Эгра (воршуд)
Эгра — удмуртъёслэн воршуд нимъёссы пӧлысь одӥгез.
.svg)
Кылдэмез сярысь
«Воршуд» кыллэн кылдэмез сярысь пӧртэм тодосчиос пӧртэм сямен верало. Кылсярысь, В. Е. Владыкинъя но М. Г. Атамановъя, воршуд — нылкышно выжыез утись кылчин. В.Чураковлэн малпамезъя, выжылэн нимыз но выжыез утись кылчин — со пӧртэм макеос луо. И. Н. Смирнов воршуд нимез выжы ним чотын кутыны дэмлаз. Озьы ик воршуд нимез Н. Блинов но ас ужъёсаз выжы ним чотын кутылӥз. Мукетыз тодосчи П. М. Сорокин пусйылӥз[1]:
Воршуд ним — со выжыез кылдытӥсь дано луэм нылкышнолэн яке воргоронлэн нимыз… воршуд ним адямилэн нимыз сяна, солэн кушемнимыз но луыны быгатэ.
Эгра воршуд нимлэн кылдэмез пумысен трос малпанъёс вӧлмемын, кылсярысь:
- Владимир Чураков «Происхождение названий удмуртских родов» статьяяз Эгра воршудлэсь кылдэмзэ Эгыр нимо воргоронэн герӟа. «Эгыр» кыл борды -а кылӥтэт ватсаса[2].
- М. Г. Атаманов Эгра воршуд нимез манси кылысь «кион выжы» шуыса берыктэ. Пусйыны кулэ, манси калык та интыосын ноку ӧз улылы.
- В. В. Напольских валэктӥз, коми-пермякъёс манси калыкез Йзгра шуыса нимало, вашкала ӟуч сямен — Югра, удмурт сямен Эгра. Перм калыклэн мансиосын кусыпъяськыса улэменызы со кыл вераськоназы кӧчиз.
Вӧлмемын
Эгра выжы 55 улон интыосын пусъемын (озьы ик Эгралэн сьӧр палаз). Эгра выжы кык вайлы люкиське — Эгра ёросын (Чупчи шур котырын) но Грах ёросын (Кам шур котырын). Эгра ёросын Эгра выжыос Лозо шур кузя интыяськемын, 27 гуртъёсын[3], Грах ёросын — 4 гурт. Пересьёслэн тодэ ваёнъёссыя, Грах ёросысь Эграос уйпалась вуиллям (Эгра ёросысь ик, оло). Та интыосын сяна, Эгра выжыос уло Удмуртилэн пӧртэм ёросъёсаз: Пичи Пурга (3 гурт), Дэри (1 гурт), Якшур-Бӧдья (9 гурт), Шаркан (1 гурт), Ува (1 гурт), Красногорье (2), Балезино (1 гурт), Башкортостанысь Калтасы (1 гурт) но Янаул (3 гурт) ёросъёсын, Татарстанысь Бавлы ёросын (2 гурт).
Валэктонъёс
- ↑ В.Чураков Происхождение названий удмуртских родов [ӟуч] Удмуртология. Эскеремын 27-10-2025 арын
- ↑ История [ӟуч] МО "Муниципальный округ Игринский район Удмуртской Республики". Эскеремын 27-10-2025 арын
- ↑ Максим Корепанов (19-12-2010) Воршудно-родовые объединения п.Игра и Игринского района. [ӟуч] ВКонтакте. Эскеремын 27-10-2025 арын