Иднакар (журнал)

Иднакар:Методы историко-культурной реконструкции
Иднакар:Методы историко-культурной реконструкции
Ӧнер удысэз	наукалы сӥзем журнал
Кылыз	ӟуч кылын
Валтӥсь редакторез	Алексей Коробейников
Кун	Удмурт Элькун; Иж;
Кылдон дырыз	2007-тӥ арын
печатной версилэн ISSN-эз	1994‑0599 (Online) ; 1994‑5698 (Print) ; 1994‑5744 (CD‑ROM)

Иднакар: Методы историко-культурной реконструкции (вакчиятыса «Иднакар») — Ижын потӥсь наукалы сӥзем журнал. Сӥземын история, археология, кылтодон, этнографи удысъёсын герӟаськем ужпумъёслы. Потэ ӟуч кылын. Куд-ог статьяос удмурт, англи, немец кылъёсын печатласько. Валтӥсь редакторез но поттӥсез — Алексей Коробейников.

Историез

Журналэз кылдытон сярысь малпанлэн авторъёсыз луо Ижкарысь историк, Удмурт элькунысь сӥё-дано журналист Алексей Коробейников но лингвист, историк но веб-мастер Денис Сахарных. Тодосчиос кемалась малпаськылӥзы ни вал элькунамы но солэн палэназ улӥсь историен тунсыкъяськись муртъёсты огазеян сярысь. Наукаен но практикаен герӟаськем но улослэн историезлы но азинсконэзлы сӥзем журнал ӵапак сыӵе платформалы пӧрмиз, «вордӥськиз», шуыны луоз, та кык тодосчиослэн ӵош ужамзы но вераськон-кенешъёссы вылэ пыкиськыса. Бордазы итӥськизы мукет тодосчиос: Александр Чураков, Николай Митюков, Андрей Иванов но мукетъёсыз.

2006-тӥ арын вуоно журналлэн форматэз кылдытэмын но солы «Иднакар: Методы историко-культурной реконструкции» ним малпамын вал. Ар ортчыса потӥз солэн нырысетӥ номерез. Печатлам сяна, журналлэн номерез дискен но поттэмын вал, озьы ик интыямын интернет-сайтын^[1]. Журналлэн сайтэз чакламын Удмуртилэн историеныз тунсыкъяськисьёслы кусып возён понна.

Журналлэн котькуд номерез кыӵе ке но темалы сӥземын луэ. Кылсярысь, куинетӥез герӟаськемын вал диалектологиен. Со номерын ик Вавож ёросысь Водӟи гуртын ужам Николай Курочкинлэн удмуртъёс сярысь гожъямъёсыз поттэмын вал^[2].

Валтӥсь редакторлэн верамезъя, журнал бамъёсын Россилэн историысьтыз наукаен юнматэм пӧртэм малпанъёс печатласько. Кылсярысь: Кам котырез ӟучъёслэн киултэмзы яке Граждан ож вакытэ 1918-тӥ арын большевикъёслы пумит ӝутӥськем Ижевско-Воткинской восстанилэн кулэлыкез сярысь но мукет:

Милям изданимы — со историкъёс понна публикаторской но дискуссионой площадка. Со официальной ёзэтъёслэсь, партийной, национальной но клановой идеологиослэсь нимаз радъямын.

Журнал сярысь

Журналэз поттэ «Иднакар» волонтёр издательство, быдэсак сямен валтӥсь редакторлэн, Алексей Коробейниковлэн уксёеныз но авторъёслэн но лыдӟисьёслэн ас мылкыдзыя юрттэмзы улсын. Лыдӟись доры араз 2 пол вуэ. Кулэлыко луэ дышетӥсьёслы, шаертодосчиослы, историкъёслы, археологъёслы, лингвистъёслы, культурологъёслы, озьы ик историко-культурной реконструкциен тунсыкъяськисьёслы, аспирантъёслы но студентъёслы, музейёсын ужасьёслы.

Журналлэн валтӥсь ужпумъёсыз: удмурт шаерлэн историяз эскерытэк кельтэм нимъёсты но «сюлэмез висьытӥсь» учыръёсты шараян; ас мылкыдзыя историен, генеалогиен но шаертодонэн герӟаськем наукаез азинтӥсь муртъёсты огазеян; авторъёслы методической юрттэт сётон но соослэсь ужъёссэс научной статьялэн стандартъёсызъя печатлан; архив материалъёсты шарае поттон; лыдӟисьлы малпаськыны но ас сяменызы пумкылъянъёс лэсьтыны луонлык кылдытон^[3].

Журналлэн вань номеръёсыз eLIBRARY.RU [ӟуч] (удм. сайтын интыямын.

Валэктонъёс

↑ Дмитрий Репников Историку А. В. Коробейникову — 50 [ӟуч] cyberleninka. Эскеремын 28-10-2025 арын
↑ Елена Никитина (22-02-2008) Удмуртъёсты огазеялоз Иднакар [удм.] Удмурт дунне. Эскеремын 28-10-2025 арын
↑ Иднакар: методы историко-культурной реконструкции.Научный журнал на тему: История и археология [ӟуч] cyberleninka. Эскеремын 28-10-2025 арын

Чӧлсконъёс

[1] Дмитрий Репников Историку А. В. Коробейникову — 50 [ӟуч] cyberleninka. Эскеремын 28-10-2025 арын

[2] Елена Никитина (22-02-2008) Удмуртъёсты огазеялоз Иднакар [удм.] Удмурт дунне. Эскеремын 28-10-2025 арын

[3] Иднакар: методы историко-культурной реконструкции.Научный журнал на тему: История и археология [ӟуч] cyberleninka. Эскеремын 28-10-2025 арын

[1]

[2]

[3]