Калашников автомат

Калашников автомат
Типез	Автомат.
Кун	СССР СССР
Кутӥськемезлэн историез
Уже кутон аръёс	1949-тӥ—1958-тӥ аръёс (СССР)
Вооружение кутэмын	1949-тӥ арын
Вооружениын	учке Автоматэз кутӥсь кунъёс
Ожъёсын но ваче вуонъёсын	XX даурлэн шорысеныз но али дырозь ваньмаз сямен ожъёсын, восстаниосын но инсургенциосын кулэс лыдӟет Вьетнамын ожмаськон Лаосысь граждан ож Камбоджаысь граждан ож Кампучи-вьетнам ваче вуон Китай-вьетнам ож Афганистанысь граждан ож Иран-ирак ож Персид заливысь ож Хорватиысь ож Босниысь ож Ирак ож Мексикаысь наркоож Камбоджа-тай кунгож дурысь ваче вуон (2008) Ливиысь граждан ож Сириысь граждан ож Иракысь граждан ож Туарегысь восстание (2012—2013) Россия-украина ожгар конфликт
Поттонлэн историез
Инженер-конструктор	Михаил Калашников
Кылдытэмын	1947-тӥ арын
Поттӥсез	Ижысь машиностроительной завод
Поттон аръёс	1949-тӥ арсыен али дырозь
Ваньмыз-ӧвӧлэз поттэмын	>100 млн
Вариантъёс	АК АКС АКМ АКМС АК-74 АКС-74 АК-74М АКС-74У AK-103 AK-105 AK-107 АК-12 АК-15 АК-19
Тодметъёсыз
Секталаез, кг	патронъёстэк / снарядитьтэмын. штыктэк нырысетӥ выпуск: 3,8 / 4,3 0,43 / 0,92 — буш / тыро магазин бӧрысь выпуск: 3,8 / 4,3 0,33 / 0,82 — буш / тыро магазин 0,27 / 0,37 — пурттэк штык / пуртэн
Кузьдалаез, мм	870 / 1070 (штыкен) 645 (АКС понэм прикладэн)
Гумылэн кузьдалаез, мм	415 369 (нарезной люкетэз)
Патрон	7,62×39 мм
Калибр, мм	7,62
Ужан принципез	порох газъёсты палэнтон, бергась затвор
Ыбылӥськон ӝоглыкез, ыбон/мин	40 (боевоез одӥген) 100 (боевоез черодэн) 600-650 (технической)
Пулялэн кутскон ӝоглыкез, м/с	715
Дальнобойность, м	800
Максимальной дальностез, м	350 (50 см ӝуждалаем целе шонер ыбонлэн кузьдалаез) 1500 (пулялэн быдтон кужымез утиське) 3000 (пулялэн тужгес кузь лобӟонэз)
Боепитанилэн видэз	коробчатой магазинэз 30 патронлы
Прицел	секторен
Медиафайлъёс РувикиМедиа пушкын

7,62-мм Калашников автомат (АК) (ӟуч: Автомат Калашникова) — СССР-ын 1949-тӥ арын вооружение кутэм автомат; ГРАУ индексэз — 56-А-212. Сое 1947-тӥ арын М. Т. Калашников лэсьтӥз, угось талэсь азьвыл АК-46 образец 1946-тӥ арын ортчытэм конкурс эскеронъёсын куашказ. АК-ын мукет конструкторъёслэсь техникая амалъёссэс адӟем карыса кутэмын.

АК но солэн модификациосыз дуннеысь ыбылӥськон ожтӥрлык пӧлысь тужгес тодмоез но вӧлмемез луэ, со Рекордъёсъя Гиннеслэн книгаяз пыртэмын: та автомат 100 млн единица лыдъяське, со дуннеысь 106 кунлэн вооруженияз кутэмын.

Та типе (лицензионной но лицензионной луисьтэм копиоссэс, озьы ик АК инъет вылын палэнын кылдытэмъёссэ лыдъяса но) дуннеысь вань стрелковой ыбылӥськон автомат ожтӥрлык пӧлысь 1/5 люкетэз пыре.

7,62-мм Калашников автомат инъет вылын пӧртэм пумо калибрен боевой но граждан ыбылӥськон ожтӥрлык кылдытэмын, соос пӧлын АКМ но АК-74 автоматъёс но соослэн модификациоссы, киын ыбылӥськон Калашников пулемёт, «Сайга» карабинъёс но гладкоствольной пыӵалъёс но мукетъёсыз, озьы ик СССР-лэн кунгож сьӧраз но.

2013-тӥ арын ивортонъёсъя, РФ-ысь ВС-лэн вооруженияз но солы утьыны оскем ваньмыз-ӧвӧлэз пӧртэм пумо 17 000 000 единица Калашников автомат лыдъяське.

Кылдытон но производствое поттон

Совето ожгар кужымъёслы выль автоматической ыбылӥськон пыӵалтӥрлык кылдытон борды кутсконлы сигнал луиз 1943-тӥ арын 15-тӥ пӧсьтолэзе СССР-ысь Обороная наркомат бурд улын ужась Технической кенешлэн люкаськемез, отын Хуго Шмайссерен лэсьтэм дуннеысь нырысетӥ массовой промежуточной 7,92×33 мм калибръем 7,92 mm Kurz немец MKb.42(H) автоматлэсь (вуоно StG-44 прототипез) конструкцизэ эскеризы, озьы ик Ленд-лиз программая вӧлмись .30 Carbine патронлы чаклам 7,62×33 мм калибръем американ капчи самозарядной M1 Carbine (Garand), РККА-лэсь американ но немец выллем ожтӥрлык образецъёсты кутонлэсь кулэлыксэ пусйизы, совето конструктор школалэсь аспӧртэмлыксэ, ожлэн нырысетӥ аръёсаз зол шуге-леке вуэм промышленностья комплекслэь куронъёссэ санэ басьтыса дасям ожтӥрлык, озьы ик «промежуточной» патронэз поттонъя концепциез пыӵатон сярысь вераськизы.

Кенешон бере одӥг толэзь ортчыса ик, ОКБ-44-ын выль патронлэн нырысетӥ образецъёсыз кылдытэмын вал ни, нош 1944-тӥ арын южтолэзе сое серийной луисьтэм производствое поттӥзы.

1943-тӥ арын шуркынмонэ выль 7,62-мм промежуточной патронлы Н. М. Елизаров но Б. В. Сёмин констуркторъёсын быдэстэм чертёжъёс но спецификациос выль ожтӥрлык комплексэз кылдытонэ пыриськись вань организациосы ыстэмын вал. Та вакытэ солэн калибрез 7,62×41 мм вал, но бератаз сое умой-умой выльдӥзы-тупатӥзы, таин валче патрон 7,62×39 мм воштэмын вал.

АК но СКС

Огъя промежуточной патронлы чаклам выль ожтӥрлык комплексэ автомат, озьы ик карабин но киын ужась пулемёт пырыны кулэ вал.

Ожтӥрлык ог 400 м кыдёке пайдаё ыбылыны луонлык кылдытыны кулэ вал, та ласянь со пистолет-пулемётъёслэсь умойгес луылӥз, секыт но дуно винтовка патронлы чаклам пыӵалтӥрлыклы кужыменыз кӧня ке гинэ сётскылӥз. Та РККА-лэн вооружениысьтыз пистолет но винтовка патронъёсты кутӥсь, Шпагинлэсь но Судаевлэсь пистолет-пулемётъёссэс, Мосинлэсь винтовказэ но солэн инъетэз вылысь бичам карабинъёслэсь кӧня ке модельёссэс, Токаревлэсь самозарядной винтовказэ, озьы ик пулемётъёсты — вань ыбылӥськон пыӵалтӥрлыкен арсеналзэ выльдыны луонлык сётылӥз.

1949-тӥ арын вооружение кутэм СКС шоры военачальникъёс дуно усеменыз но бичан ласянь секыт луэменыз вакчи дыр ӵоже потэм (1970-тӥ аръёс кутскытозь) Мосинлэсь винтовказэ воштӥсь шоры кадь оскыса учкылӥзы, нош Дегтярёвлэсь пулемётсэ М. Т. Калашниковен кылдытэм РПК модельлы воштӥзы, татын автоматлы но тупась 7,62×39 мм патрон кутӥськылӥз.

Меӵак автомат кылдытон сярысь ке верано, со кӧня ке люкетэн мынӥз но трос конкурсъёс пыр ортчиз, отчы пӧртэм конструкторъёслэн трос пумо сӧзнэтъёссы пыриськизы.

1944-тӥ арын эскеронъёслэн йылпумъянъёссыя азьланяз выльдон вылысь А. И. Судаевлэн конструкциезъя быдэстэм АС-44 автоматэз кутэмын вал. Со кӧня ке сериен потӥз, Совето войскоослэн Германияысь группазы сое мукет араз тулысысен гужемозь эскериз, озьы ик СССР-лэн интывылысьтыз куд-ог ожгар подразделениосын кужымзэ чаклазы. Умоен пусъемын вал ке но, армейысь кивалтӥсьёс ожтӥрлыклэсь секталазэ кулэстыны косӥзы.

Судаев кулэмен валче та образец бордын ужанлы пум понӥз, соин ик 1946-тӥ арын эскеронъёслэн эшшо одӥг люкетэз ортчиз, отчы со вакытлы ожтӥрлыклэсь кӧня ке модельзэ кылдытэм Михаил Калашников но пыриськиз. Со аре ик шуркынмонэ солэн автоматлы проектэз умоен лыдъямын вал, нош толэзь ортчыса, Ковров карысь пыӵалтӥрлык лэсьтон заводын бичам Калашниковлэн нырысетӥез экспериментальной луись автоматэзлэн куддыр АК-46 пусйиськись вариантэз Булкинлэн но Дементьевлэн образецъёсыныз ӵош испытаниосы келямын вал. Калашниковен ӵектэм вариант оскымон но дунтэм луиз. «Озьы ке но автоматэз сэрттон дыръя тужгес ӧжыт тӥрлык люкаськылӥз, сое капчиен уже кутылӥзы, со вакытэ чаклам „чидланлыкез“ 18-20 сюрс пол ыбон вал, но 100 сюрс пол но ыбыны быгатылӥз. Сое ву пушкын возьылӥзы, сумедэ котылӥзы, техника борды думылыса, бусы сюресъёстӥ 30 иськеме музъем кузя кыскаллязы. Котьма ке но автомат умой ужалляз», — пусйылӥз Ижысь М. Т. Калашников нимо пыӵалтӥрлыкъя адӟытон комплексысь наука ӧнерчи Вадим Хохлов.

1946-тӥ арын кылдытэм образец вуоно АК-лэн уно тодметъёсызлы ӧз тупалля. Кузь газ поршенен ужам интые, вакчиеныз ужалляз. Затворлэн рукояткаез, бур палаз интые, паллян палаз интыяськылӥз, бур палаз юнматэм предохранитель-переводчик интые нимаз флажковой предохранитель но пӧртэм пумо ыбылон тылэз вошъясь люкет вал. Ударно-спусковой механизмлэн корпусэз штифтэн уллань-азьлань лэзиськись лэсьтэмын вал.

Та этапын ваньмыз-ӧвӧлэз куинь пумо автоматъёс лыдъяськизы: 1 номеро АК-46, 2 номеро АК-46, 3 номеро АК-46. 3 номеро АК-46 вариант кык номеро АК-46 вариантлэсь уллань лэзиськись рамочной корт ныдыныз гинэ висъяськылӥз, нош 2 номеро АК-46 пулэсь куяськисьтэм ныдын быдэстэмын вал. 1 номеро АК-46 вариант 2/3 номеро АК-46 вариантлэсь зол висъяськиз. Затворъёслэн личинказы огвыллем вал ке но, затворной рамаос — пӧртэмесь, 2/3 номеро АК-46 вариантын, 1 номеро АК-46 вариантэн ӵошатыса, взводлэн ныдыз затворной рамалэсь люкемын вал. 2/3 номеро АК-46 вариантысь затворной рамалэн вылӥ люкетаз гопез вал, со затворной рамалэсь но гумы коробкалэсь ог-огзы борды зыраськемлэсь утьылӥз. Со сяна, затворной рамаысь гумы коробказылэн интыяськемзыя но пӧртэмлыкез вал. 1 номеро АК-46 вариантын затворной рама гумы коробкалэн направляющийёсыз борды юнматэмын вал. Гумы коробкоассы озьы ик висъяськизы. Озьы 1 номеро АК-46 вариантын со фрезаен лэсьтэмын вал, 2/3 номеро АК-46 вариантын — штампен дуремын, магазинысьтыз приёмникезлэн шахтаез таин валче кузь быдэстэмын вал. 1940-тӥ аръёсы штамповкалэн технологиез рос-прос малпамын ӧй вал, 2/3 номеро АК-46 — озьы ик, гумы коробкаез чакламтэ тырмымтэосын но мултэс шуг-секытъёс кылдэмен йырин умойтэм пӧрмиз.

Озьы ке но приёмной комиссиысь военнойёс куризы взводлэсь ныдзэ бур пала интыяны, малы ке шуоно, паллян палаз юнматыса, со пыӵал нуллыку яке ож бусыетӥ нюжтӥськыку, стрелоклэн мугораз пыкиськылӥз; озьы ик пӧртэм пумо тылэз воштонын кутӥськись люкетсэ предохранителен одӥг герӟетэ огазеяны но соосты бур пала интыяны куризы, та гумы бордысь коробкалэсь паллян палзэ котькыӵе шӧдскымон выступъёслэсь быдэсак мозмытон вылысь кулэ вал.

Эскеронъёслэн кивалтӥсьсы У. И. Пчелинцев полигонлэн техникая отчётэзлэн нырысь редакцияз Калашниковлэсь автоматсэ азьланяз тупамон карыны ӧз дэмла ни вал. Но таӵе йылпумъянлы котькыӵе мукет образецлы формальной инъетъёс вал. Со понна испытаниослэн берпуметӥ люкетаз, конструкторлэн куремезъя, ватсаса эскеронъёс ортчытӥзы, чаклан ужъёсты нимаз пыӵалтӥрлыкез эскеронъя ёзэтлэн кивалтӥсез В. Ф. Лютый ортчытӥз, та понна комиссилэн тӧроез Н. С. Охотников бакель сётӥз. Булкинлэн но Деменьтевлэн образецъёсынызы ӵошатыса, АК-46 конструкцилы ватсаса лэсьтэм анализ возьматӥз: Калашниковлэн конструкциысьтыз шараям тырмымтэосты палэнтыны луонлыкъёс бадӟымесьгес. Полигонлэн дэмланъёсызъя, солэн автореныз ӵектэм системаез воштон амалъёс, мукет конструкциосты тупатъянъёс сярысь, капчигес но вормымонгес кадь йӧтӥзы. Конкурс комиссилэн йылпумъянъёсызъя, Калашниковлэн автоматэз вожвылъяськисьёс пӧлын азьмынӥсь инты басьтӥз. У. И. Пчелинцевлэн малпанэз мукет пала воштӥськиз. Табере тужгес устоен но азьланяз тупатъяны луымонэн со АК-46-ез лыдъяз.

Коврове берытскыса, М. Калашников Ковровысь 2 номеро заводысь конструкторен А. Зайцевен ӵош вакчи дыр куспын выль автомат бичаз шуыны луоз, трос тодметъёсъя валамон: солэн конструкцияз конкурсэ ыстэм мукет образецъёслэсь яке азьвыл лэсьтэм образецъёслэсь асэстэм элементъёс (валтӥсь герӟетъёслэн радъяськемзы но) паськыт кутӥськизы.

Озьы газ поршенен зол юнматэм затворной рамалэн конструкциез, гумы коробкалэн огъя компоновкаез но берен сётскись пружиналэн направляющиеныз ӵош интыяськемез, гумы коробкалэсь ӵоксэтсэ ворсанын кутӥськись выступез конурсэ поттэм Булкинлэн опытной автоматэзъя лэсьтэмын вал; УСМ конструкциезъя Холек винтовкалэсь адӟем каремын луыны быгатылӥз (мукет ивортонъёсъя — Джон Браунинглэн разработкаосызлы укша, сое M1 Garand винтовкаын кутылӥзы); предохранительлэн но пӧртэм тылын ыбылӥськонъя воштӥсь люкетэзлэн рычажокез, озьы ик затвор укноез тузонлэсь утись ӵоксэт выллыем ужась арбериез Remington винтовкалы тупалляз, нош гумы коробка пушкысь затвор группазэ «юнматӥсь» люкетэз Судаевлэн автоматэзлы кельшылӥз.

Конкурслэн куронъёсызъя, вожвылъяськисьёслэн конструкциосынызы системаослэн авторъёссылы тодматскыны но ӵошатсконэ поттэм образецъёслэн конструкциязы шӧдскымон воштонъёс пыртыны алэмын вал (комиссия Калашниковлэсь выль прототипсэ конкурсэ азьланяз пыриськыны лэзьытэк быгатэ вал), озьы ке но куронъёслэсь та ортчыт ӧй вал.

