Шаньга
| Шаньга | |
|---|---|
 | |
| Малэсь пӧрамын | |
| Валтӥсьёсыз | Пызь |
| Пӧлаз кутыны луэ | картошка пунем, кузятэм, ӝук, курегпуз, йӧлвыл, кӧй-вӧй |
| Со выллем пӧросъёс | |
| Матын луись | Ватрушка, калитки, перепеч |
 Медиафайлъёс РувикиМедиа пушкын | |
Ша́ньга — ӟуч, пор, удмурт но коми пӧраськонысь сиён. Со юмал яке маял, чабей, ӟег яке ӟеген суро чабей ыльняньлэсь лэсьтэм пыжиськем. Сиён Карелиысен Обь дорозь вӧлмиз, Ӟуч Уйпалэз но санэ басьтыса. Али дыре со Предуралье, Шор Урал но Зауралье улосъёсын кутӥськись сиён луэ[1].
Нимызлэн кылдэмез
Кулинарияя гожъяськись В. В. Похлёбкин лыдъямъя, шаньга кыл коми кылысь ӟуче асэстэмын[1]. М. Фасмер верамъя, коми кылэ шаньга кыл сюриз уйпал ӟуч диалектысь[2]. В. И. Лыткин но Е. С. Гуляев пусъемъя, шаньга кыл озьы ик пумиське удмурт но пор кылъёсын, татчы со озьы ик уйпал ӟуч вераськонысь вуиз. Ас дыраз со асэстэмын вал, вылды, прибалт-финн кылъёсысь; карел. sän'gi «урожай»[3].
Историез
Сиёнлэсь нимзэ Ӟуч Уйпалысь славян калык абориген финн племяослэсь асэстӥз. Отӥяз уйпал ӟуч крестьян колонизациен валче Карелиысен Обь дорозь вӧлмиз; XVII даурысен сиён архангелогородской но сольвычегодской колонистъёсын ӵош Шундыпуксён Сибире вуиз. Туннэ та пыжиськемез паськыт куто Ӟуч Уйпал кухняын (Архангельск улос, Карелия, Мурманск улос, Вологда улос, Коми), Предуральеын, Шор Уралын но Зауральеын, Россилэн шундыпуксён но шор улосъёсаз со сярысь ӧжыт тодо. Али шаньгиез ӵемысь чырсатэм маял ыльняньлэсь пыжо; вашкала дыръя коми-пермякъёс сое юмал ыльняньлэсь но лэсьтылӥзы, со «кулиггез» нимаськылӥз (трос лыдын — «кулиги»). Великий Устюгын но котырысьтыз гуртъёсын шаньгиез туннэ но юмал ыльняньлэсь пыжо, та палъёсын сое ӵемысь пӧрало.
Тодметъёсыз
Шаньга тусызъя ватрушкалы укша, но ватрушкаен ӵошатыса, со коньыт уг луы. Куд-ог улосъёсын исключениос луо ик — кылсярысь, морошкаен шаньги. В. В. Похлёбкин малпамъя, шаньгалэсь вылзэ гинэ пушко ватсэтэн зырало. Погыльтэм ыльняне нимысьтыз гутёос уг лэсьто: пушкесэз ыльняньлэн быдэс кругез вылэ сӥен зырало, дуръёсаз сюбег гинэ буш инты кельто.
