Киров карлэн историез
Н. М. Карамзинлэн «Российской Государстволэн Историез» книгаяз: туала Киров котырысь музъемъёс вылын 1174-тӥ арын ӟуч адямиос интыяськизы шуыса пусъемын.
1374-тӥ арын Новгородысь ушкуйникъёс Вятка гурт кылдыто, сое йылсам юбоослэсь лэсьтэм кенерен котырыто.
1391-тӥ арын Бектут бигер ханлэн кивалтэмез улсын гурт быдэсак сутэмын вал. Со дырысен татчы Мускоысь но Золотая Ордаысь ожгарчиос ӵемысь вуылыны кутскизы.
1401-тӥ арын та музъемъёсын галицкой князъёс кивалтыны кутскизы. Мусколэн политикаезлы пумитъяськыса, выль карлы Хлынов ним сётэмын вал (матын бызись Хлыновица шурлэсь нимзэ санэ басьтыса).
1489-тӥ арын Хлынов весяклы Муско кун борды итӥськиз.
1580-тӥ арын Иван Грозныйлэн сётэм грамотаезъя Трифон нимо монастырез ӝутыны кутско. Пумозяз вутто 1689-тӥ арын. Та дыре со архитектурной ансамбльлэн Успенской соборез гинэ кылемын. Со — Ватка музъем вылын излэсь нырысетӥ лэсьтэм вашкала синпелет луэ.
1624-тӥ арысен Хлыновын Новодевичий Преображенской монастырьлэн юртэз ӝутыны кутскемын. Ог люкетэз — Преображенской черкез — та дырозь утемын. Поморье, Поволжье, Урал но Сибирь улосъёсы ортчись вузкарон сюресъёс карлы азинскыны юрттӥзы. XVII-тӥ дауре Хлыновын 726 улон юрт, 17 черк, 2 монастырь, 118 вузкаронни, 22 кебит, 13 вуко, 6 кармунчо лыдъяське ни вал.
1708-тӥ арозь Хлынов Сибирской губерние пыре вал. 1727-тӥ арысен Кузон губернилэн люкетэз луиз.
1722-тӥ арын Хлыновын нырысетӥ школа усьтэмын. 1758-тӥ арын сое духовной семинарие выжто. 1811-тӥ арын пиослы гимназия усьтэмын.
1780-тӥ арын Екатерина II-лэн указэзъя Вятка наместничество кылдытэмын но Хлыновлы Вятка выль ним сётэмын. 1797-тӥ арын наместничество интые губерния кылдыто. Со арысен Вятка — губернской город лыдъяськыны кутскиз. Карысь юртъёсты лэсьтонъя выль план юнматэмын (ульчаосты шонертон, излэсь юртъёсты ӝутон). 1897-тӥ арын Вятка карын 25 сюрс адями лыдъяськиз.
1895-тӥ арын Вятка кар доры чугун сюресэз вутто. 1906-тӥ арын чугун сюрес Вяткаез Петербурген герӟаз.
1916-тӥ арын карын 44 промышленной предприятие лыдъяське вал, отын 2 сюрслэсь ятыр адямиос тыршизы.
1929-тӥ арысен Вятка Нижегородской улосвылосэ пыре. 1934-тӥ арын Вяткалы выль ним сёто — Киров но Киров улосвылос кылдыто.