Нырысь ик, выль пыӵалтӥрлык сӧзнэтъёс кылдытыку, мукет образецъёслэсь адӟем карон шер ӧз пумиськылы, кыкетӥез, СССР-ын та выллем асэстонъёс со вакытэ алэм гинэ ӧвӧл, дунъяськылӥзы но, тае аспӧртэм патент законодательствоен валэктыны луэ, озьы ик прагматикая малпаськонэн — зэмос ожгар кышкытлык кылдэмен йырин вооружение тужгес усто конструктор амалъёсъя быдэстэм образецъёсты кутоно, соос кинлэсь ке асэстэмын ке но.

Со сяна, тросэз воштӥськонъёс конкурслэн азьло люкетъёсызлэн йылпумъянъёсызъя выль пыӵал поттонын тактикая но техникая куронъёсын герӟаськылӥзы, военнойёслэн лыдъямзыя, соос тужгес кулэ луись но шонер вал, соин ик Калашниковлэн конкурентъёсыз берпуметӥ образецъёсазы огкадь конструктивной амалъёсты кутылӥзы.

Усто амалъёсты уже кутон огъя конструкцилэсь умой луэмзэ уг возьматы на. Калашников но Зайцев вакчи дыр куспын сыӵе конструкция бичаны быгатӥзы, дась герӟетъёсты но коструктивной амалъёсты асэстыса гинэ со уг пӧрмы. Солэсь ортчыт, малпан вань: тужгес усто луэм но асьсэды техника ласянь умой возьматэм амалъёсты асэстон бордысь котькуд усто пыӵалтӥрлыклэсь образецсэ кылдытон луэ, конструкторлы та азинскыны юрттэ, «выль велосипед» лэсьтытэк.

Куд-ог ивортонъёсъя, автоматэз кылдытонэ ГАУ-ысь ыбылӥськон но миномёт вооружения полигонысь наукая но эскеронъя кивалтӥсь В. Ф. Лютый мыло-кыдо пыриськиз, отӥяз со 1947-тӥ арын полигон эскеронъёсын кивалтӥсь луиз. Нялтас вераса, ӵапак та полигонын АК-46 вариант брак пӧлы пыртэм вал.

Котьма ке но, 1946-тӥ—1947-тӥ арын толалтэ конкурслэн выль люкетаз умоятэм но рос-прос выльдымтэ Дементьевлэн (КБП-520) но Булкинлэн (ТКБ-415) автоматъёсынызы ӵош Калашников выль автоматсэ (КБП-580) адӟытӥз, азьвыл вариантлэсь со воксё висъяськылӥз.

Эскеронъёсъя адӟиськиз, одӥг образец но тактикая но техникая куронъёслы быдэсак уг тупа шуыса: Калашников автомат тужгес оскымонэз вал, но ыбылӥськонын меӵлыкез (ӟуч: кучность умой ӧй вал, нош ТКБ-415 меӵлыкеныз висъяськиз ке но, оскымон луонэзъя шугъяськытылӥз. Озьы комиссия Калашниковлэн образецез понна дурбасьтӥз, нош ыбылӥськонын меӵлыксэ умоятон ужпумез берлолы кельтонъя огкылэ вуизы. Та армиез вакчи дыр куспын туала но оскымон ожтӥрлык вылэ поттыны юрттӥз, со сокем меӵ ӧй вал ке но.

СССР-ысь вооружениея министрлэн Д. Устиновлэн 1500 штука мында АК-47 опытной партиез поттон сярысь 1948-тӥ арын 21-тӥ толшоре кутэм приказэз

1948-тӥ арын южтолэзе, артиллериысь валтӥсь маршал Н. Н. Воронов косэмъя, Ижысь мотозаводын АК-47 автоматлэсь 1500 единица тыр нырысетӥ опытной партиезлы техникая документацизэ но сое поттонэз радъян вылысь Ижкаре Калашников вуиз.

М. Т. Калашников вуэмлэсь азьвыл ик предприятиын дасяськон ужъёс рос-прос радъямын вал. Изделилэсь авторзэ пумитаны дасяськыса, заводлэн директорез В. И. Фомин оскымон ужез быдэстон вылысь вань службаоссэ ӝутӥз: кивалтӥсьёслэсь, ӧнерчиослэсь, вылӥ квалификациен слесарьёслэсь, токарьёслэсь, фрезеровщикъёслэсь юн группа кылдытэмын вал; выльдӥськонъёс ортчытэмын вал; цехъёсы кулэ луись тӥрлык вуттэмын вал.

Задание тупатэм дырлы быдэстэмын вал. 1948-тӥ арын Ижысь мотозаводын бичам 1500 автоматъёс ожгар эскеронъёс пыр умой ортчизы.

СССР Союзысь Министръёслэн Кенешсылэн 1949-тӥ арын 18-тӥ инвожое кутэм 2611-1033сс номеро постановлениезъя, 1947-тӥ арысь образецъя лэсьтэм Калашников автомат Шпагинлэн но Судаевлэн пистолет-пулемётэз интые вооружение кутэмын вал. Та постановление вылэ пыкиськыса ик, вооружение кутэмын: 7,62-мм промежуточной патрон, Симоновлэн самозарядной карабинэз но та патронлы чаклам Дегтярёвлэн киын ыбылонъя пулемётэз.

1949-тӥ арын автомат кылдытэмез понна М. Т. Калашников Сталин нимо I степенё премиен пусъемын вал. Та аре ик сое выльысь Ижкаре Ижмаш заводэ командировкае ыстӥзы, татын автоматэз сериен поттыны огкылэ вуизы.

Автоматъёсты араз ӝыны миллион пала сериен поттон понна вакчи дыр куспын конструктор, технология но ужез радъян ужпумъёсты быдэстоно луиз. Озьы, конкурсэ поттэм образецен ӵошатыса, 228 конструкторской но 214 технологической воштонъёс пыртэмын вал. Производствоысь 824 единица тӥрлыкез радъяны но интыяны, 2470 контрольной калибръёслы, 1105 единица вандӥсь тӥрлыклы, пӧртэм 865 юрттӥсь арбериослы но 171 штампъёслы проект лэсьтыны но соосты поттыны кулэ луиз.

Сериен поттэм нырысетӥ арбериосты эскеронын ӧз чидалэ ожгар пружина, автоспуск, выбрасыватель но солэн пружинаез, тӥяськизы спусковой крючоклэн осез но ударник.

Штампен лэсьтэм гумы коробкаос пӧлысь шӧдскымон процентэз быдӟалаезъя но хромированиысь шекъёсъя бракен потылӥзы. Гумы коробка чакламъя чурыт ӧй вал, соин сэрен, механической обработка пыр ортчыкуз, быдӟалаез вошъяськылӥз. Автоматэз но солэсь гумы коробказэ ялан конструктор ласянь тупатъяны кулэлык кылдэмен, выль тӥрлык яке штампъёсты лэсьтонъя ужпум кылдылӥз. Ваньмыз со пыӵал поттонъя кун планлэн зӥбетэз улын радъяськиз. Таин валче дурем арбериослэсь фрезеровать карыса лэсьтэм коробкаосты поттонэ огдырлы выжонъя огкылэ вуизы. Одӥг арбериез ӵыжатонын 15 килограмм корт кутон нормаез утьыны но автоматлэсь огъя секталазэ кулэстыны, тупатъяны мынӥсь дырез ичиёмытыны быгатӥзы. 1950-тӥ арлэн пумаз фрезеровать карем коробкаослэн нырысетӥ опытной партизы лэсьтэмын вал. Выль образецез «Капчиятэм 7,62 мм Калашников автомат» (АК) шуыса пусйизы.

Капчиятэм автомат капчигес магазинъёсын чурытэсь реброосыныз (азьло магазинъёслэн борддоръёссы вольытэсь вал), бордаз штыкез юнматыны луонлыкен (пыӵаллэсь азьвыл вариантсэ вооружение штыктэк кутӥзы) висъяськиз.

Мукет аръёсаз разработчикъёслэн коллективзы конструкциез умоятон бордын ужаз, соос азьвыл сериен поттэм образецъёслэсь «осконтэмгес луэмзэс, секыт куазьын но экстремальной условиосын ожтӥрлыклэсь ыбылыны пумит луэмзэ, ыбылыку вӧлскемзэ, уже кутонын лябгес сямъёссэ» пусйылӥзы.

1950-тӥ аръёслэн кутсконазы Герман Коробовлэн конструкциеныз ТКБ-517 автомат потӥз, солэн секталаез пичигес вал, умойгес ыбылӥз, поттонын дунтэмгес усьылӥз, таин валче выль автоматэз но соин ӵош умой-умой ужаны быгатӥсь ручной пулемётэз кылдытонын тактикая но техникая ужпумъёс ӝутӥськизы. 1957-тӥ—1958-тӥ аръёсы эскеронъёслы конкурс ортчиз, отын Калашников аслэсьтыз выльдэм автоматэзлэсь образецсэ но солэн инъетэз вылын лэсьтэм пулемётэз адӟытӥз. Йылпумъянъёсъя комиссия Калашниковлэн оскымонгес луись но пыӵалтӥрлык поттон промышленностьын но войскоосын кутӥськись образецъёсызлы дурбасьтӥз. 1959-тӥ арын «7,62-мм модернизированной Калашников автомат» (АКМ) вооружение кутэмын вал.

1970-тӥ аръёсы, НАТО-ысь кунъёс сьӧры уйиськыса, нуллоно ожгар комплектэз капчиятон вылысь СССР ыбылӥськон пыӵалтӥрлыкез пичи импульсэн ужась пичиятэм калибръем патрон вылэ поттӥз (8 магазинлы 5,45 мм калибръем патрон 1,4 кг секталалы экономия сётэ), 7,62-мм патронлэсь «мултэс» кужымзэ кулэстӥз. 1974-тӥ арын вооружение 5,45×39 мм патронлы чаклам ожтӥрлык комплекс кутэмын вал, отчы АК-74 (АКС-74) автомат но РПК-74 киын ужась пулемёт пыризы, нош отӥяз (1979-тӥ арын) со борды пичи кабаритъем АКС-74У автомат ватсаськиз, сое запад армиосын кутӥськись пистолет-пулемётъёсты, бӧрысь PDW нимаськись пыӵалтӥрлыкез воштыны поттӥзы. СССР-ын АКМ-ез поттон дугдытэмын вал, но туннэ но та автомат вооружениын кутӥське.

Мукет образецъёслэн конструкциенызы ӵошатон

Таӵе малпанэн пумиськыны луэ: АК-ез кылдытонын Булкин конструкторлэн ТКБ-415, Симонов конструкторлэн ABC-36, Шмайссер немец конструкторлэн StG 44 но ыбылӥськон ожтӥрлык пӧлысь куд-ог мукет образецъёслэн быдэсак я оглюкетэз прототипсы кутӥськиз.

Таӵе мылкыдъёслэн зэмлыко тысез со бордын: Калашников автомат, зэмен ик, вань пусъем но мукет кылдытэм пыӵалтӥрлыклэсь тужгес усто малпанъёссэс пыӵатӥз, кылсярысь, StG 44 пыӵаллэсь — промежуточной патронэз кутыны быгатонлыксэ, ТКБ-415 ожтӥрлыклэсь — конструкция но технология ласянь куд-ог аспӧртэм сямен быдэстэм техникая гердъёссэ, затвор люкетсэ гинэ ӧз асэсты.

«Ижмаш» музейысь ӧнерчиос бадӟым люкетсэ ивортонъёсты эскеризы но Калашников автоматлэсь но StG 44 штурмын кутӥськись винтовкалэсь техникая люкетсэс ӵошатӥзы. Нырысь ик, соос компоновка ласянь пӧртэмесь: немец автомат быдэсак кортлэсь лэсьтэмын, зол ожмаськонын со ӟырдалляз но, нимысьтыз пӧзьыостэк сое кутыны уг луы вал. Солэн модифицированной куасалскись-итӥськись версиез чакламын ик ӧй вал, кылсярысь, парашютистъёслы. Калашников аслэсьтыз разработкаоссэ нуиз Ковровын но Голутвинысь полигонын, нош Шмайссер — Удмуртиын. Иже выжыса но, Калашников Ижкарысь 524 номеро мотозаводын опытной образецъёсты поттонэз радъяз, Шмайссер «Ижмашын» ужаз, озьыен, берпуметӥезлы пыӵалтӥрлык бордын ужаны луонлык воксё ӧз кылдылы. «Шмайссер усто ужбергатӥсь но кивалтӥсь вал, но со азяз пуктэм ужпумъёсты санэ ӧз басьтылы, со дырлы Ижкарын ужам немец ӧнерчиос пӧлын сое уродэн гинэ пусйылӥзы», — вералляз «Калашников» концернысь техникая визь-кенеш сётӥсь Владимир Онокой.

Калашников автоматлэсь но StG-44-лэсь конструкциоссэс пример понна ӵошатыны луоно. Порох газъёслэсь мозмытскыны юрттӥсь кузь ходэн поршеньлы чаклам автоматикалэсь огъя ужась схемазэ кутонын соос тужгес валтӥсь куронъя висъясько — гумы каналэз ворсан амалъя: АК-ын гумы затворез продольной луись ось кузя бергатыса пытсаське, StG-44-ын — затворзэ вертикальной плоскостьын кыскыса. Озьы ик компоновказы но пӧртэм, та автоматъёсты сэрттонын но адӟиське: StG-44 пыӵалэз кесяку, берытскись пружиназэ поттон понна прикладзэ нырысь ик ишкалтоно, таин валче ударно-спусковой механизмез но люкиське, со пистолетлэн ныдыныз ӵош герӟетын уллань позырске; АК-ын ударно-спусковой механизмез уг люкиськы, нош берытскись механизмез быдэсак гумы коробкаын интыямын. АК-ез сэрттон понна ныдзэ воксё но куштоно ӧвӧл.

Та образецъёслэн гумы коробказылэн конструкциез но пӧртэм: Калашников автоматын со быдэсак аслаз гумы коробкаезлэсь сечениын берыктэм но куасалтэм пыдо П буква выллем лэсьтэмын, ӵапак соос кузя затвор группа вырӟылэ, сое вылласянь ворсась ӵоксэтэз вань, автоматэз кесян азьын сое куштоно луэ; StG-44 пыӵалын гумы коробкаез трубчатой, вылӥ люкетэз замкнутой сеченияз 8 цифра выллем лэсьтэмын, со пушкы затвор группа юнматэмын, улӥ люкетэз УСМ коробка сямен ужа, ожтӥрлыкез сэрттон понна, прикладзэ люкыса, сое ыбылӥськон ныдыныз валче штифен уллань куштоно луэ.

Ударно-спусковой механизмлэсь огъя курковой ужан принципсэ кутыку, нимысьтыз ужпумъёссы чылкак пӧртэмесь; магазинэз юнматон висъяське: StG пыӵалын кузь приёмной горловинаез, АК-ын магазинэз гумы коробкалэн укнояз капчиен шедьытӥське; тылэз берыктӥсь но предохранительной люкетэз: StG пыӵалын кыкналасянь пӧртэм пумо тылэз вошъяны юрттӥсь переводчик кнопка выллем лэсьтэмын, паллян палаз интыяськем флажок кадь предохранителез вань, АК-ын — бур палаз интыяськем переводчик-предохранитель.

Контрольно-ревизионной управленилэсь (КРУ) рапортсэ басьтыса, 1962-тӥ арын 12-тӥ коньывуонэ Р. Макнамара Обороная министрлэн воштӥсезлы Сайруслы Вэнс меморандум ыстӥз, отын пусйылӥз, M14 винтовка ыбылӥськонын но ожмаськонын совето аналогезлы (АК) но соцкунъёсысь солэн копиосызлы кужымезъя трослы келя шуыса, нош AR-15 — ожгар куронъёсын кулэ луись вань куронъёсты ортче.

Конструкциез но ужан принципез

Автомат таӵе валтӥсь люкетъёслэсь но механизмъёслэсь лэсьтэмын:

АК-лэн автоматикаез гумы пыртӥ потӥсь дары газъёслэн кужымзы чот ужа

Кылдытэм автоматъёс:
вылӥяз — M16, улӥяз — АКМС

• мертаськись люкетэн, прикладэн но гумы коробкаен гумы;
• гумы коробкалэн куштӥськись ӵоксэтэз;
• газ поршенен ужась затворной рама;
• затвор;
• берыктӥсь механизм;
• гумые юнматӥськись газ трубка;
• ударно-спусковой механизм;
• цевьё;
• магазинэз;
• штык.

АК-ын ваньмыз-ӧвӧлэз ог 95 люкетэз.

1959-тӥ арозь поттэм АК-ез тодманы луэ: ыбылӥськон гожын ныдызлэн пумыз уланьгес учке (пыӵалтӥрлыклэн «губрес» луэмезъя), тазьы нырысетӥоссэ автомат винтовкаосты бичаллязы, угось таӵе компоновка очередень ыбылӥськонын юн но оскымон луэмысь дугдэ.

