Куликов, Пётр Васильевич
| Пётр Васильевич Куликов | |
|---|---|
 | |
| Быдэс нимыз | Пётр Васильевич Куликов |
| Вордӥськем дырыз | 16-тӥ куарусёнэ 1952 (73 года) |
| Вордӥськем интыез | |
| Кунмуртлыкез (подданство) | |
| Ужудысэз | гожъяськись, журналист |
| Гожъяськон кылыз | Удмурт кыл |
Пётр Васи́льевич Кулико́в (ворд. 16-тӥ куарусёнэ 1952, Починка, Удмурт Автономной Советской Социалистической Республика) — росси гожъяськись, журналист. «Кенеш» литературной журналлэн валтӥсь редакторез (1994—2016). Россиысь гожъяськисьёслэн огазеяськонзылэн ёзчиез, Росси Федерациысь лулчеберет удысысь дано ужась, Удмуртиысь лулчеберет удысысь дано ужась.
Улон сюресэз
Вордӥськиз 1952-тӥ арын 16-тӥ куарусёнэ Удмурт АССР-ысь Кияса ёросысь Вылын Пичи Салья гуртысь крестьян семьяын. Тямыс нылпи пӧлысь со сизьыметӥез вал. Тямысэтӥ классын дышетскыкуз, нырысь атаез кулӥз, бӧрсяз — атаез. Со дырысен сое будэтӥз агаез, артысь Юрмалай черкогуртысь колхозлэн председателез[1][2].
Пётр Куликов Удмурт кун университетысь кылосбуръя факультетын дышетскиз[1][3]. Студент вакытаз тодмо удмурт писательлэн Даниил Яшинлэн литературая кружоказ пыриськиз. Та кружоклэн куноосыз вал Семён Самсонов, Роман Валишин, Владимир Романов, Анатолий Уваров[2].
1974-тӥ арын университетэз йылпумъямез бере Куликовез Ува ёросысь Удугучин шор ёзо школае дышетыны ыстӥзы. Удмурт кылъя но литературая урокъёсты нуиз, озьы ик литературно-творческой кружок кылдытӥз, отчы тодмо удмурт гожъяськисьёсты ӧтчалляз. Та кружокысь потэмъёс пӧлысь огез вал Георгий Грязев — али Удмуртиысь дано журналист. Ужысьтыз ваньмон дыръяз Куликов творчествоен выриз[1][4].
1975-тӥ арын Роман Валишин Куликовез ӧтиз «Советской Удмуртия» газетлэн редакцияз. Озьы со лулчеберетъя ёзэтлэн корреспондентэз луиз. Бератаз та ёзэтэн валтыны ӧдъяз, отӥяз иворъёсъя ёзэтлэн кивалтӥсез луиз. 1987-тӥ арын «Кене́ш» литературной журналлэн валтӥсь редакторезлы воштӥсе юнматӥзы. 1994-тӥ арысен 2016-тӥ арын пенсие потытозяз солэн валтӥсь редакторез вал[1][5][6].
Творчествоез
Пётр Куликовлэн нырысетӥ заметкаосыз потӥзы «Советской Удмуртия» но «Дась лу!» газетъёсын, соку со школаын дышетске на вал[1].
Студент вакытаз нодъясез вал писатель Роман Валишин[2][1].
Пётр Куликов веросъёсын но повестьёсын кык книга поттӥз: 1982-тӥ арын — «Бура́н бере́» но 1992-тӥ арын — «Зарни́ чоры́г». Озьы ик со «Кенеш», «Инвожо́», «Луч» журналъёсын печатласькиз, ужъёсыз сюризы «Йыр вадьсы́н инба́м», «Быльыра́м синкыли́», «Горизонт-82» бичетъёсы. Куд-ог произведениосыз мокша, чуваш, коми, пор, украин но мукет кылъёсы берыктэмын[1][2].
Куликовлэн произведениосысьтыз геройёсыз ӵемысь — огшоры адямиос, гуртын улӥсьёс[1].
Библиографиез
- П. В. Куликов. Буран бере. — Ижевск: Удмуртия, 1982. — 54 с.
- П. В. Куликов. Зарни чорыг. — Ижевск: Удмуртия, 1992. — 220 с. — 2500 экз. — ISBN 5-7659-0332-0.
- П. В. Куликов. Нош ик выльысь ужалом! // Кенеш. — 2016. — № 01. — С. 3—4.
- П. В. Куликов и др. Горизонт-82. — Ижевск: Удмуртия, 1982. — С. 137—156. — 208 с.
- П. В. Куликов и др. Йыр вадьсын инбам. — Ижевск: Удмуртия, 1984. — С. 34—44. — 214 с. — 2000 экз.
- П. В. Куликов и др. Быльырам синкыли / Г. В. романова. — Ижевск: Удмуртия, 1997. — С. 84—93. — 182 с. — 1500 экз. — ISBN 5-7659-0675-3.
- П. Куликов. Семьямы бадӟым [удм.] // Кенеш. — 2011. — Тулыспал (№ 02). — С. 10—11.
Семьяез
Кузпалыз — Удмуртиысь культура удысысь дано ужась, Ашальчи Оки нимо премилэн лауреатэз Раиса Куликова. Нылпиоссы но нуныкайёссы вань. Картэныз дуннеез котыръяны ярато[7].
Данъетъёсыз но дано нимъёсыз
- Удмуртиысь журналистъёслэн огазеяськонзылэн премиез (1979) — устоез очерк понна;
- Удмуртиысь лулчеберет удысысь дано ужась (1996);
- Росси Федерациысь лулчеберет удысысь дано ужась (2009)[2].
Валэктонъёс
- ↑ 1 2 3 4 5 6 7 8 Куликов Пётр [удм.] Воршуд. Эскеремын 2026-03-19 арын
- ↑ 1 2 3 4 5 Современные удмуртские писатели [ӟуч] izdania.unatlib.ru. Эскеремын 2026-03-19 арын
- ↑ Возняков В. Зарни чорыг шедьылэ буран бере но [удм.] // Удмурт дунне. — 2002. — 11 куарусёнэ. — С. 6, 11.
- ↑ Куликов Пётр Васильевич [ӟуч] писателиудмуртии.рф. Эскеремын 2026-03-19 арын
- ↑ История смены руководителей АУ УР «Редакция журнала «Кенеш» [ӟуч] find-org.com. Эскеремын 2026-03-19 арын
- ↑ Куликов Пётр Васильевич [ӟуч] narodudm.unatlib.ru. Эскеремын 2026-03-19 арын
- ↑ Валентина Емельянова (2021-11-01) Улон — со эрик [удм.] Удмурт дунне. Эскеремын 2026-03-19 арын
Литература
- Пузанова Н. Писатель писателю — редактор и правщик // На переломе эпох. — Ижевск: Удмуртия, 2006. — С. 274—276. — 366 с.
- Уваров А. Писатели и литературоведы Удмуртии. — Ижевск: Научная книга, 2006. — С. 73—74. — 219 с.
- Чернов П. Пётр Куликов // Горизонт-82. — Ижевск: Удмуртия, 1982. — С. 136. — 208 с.
- Куликов Пётр Васильевич //Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 429. — 768 с. — 2200 экз. — ISBN 978-5-7659-0486-2.