Ву кыскон станция
| Ву кыскон станция | |
|---|---|
 | |
| Юрт сярысь ивортон | |
| Интыяськемез | Сарапул |
| Кун | |
| Архитекторез | Трубников, Павел Алексеевич |
| Заказчикез | Башенин, Павел Андреевич |
| Лэсьтыны кутскемын | 1909 |
| Лэсьтӥськон йылпумъямын | 1910 |
| Архитектураысь стиль | модерн |
 |
|
Ву кыскон станция (али — «Старая башня» ресторан комплекс; ӟуч: Водонасосная станция) — Удмуртиысь Сарапулын 1910-тӥ арын модерн амалъя пуктэм юрт. Лулчеберет удысысь улосэн утёно синпелетъёс пӧлы пыре. Карлэн огез учкымонэз но тужгес тодмо интыез луэ.
Историез
Сарапулын нырысетӥосыз ву сётӥсь пулэсь гумыос 1870-тӥ арын лэсьтэмын. Но ХХ даурлэн кутсконаз карын калык йылэмъя со ныпъетсэ ӧзгес вормы ни[1].
1908-тӥ арын Сарапул карлэн йырыз Павел Башенин Пётр Столыпин премьер-министрен пумиськиз но выль водопроводлы но электростанцилы кредит куриз. Башенинлы 27 арлы 5 процентэн гинэ 380 сюрс манет тыр пунэмаськыны удалтӥз[2].
1909-тӥ арын Башенин Павел Трубников архитекторлы ву кыскон башня лэсьтыны курыса вазиськиз. 1910-тӥ арын модерн амалъя неоготикаысь пусъёсын объект вуттэмын ни вал, нош со аре ик 31-тӥ южтолэзе Сарапул карысь Дума сое уже кутонъя постановление юнматӥз[2][3]. Сое котыр ласянь югдытыны Мускоысь «Бромлей агайёслэн механикая заводъёссылэн обществозы» фирмалы оскизы[4]. Соку ик Сарапулын чугунлэсь ву гумыос кыскизы, ульчаосын колонкаос но тылпу кысон гидрантъёс лэсьтӥзы[4]. Нырысь-валысь карын улӥсьёс пӧлысь уноезлы водопровод вормонтэм вал, ву гумыосты доразы пыртыны со понна дун тыремъёс гинэ быгатӥзы. Но куинетӥ араз ни ву карысь 113 коркаосы, кибашлыослэн мастерскойёсазы, эмъяськонниосы, богадельняосы, дышетон заведениосы но магазинъёсы пыртэмын вал[5].
1980-тӥ арозь башня кулэезъя кутӥськиз[2]. 1979-тӥ арын Удмурт АССР-ысь Министръёслэн Кенешсы нимысьтыз постановлениен юртэз лулчеберет удысысь улосэн утёно синпелетъёс пӧлы пыртӥз, сое чакланы ӧдъязы[6].
1988-тӥ арын станцилэн юртаз егит морякъёслэн школазы усьтӥськиз, татын со 1996-тӥ арозь ужаз. Отӥяз башняез куашкан калэ вуэмен лыдъязы[2].
Туала вакыт
2011-тӥ—2012-тӥ аръёсы ву кыскон станцилэсь юртсэ выльдӥзы-тупатъязы, отӥяз татын «Старая Башня» ресторан но кунокуа комплекс усьтӥзы: кунокуа, гужем терраса но Кам шоры учкон площадка[2][7].
2024-тӥ арын толшоре «Авито» сайтын «Старая Башняез» 150 млн манетэн вузан сярысь ялон потӥз. Улосысь СМИ-ос пусйылӥзы: кузёез воштӥськемен, объект лулчеберет удысысь утёно инлыксэ уз ышты, соин ик станциез возёнъя вань кылкутонъёс историысь юртэз басьтӥсь вылэ усёзы[1][4][8].
Валэктонъёс
- ↑ 1 2 В Сарапуле за 150 миллионов рублей продают старинное здание водонапорной башни [рус.] Деловой квадрат.
- ↑ 1 2 3 4 5 Водонасосная станция (Старая Башня) в Сарапуле, Удмуртия 360 (3 коньывуонэ 2023). Эскеремын: 5 пӧсьтолэзе 2025 арын.
- ↑ Водонасосная станция в стиле модерн, Историческийбагаж.рф. Эскеремын: 5 пӧсьтолэзе 2025 арын.
- ↑ 1 2 3 Дмитрий Стрелков. Здание старинной водонапорной башни решили продать в Сарапуле за 150 млн рублей, ИА «Сусанин» (17 толшоре 2024). Эскеремын: 5 пӧсьтолэзе 2025 арын.
- ↑ Евгения Рябкова. Первая электростанция, водопровод и хорошие дороги: что появилось в Сарапуле благодаря купцу Башенину, Ижлайф (13.07.2023). Эскеремын: 5 пӧсьтолэзе 2025 арын.
- ↑ Объекты культурного наследия регионального значения Сарапула iz-article.ru.
- ↑ Водонасосная станция (современный ресторанно-гостиничный комплекс «Старая Башня») [ӟуч] #ПроУдмуртию - карта достопримечательностей.
- ↑ Виола Романова Здание старинной водонасосной станции продают в Сарапуле за 150 млн рублей [ӟуч] izh.kp.ru.