Со сяна, АК-лэн 7,62 мм патронлы чаклам магазинэз кырыжгес лэсьтэмын, угось гильзаослэн конуссы бадӟым. Кылсярысь, 7,62×39 мм патронысь гильзалэн конусэз, 7,92×33 мм немец паторонысь гильзалэн конусэныз ӵошатыса, 1,5 поллы бадӟымгес. Та возьматэ: АК гильзаослэн фланцаоссы магазинэ окружностьлэн дугаезъя ӝикыт тыремын луыны кулэ, солэн радиусэз 1,5 поллы пичигес, немец патрон улэ магазинлэн дугаезлэн радиусэз сярысь.

Гумыез но гумы коробкаез

Автоматлэн нарезной гумыез (4 нарезэз, паллянысен-выллань-бурпала бергало), оружейной анданлэсь быдэстэмын.

Гумылэн дулолы матэгес интыяськем вылӥ люкетаз газъёслы потыны юрттӥсь пась лэсьтэмын. Вандэм дуло борды мушка интыямын, нош казённой вандэм люкетэз палласянь вольыт борддоръёслэсь — патронник, ӵапак отчы ыбон азьын патрон вуэ. Гумылэн дуло ласянь люкетэз буш (холостой) патронъёсын ыбылон понна втулкаез пыртон понна резьбаез вань.

Гумыез гумы коробка борды юн-юн юнматӥське, ож бусыын сое ӝог воштыны уг луы.

АК-лэн штампен лэсьтэм гумы коробкаезлэн усьтэм тусыз.

Паллян палаз вылӥын но бур палаз гумылэн казённой вандэтэзлэсь улӥын ожмаськон упоръёс адӟисько. Улласянь паллян палан — магазинлэн паллян радысьтыз сётӥськись патронлы сюрессэ возьматӥсь вырйыл. Ваньзы соос пыӵалэ понӥськись огъя ёз выллем лэсьтэмын. Гумы коробкалэн борддоръёсызлэн вылӥяз куасалскем интыос вылӥ направляющийёс луо, нош пушкысьтыз борддоръёс борды ӵыжатэм штампен лэсьтэм детальёс — улӥ направляющийёс. Гумы коробкалэн мышказ УСМ люкетъёс но мышкысьтыз вкладыш адӟисько, соос берыктон пружинаез юнматон вылысь инъет луо.

Гумы коробка автомат люкетъёсты но механизмъёсты одӥг конструкцие юнматон понна кылдытэмын, отын затвор группа но солы кужым сётӥсь люкет, гумыысь затвор каналэз пытсаны юрттӥсь люкет пуктэмын; со пушкын озьы ик ударно-спусковой механизм интыяське.

Гумы коробка кык люкетлэсь кылдытэмын: ачиз гумы коробка но вылӥяз интыяськем басьяськись ӵоксэтэз, со механизмез тӥяськонлэсь но кырсьлэсь уте.

Гумы коробкалэн пушказ ньыль направляющиез («рельсы»; rails), соос затвор группалы ветлыны кужым сёто, — кык улӥяз но кык вылӥяз. Улысьтыз паллян направляющиез гильзаосты поттыны юрттэ.

Гумы коробкалэн азьпал люкетаз вандэм пасьёсыз вань, соослэн мышкысьтызы борддоръёс боевой упор нимасько. Соослы луыса, затвор гумы каналэз пытса. Бурысьтыз боевой упор магазинлэн бур палысьтыз вуэм патронлы озьы ик сюрес возьматӥсь луэ. Паллян палаз вырйылыз вань, со паллян палысьтыз патронэз нуэ.

АК-лэн нырысетӥ партиосыз чурыт маркаем андалэсь штампен лэсьтэм гумы коробкалэсь быдэстэмын вал. Но соку технологиос зол чурыт арбери поттыны луонлык ӧз сётылэ, соин ик брак тӥрлык ортчыт трос вал. Таин валче сериен поттон вылысь кезьыт амалэн лэсьтэм штампез палэнтоно кариськизы, коробкаосты андан юдэсэз фрезеровать карыса ӵыжатъязы, та пыӵалтӥрлык поттонэз дуноятӥз. Бератаз, АКМ поттыку, технология ласянь ужпумъёс сэрттэмын-пертчемын вал, гумы коробка нош ик суро конструкцилэсь лэсьтӥськыны кутскиз.

Огъя андан юдэслэсь быдэстэм бадӟымос гумы коробка, М16 американ винтовка кадь лэсьтэм капчиен ӵыжатэм ненег гумы коробкалэсь ожтӥрлыкен ӵошатыса, пыӵалтӥрлыкез юн но оскымон каре (тужгес но азьвыл фрезеровать карем вариантсэ), но со дыре ик пыӵалэз секытомытэ, озьы ик конструкцияз воштонъёс пыртыны шуг-секытъёс кылдытэ.

Затвор группа

Затвор группалэн пуштросэз: газ поршненен ужась затвор рама, ачиз затвор, выбрасыватель но ударник.

АК74-лэн бергась затворез но ударникез

АК-лэн затворной рамаез затворен ӵош

Затвор группа гумы коробкаын «ошем» кадь интыяське, вылӥ люкетысьтыз вырйылъёсыз вылтӥ рельсаос вылтӥ выллем ветлыса. Озьы гумы коробка пушкысь вырӟылӥсь ёзъёс, висъёсы бадӟымесь луыса но, «ошем» кадь лэсьтэменызы, кырсёмем дыръяз но системалы оскымон ужаны сёто.

Затвор рама затворез но ударно-спускового механизмез ужатыны юрттэ. Со газ поршеньлэн штокеныз рос-прос юнматэмын, со вылэ угось гумы кузя кошкись порох газъёс зӥбо, пыӵаллэсь автоматиказэ ужато. Ожтӥрлыкез выльысь зарядить карыны юрттӥсь рукоятка бур палаз интыяськемын но затвор рамаен ӵош лэсьтэмын.

Затвор цилиндр выллем быдэстэмын, солэн бадӟымесь кык боевой вырйылъёсыз вань, затворез час бергамъя берыктыку, соос гумы коробкаысь нымысьтыз пасьёсы пыро, озьы ыбон азьын гумы канал пытсаське. Со сяна, затвор кузяз ветлэменыз магазинысь ыбон понна мукет патронэз сётэ, со понна улӥ люкетаз досылатель нимо вырйылэз вань.

Затвор борды озьы ик выбрасывательлэн механизмез юнматӥське, со патронникысь бушатэм гильзаез яке осечка луэм патронэз куштыны юрттэ. Со выбрасывательлэсь, солэн осезлэсь, пружиналэсь но шпилька-ограничительлэсь кылдытэмын.

Затвор группаез интыяз берыктон понна берыктӥсь механизм малпамын, со берыктӥсь пружиналэсь (ӵемысь сое янгышен «возвратно-боевой» нимало, озьы ужась пистолет-пулемётъёсын сураса; зэмзэ ке, АК-ын нимаз боевой пружинаез вань, со ик курокез ужатэ, со пыӵаллэн УСМ-аз интыяське) но направляющийлэсь кылдытэмын, берлоез валтӥсь трубкалэсь но пушказ пырись стерженен-муфталэсь быдэстэмын. Берыктӥсь пружиналэн нуись стерженезлэн мышкысьтыз упорез пыре гумы коробкалэн пазаз, гумы коробкалэсь штампен лэсьтэмы ӵоксэтсэ кутӥсь луэ.

АК-лэн вырӟылӥсь люкетъёсызлэн секталаез — ог 520 грамм. Газлэн юн кужыменыз валче соос интыязы ог 3,5-4 м/с ӝоглыкен берытско, та пыӵалтӥрлыклы сӧриськылытэк ужаны луонлык сётэ, но одӥг интые ыбылыны луонлыксэ кулэстэ, угось ожтӥрлык зурка, вырӟылӥсь люкетъёсыз, интыязы пуксьыкузы, зол шуккисько.

АК74 вариантлэн вырӟылӥсь ёзъёсыз капчиесьгес — затворен валче затвор рамалэн секталаез 477 грамм луэ, та пӧлысь 405 г — затвор рама но 72 г — затвор.

АК выжыысь ожтӥрлыклэн вырӟылӥсь ёзъёсыз тужгес капчиесь вакчиятэм АКС74У вариантаз: солэн затвор рамаез ог 370 грамм кыске (газ поршеньлэн вакчиятэм штокезлы луыса), нош затворен валче секталаез — ог 440 грамм.

Ударно-спусковой механизмез

Ось кузяз бергась курокен курок выллем но куинь полэс езлэсь П буква кадь боевой пружинаен.

Спусковой механизм луонлык сётэ дугдылытэк (переключателез шоретӥ интыын дыръя) но оген-оген (улӥяз дыръя) ыбылыны. Одӥг гинэ бергась люкетэз тыллэсь режимзэ воштыны юрттэ, озьы ик кык полэс ужась флажковой предохранитель луэ: предохранение положениын со пытса спусковой крючокез, одӥген но черодэн ыбылыны юрттӥсь шепталоез, затвор рамалы мышлась сётскыны люкетэ, гумы коробка но ӵоксэтэз вискысь кузяз лэсьтэм пазлэсь оглюкетсэ ворса. Со дыре ик вырӟылӥсь ёзъёсты патронникез эскерон вылысь мышласянь кыскыны луэ, но та патроннике мукет патрон вуттон понна тырмыт ӧвӧл.

Автоматикаысь но ударно-спусковой механизмысь вань ёзъёсыз гумы коробка пушкын лач-лач бичамын, озьы со гумы коробкалэсь но, ударно-спусковой механизмлэн корпусэзлэсь но ужзэ быдэстэ.

АК выллем ожтӥрлыкысь «классической» УСМ-лэн куинь осез, — автоспуск понна, курок понна но спусковой крючок понна. Черодэн ыбылӥськисьтэм граждан вариантын ӵемысь автоспуск понна осез ӧвӧл.

Магазинэз

Магазин — сектроной типъем кык радлэсь коробка выллем, 30 патронлы чакламын. Корпуслэсь, стопор планкалэсь, ӵоксэтлэсь, пружиналэсь но патрон сётӥсь ёзлэсь кылдытэмын.

Магазинлэн вылӥ люкетысьтыз зӧк куасалтэм ёзъёс патронъёсты палдэмлэсь возё

АК-ын но АКМ-ын штампен лэсьтэм андан корпусъёсын магазинъёссы вал. Озьы ик пластической массалэсь быдэстэмъёсыз но вал. 1943-тӥ арысь патронлы чаклам 7,62-мм гильзалэн бадӟым конусэз вал, таин валче магазинэз зол куасалтыса лэсьтоно луизы, ожтӥрлыклэсь сяме пырем туссэ кылдытыса. АК74 выжы понна пластической массалэсь магазин лэсьтэмын вал (нырысь поликарбонатлэсь, отӥяз пиялаен тырмытэм полиамидлэсь), вылӥ люкетысьтыз куасалтэм ёзъёсыз гинэ («ымдуръёсыз») кортлэсь вал.

АК-лэн магазинъёсыз патронэз сётон понна юн оскымон луэменызы висъясько, сое тросаз тырмытыку но. Вылӥ люкетысьтыз кортлэсь зӧк «ымдуръёсыз» пластик магазинъёслы но котькыӵе югдурын умой ужаны сёто, — та конструкциез отӥяз асьсэ вузъёссылы кунгож сьӧрысь куд-ог фирмаос но асэстӥзы.

Вылӥын пусъем тодметъёс тупало йылсо ныро но корт кӧмлэсь лэсьтэм пуляосын боевой патронъёслы гинэ, соослы ик ожтӥрлык кылдытэмын вал; Калашников системаысь граждан вариантъёсын, пӧйшуран котырес ныро небыт пуляосты кутыку, куддыр осечка луэ.

АК-лы штатъя чаклам 30-патрон магазинъёс сяна, озьы ик пулемётнойёсыз вань на, соос ог-огзэс быдэсак воштыны быгато: 7,62 мм калибръем 40 (секторен) яке 75 (барабан типен) патронъёслы но 5,45 мм калибръем 45 патронлы. Калашников системалы чаклам кунгож сьӧрын поттэм пӧртэм пумо магазинъёсты санэ басьтоно ке (озьы ик граждан пыӵалтӥрлыкен рыноклы), пӧртэм вариантъёс ӧжытсэ кӧня ке дасо луозы, быдӟалазы 10-сен 100 патронозь.

Магазин гердлэн азинскем горловинаез ӧй вал — магазин гумы коробкалэн укнояз огшоры пуктӥське вал, дурысьтыз вырйылэ шедьытӥськылӥз но защёлкаен юнматӥськылӥз.

Мертаськон ёз

АК-лэн мертаськон ёзэз прицеллэсь но мушкалэсь кылдытэмын.

АК-лэн (яке кунгож сьӧрысь огез копиезлэн) мертаськон люкетэз

Прицел — сектор тип, мертаськон колодкаез пыӵаллэн шораз интыяськемын. Прицел 800 метр кемозь мертаськыны сётӥсь меткаослэсь 100 метр вамышен быдэстэмын (АКМ бордысен кутскыса — 1000 метрозь), со сяна, бордаз «П» букваен пусъем делениосыз вань, со 3 прицеллы тупась яланлы юнматэм прицелэз возьматэ. Целикез прицеллэн гривкаез борды юнматэмын, прямоугольник выллем вандэмын.

Мушка гумылэн дуло котырысьтыз треугольник выллем инъетэз вылэ интыямын, солэн «бурдъёсыз» урдэсъёссэ шобырто-вато. Ожмаськон дыръя автоматэз радъян вылысь мушкаез шонер ыбылон понна мургес позыртыны я ӝутыны луэ, музъем валлин ыбылон вылысь сое озьы ик бур пала/паллян пала вырӟытыны луэ.

АК-лэн куд-ог модификациосаз кулэ дыръяз урдэсысьтыз кронштейн вылэ оптикая я уй прицел пуктыны луэ.

Штык-пурт

Штык-пурт матысь ожмаськон дыръя тушмонэз сӧсыртон понна чакламын, со понна сое автомат борды юнматыны яке пурт интые уже кутыны луоно. Штык-пурт гумы бордысь муфта вылэ кульчоен кадь понӥське, урдэсъёсыныз газ камо́ра борды юнматӥське, нош защёлкаен шомпол борды дэмӟытӥське. Автомат бордысь ишкалтэм дыръя штык-пуртэз куске керттэм нимысьтыз тыриськон пушкын нулло.

Штык АК борды юнматэмын

• 

  АК но АКМ борды юнматӥськись 6Х2 клик штык

• 

  1959-тӥ арысь АКМ образецлы 6Х3 штык-пурт

• 

  АКМ но АК74 борды юнматӥськись 6Х4 штык-пурт

Нырысь-валысь АК борды кык лезвиен но долэн клинок кадь штык потто вал (клиноклэн кузьдалаез 200 мм).

АКМ-ез вооружение басьтыкузы, куштӥськись вакчи (клинокез 150 мм) штык-пурт поттӥзы(тип 1), сое улон-вылонын кутонъя паськыт луонлыкъёс кылдӥзы. Кыкетӥ лезвие интые, солы пилка малпазы, нош ножнаосын уже кутыку, соин бышкись езэз вандыны луылӥз, соиз электро улын ке но вал. Кутонэзлэн вылӥ люкетэз озьы ик кортлэсь быдэстэмын. Штык, ножнае юнматыку, пушказ кульчоен кадь пыре, молоток интые кутӥське. Та штык кык пӧртэм пумо луэ.

Со штыклэн бӧрысьгес кылдытэм вариантэз (тип 2) кутӥське АК74 выжыысь пыӵалтӥрлыкын. Кунгож сьӧрысь SOG, Cold Steel, Gerber кадь тодмо американ компаниослэн аналогъёсынызы ӵошатыса, штык-пуртэз лэсьтонэ мынӥсь кортлэн ӟечлыкез лябгес.

Кунгож сьӧрысь вариантъёс пӧлысь АК-лэн китай клонэз — Тип 56 — быдэсак куштӥськисьтэм, палэнскись вень кадь штыкеныз тодмо.

Автоматлы ёзъёс. Пенал

Автоматэз сэрттыны, бичаны, сузяны но вӧяны кутӥсько.

Ёзъёс пӧлы пыро: шомпол, ӵушылон, ёршик, выколоткаен отвёртка, маслёнкаез утьыны пенал. Пеналлэн корпусэз но ӵоксэтэз ожтӥрлыкез сузянын но вӧянын юрттӥсь тӥрлык чот кутӥсько.

Ныд пушкысь нимысьтыз гыркын утиське, пельпуме пыкъяськись, куасалляськись рамаен модельёс гинэ та ласянь висъясько, соослы чаклам пенал магазинъёслы сумкаын ветлэ. Пенал 1970-тӥ—1990-тӥ аръёсысь модельёс пушкы гинэ пыртэмын.

