Белобородов, Иван Фёдорович

Иван Фёдорович Белобородов
Иван Фёдорович Белобородов
Вордӥськем нуналыз	23-тӥ толсуре 1909 яке 1909
Вордӥськем интыез	Спас-Деменск[d], Мосальск уезд[d], Калужской губерния[d], Росси империя[d];
Кулон нуналыз	22-тӥ гудырикошконэ 1985 яке 1985
Кулэм интыез	Иж, РСФСР, СССР;
Кун	Росси империя[d]; СССР;
Ужудысэз	инженер-механик, политик

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Ижысь Пастуховлэн ульчаысьтыз 88 номеро корка бордысь И. Ф. Белобородовез буре ваён пул

Ива́н Фёдорович Белоборо́дов (23-тӥ толсуре 1909 яке 1909^[1], Спас-Деменск^[d], Калужской губерния^[d] — 22-тӥ гудырикошконэ 1985 яке 1985^[1], Иж) — Ижысь машиностроительной заводлэн 1956-тӥ арысен директорез, 1975-тӥ—1980-тӥ аръёсы «Ижмаш» производствоя огазеяськонлэн валтӥсь директорез. Социалистической Ужысь кык полэс Герой.

Улон сюресэз

Иван Белобородов ужан сюрессэ 1928-тӥ арын Калуга улосысь Спас-Деменск станциын кутскиз. 1935-тӥ арын Тулаысь механикая институтысь [ӟуч] (удм. «Дурон но штампъёсын тӥрлык поттон амалъёсъя производство» факультетэз йылпумъяса, Ижысь машиностроительной заводын ужаз.

Вань улонзэ Белобородов «Ижмашлы» сӥзиз. Заводын ужан сюрессэ Иван Белобородов 1935-тӥ арын революцилэсь азьвыл поттэм тӥрлыкен кебитын кутскиз, нош 1938-тӥ арын дурон цехлэн кивалтӥсез луиз. 1941-тӥ арын пӧсьтолэзе Белобородов 35 номеро выль дуриськон цехлы кивалтӥсе юнматэмын, соин со 1952-тӥ арозь кивалтӥз. Быдэс ожез цех заводын дурем, штампен лэсьтэм тӥрлык поттӥз.

1952-тӥ арын Иван Белобородов Ижысь 74 номеро машиностроительной заводлэн КПСС-лэн ЦК-езлэн партийной комитетэзлэн секретарез луиз. Удмуртиысь тужгес бадӟым партийной огазеяськонлэн кивалтӥсез луыса, со предприятиез калыклы ярамон тӥрлык поттон удысэ выжтӥз, нырысь ик саклык висъяз «Иж-49» но «Иж-56» мотоциклъёсты.

1956-тӥ арын Белобородовез машиностроительной заводлы директоре юнматӥзы. 1975-тӥ арысен «Ижмаш» производствоя огазеяськонлэн валтӥсь директорез луиз. Солэн тыршеменыз предприятиын техника ласянь зол воштӥськонъёс ортчизы: мотоцикл, ожтӥрлык бичан, станокъёс лэсьтон, корт поттон быдэсак выльдӥськизы, озьы ик точной механикая завод но автозавод кылдӥз. Спорт комплексъёс, эмъяськонниос, улон коркаос, школаос, нылпи садъёс пуктэмын вал. ЭВМ-ысь вычислительной центръёс валтӥсь производствоосын гинэ ӧвӧл — «Ижмашлэн» медсанчастяз но вуизы^[2].

Солэн кивалтэмез улсын заводын выль вузъёс поттыны ӧдъязы. Электровакуум приборъёс (магнетронъёс [ӟуч] (удм.) лэсьтон борды басьтӥськизы, ожтӥрлыклы, ыбылӥськон тӥрлыклы но спорт винтовкаослы, метеорологияя ракетаослы но ЧПУ станокъёслы оптической прицелъёс поттонэз радъязы. 1960-тӥ арын пичигес токарно-винторезной Иж-250 но Иж-250П лэчыт синмо станокъёсты лэсьтыны кутскиз. Валтӥсь технологлэн ёзэтэз бордын технологиосъя процессъёсты автоматизировать каронъя лаборатория кылдытӥзы, со огшоры станокъёсты полуавтомат но автомат амалэн ужатон вылысь выльдонэн выриз. Цехъёсын ик 120 токарной, 378 фрезерной, 30 портӥсь станокъёс умоятэмын вал, нош 105-ез быдэсак автоматъёслы пӧрмытэмын.

Пыӵалтӥрлык поттонын станокъёсын паркез выльдӥзы, выль автомат линиос кылдӥзы. Михаил Калашников кивалтэм улсын заводысь конструкторъёслэн отделзы чакламъя выль ыбылӥськон тӥрлыкъёслы образецъёс потӥзы: выль автоматлэн модификациосыз — АКМ, АКМС, АК-74; Калашниковлэн пулемётэз — РПК, РПК-74; Драгуновлэсь СВД снайпер винтовкаез.

Озьы ик заводын спорт но пӧйшуран пыӵалъёс лэсьтӥзы: БИ-7,62, БИ-59, БИ-5 биатлон винтовкаос; «Зенит», «Зенит-3», «Зенит-4» цель шоры ыбылӥськон винтовкаос, «Бызись пужей» упражнениын ӵошатсконъёслы — БО-59, МБО-1, МБО-1М; «Гондыр», «Тигр», «Барс», «Лось» пӧйшуран карабинъёс.

