Егитъёслэн нуналзы
| Егитъёслэн нуналзы (Россия) | |
|---|---|
.webp) | |
| Типез | Официальной праздник |
| Мукет сямен | Егит (пинал) калыклэн нуналыз |
| Юнматэмын | Россилэн азьмуртэз Борис Ельцин |
| Пусъё |
 Россия |
| Дырыз | 27-тӥ инвожое 1993-тӥ арын |
| Пусъён ужрадъёс | арлы быдэ |
| Сям-йылолъёс | концертъёс, митингъёс, фестивальёс, конференциос, акциос |
 Медиафайлъёс РувикиМедиа пушкын | |
Егитъёслэн нуналзы (ӟуч: День молодёжи) — Россиысь егитъёслы сӥзем праздник, пусйиське арлы быдэ, инвожолэн берпуметӥ кӧснуналаз. 2025-тӥ арын 28-тӥ инвожое тупа.
Юнматэмын РФ президентэзлэн 1993-тӥ арын 24-тӥ инвожое гожтэм 459-рп номеро косэтэзъя. Азьвыл со 27-тӥ инвожое пусйиськылӥз[1]. Президентлэн 2023-тӥ арын 2-тӥ куартолэзе гожтэм 132-рп номеро косэтэзъя инвожолэн берпуметӥ кӧснуналаз выжтэмын[2].
Праздник сярысь
«Росси Федерациысь «Егитъёсын ужан политика сярысь» катъя (кутэмын 2020-тӥ арын 30-тӥ толсуре), Росси кунмуртлыкез пусъемын ке, 14 аресысен 35 аресозь адями егит шуыса лыдъяське[3].
2024-тӥ арын Россиысь егитъёслэн лыдзы 37 млн лыдъяське вал, со кунын вань улӥсьёслэн ог ньыльмосэз луэ[4].
Егит калык — со йӧскалыклэн вуоноез, кунэз но мерлыкез азинтӥсь но валтӥсь кужым[5].
Егитъёслэн нуналзы та социально-демографической группалэсь потенциалзэ азинтон но егитъёсын герӟаськем ужпумъёслы саклык висъян вылысь кылдытэмын вал[6].
Историез
Егитъёслы сӥзем нунал кылдытэмын совето вакытэ. 1917—1945-тӥ аръёсы СССР-ын Егитъёслэн калыккуспо нуналзы (МЮД) куартолэзьлэн кутсконаз пусйиськылӥз. Та нуналэ ужын висъяськем егитъёсты данъяллязы[7][8]. Праздникез нимась МЮД аббревиатура куд-ог каръёсын урам нимъёслы пӧрмыса кылиз (кылсярысь, Владимирын вань МЮД нимо урам)[9]. Тужгес тодмоез ним, кудӥз герӟаськемын совето вакытысь Егитъёслэн калыккуспо нуналынызы, со Алексей Стаханов. 1935-тӥ арын, праздник азьын, со эгыр поттонъя рекорд пуктӥз[10].
1958-тӥ арын 7-тӥ тулыспалэ СССР-ысь Вылӥ Кенешлэн Президиумезлэн «Совето егит калыклэсь нуналзэ юнматон сярысь» Косэтэзъя «Совето егитъёслэн нуналзы» юнматэмын вал, со инвожолэн берпуметӥ арня нуналаз пусйиськылӥз[11]. Праздник быдэсак идеологической вал. Со нуналэ ужрадъёсты радъян но ортчытон понна кылкутылӥз Егитъёслэн ленинской коммунистической огъясоюз огазеяськонзы (ВЛКСМ)[12]. Совето егитъёслэн нуналазы спорт но ужын бригадаос куспын ӵошатсконъёс, устолыкъя ӵошатсконъёс, азьветлӥсьёслэн слётъёссы, концертъёс но эктон ӝытъёс ортчылӥзы[7].
СССР куашкам бере, Россилэн нырысетӥ президентэз Б. Н. Ельцин, Росси Федерациысь егитъёсын ужанъя кун комитетлэн но Россиысь егитъёслэн но нылпиослэн огазеяськонъёссылэн Йӧскалык Кенешсылэн дэмламезъя, 1993-тӥ арын 24-тӥ инвожое «Егитъёслэсь нуналзэс пусъён сярысь» 459-рп номеро Распоряжение гожтӥз, отын та нуналэз 27-тӥ инвожое пусъёно шуыса гожтэмын. Отын озьы ик ортчытоно ужрадъёс, концертъёс но адӟытонъёс пумысь пусъемын вал. Нош ужрадъёс сярысь СМИ-осты гожъяны косэмын[1].