Ужан амалыз

АК-лэн ужан принципез гумы борддоръёсызлэн вылӥ пасетӥзы кошкись порох газъёслэсь энергизэс уже кутон вылын быдэсме.

Ыбемлэсь азьло патронэз гумылэн патронниказ сётоно но пыӵаллэсь механизмзэ ыбыны дась луон кабе вуттоно.

Та понна ыбылӥськись киыныз мышлань кыске затвор рамаез выльысь заряд сётонлы чаклам рукояткаетӥз (ӟуч: «передёргивание затвора»).

Затвор рама быдэсак мышлань кошкем бере, бордысьтыз фигурной паз затворысь валтӥсь-нуись вырйылэн валче ужаны кутске, сое час бергамъя куасалтэ, сыӵе дыръя боевой вырйылъёсыз гумы коробкалэн упоръёсысьтыз пото, та гумы каналэз усьтыны юрттэ. Собере затвор рама но затвор валче вырӟылыны ӧдъяло.

АК74 автоматлэн затворез но затвор рамаез (АКС74У вакчи поршенен). Лызэн гумыез затворен — затвор рамалэн фигурной пазэз но затворлэн валтӥсь вырйылыз — пытсась но усьтӥсь люкетъёс возьматэмын

Ыбылӥськисьлэн ки улаз, мышлань сётскыкуз, затвор рама зӥбоно курокез вырӟытэ, сое автоспуск понна шептало вылэ пуктэ. Затвор рама берпуметӥ положение вуытозь, курок озьы возиське, рама автоспусклэсь тылызэ вырӟытэмен, курок но автоспуск висъясько. Отӥяз курок азьпал шептало вылэ султэ (киын «затворез кыскыку»).

Со дыре ик берыктӥсь пружина, кужым люкаса, шымырске, ыбылӥськись рукояткаез лэзьыку, со затвор группаез азьлань донге. Пружиналэн кужыменыз сэрен затвор группа азьлань вырӟыку, затворысь улӥ люкетысьтыз вырйыл магазинысь вылӥ патронэз гильзалэн пыдэстӥз донге, сое гумылэн патронниказ ыстыса.

Затвор, берпуметӥ положение вуыса, затворлэн вкладышезлэн вырйылаз пыкиське но фигурной пазысь потон вылысь кӧнялы ке берытске. Затвор рама та дыр куспын пружиналэн кужыменыз но аслаз инерциеныз азьлань мынэ, со куспын валтӥсь затвор вырйыллэн фигурной пазэныз валче затворез час бергамъя 37° берыктэ, таин валче гумы затворен пытсаське.

Гумыез пытсамез бере кылем вамышсэ пумозяз вуттытозяз, затвор рама автоспускысь рычагез азьлань но уллань донге, соиз автоспускез шептало вылын возиськись куроклэсь мозмытэ, озьы сое валтӥсь шептало гинэ на ыбонлэсь возе, со спусковой крючокен огъя люкет кадь быдэстэмын.

Табере ожтӥрлык ыбыны дась.

Спусковой крючоке зӥбыку, курокез возись шептало сое мозмытэ. Курок боевой пружиналэн кужыменыз поперечной осез кузя берыктӥське, вань кужмысь ударникез шукке, соиз патронлэн капсюлез борды шуккиське, сое пиле но гильзаысь дарыез кенжытэ.

Ыбон вакытэ гумы каналын порох газъёслэсь шуак бадӟым давление кылдэ. Со одӥг дыре ик пуля вылэ но, гильзалэн пыдэсаз но зӥбе, со пыр — затворе. Но затвор пытсамын, мукет сямен вераса, гумы коробкаен вырӟылонтэм герӟамын, соин ик со интыяз кыле, нош азьланянь сётско: пуля — одӥг ласянь, быдэс ожтӥрлык — мукет ласянь. Пыӵалтӥрлыклэн но пулялэн секталазы уно пол висяъсько бере, пуля дулоысь пасьёс доры ӝоггес азинске, гумы пушкысь вандылэм гутёослы луыса, ас котыртӥз бур пала бергаса лобӟе. Ожтӥрлык ыбылӥськисьлэн пельпумаз шукке (огез вырӟон амалыз).

Пуля газ кошкон пасьёс дортӥ кошкем бере, со пасьёс пыр газ каморае бадӟым зӥбет улсын порох газъёс омырско. Соос затвор рамаен юн герӟаськем шток вылысь поршенез зӥбо, сое мышлань донго. Поршень нимысьтыз кузьдалаез ортчем бере (ог 25 мм), газэз палэнтыны юрттӥсь трубка вамен палэнске, со пыртӥ порох газъёс омыре пото (газъёслэн оглюкетсы гинэ потэ, мукет люкетэз гумы коробкае сюре яке гумы пыртӥ кошке).

Киын выльысь заряд сётэм сямен, затвор рама поршенен ӵош аслаз сюрестӥз мышлань сётске, собере затворез берыктэ, со гумыез усьтэ. Гумы усьтӥськон вакытлы пуля гумыысь потэ ни, гумылэн каналаз давление усе, озьыен, пыӵалтӥрлык понна но ыбылӥськись понна гумы каналэз усьтон кышкытлык уг кылдыты ни.

Гумыез усьтэм бере затвор затвор рамаен валче зол мышлань сётске, талы кык кужымъёс юртто: гумы каналэ кылем давление (омыр давленилы матын), со гильза пыдэсэз таиз патронникысь потытозь зӥбе, нош со пыр — затвор вылэ; затвор рамалэн но соин герӟам газэз уллясь поршеньлэн инерцизы.

Ыбылэм гильза пыӵалтӥрлыкысь палдэ, пыдэсэныз гумы коробка борды юнматэм отражательлэн вырйылаз шуккиськыса, со ик солы паллянэ-бур пала-азьлань мыныны кужым сётэ.

Та ваньмыз бере затвор рама затворен валче пумозяз мышлань сётско, отӥяз берытскись пружиналэн кужымезлы луыса азьвыл интыязы султо. Сыӵе дыръя, киын выль заряд сётыку сямен ик (оген-оген я черодэн ыбылӥськон бордысь потэ шепталлэн ужан сямыз), курок ӝутске но магазинысь мукетыз патрон патроннике вуэ, нош отӥяз гумы канал пытсаське.

Отӥяз югдур потэ ыбылон тылэз вошъясь переводчиклэн интыяськемез бордысь, озьы ик спусковой крючок зӥбемын я ӧвӧл.

Спусковой крючок лэземын ке, ожтӥрлыкысь вырӟылӥсь люкетъёс азьвыл положениязы берыктӥсько; пыӵалтӥрлык выльысь зарядить каремын, боевой взводэ ӝутэмын но выльысь ыбыны дась.

Спусковой крючок зӥбемын ке, нош переводчик АВ (автоматической ыбылон) положениын ке, ожтӥрлыклэн вырӟылӥсь люкетъёсыз азьвыл интыязы бурытскыку, автоспуск курокез мозмытоз, отӥяз вылӥын пусъем огпол ыбон дыръя сямен луоз, озьы ыбылӥськись спусковой крючокысь чиньызэ басьтытозь яке магазинысь патронъёс бырытозь.

Спусковой крючок зӥбемын ке, нош переводчик ОД (оген ыбылон) положениын ке, ожтӥрлыклэн вырӟылӥсь люкетъёсыз азьвыл интыязы бурытскыку но автоспуск лэзиськыку, курок боевой взводэ кылёз, сое одӥг тылын ужась шептало гинэ возёз, озьы возиськоз, ыбылӥськись спусковой крючокез лэзьытозь но выльысь зӥбытозь.

Автоматысь ыбылӥськыку, тужгес но начар патронъёсты но кырсь пыӵалэз уже кутыку, осечкаен валче ӝеганъёс луыны быгато (капсюлез ӟырдатыны кужымез уг тырмы — ӟуч: «ненакол капсюля»), озьы ик патронъёсты сётонын шуг-секытъёс кылдо (ёркан но куасалскон — ӵемысь магазин пумъёслэн шекъёсынызы). Шуг-секытъёсты ыбылӥськись ачиз ик палэнтэ, со понна ожтӥрлыксэ выльысь рукояткаетӥз киын зарядить каре, та осечка луэм я патроннике сётон вакытэ куасалкем патронэз куштыны ӵемысь юрттэ. Ыбылӥськон дыръя ӝеганлэн эшшо но бадӟымгес мугъёсыз — гильзалэн ёркамез яке кеськемез — секытэнгес палэнтӥсько, но туж шер пумиськыло, ӵемысь — улӥ ӟечлыко, брак луэм яке утьыку сӧриськем патронъёсты кутыку.

Ыбылон кужым но тыллэн пайдаез

Одӥг точкае трос пуляен огкадь умой ыбылыны быгатон — АК-лэн нырысь ик юн палыз ӧй вал. Опытной экземпляръёссэ войскоосын эскеронъёс дыръя ик пусъемын вал: пуляослэн ог-огзылы матэгес йӧттыны быгатэмзыя меӵкытон куронъёсты чаклано ке, конкурсэ сётэм системаос пӧлысь Калашниковлэн конструкциез ваньмызлэсь оскымонгес ке но вал, та условиез ӧз быдэстылы (вань возьматэм конструкциос сямен ик). Озьыен, та параметръя 1940-тӥ аръёслэн шорысьтызы мертэтъёсъя но АК сокем вылӥ адӟем карымон ӧй вал. Озьы ке но, оскымон луонэз со вакытэ нырысетӥ интые пуктылӥзы (татын огъя оскымон — эксплуатацияя комплексысь тодметъёс: умой ужаны быгатон, сӧриськытозяз ыбылӥськон, гарантиен пусъем ресурсэз, зэмос ресурс, нимаз ёзъёслэн но гердъёслэн ресурссы, утиськон, механикая юнлык но автоматэз али но умойёсыз пӧлы пыртонъя мукет сямъёс), нош ыбылӥськонъя куронъёсты юнматонэз азьланезлы кельтоно кариськизы.

Ожмаськонын вакчи черодэн андан шорсюлмо пуляосын АК-ысь ыбылӥськон дыръя шоро-куспо палэнсконъёс:
Ыбылӥськонлэн кузьдалаез, м	Нырысетӥ пуляослы, см		Мукет пуляослы, см						Пулялэн кужымез, Дж
			пуляос		йӧттонъя шоро-куспо точкаослэн лыдзы		огъя пазьгиськон
	ӝуждалае	урдэсаз	ӝуждалае	урдэсаз	ӝуждалае	урдэсаз	ӝуждалае	урдэсаз
100	8	4	9	11	7	5	11	12	1540
200	11	8	18	22	14	10	23	34	1147
300	17	12	27	33	21	15	34	36	843
400	23	16	37	44	28	20	46	48	618
500	29	20	46	56	35	25	58	61	461
600	35	24	56	67	42	30	70	73	363
700	42	29	66	78	49	35	82	86	314
800	49	34	76	89	56	40	94	98	284

Шоро-куспо палэнскон-някырскон учыръёс— пазьгиськонъя валтӥсь полосалэн ӝыны пасьталаез, отчы вань йӧттон учыръёс пӧлысь 50 % пыре.

Ожтӥрлыкез азьланяз выльдон — дулолы пӧртэм пумо компенсаторъёсты лэсьтон но пичи импульсэн ужась патронъёс вылэ выжон — зэмен ик автоматысь меӵак ыбылӥськон вылын умой ласянь шӧдскиз (кучность вылын но). Озьы АКМ-лэн 800 м ыбылӥськонын огъя шоро-куспо някырсконэз луиз 64 см (выллапала) но 90 см (пасьталае), АК74-лэн — 48 см (выллапала) но 64 см (пасьталае).

Та тодметъёсты умоятон вылысь мукетыз вамыш луиз сбалансированной автоматикаен АК-107/АК-108 модельёсты кылдытон (учке улӥысьтызгес), озьы ке но АК-лэн та вариантэзлэн адӟонэз али но тодмо ӧвӧл.

Фигуралэн гадяз шонер ыбонъя кузьдала — 350 м.

АК одӥг пуляен таӵе цельёсты йӧттыны луонлык сётэ (тужгес усто ыбылӥськисьёслы, выдыса упорен, одӥген-одӥген тылын):

• фигуралэн йырыз — 100 м;
• фигуралэн кускыз но бызьылӥсь фигура — 300 м;

800 м кемысен «бызьылӥсь фигура» типъем целез йӧттон вылысь та условиосын ик одӥг тылын ыбылон понна кулэ 4 патрон, вакчи черодэн ыбылон понна — 9 патрон.

Зэм, та йылпумъянъёс лэсьтэмын полигонын ыбылӥськон дыръя, зэмос ожмаськонъёслэсь зол висъяськись условиосын (котьма ке но, эскеронъёсъя методикаез профессионал луись ожгарчиос кылдытӥзы, йылпумъянъёслы оскыны чакламын).

Бичан но сэрттон

Автоматэз сузян, вӧян но чаклан понна сое ӝыныё сэртто таӵе радлыкъя:

1. магазинэз люкон но патронникысь патронэз эскерон, отын медаз луы шуыса; 2. тӥрлыкен пеналэз поттон (АК автоматын — ныдысьтыз, АКС-ын — магазинъёслы чаклам сумка кисыысь); 3. шомполэз висъян; 4. гумы коробкалэсь ӵоксэтсэ басьтон; 5. берыктӥсь механизмез поттон; 6. затвор рамаез затвореныз валче висъян; 7. затворез затвор рамалэсь люкон; 8. газ трубкаез гумы накладкаеныз валче висъян.

АК74-ез ӝыныё сэрттон.

Ӝыныё сэрттон бере автоматэз радлыклэн мышкысеныз бичало.

АК автоматлэсь бадӟым макетсэ сэрттон/бичан школаысь НВП (начальной военной подготовка) курсэ пырылӥз, бератаз ОБЖ-е, таӵе дыръя бичан но сэрттон понна висъяськись дыр:

• «туж умой» оценка — 18 но 30 секунд;
• «умой» — 30 но 35 секунд;
• «удовлетворительно» — 35 но 40 секунд.

Арми куронъёсъя — 15 но 25 секунд.

АК семья

Калашников автоматъёсты но атыкай конкурентъёссэс ӵошатон

Нимыз	Кун	Патрон	Кузьдалаез, мм ныдыныз/ ныдтэк	Гумылэн кузьдалаез, мм	Секталаез, кг (патронтэк)	Ыбылӥськонлэн ӝоглыез, минутэ ыбон	Кузьдалае мертаськон, м	Пулялэн сётэм ӝоглыкез, м/с
АК	СССР	7,62×39	870	415	4,3	600	800	710
АКМ	СССР	7,62×39	880	415	3,1	600	1000	715
РПК	СССР	7,62×39	1040/820	590	5,0/5,6	600	1000	745
СВК	СССР	7,62×54R	1155 (1 вариант) 1100 (2 вариант)	600	4,226 4,0	—	700 1000	—
ПК	СССР	7,62×54R	1173	605	9,0	650	1500	825
АК74	СССР	5,45×39	940	415	3,3	600	1000	900
АК74М	Россия	5,45×39	943/705	415	3,6	650	1000	900
РПК-74	СССР	5,45×39	1060	590	5,0	600	1000	960
АКС74У	СССР	5,45×39	730/490	206,5	2,7	700	500	735
АК-101	Россия	5,56×45	943/700	415	3,6	600	1000	910
АК-102	Россия	5,56×45	824/586	314	3,2	600	500	850
АК-103	Россия	7,62×39	943/705	415	3,6	600	1000	715
АК-104	Россия	7,62×39	824/586	314	3,1	600	500	670
АК-105	Россия	5,45×39	824/586	314	3,2	600	500	840
АК-107	Россия	5,45×39	943/700	415	3,8	850	1000	900
АК-108	Россия	5,56×45	943/700	415	3,8	900	1000	910
АК-109	Россия	7,62×39	943/700	415	3,8	900	1000	750
АК-9	Россия	9×39	705/465	200	3,1	600	400	290 (СП-5) / 305 (СП-6)
АК-12	Россия	5,45×39	940/730	415	3,2	700/1000	1100	900
AK-15	Россия	7,62×39	862/922	415	3,7	700	1100	715
АК-308	Россия	7,62×51	943/880	415	4,3	600	1000	715

АКС

АКС (ГРАУ индекс — 56-А-212М) — АК-лэн цевьё улэ уллань лэзиськись корт ныдын автоматлэн вариантэз, сое омырысь десантной войскоос понна чаклаллязы. Вооружение 1949-тӥ арын АК-ен ӵош кутэмын. Нырысь-валысь штампен лэсьтэм гумы коробкаен потылӥз, 1951-тӥ арысен — штамповкаен валче брак луэм ёзъёс трос луэмен, фрезеровать карем гумы коробкалэсь лэсьтӥськиз.