Таӵе мотоциклъёсты поттон радъяськиз: «Иж-Юпитер» (1961), «Иж-Юпитер-2» (1965), «Иж-Юпитер-3» (1971), «Иж-Планета» (1962), «Иж-Планета-3» (1971), озьы ик «Иж-55М», «Иж-57М», «Иж-65М» спорт модельёс. 1960-тӥ арысен 1965-тӥ арозь миллион мотоцикл лэсьтэмын вал. 1972-тӥ арын конвейерысь 5 000 000 номеро мотоцикл васькиз.

1966-тӥ арын «Москвич — 408» машина поттон радъямын вал, 1967-тӥ арын — «Москвич-412», 1968-тӥ арын — «Москвич-434» фургон. 1970-тӥ арын роботъёсын машина бичанъя валтӥсь конвейерез нырысьсэ эксплуатацие лэзизы. 1973-тӥ арын «Иж-2125 Комби» машина поттыны кутскемын^[3].

1964-тӥ арын заводысь станокъёс лэсьтонъя конструктор бюроын универсальной токарно-винторезной 1И611П станок кылдытӥзы, уно пумо пичи лэчыт станокъёслы инъет луиз со, пӧлазы программаен кивалтон станокъёс но пыризы.

Кунамы 1970-тӥ аръёс «гуньдон» вакытэн лыдъяськизы ке, Иж понна та аръёс пайдаё но сяськаяськонэн берытскизы. Син азяды пуктэ: «Ижмаш» производствоя огазеяськонэ куать заводъёс — пыӵалтӥрлык лэсьтӥсь, корт поттӥсь, тӥрлык лэсьтӥсь, станок лэсьтӥсь, точной механикая завод но автозавод — пыризы, отын 60 сюрс пала адями ужаз. Пӧлазы улон инты лэсьтонъя, транспортъя, ЖКХ-я управлениосты, нылпи учреждениосты но трос мукетсэ пыртыны луоно на. Котькуд заводлэн аслаз дирекциез, парткомез, профкомез, ВЛКСМ-лэн комитетэз вал. Ма, мар веранэз — котькуд бадӟым цех завод выллем вал: шуом, сваркая цехын 1,5 сюрс адями ужалляз! Нош вань та бадӟым махинаен Иван Фёдорович кивалтӥз.
— Александр Коробейников, ужысь ветеран^[4]

1954-тӥ—1962-тӥ аръёсы СССР-лэн Вылӥ Советэзлэн депутатэз вал. 1963-тӥ—1975-тӥ аръёсы — УАССР-ысь Вылӥ Кенешлэн депутатэз. 1980-тӥ арын пенсие потӥз.

1985-тӥ арын 22-тӥ гудырикошконэ улонысь кошкиз, Ижкарысь Хохряк шайвылын ватэмын^[5].

Буре ваён

Россиысь Спас-Деменск карын^[6] И. Ф. Белобородовлэн бюстэз юнматэмын.

Иван Белобородов кулэм бере, заводлэн коллективез куремъя, Ижкарлэн администрациез Белобородовлэн берло улэм коркасьтыз борддораз мемориал пул шуккиз.

Мемориал пул озьы ик «Ижмашлэн» заводоуправлениезлэн борддораз юнматэмын.

2015-тӥ арын «Ижкарлэн дано кунмуртэз» нимын пусъемын кулэмез бере^[7].

И. Ф. Белобородовлэсь нимзэ Иж тыметлэн лымшор ярдурезлы сётыны огкылысь кенешемын.

Данъетъёсыз но дано нимъёсыз

Социалистической Ужысь кык полэс Герой (28.07.1966, 12.12.1979);
Ленин нимо 3 орден (1957, 28.07.1966, 12.12.1979);
Октябрь Революци нимо орден (1971);
Ужысь Горд Знамя нимо 2 орден (1944, 1974);
СССР-ысь Министръёслэн Кенешсылэн премиезлэн лауреатэз (1973).

Валэктонъёс

↑ ¹ ² ³ ⁴ Faceted Application of Subject Terminology
↑ Иван Федорович Белобородов, награды директора "Ижмаш" Музей "Ижмаш".
↑ Иван Белобородов — создатель заводов Ижевска, ИА СУСАНИН. Эскеремын: 10 коньывуонэ 2024 арын.
↑ «Иван Железный»: как один человек руководил 60 тысячами заводчан, IZHLIFE. Эскеремын: 10 коньывуонэ 2024 арын.
↑ Белобородов Иван Фёдорович
↑ Международный реестр мемориалов, кладбищ, воинских захоронений, братских могил: Мемориал — Мемориал героям землякам в городе Спас-Деменск
↑ Белобородов Иван Федорович Официальный сайт Ижевска.

Чӧлсконъёс

Иван Фёдорович Белобородов [ӟуч] «Герои страны» сайт.

[_be2bff9c4764c7ed-1] ¹ ² ³ ⁴ Faceted Application of Subject Terminology

[2] Иван Федорович Белобородов, награды директора "Ижмаш" Музей "Ижмаш".

[3] Иван Белобородов — создатель заводов Ижевска, ИА СУСАНИН. Эскеремын: 10 коньывуонэ 2024 арын.

[4] «Иван Железный»: как один человек руководил 60 тысячами заводчан, IZHLIFE. Эскеремын: 10 коньывуонэ 2024 арын.

[5] Белобородов Иван Фёдорович

[6] Международный реестр мемориалов, кладбищ, воинских захоронений, братских могил: Мемориал — Мемориал героям землякам в городе Спас-Деменск

[7] Белобородов Иван Федорович Официальный сайт Ижевска.

[1]

[2]

[3]

[4]

[5]

[6]

[7]