Праздникез пусъён нуналэз Борис Ельцин 27-тӥ инвожое юнматӥз ке но, тросаз каръёсын та нуналэз азьвыл сямъя пусъылӥзы ― инвожолэн берпум арня нуналаз.
2023-тӥ арын толшоре Владимир Путин МГУ-лэн Инновационного научно-технологической центрысьтыз «Ломоносов» нимо кластере вуылыкуз, пумиськонэ пыриськемъёс пӧлысь одӥгез президентлы Егитъёслэсь нуналзэс матысь шутэтскон нуналъёсы выжтон сярысь дэмланэн вазиськиз. Юнматэм нуналэ праздникез ӵемысь пусйыны уг луы, малы ке шуоно, ӵапак со вакытэ егитъёслэн сессизы луэ яке ужан нунал вадьсаське[13].
Россилэн президентэзлэн 2023-тӥ арын 2-тӥ куартолэзе гожтэм 132-рп номеро косэтэзъя Егитъёслэн нуналзы инвожолэн берпуметӥ кӧснуналаз выжтэмын[2].
Сям-йылолъёс
Егитъёслэн нуналазы, котьку сямен, ортчыло праздниклы сӥзем концертъёс, фестивальёс, адӟытонъёс, лекциос но спорт ӵошатсконъёс.
Ӵемысь тодмо артистъёсын, блогеръёсын но мукет адямиосын пумиськонъёс радъясько[12].
Музейёс, лулчеберето центръёс, кинотеатръёс пӧртэм акциос ортчытъяло.
Озьы ик Егитъёслэн нуналзылы сӥзьыса, флешмобъёс, волонтёрской но экологической кичӧлтонъёс, благотворительной ярмаркаос радъяськыло[14].
Та выллем нуналъёс
- Егитъёсын огъя луонъя калыккуспо нунал (24-тӥ оштолэзе);
- Егитъёслэн калыккуспо нуналзы (12-тӥ гудырикошконэ);
- Егитъёслэн дунневыл нуналзы (ВФДМ) (10-тӥ шуркынмонэ).
Валэктонъёс
- ↑ 1 2 Распоряжение Президента Российской Федерации от 24.06.1993 г. № 459-рп, Президент России. Эскеремын: 25 инвожое 2025 арын.
- ↑ 1 2 Распоряжение Президента Российской Федерации от 02.05.2023 № 132-рп «О Дне молодежи»
- ↑ О молодежной политике в Российской Федерации
- ↑ Татьяна Голикова: на молодежь 14–35 лет приходится четверть населения РФ | Эксперт [ӟуч]
- ↑ День молодёжи России, РИА Новости (27 инвожое 2022). Эскеремын: 25 инвожое 2025 арын.
- ↑ 28 июня – День молодежи России
- ↑ 1 2 День молодежи 2025: дата, история, традиции, суть праздника
- ↑ Энергия нового поколения: когда в 2025 году отмечают День молодежи | Ямал-Медиа, Ямал-Медиа (25 инвожое 2025). Эскеремын: 25 инвожое 2025 арын.
- ↑ МЮДа улица во Владимире | Владимир: с XIX в. до наших дней [рус.]
- ↑ День молодежи в 2025 году: какие традиции и история у этого праздника
- ↑ Всесоюзный Ленинский Коммунистический союз молодёжи // Большая советская энциклопедия : [в 30 т.] / гл. ред. А. М. Прохоров. — 3-е изд. — М. : Советская энциклопедия, 1969—1978. — (Большая советская энциклопедия : [в 30 т.] / гл. ред. А. М. Прохоров).
- ↑ 1 2 29 июня — День молодежи: история и традиции, праздничные мероприятия, Известия (28 инвожое 2024). Эскеремын: 25 инвожое 2025 арын.
- ↑ Встреча с учащимися вузов по случаю Дня российского студенчества, Президент России. Эскеремын: 25 инвожое 2025 арын.
- ↑ День молодежи 2025: какого числа, история и традиции праздника, КП. Эскеремын: 25 инвожое 2025 арын.