Уллась лэзиськись корт ныдын АК (АКС)

АКМ

АКМ (Модернизированной Калашников автомат, ГРАУ индекс — 6П1). 1959-тӥ арын вооружение кутэмын

Выльдэм Калашников автомат

Штатэ пырисьтэм 10 патронлы магазинэн АКМС

Та модель бордысен кутскыса, АК выжыысь вань автоватъёслэн ныдзы пыкиськон точкаез ыбылӥськон гожлы матэ карон понна кӧня ке ӝутэмын.

АКМ-лэн мертаськонъя дальностез 1000 метрозь йылтэмын, ожтӥрлыклэн секталаез кулэстэмын, оскымон но эксплуатациын капчигес мед луоз шуыса, воштонъёс пыртэмын.

АКМ-лэн гумы коробкаез штампен лэсьтэмын. Ударно-спусковой механизмез выльдэмын — курокез лэзёнъя ӝегатӥсь ёз йылтэмын, соин валче автоматической ыбылӥськон дыръя курокез лэзён кӧня ке миллисекундлы ӝега. Та ӝеган ыбылӥськонлэн ӝоглыкез вылын уг ик шӧдӥськы, со затвор рамалы выль ыбон азьын азьвыл интыяз умой берытскыны гинэ юрттэ. Та воштӥськонъёс пуляослы одӥг интые умойгес йӧттыны луонлык кылдытӥзы, тужгес зол вылласянь пазьгиськонэз кулэстӥз (одӥг куиньмослы сямен).

АКМ-лэн гумыезлы компенсатор

Гумылэн дуло люкетаз резьбаосыз вань, отчы сяськабурд выллем куштӥськись компенсатор пуктӥське («лоток выллем компенсатор» нимаське), со черодэн ыбылӥськон дыръя мертаськон точкаез ввылань-бур пала нуонлэсь уте, угось гумыысь потӥсь порох газъёслэсь зӥбетсэс компенсаторлэн улӥ выступаз келя. Та резьба вылэ ик компенсатор интые ПБС яке ПБС-1 глушительёсты юнматыны луоно, соосты уже кутон понна дозвуковой начальной ӝоглыкен пуляосын 7,62УС патронъёс кулэ. Озьы ик АКМ борды «Костёр» ГП-25 нимо подствольного гранатомёт юнматыны луонлык кылдӥз.

• АКМС (ГРАУ индекс — 6П4) — уллань лэзиськись корт ныдын АКМ вариант. Десантникъёслы чакламын;
• АКМН (6П1Н) — уйин мертаськон;
• АКМСН (6П4Н) — уллань лэзиськись корт ныдын АКМН-лэн модификациез.

АК74

АК74 (ГРАУ индекс — 6П20) — азьланяз выльдэм автомат. 5,45 мм калибръем патронъёсын ужа, вооружение солэн инъетэз вылын лэсьтэм ожтӥрлык комплексэн ӵош 1974-тӥ арын кутэмын. Автомат поттон технология воштӥськиз: трос люкетъёссэ ӵыжатэм модельёсъя кисьтэм заготовкаослэсь лэсьтыны кутскизы, озьы ке но АКМ-ен трос огкадез кылемын. Озьы ик дулолы выль тормоз-компенсатор пуктэмын вал, таин валче автоматлэн шуккыса лэзён кужымез кулэсмиз, та меӵ ыбылӥськонын пайдаен берытскиз. Дыр ортчемъя автоматэ воштонъёс пыртылӥзы: озьы берло образецъёссы, пулэсь лэсьтэм интые, пластмасс фурнитуралэсь бичамын вал.

АК74

AKC74

АКС74У

Пыӵал тӥрлыклэсь куд-ог характеристикаоссэ будэтӥзы ке но, тросэз профессионал ожгарчиос лыдъяло ни: АКМ ожгар ӟечлыкезъя Калашников автоматъёслэн радазы устоез луэ.

5,45-мм модификацилэн шекъёсыз пӧлысь пусъемын: та калибръем пуляос, капчи но ляб могӟетэн пумиськыса, чальтчо (НАТО-лэн образецъёсызлэн 5,56 мм калибръем азьвыл патронъёсыз но сыӵеесь ик вал), озьы ик — могӟет пыртӥ шуген пото я сое уг вормо (таӵе пуляос зол сӧсырто лыдъяське ке но). Со сяна, 5,45 мм калибръем пуляослэн дугдытӥсь кужымзы сярысь эчешонъёс мыно. Пичи калибръем патронъёс пала дурбасьтӥсьёс оскыто: 7,62 мм калибръем пуляен ӵошатыса, дугдытыны быгатӥсь кужымез герӟаськемын бадӟым ӝоглыкен но пичи калибръем пулялэн раневой каналын лики-ляки возиськеменыз. Вьетнамын ожмаськонэз котыр ласянь эскеремзы-чакламзы бере, 5,45 мм калибръем пуляос вылэ выжемын вал шуыса, лыдъяло. Кылсярысь, 5,45 мм калибръем пуляос тушмонъёсты ӧжытгес быдто, но ӵемгес сӧсырто, нош сӧсыртэмез, стройысь ассэ гинэ поттэм сяна, кӧня ке эшъёссэ но сьӧраз кыске на, сое угось утьыны но ышыг интые нуыны кулэ. Оглом 7,62-мм яке 5,45-мм Калашников автомат умойгес шуыса юан али но усьтэмын, любительёс но профессионалъёс пӧлын эчешоносъёс кылдытэ.

• АКС74 — ВДВ-лы но зарезь пехоталы вариант, рамаен корт ныдыз паллян пала куасалске;
• АК74Н но АКС74Н — АК74 но АКС74 автоматъёслэн «уй» вариантъёссы, уйин уже кутон понна инфракрасной прицеллы планказы вань;
• АК74М — выльдэм АК74, со асэныз АК74, АКС74 но «уй» вариантъёсты воштӥз. Полимерлэсь ныдыз паллян пала куасалске
• АКС74У — вакчиятэм вариант, рамаен ныдыз паллян пала куасалске.

«Сюэтӥ серия»

1990-тӥ аръёслэн шоразы автоматлэн «100 серия» нимаськись выль сериез кылдӥз. Та сериысь модельёсты экспортэн вузало, озьы ик МВД-лэн вооруженияз кутӥсько. Серилэн инъетэзлы АК-74М басьтэмын вал, нимысьтыз модельёс калибръёсын висъясько (АК-105 но АК-107 понна 5,45×39 мм; АК-101, АК-102, АК-108 понна 5,56×45 мм НАТО; АК-103, АК-104, АК-109 понна 7,62×39 мм), вакчиятэм моделен (AK-102, AK-104, АК-105), автоматикаез сбалансированной системаен (АК-107, АК-108 но АК-109). 100-тӥ сериысь вань автоматъёслэн валтӥсь тодметсы — пластик цевьё но сьӧд буёло ныд.

АК-105

Сбалансированной автоматикаен модельёс

АК-107, АК-108 но АК-109 автоматъёсын автоматикалэн модифицированной схемаез кутэмын — люкем секталаосын безударной. Вылтусын но пуштросэн АК74-лы туж кельше ке но, со лэсьтэмезъя но ужан принципезъя зэмзэ туж висъяськись пыӵал, сое иж конструкторлэн Юрий Александровлэн 1960-тӥ—1970-тӥ аръёсы кылдытэм разработкаосыз вылын (АЛ-4 но АЛ-7) лэсьтӥзы.

Та схемаын автоматын штокъёсын кык газ поршенез, соос ог-огзы пумитэ мыно. Огшоры АК-ын сямен ик, валтӥсь поршень затвор рамаен герӟамын, выль заряд кылдытӥсь автоматикаез ужатэ; ватсам поршень — затвор группа вадьсысь бадӟым компенсаторез интыысьтыз воштэ, мушка котырысь площадкаез вырӟытыса но шуккыса, затров группаллэсь кужымзэ буйгатэ. Поршеньёс огкадь вырӟо, ӵапак огдыре шукко, та понна реечно-шестерёнчатой механизм малпамын.

Ваньмыз та затвор группалэн пичиятэм кужыменыз валче автоматэз зурканлэсь трослы уте, таин валче ыбылӥськонлэн ӟечлыкез 1,5—2 поллы йылӥз, тужгес но — шуген ыбылӥськыку.

Saiga MK-107

Со сяна, АК-107, АК-108 но АК-109 базовой луись модельлэсь висъясько ӝог ыбылӥськыны быгатэменызы (минутскын 850—900 ыбонозь), «классической» амалэн автоматикая ыбылӥськон сяна, УСМ-ын 3 патронэн черодэн ыбылон режим но пуктэмын.

Таӵе схемая бичам автоматъёс автоматикая тылын шонер ыбылӥськонын вожвылъяськыны быгато конструкцияя секытгес лафет схемая лэсьтэм АН-94 автоматэн (2 пол черодэн ыбылӥськонын пуляосыз гинэ пазьгиськогес) но АК-лы конструкциезъя матын луись АЕК-971 автоматэн.

Али дыре та семьяысь пыӵалтӥрлыклэн адӟонэз валантэм. Сое вооружение кутон яке югдурез утён структураосы басьтон сярысь ивортонъёс ӧвӧл. Верамъёссыя азинлыко «200 сериысь» АК-ын сбалансированной автоматикаез ӧвӧл. Куд-ог ивортонъёсъя, трос ыбылӥськон учыръёсы реечной механизмъя буям ёзъёсыныз шуг-секытъёс кылдо.

Со дыре ик «Калашников» концерн кӧня ке арзэ ни рыноке граждан ожтӥрлыкъя полуавтомат луись выль карабин (Сайга Мк-107) поттон сярысь ушъяськылэ, сое Ак 107 схемая сбалансированной автоматикаен бичаны медэ, та карабинъёслэн пӧртэм прототипъёссы Россиысь но солэн палэнысьтыз пыӵалтӥрлыкъя адӟытонъёсын огпол гинэ возьматэмын ӧй вал ни. Сериен производствое Kalashnikov SR1 коммерцияя нимын 2018-тӥ арын тулысыен лэземын.

«Кык сюэтӥ серия»

2009-тӥ арын «Рособоронэкспорт» компанилэн валтӥсь директорез Анатолий Исайкин ялӥз «Калашниковъёслэсь» выль модельзэс кылдытонэн выремзы сярысь, со ӝоген «сюэтӥ сериез» воштыны кулэ. Со дыре ик, Владимир Гродецкий пусъемъя, 200-тӥ сериысь ожтӥрлык автоматъёслэн азьвыл поколенизылэсь пайдалыко луэменыз 40—50 % висъяськыны кулэ.

2009-тӥ арын 25-тӥ шуркынмонэ, элькун но и росси СМИ-сын пумиськылыкуз, «Ижысь машиностроительной завод» ОАО-лэн валтӥсь директорез Гродецкий Владимир Павлович ялӥз:

Али АК-ез азинтон бордын ужаськомы — со луоз ини «кык сюэтӥ» серия. Со висъяськоз, кылсярысь, мукет гумыен, кутӥськись патронэн. Али 5,56×45 натовской патронэз вань тодметъёсъя ортчон пумысен ужпум сылэ. НАТО-лэн классификациезъя, автоматэз карабинъёсын оградэ пырто, котьма ке но, асьме автомат НАТО штурмовой винтовкалы уг сётскы. Сое ортчонъя ужпум сылэ. «Кык сюэтӥ» сериын ми та ужпумез быдэстыны тыршом.

2010-тӥ арын 25-тӥ куартолэзе Гродецкий Интерфакслы шуиз: Калашников автоматлэн 200-тӥ сериезлы кун эскеронъёс 2011-тӥ арын ортчозы. Отысь йылпумъянъёсъя автоматэз войскоосын кутон ласянь пумкыл юнматэмын луоз. Со озьы ик ивортӥз: выль модель АК-74М инъет вылын лэсьтэмын луоз, выль автоматын ватсам тӥрлык юнматон планкаез кылдӥз — прицелъёслы, лазер целеуказательёслы но фонариклы, та выль автоматлэсь секталазэ шӧдскымон йылтӥз: 3,8 кг луиз, азьвылэз 3,3 кг вал. Со сяна, 200-тӥ сериысь АК-лэн магазинэз бадӟымгес луоз — 30, 50 яке 60 патронлы, нош АК-74М-лэн магазиназ 30 патрон тэре. Та нуналэ ик кӧня ке бергес Россиысь вице-премьер Сергей Иванов ивортӥз: Югдурез утёнъя министерство но Россиысь югдурез утёнъя федерал служба басьяны кутскизы Калашников автоматлэсь 200-тӥ серизэ. Со дыре ик ватсаз на, Обороная министерство ыбылӥськонъя выль пыӵалтӥрлык басьтон сярысь решение ӧз куты на шуыса.

2012-тӥ арын 27-тӥ оштолэзе «Ижмаш» Калашников автоматлэн «кык сюэтӥ сериез» вань шуыса танӥськиз.

Максим Кузюк «Лента.рулы» интервьюаз вераз: али дыре югдурез утисьёс «Ижмашлэсь» «сюэтӥ сериен» АК-зэ басьто. Предприятиен кивалтӥсь нимысьтыз модельёсты ӧз пусйы.

Кузюклэн ивортэмезъя, «Ижмаш» бадӟым саклык висъя АК-12 нимам выль автоматэз кылдытонлы. «Со ини зэмос образец, кудӥныз ми ыбылӥськиськом, озьы ик соин югдурез утён ведомствооствоосысь оскем муртъёс ыбылӥсько. Соос заводамы вуыло, эскерон станциосамы пӧртэм спецподразделениысь муртъёсын ӵош ыбылыса утчало. Ӟеч мылкыдъёссэс, мае эшшо умоятыны луоно малпанзэс кылӥмы», — валэктӥз Кузюк.

АК-12 нырысетӥ прототипез «Ижмаш» 2012-тӥ арын толшоре бичаз. Выль платформалэн инъетэз вылын пӧртэм пумо ыбылӥськон пыӵалтӥрлык, СВД-ез воштон вылысь снайпер винтовкаез но кылдытыны медо шуыса, ивортылӥзы.

АК-9

АК-9 — чалмыт вариант, «сюэтӥ серия» инъет вылын лэсьтэмын. «Вал» АС-ын сямен ик 9×39 мм патронъёсын ужа. Озьы ик вань пӧртэм прицелъёс понна целез возьматӥсь тӥрлыклы креплениосыз вань.

АК-12

Выль АК-12 автомат (2012-тӥ арысь образецъя Калашников автомат) — ИЖМАШ концернлэн азинлыко кылдытэм пыӵалтӥрлыкез, солэн валтӥсь конструкторез Владимир Злобин луэ. АК-74, АК-74М, АКМ азьвыл ожтӥрлыкъёсын ӵошатыса, выль АК-12 автомат ыбылӥськисьлы капчиен уже кутымон лэсьтэмын. Со сяна, меӵак ыбылӥськонъя, оскымон луонъя но кема ужатонъя луонлыкъёсыз умоятэмын. Выль АК-12 автоматлы 5,45×39 мм калибр валтӥсез луоз. Но АК-ез поттӥсьёслэн чакламзыя, сое бичалозы атыкай но кунгожсьӧр 5,45×39 мм, 5,56×45 мм но 6,5×39 мм Grendel, 7,62×39 мм промежуточной калибрен патронъёслы но, озьы ик винтовкалы 7,62×51 мм. Конструкцияя валтӥсь воштӥськонъёс — затвор группалэсь секталазэ воштон.

2015-тӥ арысь кун эскеронъёслэн йылпумъянъёссыя, 5,45 мм но 7,62 мм калибръёсын АК-12 автоматэз поттӥсьлы кӧня ке дэмланъёс сётэмын, таин валче выль валтӥсь конструктор Сергей Уржумцев чаклам улсын производствоез ӟечомытон но шараям тырмымтэосты тупатон вылысь умоятӥзы АК-12-лэсь конструкцизэ. Конструктор ужъёсты быдэстэм улсын 7,62 мм калибрлэн вариантэз АК-15 ним басьтӥз. 2016-тӥ арын куарусёнэ «Калашников» концерн «Армия-2016» адӟытон улсын возьматӥз выльдэм АК-12 но АК-15 автоматъёсты, 2015-тӥ арен ӵошатыса, вуж АК-12 версилэсь соос зол висъяськизы. Кылсярысь, 2014-тӥ арысь АК-12 образец сярысь, 2016-тӥ арысь АК-12 но АК-15 образецъёслэн ӧвӧл ни затворен йырин ӝеганъёссы, затвор рамалэн вошъяськись рукояткаез но пистолет ныд вадьсысь кыкналасянь капчиен уже кутӥськись переводчик-предохранителез. «Армия-2017» адӟытонын АК-12К но АК-15К опытной образецъёс возьматэмын вал, соос 2016-тӥ арысь АК-12 но АК-15 образецъёслэн вакчиятэм варсиоссы луизы.

Улон-вылонын кутӥськись вариантъёс

Боевой ожтӥрлык сяна, «Ижмаш» НПО АК инъет вылын поттэ пӧйшуранъя вольыт гумыен (12-тӥ, 20-тӥ но .410-тӥ калибръем) пыӵал, 7,62×39 мм, 7,62×51 мм, 5,45×39 мм патронъёслы нарезной ожтӥрлык, озьы ик экспортэ поттон вылысь 5,56×45 мм НАТО-вской патронлы — огъя «Сайга» нимын.