Ӵемысь пумиське кисьтэм шаньга (ӟуч: наливная шаньга) валатон, тазэ Европейской Северлэн (Архангельск улос) ёросъёсаз пыжо. Та учырын пушкессэ уг кисьто — инъетсэ: ыльняньзэ кизергес нырко но кисьто «табаосы» — пичи тэркы выллем пичиесь корт формаосы. Сыӵе шаньгиослэсь вылзэс чырсатэмен, йӧлвылын яке курегпузэн шуккем йӧлвылын маялляло — кин маин узыр, нош вылаз ӝожон яке йыды пызь пызьнало[4]. Та шаньгиосты ӵемысь йыды пызьлэсь лэсьто вал, нош поморъёс йыдыез «жито» нимало, озьы та шаньгиосты эшшо «житники» нимало на. Ыльнянез эшшо но кизергес ныркемын ке, сыӵе кисьтэм шаньгиосты «налисники» яке «налистники» шуо. Соос шаньга кадь буй-буй уг ӝутско, зӧк мыльымлы укшалляло. Йӧлвылэн но курегпузэн зырамысьтызы, вылыз чебер пыже. Шаньгиослэн быдӟалазы пӧртэм луэ: диаметрез 12-15 сантиметрысен 30 но солэсь ортчыт сантиметрозь, ваньзэсты гурын пыжо. Тужгес паськыт вӧлмемын 18-20 сантиметр диаметръем шаньгиос.
Нырысь-валысь пыжиськемлы пушкес чот дасяллязы йӧлвыл, пӧртэм пумо пызь, кӧжы ӝук. Туннэ ӵемысь кутӥське картошка пунем яке кузятэм; ӝукъёслэсь но лэсьтӥськыны быгатэ — кылсярысь, тари; секыт пушкесъёс но вань, кылсярысь, сьӧдчабей ӝукез пӧзьтыса корам курегпузэн сурало.
Шаньгиос ӟуч гурын но, духовкаын но умой пыжо. Гурысь потэмзы бере шунтэм нӧкы вӧйын яке йӧлвылын зырало.
Шаньгиосты пӧсь дыръязы сиё — йӧлын, чырсатэмен, сылалтэм чорыген, кубиста шыдэн, чаен.
Совето Союз вакытэ шаньги вӧлмем улосъёсын трос усьтӥськемын вал ӝог сиськонъя «шаньга пыжон» предприятиос, «блиннойёслы», «чайнойёслы» но мукет та выллем сиськонниослы укшалляз — татын пӧртэм пумо пушкесэн шаньги вузаллязы[5]. Али дыре шаньгиез Европейской Россилэн уйпал но шундыӝужан люкетысьтыз пекарняосын лачак пумитаны луэ.
Валэктонъёс
- ↑ 1 2 В. В. Похлёбкин. Кулинарный словарь. — М.: Издательство «Э», 2015. — С. 407. — 456 с.
- ↑ Шаньга // Этимологический словарь русского языка = Этимологический словарь русского языка Макса Фасмера : в 4 т. / авт.-сост. М. Фасмер ; пер. с нем. и доп. чл.‑кор. АН СССР О. Н. Трубачёва, под ред. и с предисл. проф. Б. А. Ларина [т. I]. — Изд. 2-е, стер. — М. : Прогресс, 1987. — Т. IV : Т — Ящур. — С. 405.
- ↑ В. И. Лыткин, Е. С. Гуляев. Краткий этимологический словарь коми языка. — М.: Наука, 1970. — 317 с.
- ↑ Л. А. Черемухина. Северная кухня. — Архангельск: Сев.-Зап. кн. изд-во, 1992. — С. 222–223, 231. — 319 с.
- ↑ Что такое «шанежки» (подсказка: они съедобные) [ӟуч] mel.fm. Эскеремын 2026-02-25 арын
Литература
- Ковалёв В. М., Могильный Н. П. Русская кухня: традиции и обычаи. — М.: Советская Россия, 1990. — С. 102. — 256 с. — 150 000 экз. — ISBN 5-268-00916-8.
- Похлёбкин В. В. Шаньги // Кулинарный словарь. — М.: Издательство «Э», 2015. — С. 407. — 456 с. — ISBN 978-5-699-75127-3.
- Ратушный А. С. Шаньги // Всё о еде от А до Я: Энциклопедия. — М.: Издательско-торговая корпорация «Дашков и К°», 2016. — С. 422. — 440 с. — 300 экз. — ISBN 978-5-394-02484-9.