Валан
| Валан | |
|---|---|
 Вавожысь «Валан» ансамбль | |
| Огъя тодэтъёс | |
| Жанр | эстрада, удмурт но ӟуч калык кырӟанъёс, чиган но казак кырӟанъёс |
| Кун |
 Россия |
| Кылдон интыез |
 Удмуртия |
| Кылыз | удмурт, ӟуч |
| Составез |
Владимир Морозов Алёна Кадесникова Алексей Шубин Наталья Красильникова. |
Валан — Удмурт Элькунысь Вавож ёросысь крезьгуро ансамбль. Калыккуспо но огъяросси ӵошатсконъёслэн лауреатсы, удмурт кырӟанъя «Элькуновидение. Суперфинал» улоскуспо ӵошатсконлэн вормисез (2022)[1]. 2020-тӥ арын «Валан» ансамбль Вавож ёрослэн Данъян пул вылаз пыртэмын.
Кылдэмез
Ансамбль кылдытэмын 2017-тӥ арын южтолэзе. Арганэн шудӥсь ньыль артистъёс нырысьсэ огазеяськыса сцена вылэ потӥзы Вавож ёросысь Культура юртын Нылкышноослэн Калыккуспо нуналзылы сӥзем концертын. Соку коллективлэн нимыз но малпамын ӧй вал на.
Нимыз сярысь
Ансамбльлэн нимыз отчы пыриськисьёслэн нимъёсысьтызы нырысь букваосъя кылдытэмын:
- В — Владимир Морозов, ансамбльысь арганчи. Дышетскемын Ижкарысь лулчеберетъя кун училищеын, калык инструментъёсъя оркестрен кивалтэ.
- АЛ- Алёна Кадесникова, ансамбльльысь солистка. Дышетскемын Удмурт кун университетын, вокально-хоровой коллективен кивалтэ.
- А — Алексей Шубин, ансамбльысь солист. Ижкарысь лулчеберетъя училищеын собере Росси Федерацилэн Президентэз улсын Россиысь калык возёсъя но кун службая академиын дышетскемын (РАНХиГС), дышетӥсь, калык инструментъёсъя оркестрлэн дирижёрез.
- Н — Наталья Красильникова, ансамбльысь солистка. Дышетскемын Петрозаводскысь кун консерваториын этномузыковедение удысъя.
Валан кыл — ӟуч кылэ «понимание» шуыса берыктӥське. Озьы ик та кылын Вавож ёросэтӥ бызись Вало шурлэн нимыз кылӥське.
Тусыз
Ансамбльлэн аслаз, нокинэн сурантэм стилез кылдытэмын. Валанчиосты дӥськутсыя, образъёссыя но эктон выросъёссыя тодманы луэ. Соосты ваньзэ артистъёс асьсэос малпало. Кырӟан быдэстон манеразы, выросъёсазы но аспӧртэм дӥськутъёсазы коллективлэн аслаз тусыз адӟиське[2].
Репертуарез
«Валан» ансамбль мукетъёсызлэсь аслаз репертуареныз висъяське. Кырӟасьёс удмурт кылбурчиослэн кылъёссыя кылдытэм асьсэ кырӟанъёсты быдэсто. Ансамбльлэн репертуараз озьы ик ӟуч но удмурт калык кырӟанъёс; Вавож ёросын но солэн палэназ гожтэм калык кырӟанъёс; чиган но казак гуръёс пыртэмын. Соосын валче, валанчиос туала кырӟанъёсты но быдэсъяло. Концертъёсын артистъёс арганэн, баянэн, блок- флейтаен, балалайкаен, гитараен, чингылиосын, бубенэн, дымбырен шудыны быгатэменызы паймытъяло[2]. «Валан» ансамбль Вавож ёросын но Удмурт Элькунын концертъёс сётъям сяна, солэн палэназ но поталля. Мыло-кыдо пыриське калыккуспо но огъяросси ӵошатсконъёсы но фестивальёсы. Асьсэдыз возьматон, творчествозэс азинтон но мукет тунсыко муртъёсын тодматскон понна ӵыжы-выжы луись кунъёсын кусып возе, кылсярысь, Коми но Карел Элькунъёсын. Ӵемысь «Мынам Удмуртие» но ГТРК «Удмуртия»[3] кун теле- радиокомпаниосы вуылэ. Юн кусып возе «Эктоника» проектэн. Ялан пыриськылэ Ижкарысь «Аксион» Культура юртын ортчылӥсь огазеям концертъёсы, калык кырӟанъя «Хлеб-соль» но «Эктоника/Бабушкина дача» крезьгуро фестивальёсы но удмурт дискотекаосы[4].