Вӧльыт гумыё Сайга-12К исп.030 пыӵал тактикая вариантын

• Нырысетӥосыз пӧйшуранъя «Сайга» карабинъёс 1970-тӥ аръёсы кылдытэмын (соку ай КПСС-лэн ЦК-езлэн валтӥсь секретарезлэн Л. И. Брежневлэн косэмезъя, Казахстанысь кизем бусыосты утён понна степьёсысь сайгакъёсты ыбылон вылысь промысловой карабинъёс сямен), соосты пӧйшуранъя атыкай 5,6×39 патронэн ыбылон вылысь поттӥзы. Ӵапак та образец быдэс пыӵалтӥрлык выжыез кылдытӥз.

1990-тӥ аръёслэн кутсконазы АКМ автоматлэн конструкциез вылын поттэмын вал 7,62×39 мм патронлы пӧйшуран самозарядной «Сайга» карабин, отӥяз вольыт гумыё «Сайга» пыӵалъёсты кылдытон но бичан борды басьтӥськизы.

Боевой ожтӥрлыкен ӵошатыса, 7,62×39 мм патронлы «Сайга» карабинысь автоматической тылын ыбылынын луэ, со понна куд-ог ёзъёсыз воштэмын. Со сяна, пыӵал борды пуктӥськись магазинлэн юнматон ёзэз выльдэмын, карабинэ ожгар автоматлэсь магазинзэ пуктыны медаз луы шуыса. Ныдыз но карабинысь цевьё сяме пырем пӧйшуран пыӵалтӥрлык сямен лэсьтэмын луыны быгато, озьы ик соосты автоматъёслэнэныз воштыны луоно, ёзъёсыз пластмасалэсь но, пулэсь но лэсьтӥсько. Классической схемая бичам карабинын тылын кивалтоно пыӵал рукояткаез ӧвӧл, нош спусковой крючокез но солэн предохранитель луись скобаез ныдызлэн чыртыыз котырегес юнматэмын, таин валче спусковом механизмаз спускезлы кужым сётӥсь ёз пыртоно луиз. Магазинъёсыз кык пӧртэм пумоесь — вить но дас патронлы.

Али дыре «Ижмаш» НПО пӧртэм пумо самозарядной «Сайга» пыӵалъёс но карабинъёс лэсьтэ, соос паськыт вӧлмем атыкай но кунгож сьӧр боеприпасъёслы чакламын: пӧйшураны гинэ чаклам вариантъёс бордысен кутскыса «тактической» дробовикъёс дорозь, югдурез утисьёслэн ужазы кутыны туж ярамонэсь.

• «Вепрь» карабинъёс — «Молот» заводлэн вузэз, «Вятские-Полянысь машиностроительной завод» ОАО (соос пӧлын: «Вепрь-К» (ВПО-133) но «Вепрь-КМ» (ВПО-136) — автоматической тылын ужаны быгатӥсьтэм АКМ);
• АКМ инъет вылын .366 дюйм калибръем (9,55 мм) ВПО-209 потэ, солэсь гумызэ но УСМ-зэ воштӥзы. Солы .366 ТКМ (9×37) патронъёс ТехКрим компания поттэ;
• АКМС-МФ но АКМ-МФА — Винницаысь пыӵалтӥрлык поттонъя «ФОРТ» заводысь тӥрлык;
• «Вулкан» карабинъёс — Харьковысь «СОБР» ООО-лэн пӧйшуран карабинъёсыз.

Опытной образецъёс

АК-46

АК-46 — 1944-тӥ арын самозарядной карабинлэн инъетэз вылын Калашниковен лэсьтэм автоматэз условно пусъён (рос-прос тодмо ӧвӧл, куке нимазы-а сое озьы), 1946-тӥ арын со конкурсэ поттэмын вал. Конструкциезъя со M1 Garand американ винтовкалы кельшылӥз (Гарандлэн системаяз сямен ик, вакчи ходэн автоматикаез газ поршенен гумыно берыктӥськись затвор вадьсын интыяськылӥз).

Эскеронъёсъя кыкетӥ тур ортчем бере, комиссия сое азьланяз умоятонлы ярантэмен лыдъяз. Рос-прос выльдэм-тупатэм бере эскеронъёслэн выль туразы потэмын вал выль автомат (АК-лэн прототипез), со азьвыл ожтӥрлыклы конструкция ласянь туж ичи укшалляз.

СВК

1959-тӥ арын Михаил Калашников кылдытӥз «М. Т. Калашниковлэн системаезъя 7,62-мм самозарядной снайпер винтовка (СВК)», со АК-лы тупалляз. Гумы каналысь порох газъёс потон но вакчи ходэн поршень вылын возиськиз ужан принципез. Флажковой типъем предохранителез гумы коробкаын бур палаз интыяськылӥз. Гумы коробкалэн паллян палаз оптикая прицелэз юнматыны кронштейнэз вал. 7,62×54 мм R дас патронъёслы чаклам коробчатой магазинъёсысь кужым басьтылӥз. Пытсан схемаез АК-ын кадь. Патронъёстэк секталаез — 4,23 кг. Вооружение кутэмын ӧй вал — Драгуновлэн винтовкаез вормиз.

АК-47

1947-тӥ ар пумын—1948-тӥ ар кутсконын огъя войсковой эскеронъёс понна кылдытэмын вал 1500 штука опытной партия. Образец эскеронъёсты ӧз ортчы, сое умоятэмзы бере гинэ, 1949-тӥ арын, «Калашников автомат» (АК) нимын СССР-ын вооружение кутэмын вал.

Патент инлык

«Ижмаш» Россилэсь палэнын поттэм АК выллем вань модельёсты контрафактэн нима (лыдъяське, аутентичной образецъёсты бичан понна нимысьтыз калиброванной тӥрлык гинэ кутӥське, нош со Россиын гинэ вань, одӥг чертёжъёс но гумыосты, пружинаосты но мукет ёзъёсты поттон технологиез валан гинэ тырмыт ӧвӧл на ӟечлыко эквивалентэн копиосты лэсьтон понна, «контрафакт» улсын та учырын правовой ӧвӧл, технологияя аспект сярысь ужпум мынэ, малы ке шуоно кунгожсьӧр копиослэн ӟечлыксы АК-лэн вылтусызлы туж тупа ке но, совето/росси ӟечлыклы шӧдскымон келяны быгатэ). Озьы ке но аслаз автоматэзлы Калашников автор свидетельство басьтон сярысь регистрация пыр потӥз шуыса, нокыӵе ивортонъёс ӧвӧл: Ижысь М. Т. Калашников нимо пыӵалтӥрлыкъя адӟытон комплекслэн экспозициосаз куд-ог свидетельствоос поттэмын, солы соосты пӧртэм аръёсы «ожгар техника удысысь изобретение понна» улсын сётӥзы, бордазы АК-ен герӟаськемзы пумысен нокыӵе но ватсам ужкагазъёс ӧй вал. АК-лы автор свидетельство вань ке но, со Калашниковлы сётэмын вал ке но, ньыльдонэтӥ аръёсы кылдытэм нырысетӥ конструкцилы патентэз утён дыр кемалась ортчиз ни.

АК74-ын но «сюэтӥ сериысь» Калашников автоматъёсын куд-ог выльдӥськонъёс 1997-тӥ арын еврази патентэн утемын, со «Ижмаш» компанилэн лыдъяське.

Патентын пусъем инъет луись АК-лэн тодметъёсыз:

• куасалляськись ныдыз ожгар но мынон-ветлон положение юнматӥське;
• газ поршеньлэн штокез затвор рамалэн пасяз висо разьбаен юнматӥське;
• тӥрлыкен пеналлы инты малпамын чурыт ныд пушкын пружина золтӥськемен ворсаськись ӵоксэт улын;
• дуло сӧзул пала учкись прицеллэн колодкаез пала ошем газ трубкаез вань;
• гумы пушкысь вандылэм люкетысьтыз бусыысен вандылэм люкет пыдэсозь выжон геометриез воштэмын.

Россилэсь палэнын АК-ез поттон но кутон

1950-тӥ аръёсы СССР АК поттонлы лицензиосты 18 кунъёслы сётӥз (валтӥсь интыын — Варшавской огкылъя союзникъёс). Соку ик эшшо дас кык кунъёс АК поттонэз лицензитэк мытӥзы. «Рособоронэкспортлэн» ивортэмезъя, али дыре кунъёсын вань азьвыл басьтэм лицензиослэн ужан дырзы быремын ни, озьы ке но производство азинтӥське. Калашников автоматлэсь подопизэ тужгес но мыло-кыдо потто «Бумар» польша предприятие но «Арсенал» болгар фирма, кудӥз та дыре США-ын ёз усьтӥз но отын автомат поттонэз радъяз. АК-лэсь клонъёссэ бичан Азияын, Африкаын, Ближний Востокын но Европаын радъямын. Оглом лыдӟыса, дуннеын ваньмыз-ӧвӧлэз Калашников автоматлэн 70—105 млн экземпляр пӧртэм модификациез вань. Соос дуннеысь 55 кунъёслэн вооружениязы кутэмын.

Туала польской вариант (Karabinek szturmowy wz.1996 «Beryl»)

2004-тӥ арын «Рособоронэкспорт» но ачиз Михаил Калашников США-ез янгыше уськытӥзы АК-лэсь контрафакт копиоссэ вӧлмытонлы дурбасьтэмез понна. Озьы таӵе учырлы дунъет сётэмын: Афганистанысь но Иракысь власть доры вуттэм кивалтӥсьёслы США вуттэ Калашников автоматъёсты, соосты Китайын но Шундыӝужан Европаысь кунъёсын лэсьто. Та пумысен ожтӥрлыкез вӧлмытон юанъёсъя эксперт, профессор Аарон Карп пусйиз: «Озьы китайёс котькуд поттэм ыбылӥськон тӥрлык понна выплатаос курысалзы кадь, ӵапак соос 700 ар талэсь азьло порох малпаллям». Тазьы янгыше усьытонъёс вал ке но, АК выллем ожтӥрлык поттонэз дундытон пумысен суд искъёс я мукет вамышъёс сярысь нокыӵе ивортонъёс ӧвӧл.

АК-ез поттонлы азьвыл лицензия басьтэм куд-ог кунъёсын сое кӧня ке воштыса бичаллязы. Озьы Югославиын, Румынияын но куд-ог мукет кунъёсын потӥсь АК-лэн модификациосаз цевьё улын кылдӥз пыӵалтӥрлыкез кутон вылысь пистолет типъем ватсам ныд. Мукет пичи выльдӥськонъёс но пыртэмын вал: штыклы креплениос, цевьёлэн но ныдлэн материалъёсыз, отделкаез воштӥськылӥзы. Сыӵе учыръёс но тодмо: кык автоматэз ог-огшенызы асьсэ лэсьтэм креплениен герӟаллязы, озьы ПВО выллем кык гумыен ожтӥрлык установка пӧрмылӥз. ГДР-ын .22LR патронлы чаклам АК-лэн дышетсконъя модификациез потылӥз. Со сяна, АК инъет вылын кылдытэмын вал уно ожгар тӥрлыкъя образецъёс — карабинысен снайпер винтовкаозь. Та конструкциос пӧлысь куд-огез заводын рос-прос воштэм оригинал АК-ос луо.

АК-лэн уно копиоссызлы озьы ик копиос лэсьтыло (лицензия басьтыса но, басьтытэк но), соосты выльдыса-тупатыса потто, таин валче нырысетӥ образецлэсь висъяськись автоматъёс кылдо, кылсярысь, Vektor CR-21 — булл-пап компоновкаен лымшор африка автомат, соеVektor R4 инъет вылын пӧрмытӥзы, таиз ачиз ласянь Galil израиль автоматлэн копиез луэ — Valmet Rk 62 финн автоматлэн лицензияя копиез, нош со АК-лэн лицензияя вариантэз.

Дуннеын кутӥськемез

СССР-ысь Правительство автоматъёсты ваньзылы мыло-кыдо вузалляз, кин «социализм уже» пыриськемез пумысен ялылӥз. Таин валче куинетӥ дуннеысь куд-ог кунъёсын АК улэп куреглэсь но дунтэм сылэ. Сое дуннеысь котькудысьтыз сямен пӧсь интыосысь сводкаосысь адӟыны луэ. АК быдэс дуннеысь витьтонлэсь ятыр кунъёсысь ялан ужась армиослэн вооружениязы кутэмын, озьы ик тросаз неформальной группировкаосын, террористъёслэназ но. Со сяна, АК-ез поттыны лицензия дунтэк басьязы «вын луись кунъёс», кылсярысь, Болгария, Венгрия, ГДР, Китай, Польша, Уйпал Корея но Югославия. АК-ен вырон понна трос дышетсконо ӧвӧл (автоматлы дышетсконъя быдэс арми курслэн кузьдалаез 10 час гинэ).

Калашников автоматъёслэн вӧлмемзы:      АК-ез эксплуатантъёс      АК инъет вылын асьсэ вариантъёссэс поттэм/поттӥсь кунъёс      выльдэм автоматъёсты гинэ эксплуатантъёс

Ожын нырысьсэ кутон

Дуннеысь аренаын АК-ез нырысьсэ паськыт кутӥзы 1956-тӥ арын 1-тӥ шуркынмонэ, Венгриын восстаниез зӥбломытон дыръя.

Вьетнамын ожмаськон

АК озьы ик Вьетнам ожлэн одӥгез тодметэз луиз, соку сое уйпал вьетнам армиысь солдатъёс но НФОЮВ-ысь партизанъёс паськыт кутӥзы.

Афганистан

Афганистанысь ожмаськон АК-ез дуннеын вӧлмытонэз ӝогомытӥз. Табере сое вооружение кутӥзы повстанецъёс но террористъёс. ЦРУ моджахедъёсты Пакистан пыр Калашников автоматъёсын узырмытӥз, ӵемысь китай поттэменыз (КНР-ын Type 56 нимын АК лицензиен лачак бичаськиз). АК дунтэм но оскымон ожтӥрлык вал, соин ик США со вылэ дугдӥз.

Афганистан. 56-тӥ десантно-штурмовой бригада, 1987

Совето войскоосты поттэмлэсь азьвыл ай запад СМИ-ос улосын лачак вӧлмем АК-лы саклыксэс висъяллязы, нош вераськонэ «Калашниковлэн культураез» валатон пыриз. 1989-тӥ арын 15-тӥ тулыспалэ берпуметӥ совето частьёс Афганистанысь потэм бере, моджахедъёслэн азинскем пыӵалтӥрлыкъя инфраструктуразы нокытчы ӧз ышы, солэсь ортчыт, улослэн экономикаяз но лулчеберетаз пыӵаз. Афган моджахедъёслэн азьветлӥсьлы Ахмад Шах Масуд «Кыӵе пыӵалтӥрлык Тӥледлы кельше?» юанлы вазьылӥз: «Калашников, валамон».

Афганистанэ НАТО войскоосты пыртэм бере, американецъёс со АК-ын ик шуккиськоно -пумиськоно луизы, соосты моджахедъёс понна ЦРУ басьяз. «Вашингтон Пост» газет ивортэмъя, 1-тӥ классысь сержант Натан Росс Чепмэн, афган пиналэн Калашников автоматысь ыбем мурт, та ожын тушмон тыллэсь бырем нырысетӥез американец луиз(iCasualties.org эрико интернет-сайта ивортэмъя, Афганистанын тушмон тыллэсь бырем нырысетӥез американец вал Джонни Спэнн).

Иракын ожмаськон

Коалициысь кужымъёс паймизы: выльысь кылдытэм Ирак армиысь солдатъёс M16 но M4 американ пыӵаллэсь куштӥськизы, АК-ез куризы. Огдырлы кылдытэм коалицияя администрациысь валтӥсь советниклэн Уолтер Слоукомблэн кылъёсызъя, «Иракысь котькудӥз12 ареслэсь бадӟым мурт сое кынем синмын ӟеч бичаны но сэрттыны быгатэ, умой ыбылэ».

США-ысь заресь пехотинец MPi-KMS-72 пыӵалэн, со АКМС-лэн восточногерманской аналогез луэ

Постсоветской вакыт

СССР куашкам бере ОВД-ысь тросэз кунъёс асьсэ арсеналъёссэс вузаны но совето образецъёсты европейской но американской выльгес обарзецъёслы вошъяны ӧдъязы, но та АК-лы дунъёсты воксё но ӧз уськыты. 1980-тӥ—1990-тӥ аръёсы Ближний Востокын гинэ автоматлы дунъёс 1100-сен 800 $ шӧдскымон усизы, нош Азияын но Америкаын дунъёс воксё но ӝутскизы (500-сен 700 $), Шундыӝужан Европаын но Африкаын ӧз воштӥське (ог 200—300 $).

