Варзи-Ятчи (санаторий)

Варзи-Ятчи санаторий
Кун	Росси империя[d]  РСФСР  Россия
Кылдытэмын	1889
Ужан дырыз	быдэс ар ӵоже
Ватсам тодэтъёс
Профиль	эмъянъя но диагностикая
Адресэз	Алнаш ёрос, Ӟатча черкогурт, Курортная урам, 1-тӥ юрт
varzy.ru

«Варзи́-Ятчи́» санаторий — Удмурт Элькунысь Алнаш ёросысь трос профильем санаторий, улосысь эмъянъя но диагностикая огез вашкалаез ужъюрт. Йӧнатӥсь дэриеныз но минерал вуосыныз тодмо.

Интыяськемез

«Варзи-Ятчи» санаторий Удмуртиысь Алнаш ёросысь Ӟатча (ӟуч: Варзи-Ятчи) черкогуртын, Ижкарлэсь лымшор пала 150 иськемлы кыдёке интыяськемын.

Историез

1885-тӥ арын алабго купеч Пётр Ушков, Ӟатчалась дэрилэсь но минерал вуослэсь эмъяны быгатонлыкъёссы сярысь кылыса но тодосчиослэсь юалляськыса, гуртысь крестьянъёслэсь музъемзэс арендае кутӥз, отын висисьёсты йӧнатонъя ваннаосын павильон но корпус пуктыны ӧдъяз. 1889-тӥ арын, Ватка губернаторлэсь бакельзэ басьтыса, сераен но дэриен эмъянъя ужъюрт усьтӥз, сое Александровской нимаз. Лечебница котыре озьы ик ӝутӥзы эмчилы, фельдшерлы но акушеркалы юртъёс, сьӧд ужез быдэстӥсьёслы но крестьянъёслы висъетъёс, шутэтскон номеръёс.

1889-тӥ арын 18-тӥ инвожое здравницаез сиё-дано усьтӥзы. Ӵапак соку Пётр Ушков сераен но дэриен эмъяськонъя курортэз алабго земство кие сётӥз. Со пумысен «Вятские губернские ведомости» газетын гожъяллязы:

Ӧтем куноос пӧлын Ватка эмъян управаысь эмъянъя инспектор, ужась статсоветник И. Михайлов но вал. Юртъёсты учкиз но малпаса умой пуктэмзылы синмаськиз, земстволы таӵе ӟеч кузьым лэсьтэмез понна тау кариз.

Пётр Ушков отӥяз но здравницалы юрттэт сётылӥз, ужаменыз тунсыкъяськылӥз.

1894-тӥ арын йӧнатӥсь дэриос но вуос сярысь Санкт-Петербургын тодӥзы: образецъёссэс Россиысь гигиеналы сӥзем I адӟытонэ ыстӥзы, татын соосты туй медален пусийзы.

ХХ даур кутсконын санаторие, Ватка губерниысь сяна, Кузон, Оренбург но Уфа губерниосысь но шутэтскыны но эмъяськыны ялан вуылӥзы — огдыре ог 500 адями.

1921-тӥ арын ВЦИК-лэн президиумезлэн пуктэтэзъя «Варзи-Ятчи» дэриен эмъяськонъя курортэн ялэмын вал.

1935-тӥ арысен тазалыкез юнматон ужъюртлэсь ужамзэ Ижысь мединститутысь экспедиция эскериз, кивалтӥз соин профессор Степан Стрелков.

1942-тӥ арын тулыспалысен 1943-тӥ арын коньывуонозь лечебницаын 3153 номеро госпиталь интыяськылӥз, 1944-тӥ арысен 1946-тӥ арозь татын Быдӟым Атыкай ож пыр потэм сӧсыръёсты эмъяллязы. Ужъюрт 150 муртлы чакламын вал.

1947-тӥ арысен здравница путёвкаен доразы ыстэм висись муртъёслы выльысь ӧсъёссэ усьтӥз, но соосты гужем вакытэ гинэ йӧнатылӥзы (инвожо кутсконысен гудырикошкон шорозь), 1957-тӥ арысен — быдэс ар ӵоже.

1985-тӥ арысен «Варзи-Ятчи» луиз санаторий.

1995-тӥ арын эмъянъя «Анай но пинал» нимо выль ӧр усьтӥськиз.

1996-тӥ арын санаторие газ вуиз.

• 

  2-тӥ корпус

• 

  5-тӥ корпус

• 

  Санаторийлэн администрациез

• 

  7-тӥ корпусэ нуись тубатъёс

• 

  Часовня

• 

  Бассейн

Эмъян

Санаторийын йӧнатӥськон радъямын эмъясь инкуазь, дэриос, минерал вуос вылын.

Дэриосын эмъяло суй-пыд, кызян, нуны ваён, шокан ёзвиосынызы, пель, ньылон ӝуш, кӧтпуш, ку висёнъёсынызы курадӟисьёсты.

Санаториысь минерал вуосын лачак углекислотаез, азотэз, сероводородэз, химияя тырметъёсыз. Сыӵе вуэн эмъяло вирсэр, сюлэм но сэр, суй-пыд, кӧтпуш, зоб, шор лулсэр системаен герӟаськем висёнъёсынызы, шокан, нуны ваён ёзвиосынызы но мукет черъёсын курадӟисьёсты.

Инфраструктураез

2024-тӥ арын ивортонъёсъя, дэриен но минерал вуосын инкуазьын эмъяськонъя «Варзи-Ятчи» санаторийлэн котыраз вань:

• пыжен уян станция;
• спортъя площадкаос;
• нылпиослы шудон площадкаос;
• музейёс;
• часовня;
• машинаосты дугдытыны чаклам дунын кык эскероно интыос.

Санаторийлэн огъя территориез 39 га луэ, сое частной луись утёнъя огазеяськон эскере.

• 

  Минерал вуосын но дэриен эмъянъя лечебница

• 

  Юон вуослы сӥзем галерея

• 

  Пыжен уян станция вӧзысь «Вашкала выжы» музей

• 

  Пыжен уян станция

• 

  Санаторийлэн котырыз

Валэктонъёс

Чӧлсконъёс

• О санатории [ӟуч]

• «Варзи-Ятчи» — уникальная здравница Удмуртии [ӟуч]