Узы-Боры (фестиваль)

Узы-Боры (емышо фестиваль)
Инлыкез	элькун
фестиваль[d]
Кивалтӥсез	Сюмси ёрос Культура юрт
Кутсконэз	2018-тӥ арысен арлы быдэ пӧсьтолэзе
Ортчытон интыез
57°06′42″ с. ш. 51°36′29″ в. д.
Ортчытон интыез	Удмурт Элькун Сюмси
Кун	Россия
Сайт	vk.com/uzibori
Медиафайлъёс РувикиМедиа пушкын

Узы-Боры (ӟуч: Лесная ягода) − пӧртэм емышъёслы сӥзем гужем фестиваль. Ортче Удмурт Элькунысь Сюмси черкогуртын. Фестиваль Удмуртиын улӥсь калыкъёслэсь аспӧртэм лулчеберетсэс, йӧскалык кылъёссэс утён но вӧлмытон, Сюмси ёросын будӥсь узы-борылэсь, турынъёслэсь пӧртэм сиён-юонъёс лэсьтон йылолъёсты улыӟтон, ёросын туризмез азинтон вылысь радъяське. Нырысьсэ ортчиз 2018-тӥ арын.

Кылдэмез сярысь

Ужрад ортчытӥське Сюмси ёрос Муниципал округлэн кичӧлтэмезъя, Удмурт Элькунысь Культурая но Йӧскалык политикая министерствоослэн юрттэмзыя. Озьы ик ужрадэз дасянэ но ортчытонэ пырисько Удмурт Элькунысь Калык творчествоя юрт, «Сюмси ёрос муниципал округ» муниципал кылдытэтлэн администрациез но Сюмсиысь ёрос Культура юрт.

Фестивалез одно ик Сюмсиын ортчытон пумысен ужрадэз радъясьёс но Сюмсиын улӥсьёс тазьы валэкто: «Удмуртиын пумиськись пӧртэм пумо емышъёс (узы, боры, ягмульы, кудымульы, лызмульы, нюрмульы, нюрэмезь, палэзь, шу но эмезь) та палъёсын гинэ будо». Фестивале лыктэм куноос удмурт лулчеберетэн но йӧскалык сиён-юонъёсын тодматско. Ужрадлэн валтӥсь люкетэз − емышъёслэсь пыжем бадӟым шаньга. Быдӟалаезъя со 30 килограммлэсь секытгес, огъя диаметрез 1 но ӝыны метр. Сое пӧран понна ог витё литра али бичам емыш кулэ луэ. Фестивальлэн аслаз юнматэм валютаез вань, со коньдон шуыса нимаське. Пӧртэм интерактивной площадкаосы пыриськыса, мылкыд карисьёс коньдон люкало но соосты сувенирной лавкаосын пӧртэм арбериосын вошъяло.

Емышо шаньга. 2023-тӥ ар

Азьвыл аръёсы

Фестиваль нырысьсэ ортчиз 2018-тӥ арын, Сюмси ёрослэн кылдон дырысеныз 90 ар тырмонлы сӥзьыса. Гужем фестивальлэн вань на тол вариантэз. Со «Лымы мульы» шуыса нимаське, ортче 7-тӥ толшоре. 2023-тӥ арын фестивале элькунысь 11 ёросъёсысь, Ижкарысь, Кузонысь но Киров улосысь 4500 пала куно вуылӥз. Удмурт Элькунысь йӧскалык политикая министр Эдуард Петров «Узы-Боры» фестивалез усьтон ужрадын, куноослы пумитан кылъёсын вазиськоназ, та тужгес ческытэз гужем ужрад шуыса пусйиз. Котькуд ёрослэн аслаз аспӧртэмлыкез, аслаз брендэз вань, Сюмси ёрослэн со — «Узы-боры» емышо фестиваль

2025-тӥ арын

2025-тӥ арын «Узы-Боры» фестивалез Сюмси черкогуртын 12-тӥ пӧсьтолэзе ортчытыны чакламын. Емышъёслэсь дасям пӧртэм сиён-юонъёсты веръям сяна, татын озьы ик чакламын:

• пӧраськонъя мастер-классъёс;
• нюлэс емышъёсты веръян-дегустация;
• элькунысь устолыкъя коллективъёслэн выступлениоссы;
• элькунысь усточиослэн арбериосынызы адӟытон-вузкарон;
• семьяос куспын «одӥг бусыысь емыш» вожвылъяськон;
• «емышо» дэремъёсын вожвылъяськон-дефиле;
• спорт ӵошатсконъёс;
• бакча сульдэръёсъя сяме пыӵам вожвылъяськон;

Ужрадэз «Холи буёлъёс» дискотека йылпумъялоз. Отчы элькун кизилиослэн пыриськемзы чакламын.

Валэктонъёс