Ананьино лулчеберет
| Ананьино лулчеберет Корт даур | ||||
|---|---|---|---|---|
 Туйлэсь секира. Ананьино лулчеберет. Асьме эралэсь азьвыл VII—V дауръёс. Татарстанысь йӧскалык музейысь экспозиция | ||||
| Интыяськемез | Поволжье | |||
| Дырыз | Асьме эралэсь азьвыл VIII—III дауръёс | |||
| Калыкъёс | Пермянъёс ? | |||
| Бӧрысьлыкез | ||||
|
||||
Ананьино лулчеберет (огъялык) (ӟуч: Ананьинская культура) — асьме эралэсь азьвыл IX—III дауръёс пумысь археологияя лулчеберет (лулчеберетъя но историяя огъялык), Шор Поволжьелэн интывылаз (Ветлуга шурысен Ульяновскозь) но Кам бассейнын вӧлмиз. Лымшор но шундыӝужан перифериын лулчеберетъя синпелетъёс Белая шурлэн улӥ бызёнэзлэн ярдуръёсаз интыясько, солэн ву усёнысеныз Бирск карозь (Новокабаново, Какрыкуль, Петер-Тау, Аначево, Тра-Тау, Трикол, Новобиктово городищеос, Бирск поселение, Таш-Елга могильник). Волга-Кам но уйпал ёросъёсысь лулчеберетъя синпелетъёс пуксизы Приполярьеысь Печора шур дорозь.
Нимыз сётэмын Алабго (Татарстан) котырысь Ананьино гурт вӧзысь шараям нырысетӥ шайёсъя, сое 1858-тӥ арын усьтӥзы П. В. Алабин но И. В. Шишкин.
Поволжьеын но Улӥ Прикамьеын ананьино лулчеберет пытьыосыз асьме эралэсь азьвыл VI даурын ышо, мукет ёросъёсын — асьме эралэсь азьвыл III—II дауръёсы.
Котыртымтэ но юнматымтэ поселениос, вашкала каръёс но шайёс тодмоесь. Поселениосын но городищеосын шедьтэмын музъем вылэ пуктэм коръёслэсь улон юртъёслэн бервылъёссы (быдӟалаез 10×5 м; 12х4 м). Со сяна, Конецгор поселениын шараямын секциослы люкылэм кузь коркаос, шортӥз кузянак тылскемъёслы инты лэсьтэмын.
Болгар IX селищелэн но Пермь котырысь Болгары гурт вӧзысь Протасы шайвыллэн материальной культураез асьме эралэсь азьвыл III—II дауръёсы пусъемын, Пермь Прикамьеысь ананьино лулчеберетысен глядено лулчеберетэ выжон вакытлы тупа[1].
Экономика
Улӥсьёсыз пудо вордонэнгес выризы, озьы ик пӧйшуразы, чорыгазы но бичаськизы. Музъем ужен выризы я ӧз юанъя али но эскеронъёс мыно. Зол азинскиз сьӧд но чибориё металлургия, туй ӵыжатон но дуриськон, куиськизы, черсӥськизы, лыослэсь но куослэсь арбериос лэсьтылӥзы, тусьты-пуньы пӧрмытъязы. Тодметэз луэ гопо но пунэм кадь орнаментэн котырес пыдэсо керамика. Поселениосын лылэсь трос арбериос шедьто, соос ӵемысь пӧйшуранэн герӟаськемын (пӧртэм формаен пукыӵ ньӧлъёслэн йылъёссы, гарпунъёс, герыослэн йылъёссы).
Ананьино лулчеберетлэн вазь вакытъёсаз огдыре пумисько туйлэсь но кортлэсь ужан но ожмаськон тӥрлыкъёс. Озьы ик излэсь пукыӵ ньӧлъёс но вуштонъёс шараямын. Ананьино лулчеберет вылын зол шӧдӥськиз Кавказ лулчеберет (колхид но кобан), Евразиысь кочевникъёслэн скиф но шундыӝужан пал лулчеберетсы. Ананьиноослэн улоназы бадӟым инты басьто вал Кавказ лулчеберетэз нуллӥсьёсын кусыпъёссы (трос импортной арбериос). Кортэз ӵыжатон амалъёссы ӵапак кавказ сям-йылолъёслы тупало шуыса, чакламын.
Ватӥськонъёс
Вашкала шайгуос вырйылтэк (кургантэк) лэсьтэмын, куддыр соос туж паськытэсь (Быдӟым Ахмылово шайын 1100-лэсь ятыр гуос вал). Тужгес вазь гудэмъёсаз, кылсярысь, I Мордва, шедьтылӥзы шайёслэсь палэнэ интыям ожтӥрлыкез возьматӥсь излэсь стелаос. Асьме эралэсь азьвыл VI—V дауръёсы та стелаосты гуос вылэ юнматъяны ӧдъязы, куд-ог дыръя отын киосазы ожтӥрлыкен яке сотэк пиосмуртъёсты суредаллязы. Гуосын ингумация йылол шӧдске, соос вадьсын корка выллем бугроос ӝутылэмын. Тросгес вал огназы ватэм лысьӧмъёс, но шараямын парен но коллективен ватэмъёсыз но, люкылэм (повторной) но частичной (йыркобыосты ватон) гуос но усьтэмын. Ватӥськон учыръёсы сьӧразы ӵемысь келяллязы сӥлен сиён (воргоронъёслы — вал сӥль, нылкышноослы — скал сӥль), озьы ик шайёсы пӧртэм арбериос тырылӥзы, соос пӧлын горд сюйлэсь лэсьтэм сосудъёс шараямын. Воргорон шайгуосысь шедьтэмын ожтӥрлык, ужан тӥрлык (шибоды, кельт, меч, кинжал, пукыӵ ньӧл йылъёс, клевец) но чеберъяськонъёс. Нылкышно шайгуосын шараямын чеберъяськон арбериос (суйпосъёс, сын, ку йыркерттэт вылэ вурем бляшкаослэсь но пилинӟы выллем гумыослэсь бичетъёс).
