архивная копия от 4 южтолэзе 2016 на Wayback Machine, Время новостей, № 55, 2 апреля 2009  [Дата обращения: 2 оштолэзе 2009]
  11. ↑ Алексей Непомнящий. Первое банкротство Архивная копия от 15 гудырикошконэ 2009 на Wayback Machine // Ведомости, № 151 (2421), 14 августа 2009
  12. ↑ «ИжАвто» подкатят к АвтоВАЗу
  13. ↑ Ижевский автозавод завершил производство «семерки»
  14. ↑ 1 2 Анастасия Николаева. Прощание с "семеркой" // interfax-russia.ru. Эскеремын 2012-04-23 арын
  15. ↑ АвтоВАЗ въехал в «ИжАвто» за 1,7 млрд рублей
  16. ↑ Ъ СПб. Nissan подгонит Qashqai к форуму
  17. ↑ 1 2 Владимир Штанов. «ИжАвто» начал серийное производство Lada Granta // vedomosti.ru. Эскеремын 2012-07-31 арын
  18. ↑ 1 2 «АвтоВАЗ» запустил в Ижевске производство нового лифтбека LADA Granta
  19. ↑ 1 2 В Ижевске началась пилотная сборка Lada Vesta Эскеремын 2015-05-24 арын
  20. ↑ 1 2 Стартовало серийное производство LADA Vesta SW и LADA Vesta SW Cross
  21. ↑ 1 2 LADA Vesta Cross — дан старт серийному производству
  22. ↑ ИЖЕВСКИЙ АВТОЗАВОД — StaticContent
  23. ↑ Автозавод Группы АВТОВАЗ в Удмуртии переименован в ООО ЛАДА Ижевск
  24. ↑ История развития модельного ряда
  25. ↑ 1 2 «ИжАвто» в 2011 году выпустил более 70 тысяч автомобилей
  26. ↑ Производство LADA Granta Liftback будет перенесено в Тольятти
  27. ↑ 300-тысячная «Лада Веста» сошла с конвейера Ижевского автозавода
  28. ↑ 1 2 ИЖ-Авто подвел итоги 2003 года — Mail Авто
  29. ↑ Ижевский автозавод в 2007 увеличил объём производства на 69 % | Udm-Info
  30. ↑ 1 2 На ОАО «ИжАвто» введено внешнее наблюдение — Коммерсантъ Пермь
  31. ↑ ИжАвто в 2014 г. планирует выйти на производство 100 тыс. автомобилей — Волга Ньюс
  32. ↑ Репортаж с автозавода «ИжАвто», где будут собирать седан Lada Vesta — Газета.Ru
  33. ↑ Ижевский автозавод улучшил прогноз по производству: рост почти на треть к 2015 году — ВЕДОМОСТИ
  34. ↑ За 2016 год ИжАвто выпустил почти 100 тысяч автомобилей
  35. ↑ Производство автомобилей на Ижевском автозаводе выросло на 9% » Новости Ижевска и Удмуртии, новости России и мира – на сайте Ижлайф все актуальные новости за сегодня
  36. ↑ 1 2 Ижевский автозавод сократил производство на 2,2% в 2019 году
  37. ↑ За 4 месяца "Ижевский автозавод" увеличил выпуск авто на 8% - ИА "Финмаркет"
«https://udm.ruwiki.ru/w/index.php?title=Иж_Лада&oldid=507250»-ысь басьтэмын