Конёнкова, Маргарита Ивановна
| Маргарита Ивановна Конёнкова | |
|---|---|
 | |
| Вордскем нимыз | Маргарита Ивановна Воронцова |
| Вордӥськем нуналыз | 1895 |
| Вордӥськем интыез | |
| Кулон нуналыз | 1980 |
| Кулэм интыез | |
| Кузпалыз | Конёнков Сергей Тимофеевич |
Маргари́та Ива́новна Конёнкова (ныл нимыз Воронцо́ва; 1895, Сарапул, Ватка губерния — 1980, Муско) — совето разведчица, Сергей Конёнков скульпторлэн кузпалыз.
Улон сюресэз
Вордӥськиз 1895-тӥ арын Сарапулысь окружной судысь адвокатлэн Иван Тимофеевич Воронцовлэн семьяяз. Дораз тодон-валан люказ: роялен шудӥз но нотной грамота валалляз, немец, англи но француз кылъёсын шаплы вераськиз. Отӥяз Сарапулысь нылкышно гимназиез йылпумъяз[1][2].
Революцилэсь кӧня ке азьвыл Воронцовъёслэн семьязы Муское улыны выжиз[1].
Татын Маргарита Воронцова Полторацкаялэн юридической вылӥ нылкышно курсъёсаз дышетскиз. Со Фёдор Шаляпинэн, Сергей Есенинэн, Анатолий Мариенгофен, Сергей Рахманиновен, Всеволод Мейерхольдэн но мукетъёсыныз тодмо вал[1][3].
1923-тӥ арын Сергей Конёнков скульптор кузпалыныз Огазеям Штатъёсы выжиз. Картэзлы профессоръёслэсь портретъёссэс лэсьтонъя Принстон университетлэсь заказ вуиз. Огез соос пӧлын вал Альберт Эйнштейн[4].
Конёнковалэн Америкаын валтӥсь ужпумез вал совето спецслужбаосын валче тыршон. Ӵапак со Быдӟым Атыкай ож кутскемлэсь азьвыл нырысь ик телеграмма ыстӥз, Роберт Оппенгеймер ядерной ожтӥрлык кылдытон бордын выре шуыса. Но Конёнковалэн агент сямен ужамез пумысен трос тодмо ӧвӧл, малы ке шуоно личной ужез али ке но мурт синъёслэсь пытсамын (2024-тӥ арын ивортонъёсъя). Совето разведкаысь азьвыл генерал Павел Судоплатов сое ядерщик тодосчиосын кусып тупатонъя огез устоез агентэн нимаз[4].
Быдӟым Атыкай ож вакытэ Конёнков Россилы юрттэт сётонъя америка комитетлы тӧрое юнматэмын вал, нош Маргарита солэн секретарез луиз. Нылкышно медикаментъёс, ю-нянь, ожгар техника басьтонэн выриз, дӥсь бичаз. Вордэм кунэз понна со 500 млн доллар тыр юрттэт радъяны быгатӥз. Та вакытэ Конёнкова пӧртэм удысъёсысь тодмо муртъёсын кусып тупатыны быгатӥз. Со Элеонора Рузвельтэн но пумиськылӥз[3][1].
1945-тӥ арысен Маргарита Конёнкова Мускоын улӥз.
1980-тӥ арын 85 аресказ начармыса улонысь кошкиз. Новодевичье шайвылын (8 номеро участок) ватэмын[5].
Семьяез но Эйнштейнэн кусыпъёсыз
1922-тӥ арын Маргарита Воронцова аслэсьтыз 20 ареслы мӧйы Сергей Конёнков скульпторлы бызиз. Ар ортчыса, кузпалъёс Америкае выжыяськизы. Татын со Альберт Эйнштейнэн кусып возиз (Манхэттен проектъя ивортонъёсты тодон вылысь, но Маргарита понна та яратон-кушласькон пӧяськон вал шуыса нокыӵе юнматэм доказательствоос ӧвӧл). 1945-тӥ арын Конёнковъёс Муское берытскемзы бере кусыпъёссы чигиськизы, но кӧня ке дыр ӵоже ог-огзылы гожтэт ысъязы на[4][3].
Конёнковалэн но Эйнштейнлэн романзы сярысь тросэз тодӥзы 1998-тӥ арын, ӵапак соку Нью-Йоркысь одӥгаз аукционэ солэн нобель лауреатлы гожтэтъёсыз поттэмын вал. Та гожтэтъёсысь ик шараяськиз: Эйнштейн Конёнковалэн совето спецслужбаосын кусыпъёсыз сярысь тодылӥз но «та ныпъетэз» понна нылмуртэ туж жаля вал[4][3].
Кинематографиын
Альберт Эйнштейнлэн улон-вылонэзлы сӥзем «Гений» сериаллэн нырысетӥ сезоназ (2017) Маргарита Конёнковалэсь рользэ Аня Букштейн актриса быдэстӥз. «Эйнштейн. Теория любви» росси сериалын (2013) Маргариталэсь рользэ Ольга Будина шудӥз.
Валэктонъёс
- ↑ 1 2 3 4 Маргарита Коненков [ӟуч] biographe.ru. Эскеремын 15-11-2025 арын
- ↑ Воронцова – Конёнкова Маргарита Ивановна [ӟуч] библиотека.сарапул.рф. Эскеремын 15-11-2025 арын
- ↑ 1 2 3 4 Инна Руденко (5-09-2005) Удивительная судьба Маргариты Коненковой: Любила Эйнштейна и работала на НКВД [ӟуч] kp.ru. Эскеремын 15-11-2025 арын
- ↑ 1 2 3 4 Василий Зайцев (14-03-2024) Последней любовью Эйнштейна была советская разведчица. Помог ли он создать СССР атомную бомбу? [ӟуч] Газета.Ru. Эскеремын 15-11-2025 арын
- ↑ Конёнкова Маргарита Ивановна (1895-1980) [ӟуч] nd.m-necropol.ru/. Эскеремын 15-11-2025 арын
Литература
- А. Вардугина. Возвращение Маргариты // Удмуртская правда. — 2007. — 10 августа. — С. 12.
- А. Вардугина. Ищите женщину // Московский комсомолец в Ижевске. — 2007. — 20—27 06. — С. 14.
- В. Конюхова. Камская жемчужина // Красное Прикамье. — 2007. — 25 октября.
- С. Плюснин. Мастер и Маргарита // Красное Прикамье. — 2005. — 5 марта.
- И. Соколова. Возвращение Маргариты // Красное Прикамье. — 2007. — 13 марта. — С. 1.
- М. Субботина. В Сарапуле Конёнкова никто не заметил // Удмуртская правда. — 2004. — 17 августа.
- М. Тарощина. Мастер и его Маргарита // Сельская новь. — 2006. — 17 августа (№ 12). — С. 36—37.
Чӧлсконъёс