Венесуэла

2005-тӥ арын Венесуэлалэн президентэз Уго Чавес Россиен 100 сюрс АК-103 автомат басьтон сярысь контракт гожтыны решение кутӥз. Огкыл 2006-тӥ арын юнматэмын вал, бӧрысьгес Уго Чавес эшшо 920 сюрс автомат басьтыны дась луэмез сярысь вераськиз, куназы АК-103 автоматэз лицензионной амалэн поттонэз радъян сярысь кенешылӥз. Уногес но уногес ожтӥрлык басьтыны кулэяськонлэсь мугзэ Уго Чавес «Америка ласянь урдсконлэсь кышкытлыкен» герӟалляз.

Дунъетъёс но азинлык

Калашников автоматлы, кема дыр ӵоже кутӥськытозяз, пӧртэм пумо дунъетъёс сётъязы.

Кылдытон вакытэ

Дунне вылэ кылдон вакытаз АК пайдаё ожтӥрлык вал, мукет кунъёсын вооружение кутэм пистолет патронъёслы чаклам пистолет-пулмёт модельёсын ӵьшатыса, со соосты вань валтӥсь куронъёсъя-тодметъёсъя азьпалтылӥз, со дыре ик винтовка боеприпаслы чакласа лэсьтэм автоматикая винтовкаослы ӧжыт гинэ кужыменыз сётскылӥз, соку но таосты кие кутымон, капчигес луэменыз, автоматической тылын пайдаёгес ыбылыны быгатэменыз вормылӥз. Фрезеровать карыса андалэсь лэсьтэм гумы коробкаен но кызьпулэсь бичам люкетъёслэсь поттэм АК-лэн асдуныз 1954-тӥ арын 676 манет вал.

Фёдор Токарев, ас дыраз АК-лэн тодметъёсыз сярысь пусйыкуз, сое «ужын оскымон, мертаськонын но ыбылӥськонын лэчыт, капчи секталаё» ожтӥрлыкез сямен висъялляз.

Ожтӥрлыклэн ожмаськонын вылӥ пайдалыкез ож бере дасо аръёс ортчем бере но локальной конфликтъёс дыръя юнматэмын вал, Вьетнамысь ожез пусйыса но.

Ожтӥрлыклэн оскымон но тӥяськылытэк юн ужамез солэн классэз понна эталон луо, сое поттон понна угось техникая трос комплекс ужпумъёс быдэстэмын вал, озьы ик сое бичанлэн ӟечлыкез но вылӥын возиськиз. Маузер 98 винтовка вакытъёс дырысен АК тужгес оскымон ожгар тӥрлык луэ шуыса, вераськонъёс мыно. Тужгес секыт югдурын но, воксё чаклатэк-жалятэк, квалификацитэк утялтыку но, оскымон луэмысь уг дугды.

Али вакытэ

Дыр ортчемъя, АК автоматлэн тырмымтэосыз шараяськыны кутскизы — куд-огез солы тупамон сямаз вал, куд-огез ыбылӥськон тӥрлыклы куронъёс но ожмаськон сямъёс воштӥськемен герӟаськемын. Конструкциысь но компоновкаысь куд-ог нимысьтыз шекъёсты туала вооруженилэн образецъёсысьтыз но палэнтыны уг луы, малы ке шуоно АК серилы тупась шуг-секытъёсты тупатон понна автоматэз бичан системаез быдэсак выльдыны кулэ. Вужмисьтэм АК серилы гажанэз возьматыса но, пусйыны кулэ: пересьмем автоматлэн малпанэз тросэтӥ уг сёты та модельёслы азинскыны но XXI даурысь пыӵалтӥрлыклэсь тодметъёссэ басьтыны.

АКС 74У автоматлэн выльдэм вариантэз

• Туала куронъёсъя, ожтӥрлыклэн секталаез бадӟым, со конструкцияз уно корт ёзъёсыз ванен герӟаськемын. Со дыре ик АК-ез мултэс секыт шуыны уг луы, но сое выльдыны тыршон учыръёс секталазэ эшшо йылтылӥзы, армейской ожтӥрлыклэн чаклам мертэтъёсысьтыз поттыса, кылсярысь, шонер ыбылӥськыны луонлыксэ будэтон вылысь гумызэ кузьгес но секытгес карылӥзы, мертаськыны ватсам арбериос юнматъязы, та пӧйшуран «Сайга» но «Вепрь» карабинъёсты, озьы РПК пулемётъёсты кылдытон но уже кутон вылын шӧдскиз. Быдэс конструкцизэ утьыса, ожтӥрлыкез капчиятыны тыршон амалъёс служебной юнлыксэ ярантэм кулэсто, та огласянь адӟиськиз азьвыл АК74 партиез уже кутонын но, солэн гумы коробкаез сокем юн ӧй вал, солэсь конструкцизэ выльысь кужмоятоно луиз — озьыен, татын вань луоноез лэсьтэмын ни, азьланяз модернизация ортчытыны уг луы ни;

• Туала образецъёсын ӵошатыса, АК-лэсь гумызэ пытсан понна гумы коробкалэн вкладышысьтыз вандэтъёс борды шедьытӥськись затворез кысконо, таин валче гумы коробкаез капчигес но технология ласянь йӧнгес материалъёслэсь лэсьтыны уг луы. Кык боевой упоръёс огшорыесь быдэстэмын, но со тужгес умоез малпам амал ӧвӧл — СВД винтовкалэн затвораз гинэ но куинь боевой упорез, та каналэз огсыр пытсаны но затворлэсь берыктон уголзэ кулэстыны юрттэ, со туала запад образецъёсты вератэк, кытын затворлэн куать боевой упорез;

• Басьтӥськись ӵоксэтэн сэрттӥськись гумы коробка уг сёты Вивера яке Пикатинни планкаос вылын лэсьтэм туала прицелъёсты юнматыны (кылсярысь, коллиматорной, оптикая, уй прицелъёсты): гумы коробкалэн басьяськись ӵоксэт вылаз секыт прицелэз пуктон толыктэм луэ, угось солэн конструкцияз люфтэз бадӟым. Озьыен, АК-лэн уноез модельёсыз луонлык сёто кӧня ке пумозэ гинэ мертаськон ёзъёсты юнматыны, соослэн но урдэсазы «ваёбыжлэн быжыз» выллем кронштейнзы луыны кулэ, таиз ожтӥрлыклэсь секталазэ паллян пала воштэ но ныдзэ куасалтыны луонлык уг сёты ни. Польша «Берил» автоматъёс выллем вариантъёс гинэ исключение луо, соослэн мертаськон планкалы нимысьтыз постаментсы вань, со гумы коробкалэн улӥ люкетаз рос-прос юнматӥське, но та огдырлы кутэ амал гинэ, со пыӵалтӥрлыкез сэрттыны-пертчыны шуг-секытъёс кылдытэ, озьы ик ассэ бадӟыматэ но секталазэ йылтэ. Вань на «булл-пап» схемая лэсьтэм лымшор-африкан Vektor CR21 «штурмовой винтовкаосъя» вариантъёс, соослэн коллиматорной прицелзы нимысьтыз планка вылэ юнматэмын, со АК борды пуктӥськись прицеллэн инъетэз вылэ пуксё — таӵе компоновкаын со ыбылӥськисьлэн син вадьсаз луэ. Мукет ласянь, гумы коробкалэн басьяськись ӵоксэтэз АК-ез ӝог но капчиен бичаны-сэрттыны юрттэ, пыӵалтӥрлыкез сузяку, ёзъёсыз дорозь рос-прос сузьтӥськыны луонлык сётэ. АК-12-лэн но пӧйшуранъя «Сайга» систамаысь карабинъёслэн гумы коробказылэн ӵоксэтэз выллань но азьлань шарниръёс вылын куштӥське, та туала прицел планкаосты юнматыны лэзе, ожтӥрлыклэсь механизмаз пыронэз секытомытытэк (АК-12-ын но «Сайгалэн» «тактикая» вариантъёсаз та амал кутэмын ни);

• Ударно-спускового механизмлэн ёзъёсыз гумы-коробка пушкын тач-тач бичамын, со затвор коробкалэсь но огдыре ик ударно-спусковой механизмлэн корпусэзлэсь рользэ быдэстэ (УСМ; спуск коробка). Али та ожтӥрлыклэн тырмымтэез лыдъяське, малы ке шуоно туала системаослэн (вуж совето СВД-лэн но американ M16-лэн гинэ но) УСМ-зы лэсьтӥське капчиен куштӥськись нимысьтыз блок выллем, модификациослы модуль кылдытыку, та сое ӝог воштыны юрттэ (самозарядной, черодэн ыбылыны юрттӥсь тылэз кузьдалая тупатыны но мукет), нош М16 учырын — ожтӥрлыкез воксё выльдыны, та понна УСМ-лэн блоказ выль гумы коробкалэсь блоксэ гинэ пуктоно (кылсярысь, выль калибръем боеприпасъёс вылэ потон понна), та трослы дунтэмгес луэ;

• Трос туала ыбылӥськон ожтӥрлык системаосын ӵошатыса, АК-лэсь берпум модификациоссэ но ӝог но капчиен вошытыны луонлык ӧвӧл — кылсярсь, пӧртэм кузьдалаё ӝог куштӥськись гумыосты кутыны;

• АК выжылэн юн оскымон луэмез солэн конструкциеныз герӟаськемын, но та со дыре ик сямаз пырем тырмымтэосызлэн мугзы но луэ. Газлы кошкыны сётӥсь кужмо механизм, затвор рама борды рос-прос юнматэм газ поршень но ёзъёс куспысь бадӟым висъёс, одӥг ласянь, пыӵалтӥрлыклэн автоматикаезлы зол кырсь дыръяз но могӟытэк-тӥяськытэк ужаны сёто (кырсез гумы коробка пушкысь ыбыку «пельтӥське»); мукет ласянь, затвор группа вырӟылыку, бадӟым висъёс урдэсъёсысьтыз пӧртэм пала кошкись импульсъёс кылдыто, та автоматэз мертаськон гож вылысь вамен шонскытэ, сыӵе дыръя затвор рама, ог 5 м/с ӝоглыкен мышлань сётскыса, ожтӥрлыкез ыбылыку зол зуркатэ («капчигес» автоматикаен ужась системаосын, затворзы мышлань кошкыны кутскыкуз но, та ӝоглык 4 м/с уг ортчы), озьы автоматикая тыллэсь пайдалыксэ шӧдскымон кулэстэ. Куд-ог дунъетъёсъя, АК выжыысь ожтӥрлык прицелысен черодэн ыбылӥськонлы воксё уг яра. Озьы ик тае затворлэн бадӟым амплитуда кылдытэменыз герӟало, озьыен, гумы коробкалэн кузьгес луэменыз, та ачиз ласянь гумылэсь кузьдалаез вылын шӧдске, пыӵалтӥрлыклэсь быдӟалазэ утьыса но. Мукет ласянь, АК-лэн гумы коробка пушказ пуромем затвор амплитудаез ныдыныз воксё уг герӟаськы, озьыен, та ныдзэ куасалтыны но транспортировка дыръя ожтӥрлыклэсь кузьдалазэ вакчиятыны юрттэ.

Мукет тырмымтэос сокем радикальноесь ӧвӧл, соосты образецлэн аспӧртэмлыкеныз герӟаны луоз.

• Переводчик-предохранителез умойтэм интыямын (гумы коробкалэн урдэсысьтыз бур палаз, взводной рукояткалы чаклам вандэт улын) но ожтӥрлыкез предохранительысь куштыку зол чильк-вальк чузъяськись куара, со тылзэ усьтэмлэсь азьло ик ыбылӥськисез шарая. Созэ но пусйисьёс вань: ожмаськонъёс дыръя ожтӥрлыкез предохранителе пуктыны кулэлык воксё ӧвӧл — ыбыны дасям дыръя но туж шер учыръёсы, кылсярысь, пыӵалтӥрлык усьыку, янгышен ыбыны быгатоз. Озьы ке но предохранитель нимаз интыямын луыны кулэ, юнматэм ыбылон режимлэсь нимаз ужаны кулэ, ожтӥрлыкез пистолет рукоятка бордытӥз возьыку, сое пуктыны могӟетъёс медаз кылдэ. Тросаз кунгожсьӧр вариантъёсын («Тантал», «Валмет», «Галиль») но АЕК-971 автоматын переводчик-предохранитель паллян палаз юнматэм рычажокен дублёр сямен ужа, та пыӵалэз уже кутонэз умоятэ, но тылэз ӝог усьтыны кылдытэм луонлык но тыл режимез быръён (тужгес но, режимъёс куинь ке) — со пӧртэм функциос. Та югдурез тупатыны луысал, предохранителез рукоятка бордыгес палэнтыса, сое кыкна ласянь пуктыса, нош тылэз вошъясь переводчикез пыдлогес юнматыса;

• АК-лэн спусковой механизмез секытос юн лыдъяське, но солы дышыны луэ;

• Бур палаз интыяськем взводной рукояткаез ӵемысь тырмымтэос пӧлы пырто; сое тазьы юнматыны мугез аслаз вал: бур палаз интыям рукоятка, ожтӥрлыкез вамен ошыса нуллыку но нюжтӥськыса мыныку, ыбылӥсьлэн мугораз пыкиське, шуг-секытъёс кылдытэ. Озьы, кылсярысь, MP40 немец пистолет-пулемёт бичамын вал. Калашниковлэн 1946-тӥ арысь автоматэзлэн опытной образецаз рукояткаез озьы ик паллян палаз вал, но ожгар комиссия сое, пӧртэм пумо тыллы предохранитель-переводчикез сямен ик, бур палаз воштыны косӥз. Кылсярысь, кунгожсьӧр «Галиль» вариантлэн рукояткаез выллань куасалтэмын, паллян киын ӝутыны капчи мед луоз шуыса;

• АК магазинлэсь чыртытэм приёмниксэ ӵемысь курлаллязы ыбылӥськись понна шуг луэменыз: чыртыё системаен ӵошатыса, магазинзэ воштон понна 2-3 поллы тросгес дыр кулэ шуыса, вераськонъёс пумиськыло. АК-лэн магазинэз туж ик капчиен уг юнматӥськы ке но, со котькыӵе югдурын ужа, кылсярысь, М16 винтовкалэн чыртыяз секыт югдурын ӵемысь кырсь тымиське, собере магазинзэ пуктонын шугъяськонъёс кылдо. Со сяна, ожмаськонын ожтӥрлыклэн ӝог ыбылӥськыны быгатонэз ӵемысь потэ магазинъёс понна чаклам подсумоклэн конструкциез бордысь — сое воштон бордысь уг. Озьы ик АК магазинэз паллян киын но, бур киын но воштыны луэ, чыртыё автоматъёсын озьы ужаны уг луы ни: со понна отын одӥг палаз гинэ интыяськем кнопкаез зӥбоно;

• АК-лэн ныдыз туж вакчи, нош цевьёез туж секыт лыдъяське, но та ожтӥрлык нырысь ик 1940-тӥ аръёсысь лапег ожгарчиос понна малпамын вал, озьы ик тол дӥсен но перчаткиосын сое уже кутонэз чаклазы. Югдурез огласянь тупатыны быгатысалыз ныд пуме понӥськись-басьтӥськись резиналэсь люкет, сыӵе пӧртэм пумо вариантъёсты калык рынокын ӵемысь ӵекто. Нимысьтыз назначениея росси подразделениосын но калык рынокын ӵемысь кутӥсько АК-лы чаклам серийной луисьтэм пӧртэм пумо ныдъёс, пистолет рукояткаос но мукетыз, со ожтӥрлыкен ужаны луонлыкъёсты капчиятэ но сое дуноятэ, югдурез быдэсак уг палэнты ке но;

• Куасалскись ныдо версиосты гадь я тыбыр вылын куасалтыса нуллыны шуг, малы ке шуоно ныдыз паллян пала зӥбиське, нош АК инъет вылын поттэм израиль «Галиль» ожтӥрлыклэн озьы ӧвӧл. Бур пала куасалтэм ныдын ужаку, затвор рычаг но гильзаез куштӥсь укно, тылын ыбылыку, эрикоесь луыны кулэ, озьы ик предохранитель но. АК понна та шугъяськон, угось предохранителез бур палаз интыяське;

• АК-лы заводын лэсьтэм прицел тӥрлыкез торккес лыдъяло, нош вакчи мертаськон гожез (мушка но прицеллэн целикысьтыз вандэм люкет кусып) шонер ыбылӥськонлэсь ӟечлыксэ уг йылты. АК инъет вылын кылдытэм кунгожсьӧр вариантъёсы нырысь ик пуктылӥзы умоятэм прицел тӥрлык, уноез соос пӧлысь — ыбылӥсьлэн синмызлы матэгес интыяськем диоптрической типъем целикен (кылсярысь, учке Valmet финн автоматысь прицелэзлэсь туспуктэмзэ). Мукет ласянь, шоро-куспо но кузь дистанциосы ыбылӥськукы гинэ зэмос пайдаё луись диоптрен ӵошатыса, АК-ысь «усьтэм» прицел, матысь но шоро-куспо кузьдалае огысьтыз мукетаз цель шоры ыбылыку, тылэз воштыны юрттэ, со автоматикая тылэз но капчиенгес уже кутыны тросгес луонлыкъёс сётэ, малы ке шуоно целез ӧжытгес пытса. Калашников автоматлэн нырысетӥ вариантъёсыз оптикая прицелъёсты юнматонъя планкаостэк лэсьтӥськылӥзы. Сыӵе луонлык кылдӥз АК-74М модификациын гинэ. Пуктэм планка ожтӥрлыкез бичан но сэрттон дырез кузёмытэ, ныдзэ паллян пала куасалтыны уг сёты ни;

• АК одӥг интые трос пуляен меӵ ыбылыны бадӟым луонлыкеныз ноку ӧз паймытъя, нырысетӥ образецезлэн но, отӥяз но та ляб пылыз вал, модернизациен валче быгатонлыкъёссэ ялан выльдӥзы-умоятӥзы ке но, кунгожсьӧр образецъёсын ӵошатыса, улӥынгес возиськиз. Котьма ке но, ожгар тӥрлык но та типен патронъёс понна та тырмыт лыдъяське. Куд-ог басьтэм ивортонъёсъя, фрезеровать карем гумы коробкаен АК (азьвыл модификациысь 7,62-мм) одӥген-одӥген ыбылӥськон дыръя ~5-9 см диаметре 90 м кемысен группаен йӧттылӥз. Соку ик усто ыбылӥськись ~350 м кеме пайдаё йӧттылӥз, сыӵе дыре пазьгиськись-вуись пуляослэн диаметрзы ~18 см вал, со адями ӝуждаез погыртыны окмымон. Пичи импульсэн патронъёслы чаклам ожтӥрлыклэн сямъёсыз эшшо но умоесьгес .

