Богоявление нимо черк (Нечкино)
| Православной черк | ||
| Богоявление нимо черк | ||
|---|---|---|
 | ||
| 56°39′03″ с. ш. 53°46′15″ в. д.GЯO | ||
| Кун |
 Россия |
|
| Интыяськемез | Нечкино | |
| Епархия | Сарапул | |
| Архитектурной стиль | классицизм | |
| Архитекторез | Ф. М. Росляков | |
| Кылдытэмын | 1807 | |
| Юртэз пуктэмын | 1801 | |
| Инлыкез |
 ОКН № 1800000013 |
|
| Югдурез | Ужась | |
| Сайтэз | nechkino.cerkov.ru | |
|
|
||
 |
||
 Медиафайлъёс РувикиМедиа пушкын | ||
 | Россилэн лулчеберето кылёс лэсьтосъёсыз улос инлыкен рег. № 181610421730005 (ЕГРОКН) лэсьтос № 1800000013 (БД Викигида) |
Богоявление нимо черк (Богоявленской черк; ӟуч: Богоявленская церковь (Нечкино)) — Удмуртиысь Сарапул ёросысь Нечкино черкогуртысь Ӟуч православной черклэн Сарапул епархиысь черк. Улосысь утёно архитектурая синпелетъёс пӧлы пыре.
Историез
XVIII даурлэн кутсконаз Нечкино черкогуртын пулэсь ӝутэм Илия пророклы но Инмар Анайлэн Владимирысь мудорезлы сӥзем черкъёс вал ни. 1768-тӥ арын инвожое Ваткаысь но Быдӟым Пермьысь епископ Варфоломей куашкан калэ вуэм черк интые выльзэ Владимирско-Богородицкой черк пуктыны храмозданной грамота сётӥз. Сое 1770-тӥ арын 15-тӥ южтолэзе вӧсязы. 1801-тӥ арын Нечкиноысь Илия пророклы но Владимирско-Богородицкой кык пулэсь черкъёслэн ужамзы сярысь ивортонъёс пусъемын[1].
1801-тӥ арын 4-тӥ южтолэзе Ватка духовной консистория из черк пуктыны храмозданной грамота сётӥз[1]. Черкез Ватка губерниысь архитектор Филимон Меркурьевич Росляковлэн проектэзъя ӝутӥзы[2]. Валтӥсь кезьыт престол Инмарлэн возьматӥськемезлы (ӟуч: Богоявления Господня) сӥзьыса вӧсямын. Бурысез шуныт престол 1807-тӥ арын 20-тӥ инвожое Инмар Анайлэн Владимирысь мудорезлы сӥзьыса вӧсямын, нош паллянэз — 1808-тӥ арын 23-тӥ инвожое Илия пророклы[1]. 1879-тӥ арын Фёдоров архитекторлэн проектэзъя шундыпуксён палась фасадэз борды куинь ярусъем гырлы жугон пуктэмын. 1895-тӥ арын Иван Аполлонович Чарушин трапезнойысь сэрегъёсты контрфорсъёсын юнматӥз, озьы ик гырлы жугонлэсь куинетӥ яруссэ выльдӥз[2].
1846-тӥ арын черклэн приходаз, Нечкино черкогурт сяна, таӵе гуртъёс пыризы: Пислэггурт, Макарово, Усть-Нечкинка, Чепаниха, Дуванак, Горбуново, Юриха, Сениха, Лагуново, Немешаево, Слепокурова, Килина, Боровики, Шадренки, озьы ик починкаос: Голованов, Коновалов но Чукавин. 1868-тӥ арын черк бордын ужась приход попечительство усьтэмын[1].
УАССР-ысь Вылӥ Кенешлэн Президиумезлэн 1941-тӥ арын 3-тӥ куарусёнэ юнматэм указэзъя пытсамын. Юрт эмъяськоннилы сётэмын[1]. Бӧрысь аръёсы черклэн юртаз клуб но библиотека интыяськылӥзы, татын пудо, техника, ю-нянь но удобрение возьылӥзы[3].
1996-тӥ арын черклэн выльысь усьтэм приходэз пусъемын. 2007-тӥ арын сое тупатъян борды басьтӥськизы. Биатлонист Иван Черезов выльдэм черклы тямыс гырлы кузьмаз. 2013-тӥ арын 6-тӥ пӧсьтолэзе Ижысь но Удмуртиысь митрополит Николай черкез вӧсяз[3].
Архитектураез
Черк классицизм амалъя пуктэмын. Ньыль сэрго юрт вылэ тямыс гранё итэт ӝутэмын, ваньмыз со куаралы кыдёке чузъяськыны юрттӥсь укноосын куполэн йылсамын, со вадьсын купол выллем лэсьтэм пичи чеберъям главкаен фонарик пуктэмын. Валтӥсь юрт борды шундыӝужан но шундыпуксён ласянь одӥг кадь ӝуждаесь котырес алтарь апсида но трапезной пуктэмын. Трапезной ньыль столпен, куинь нефен. Сюбег притвор трапезноез куинь яруслэсь гырлы жугонэз герӟа. Гырлы жугонлэн нырысетӥ но кыкетӥ ярусъёсыз — ньыль гранё, куинетӥез — тямыс гранё, куара кыдёке мед чузъяськоз шуыса, укноосын йылсамын, тужгес вылӥяз главка юнматэмын[2].
Фундаментэз бутлэсь, борддоръёсыз кирпичлэсь, липетэз кортлэсь, выжез пулэсь лэсьтэмын. Юртлэн огъя кузьдалаез — 54,5 м. Колокольнялэн пасьталаез — 8 м, трапезнойлэн — 21 м, огъя быдӟалаез — 14 м, апсидаез — 10,5 м[2].