Кылдэмез
Ананьино лулчеберетлэн кылдэмез но азинскемез сярысь юан туннэ но трос эчешонъёсты бугыртэ. 1960-тӥ аръёсы вераськон мынӥз интыысь, бер туй но палэнысь лыктэм, уйпал сибирь компонентъёслэн соотношенизы сярысь. А. Х. Халиков чакламъя, ананьино лулчеберет Кузон котырысь лулчеберетлэн бер этапысьтыз «ӝужамын», талы пумит луылӥзы О. Н. Бадер но В. П. Денисов. Ананьино лулчеберетлэн кылдоназ зауральской племяослэн валтӥсь интызы сярысь малпанзэ вералляз В. Ф. Генинг[2]. Берлогес ни ананьино лулчеберетлэсь инъет вариантъёссэ утчаны кутскизы лебяжье но быргында вашкала лулчеберетъёсысь.
Антропологияя типез
Ананьиноос пӧлын лапегесь но паськыт ымныро монголоидъёс вал[3], озьы ик европейской типе пырисьёс. Монголоидной йыркобыос шараямын Луговое, Ананьино но Котловка шайёсын, тае герӟаны луэ асьме эралэсь азьвыл VII—VI дауръёсы Шор Поволжьее Уйпал но Шор Предуралье улосъёсысь выль калык лыктэмен[4].
Кыл
Ананьиноос асьсэ бере нокыӵе гожтэм синпелетъёсты ӧз кельтэ, соослэн кылзы сярысь номыр тодмо ӧвӧл. Куд-ог тодосчиос лыдъямъя, ананьиноос финн-угор кыл группае пырылӥзы. Огез гипотезая соосты вашкала грек историк Геродотэн пусъем тиссагетъёсын яке аргиппейёсын ӵошато, таосты Геродот скифъёслэсь но сарматъёслэсь уйпал но шундыӝужан пала интыялляз (берпуметӥ версия оскымонгес, малы ке шуоно Геродот аргиппейёслэсь монголоид вылтуссы сярысь гожтэ, нош тиссагетъёслэн туссы сярысь номыр но уг вера, таос, вылды, котырысьтыз европеоидной племяослэсь ӧз висъяськылэ). Веран вань, ананьино общностьлэн уйпал но шундыӝужан пал люкетаз пермянъёс (комиослэн но удмуртъёслэн выжыоссы) кылдӥзы шуыса, шундыпуксён люкетаз — волжской финнъёс (поръёс), озьы ке но али та гипотезаез юнматыны быгатӥсь нокыӵе генетикая эскеронъёс ӧвӧл.
Валэктонъёс
- ↑ Васильева А. В., Коренюк С. Н., Перескоков М. Л. (2015) Болгарское IX селище — памятник финала ананьинской культуры в окрестностях г. Перми [ӟуч] cyberleninka.ru. Эскеремын 2026-02-21 арын
- ↑ Учёные записки ПГУ [ӟуч] cyberleninka.ru (1967). Эскеремын 2026-02-21 арын
- ↑ Сергей Синенко (04-12-2023) Ананьинская культура в бассейнах средней Волги и Камы [ӟуч] posredi.ru. Эскеремын 2026-02-21 арын
- ↑ Ананьинская культура [ӟуч] Казанский федеральный университет. Эскеремын 2026-02-21 арын
Литература
- Археология Южного Урала / В. А. Иванов (науч. ред.), А. Х. Пшеничнюк, Ю. А. Морозов и др.. — Стерлитамак: Изд-во Стерлитамак. гос. пед. ин-та, 1992. — 233 с. — ISBN 5-86111-005-0.
- Ашихмина Л. И. Генезис ананьинской культуры в Среднем Прикамье. — Казань: Институт археологии им. А. Х. Халикова АН РТ, 2014. — 300 с. — ISBN 978-5-9222-0923-6.
- Голдина Р. Д. Древняя и средневековая история удмуртского народа. — Ижевск: Удмуртский университет, 1999. — 463 с.
- Збруева А. В. История населения Прикамья в ананьинскую эпоху // Материалы и исследования по археологии СССР. — 1952. — № 30. — С. 326.
- Иванов В. А. Вооружение и военное дело финно-угров Приуралья в эпоху раннего железа (I тыс. до н. э.-первая половина I тыс. н. э.). — М.: Наука, 1984. — 88 с.
- Кузьминых С. В. Металлургия Волго-Камья в раннем железном веке: Медь и бронза. — М.: Наука, 1983. — 257 с.
- Марков В. Н. Ананьинская проблема. — Казань, 1994. — 48—88 с.
- Марков В. Н. Нижнее Прикамье в ананьинскую эпоху (Об этнукультурных компонентах ананьинской общности). — Казань: Институт истории АН РТ, 2007. — 136 с.
- Халиков А. Х. Волго-Камье в начале эпохи раннего железа. — М., 1977. — 262 с.
- Чижевский А. А. Погребальные памятники населения Волго-Камья в финале бронзового — раннем железном веках: Предананьинская и ананьинская культурно-исторические области. — Казань: РИЦ «Школа», 2008. — 172 с.
 |
|---|