АК трос умой палъёсыз но, со вооруженилы ярамон на, но сое туала модельёслы воштонлэн кулэлыкез шӧдӥське ини, конструкцияз зол воштонъёс пыртоно, соос вуж системалэсь вань вылӥ гожтэм тырмымтэоссэ тупатыны юрттысалзы.

Выльдӥськонлэн азинлыкез

2011-тӥ арын «Ижмаш» автоматэз зол выльдон уж борды кутскиз. Выль пыӵал лэсьтонтэм вылысь модернизация сюрестӥ ик мыныны кенешизы кӧня ке мугъёсын сэрен. Соос пӧлын: оскымон луонзэ утьыны тыршон (шуккиськемез, усемез усто ужаны быгатэ), дунзэ кутыны вырон (Калашников автоматлэн образецъёсызлэн дунзылы матын), капчиен уже кутон но шуэрес югдуръёсын ужатыны быгатон (мускытын, дэриын, тузонын но мукет).

Витетӥ поколениысь выль образец АК-12 ним басьтӥз (нырысетӥ поколение АК пыре, кыкетӥяз — АКМ, куинетӥяз — АК-74, ньылетӥяз — ог-огзылы матэ луись АК-74М но «сюэтӥ серия»), 2012-тӥ арын со калыклы нырысьсэ адӟытэмын вал. «Ижмашлэн» валтӥсь директорез «Лента.рулы» интервьюын ялӥз: со умоятэм-выльдэм образец гинэ ӧвӧл — со мукет конструктивен но мукет луонлыкъёсын воксё мукет автомат. Со бордын та дыре но ужало, но али ик вераны луэ, АК-лэн азьвыл модельёсызлы тупась трос тырмымтэос палэнтэмын вал шуыса.

Выльдэм Калашников автоматъёслэн «Обвес» комплектсы Arms&Hunter 2015 адӟытонын

Нырысь ик прицел тӥрлыкъёсты юнматыны чаклам Пикатинни планкаез пуктон (коллиматорной, оптикая, уй), тактикая фонарь, целеуказатель но мукет котыр пумысен ужпум сылэ. АК-74М образецлы урдэсаз ватсам тӥрлыклы планка чакламын вал, но вылаз троссэ тӥрлыкез пуктыны уг луы вал, нош соосты куштыку но пуктыку, ожтӥрлыкез ыбылӥськон вылысь выльысь радъяны кулэ вал. АК-12 образецын Пикатинни планкаез чакламын; со рос-прос юнматэмын, кузь дистанциосын целез умой йӧттыны уг люкеты, со понна пристрелкаен но выроно ӧвӧл. Ваньзэ тае ӵоксэтсэ воштэмен быдэстыны луиз, сое юнгес лэсьтӥзы, азьысьтыз но мышкысьтыз люкетэз люфттэк юнматӥсько. Та озьы ик юрттэ ыбылӥськыку но температура воштӥськыку зурканлэсь утиськыны. Ужпум сылэ оген-оген тылын но автоматикая ыбылӥськон дыръя меӵ но шонер ыбылӥськонъя быгатонлыкъёссэ умоятыны, озьы ик пельпуме шуккон кужымзэ кулэстыны, со понна ожтӥрлыкез киын возёно люкетэз дорысен гумызэ улэгес интыяно. Таин валче выль гумыез кылдытон бордын ужало, сое лэсьтонъя пӧртэм бичан амалъёсты, технологиосты но нарезъёсъя конструкциосты чаклало. Эскеронъёслэн йылпумъянъёссыя устоез вариант быръемын луоз.

Трос мукет гердъёс но чакламын — пытсась механизм, суй-кие шуккись кужымзэ лябомытӥсь ударно-спусковой механизм. Вылзэ умоятонъя туала технологиосын валче ӧнерчиос ужало секталазэ но затвор группалэсь ветлон ӝоглыксэ кулэстон бордын, ӝог ыбылӥськон быгатонлыкъёссэ утьыса но йылтыса. Телескопической куасалскись ныд малпамын, сое ожгарчилэн антропометрикаезъя вошъяны луэ. Суй-кие шуккись кужымзэ лябомытон понна дульной тормоз-компенсаторез умоятэмын. Черодэн куинь пол ыбонэз висъяны луонлык кылдӥз, озьы ӧжытгес опытэн ыбылӥськись, вакчи черодэн ыбылыкуз, ӧжытгес боеприпасты быдтоз.

Али дыре ожтӥрлыкез «кык киё» карон бордын тыршо. Предохранительысь куштон, тыл режимъёсын кивалтон, магазинэз капчиен люкон, затворез ӝутон — ваньзэ тае паллян киын но, бур киын но быдэстыны луоз, ыбылӥськисьлэн чакламезъя. Взводной рукояткаез бур палаз но, паллян палаз но пуктыны луонлык кылдэ.

АК-12 инъет вылын быдэс сериен тӥрлык поттыны чакламын вал — штурмын кутӥськись винтовка, вакчиятэм автомат, пистолет-пулемёт, снайпер полуавтомат винтовка, ручной пулемёт но та ожтӥрлыклэн граждан версиосыз.

2012-тӥ арын югдурез утисьёс экспертъёсын ӵош эскеронъёсын АК-12 пумысен ӟеч кылъёс веразы. Россиысь МВД но Обороная министерство 2012-тӥ арын куартолэзь пумын ыбылӥськонзэс адӟытӥзы.

Та дырлы Россиысь Обороная министерствоын АК-74 запасъёс трос, соосты быдтыны пайдаё ӧвӧл. «Ижмаш» автоматэз выльдонъя пӧртэм вариантъёсты эскериз. Конструкторъёс сэрттон-бичанын секыт но трос гердъёссэ быдэсак воштыны кулэ карись нырысетӥ дуно вариантъёсты палэнтӥзы, та дырлы тужгес но азинлыко луэ ӵоксэтсэ воштонъя дунтэм выльдӥськон, со борды юнматӥськозы Пикатинни но цевье планкаос, озьы ик куасалскись, кузьдалая радъяськись ныдын, воштэм модулен АК-12. Выльдэм вариант конструкциез ласянь но, экономикаын пайдалыкъя но Обороная министерстовлэн куронъёсызлы тупаны кулэ луоз.

Калашников автомат граждан ожтӥрлыкъя рынокын

Калашников системалэн пӧртэм вариантъёсыз граждан пыӵалтӥрлык чот вӧлмемын дуннеысь тросаз кунъёсын, отын пыӵал нуллон сярысь катъёс кунмуртъёс пала карисько.

Мозамбиклэн кунпусэз

Буркина-Фасолэн кунпусэз, 1984—1997

США-ын вань АК выллем ожтӥрлык «АК-47» (англ. «A-K-forty-seven») ним улсын тодмо. АК-лэн нырысетӥ экземпляръёсыз США-е вуизы Вьетнамысь бертӥсь солдатъёсын ӵош. Со аръёсы США-ын автоматической (черодэн ыбылӥськись) пыӵалэз возьыны гражданъёслы лэземын вал бере, отӥяз тросэз соос пӧлысь регистрация пыр ортчизы, вань куронъёсты чакласа.

1968-тӥ арын кытэм Gun Control Act автоматикая граждан пыӵалтӥрлыкез импортэ пыртыны алӥз, но законъёсты асьсэ ласянь берыктыны быгатэменызы, США-ын бычам автоматикая ожтӥрлыкез вузаллязы. Со сяна, АК инъет вылын бичам самозарядной вариантъёсты импортэн пыртон нокызьы алэмын ӧй вал.

1986-тӥ арын со постановление воштон пыртыса (англ. Firearm Owners Protection Act), импорт гинэ алэмын ӧй вал, граждан калыклы автоматика пыӵалтӥрлыкез вузан но, озььы ик сое сыӵе мылкыдын вузан вылысь поттон но; та постановленилэн кужымыз 1986-тӥ арозь регистрация пыр поттэм ожтӥрлык вылэ ӧз тырмылы, угось со законэз чакласа басьтэмын луыны быгатылӥз, лицензизы вань ке, нош дилерлэн кулэ уровенен лицензиез (англ. Class III Dealer) вань дыръя — вузаськылӥз. Озьыен, США-ын граждан калыклэн кияз али дыре но военной образецысь черодэн ыбылыны быгатӥсь Калашников автоматъёс вань.

Отӥяз озьы ик мукет постановлениос но кутэмын вал (англ. 1989 Semi-Automatic Rifle Import Ban, англ. 1994 Federal Assault Weapons Ban), АК выллем котькуд ожтӥрлыкез, нимын-нимын пусйыса, импортэн пыртыны алылӥзы, зэм, нимысьтыз выльдэм-тупатэм вариантъёсты лэзьылӥзы ик, кылсярысь, росси «Сайгалэсь», пистолет рукоятка интые, винтовка ныдын но конструкцияз мукет выльдӥськонъёсын куд-ог модификациоссэ. Али дыре та ватсам алонъёслы пум понэмын, постановлениослэн кужымзы быремен.

Мукет кунъёсын тросаз учыръёсын граждан калыклы законъя ожтӥрлык возьыны лэземын ке но, со исключение выллем луэ, со понна нимысьтыз разрешение кулэ яке коллекционер луоно.

Калашников автомат паськыт вӧлмем лулчеберетын

Калашников автомат 1970-тӥ аръёсы ай музъем вылысь нимысьтыз улосъёсысь калык пӧлын зол вӧлмем лулчеберетазы пыриз, кылсярысь, Ближний Востоклэн лулчеберетаз. Женеваысь штаб-квартираын интыяськем Small Arms Survey калыккуспо огазеяськонлэн эскеронъёсызъя, Кавказ, Ближний Восток, Шор Азия, Африка кунъёсысь пыӵалтӥрлыкен герӟаськем йылолъёсын паськыт вӧлмизы «Калашников культ» (англ. Kalashnikov Culture) но «Калашниковизация» (англ. Kalashnikovization) валатонъёс.

Абдин дворецлэн музейысьтыз стенд

«Калашников» концернысь автоматъёслы сӥзем маркаос (2024)

Калашников автомат Шундыӝуан Тиморлэн, Зимбабвелэн но Мозамбиклэн кунпусаз, Мозамбиклэн куншетаз, озьы ик Кука шормучлэн уксё вылаз возьматэмын.

Калашников автомат озьы ик шутер жанрысь трос пумо видеошудонъёсын кутӥське.

2004-тӥ арын «Playboy» журнал Калашников автоматэз «дуннеез воштэм 50 арбериос» списоке пыртӥз, сое Apple Macintosh компьютер, нылпи сюронтэм эмъюм но Sony Betamax видеомагнитофон мышкы пуктӥз.

Туспуктэмъёс

• АК но АКМ Ижмашлэн «Россилэн пыӵалтӥрлыкъя кебитэз» адӟытонэз
• 

  1-тӥ но 2-тӥ модельем юнматэм 6Х2 штыкен Калашников автомат

• 

  3-тӥ модельем АК

• 

  АКС

• 

  АКМ

• 

  Уйин мертаськыны луоно прицелэн НСП-3 прицелэн

• 

  АКМ-лэн инъетэз вылын кылдытэм ыбылӥськонлы но граномётлы чаклам «Тишина» комплекс

• 

  1-тӥ модельем АК74 но АКС74 юнматэм 6Х5 штыкъёсын

Лулчеберетын

• 

  Украинаысь каскадёр Александр Литвиненко кияз Калашников автоматэн «Братство десанта» сериалэз пуктон дыръя, 2012-тӥ ар

Эксплуатант кунъёс

•  Афганистан.
• Албания Албания
•  Алжир
•  Ангола
• Армения Армения
• Азербайджан Азербайджан
•  Бангладеш
• Белоруссия Белоруссия
•  Бенин
• Босния и Герцеговина Босния и Герцеговина
•  Ботсвана
• Болгария Болгария
•  Буркина-Фасо
•  Бурунди
•  Камбоджа
•  Кабо-Верде
• ЦАР ЦАР
•  Чад
• Китай Китай:Тип 56 вариант
•  Коморы
• Куба Куба
• ДР Конго ДР Конго
•  Джибути
• ГДР ГДР
•  Египет
•  Эритрея
• Экваториальной Гвинея Экваториальной Гвинея
•  Эфиопия
•  Габон
• Грузия Грузия
•  Гана
•  Греция
•  Гвинея
•  Гвинея-Бисау
•  Гайана
• Венгрия Венгрия
• Индия Индия
• Иран Иран
•  Ирак
• Израиль Израиль
• Казахстан Казахстан
•  Кения
• Киргизия Киргизия
•  Лаос
•  Ливан
•  Лесото
•  Либерия
•  Ливия
• Северная Македония Северная Македония
•  Мадагаскар
•  Мали
•  Мальта: Тип 56 вариант
•  Мавритания
• Молдавия Молдавия
•  Марокко
•  Монголия
•  Мозамбик
•  Мьянма
•  Намибия
•  Нигер
• Нигерия Нигерия
• КНДР КНДР: Тип 58 вариант
•  Пакистан: Тип 56 вариант
• ПНА ПНА
•  Перу
• Филиппины Филиппины
• Польша Польша
• Катар Катар
• Республика Конго Республика Конго
• Родезия Родезия
• Румыния Румыния
• Россия Россия
•  Руанда
• Сан-Томе но Принсипи Сан-Томе но Принсипи
• Сахараысь Арабской Демократической Республика Сахараысь Арабской Демократической Республика
•  Сенегал
• Сербия Сербия
• Сейшел шормуӵъёс Сейшел шормуӵъёс
•  Сьерра-Леоне
•  Сомали
• ЮАР ЮАР
• Лымшор Судан Лымшор Судан
• СССР СССР
•  Шри-Ланка: Тип 56 вариант
•  Судан
• Суринам Суринам
•  Сирия
• Таджикистан Таджикистан
•  Танзания
•  Того
• Туркменистан Туркменистан
• Турция Турция
•  Уганда
• ОАЭ ОАЭ
• Украина Украина
• Узбекистан Узбекистан
•  Вьетнам
•  Йемен
• Югославия Югославия
•  Замбия
•  Зимбабве

Валэктонъёс

Литература

• Наставление по стрелковому делу. 7,62-мм автомат Калашникова (АК). Изд. 2-е. — М.: Военное издательство Министерства обороны СССР, 1960.
• Наставление по стрелковому делу. 7,62-мм модернизированный автомат Калашникова (АКМ и АКМС). Изд. 3-е. — М.: Военное издательство Министерства обороны СССР, 1970.
• Малимон А. А. Отечественные автоматы (записки испытателя-оружейника). — М.: Типография ВА РВСН им. Петра Великого, 1999.
• Монетчиков С. Б. История русского автомата. — СПб.: Атлант, 2005. — 246 с. — ISBN ISBN 5-98655-006-4.
• Чиверс, Кристофер. Автомат: АК-47 и эволюция войны. — New York: Simon & Schuster, 2010. — 496 с. — ISBN ISBN 0-74327-07-6-2.

Чӧлсконъёс

•  «Отечественное стрелковое оружие». Фильм 3. «Автоматы»
•  Как работает автомата Калашникова? Устройство и принцип действия А