Крым Слудка

Черкогурт
Крым Слудка
55°59′59″ с. ш. 51°25′36″ в. д.
Кун	Россия
Часовой поясэз	UTC+4:00
Улӥсез
Улӥсез	▲449 мурт (2021)
Цифровой идентификаторъёс
Телефон кодэз	34154
Почта индекс	427707
Крым Слудка

Крым Слудка (Слутка, Архангельское) — Удмуртиысь Кизнер ёросысь черкогурт, Крым Слудка гурт поселенилэн административной центрез.

Удмуртиысь огез вашкалаез гурт.

Интыяськемез

Черкогурт ёрослэн лымшор палаз, Ватка шурлэн ярдураз, ёрос центрлэсь но матысь чугун станцилэсь — Кизнер каргуртлэсь — 49 иськемын интыяськемын.

Историез

Черкогуртлэсь кылдэм арез-нуналэз тодмо ӧвӧл, нырысетӥ черк татчы XVI даурлэн шораз пуктэмын вал шуыса, лыдъяло. 1745-тӥ арын черкез выльдыны бакель басьтэмын, выль черк 1764-тӥ арын 27-тӥ инвожое вӧсямын. 1832-тӥ арын излэсь черк ӝутэмын. 1840-тӥ арын черкын приходской школа усьтэмын.

Архангел Михаиллэн черкез, 1900-тӥ ар

Граждан ож вакытэ, 1919-тӥ арын, черкогуртын ожмаськон мынӥз. 1930-тӥ арын черкысь баӵко арест улэ шедиз, юртъерзэ школалы шуыса талазы. Ар ортчыса, баӵкоез пытсэт улысь мозмытӥзы, но 1937-тӥ арын нош ик кечат-вамат корт сьӧры ворсамын. 1940-тӥ арын пӧсьтолэзе черкез пытсазы.

1921-тӥ арозь черкогурт Ватка губерниысь Алабго уездысь Вуж Ятчи волосте пыре вал, нош Вотской АО кылдэм бере татчы пыриз. 1924-тӥ арысен 1929-тӥ арозь черкогурт бадӟыматэм Троцкой волосте пырылӥз, 1924-тӥ арын ортчытэм реформа бере, та волосте Можга уездысь Васильевской, Вуж Ятча но Троцкой поттэм волостьёсысь гуртъёс пыризы. 1929-тӥ арын, ёросъёс кылдэмен, Троцкой волость быдтэмын, озьы черкогурт Грак ёросэ шедиз. 1935-тӥ—1956-тӥ аръёсы черкогурт Бемыж ёросэ пырылӥз, ёросэз быдтэмзы бере, Кизнер ёросэ шедиз.

Ватка шур ӧрзэ вошъямен, ярдур ялан гылтӥське, нош со вӧзы черкогурт пуксемын. Шур озьы вить ульчаез коркаосынызы валче ньылӥз ни. Пуктӥськем юртъёс пӧлысь нырысь ик шур черкез быдтӥз. Али Ватка шурлэн шорыз бызе черкогуртлэн азьвыл кутскон интыетӥз. Ярдур ялан куашка, арлы быдэ со кӧня ке участокъёсты но коркаосты сьӧраз нуэ.

Таин валче интыосысь мадёсъёсъя черкогурт каргамын лыдъяське, озьыен, бадӟым люкетэз шурен быдтэмын луоз.

Граждан ож бере гуртэ нылпиен беглой кышномурт вуэм (одӥгъёсызлэн верамъёссыя, чиган, мукетъёсызлэн — бигер). Гуртысь калыкез уно пол тэльмырем, пиналызлы сиён сётыны курыса. Гуртын улӥсьёс сук кариськиллям, таин сэрен нылпиез кулэм (одӥгъёсызлэн мадемъёссыя, начармыса, мукетъёсызлэн — черласа). Лекъяськон, синазькыль карон сяменыз кышномурт черкогуртэз каргаз. Юриськыкуз табазэ Ватка шуре куштэм. Со дырысен ик шур ярдурез куашкатыны ӧдъям.

— мадёс

Черкогуртын улӥсьёс та каргаськонлы али но оско. Шур нырысь ик черкез ньылӥз шуыса, пусъё. Черкогурт но черк кылдэм дырысен татын улӥсьёс, Граждан ож пуромытозь, трос сьӧлыказы, Инмар сярысь вунэтӥзы, таин валче Со калыкез курадӟытоно кариськем, лыдъяло. Мукет веран но вань на: шуре баржа выйытэмын вал, таин сэрен шур ӧрзэ воштӥз.

Гуртысь тодмо муртъёс

Николай Семёнович Савин — Совето Союзысь Герой.

Калык ужъюртъёс

• «Крым Слудка шор ёзо школа» МОУ — 1840-тӥ арын кылдэмын;
• Крым Слудка нылпи сад;
• Крым Слудка ФАП;
• Крым Слудка клуб.

Ульчаос

• Берёзовой урам;
• Кленовой урам;
• Клубной урам;
• Луговой урам;
• Пичи урам;
• Молодёжной урам;
• Набережной урам;
• Овражной урам;
• Полевой урам;
• Речной урам;
• Садовой урам;
• Тополиной урам;
• Цветочной урам;
• Школьной урам;
• Школьной пролка;
• Юбилейной урам;
• Южной урам.

Валэктонъёс