Силаева, Татьяна Ивановна
| Татьяна Ивановна Силаева | |
|---|---|
 | |
| Вордӥськем нуналыз | 14-тӥ шуркынмонэ 1958 (67 лет) |
| Вордӥськем интыез | |
| Кунмуртлыкез | |
| Ужудысэз | актриса, оперный певец, преподаватель |
| Данъетъёсыз | |
Татья́на Ивáновна Силáева (ворд. 14-тӥ шуркынмонэ 1958, Белорецк[d], Башкир Автономной Советской Социалистической Республика[d]) — совето но росси операя кырӟась (сопрано). Концертэн камерной кырӟась. Дышетӥсь. Удмурт Элькунысь операя но балетъя кун театрысь артистка. Удмуртиысь дано артистка. Росси Федерациысь дано артистка.
Улон сюресэз
Вордӥськиз 1958-тӥ арын 14-тӥ шуркынмонэ Башкириысь Белорецкын. Пичи дыръяз школа хорын кырӟалляз. Школаез йылпумъяса, Силаева политехникая институтэ пырыны турттэ вал, но конкурсэз потыны ӝыны баллэз ӧз тырмы. Вордскем караз берытскиз но, анай-атаезлэсь адӟем карыса, металлургияя заводэ интыяськиз, волочильщица луыса ужаны кутскиз. Ваньмон дыръяз Силаева самодеятельносте пыриськылӥз — ӟуч калык хорын кырӟалляз. Хорен чеберлыко кивалтӥсь лыдъяз, нылмуртлы быгатонлыкъёссэ азинтыны кулэ шуыса, сое Магнитогорскысь крезьгуръя училищее нуиз. Курсысьтыз ӵош дышетскись эшъёссэ сутон понна нылмурт уен-нуналэн тодон-валан люкано луиз, соослэн угось крезьгуро образованизы вал ни[1].
Мукоысь консерваторие Татьяна Силаева шӧдтэк-шорысь пыриз. Шоркаре экскурсиен вуыса, нылмурт консерваториен тодматскиз но ужкагазъёссэ отчы сётӥз. Экзаменъёссэ кутӥз вокалъя дышетӥсь, операя тенорлэн Сергей Яковлевич Лемешевлэн кышноез Вера Николаевна Кудрявцева. Со Силаеваез аслаз курсаз басьтӥз[1]. 1987-тӥ арын актриса консерваториез йылпумъяз[2].
Творчествоя ужез
Консерваториез йылпумъямез бере ик Татьяна Силаева Удмурт операя но балетъя театрын солистка луыса ужаны ӧдъяз[2]. Актриса Екатеринбурге куараосъя ярмаркае вуылӥз, отын ик сое Ижкаре ӧтизы[1].
Силаевалэн дебютэз — «Евгений Онегин» спектальын Татьяна Лариналэн ролез, нырысетӥ сезонын ик со театр труппаын валтӥсь интыын луиз. Кырӟасьлэсь вокалъя быгатонлыкъёссэ, куараезлэсь тембр узырлыксэ пусйылӥзы. Татьяна Силаева Удмуртиысь ӧнерлыко театръёслэн «Театр тулыс» фестивалязы тужгес усто нылкышно роль понна трос пол кузьымен пусъемын. «Флория Тоска» постановкаын Тоскалэсь, «Травиатаын» Виолетталэсь, «Сельская честь» постановкаын Сантуццалэсь, «Карменын» Микаэлалэсь рользэ быдэстэмъёсыз дан вайизы. Озьы ик Татьяна Силаевалэн устоосыз рольёсыз луизы «Нормаын» — Норма, «Аидаын» — Аида, «Турандотын» — Турандот. 1999-тӥ арын актриса труппаен ӵош гастроль туръёсын Германиысь но США-ысь каръёстӥ ортчиз. 2000-тӥ арын Татьяна Силаевалэн нимыз Удмурт Элькунысь Данъян пул вылэ пыртэмын вал[3].
Татьяна Силаева концерт программаен поталля, кӧня ке пол кунгожсьӧр туръёсы Германие, Венгрие но США-е вуылӥз ни[4].
2000-тӥ арысен, актёр ужзэ быдэстэм сяна, Татьяна Силаева Удмурт Элькунысь крезьгуръя колледжын вокалъя курсэз дышетэ[1][5]. Солоен камерной но операя кырӟаны, ансамбльысь камерной но оперной кырӟанъёсты быдэстыны дышетэ. Татьяна Силаевалэн студентъёсыз конкурсъёсы, концертъёсы пыриськисько, нош колледжез йылпумъяса, вылӥ заведениосын дышетсконзэс азьланьто[5].
Театр ужъёсыз
| Ролез | Постановка |
|---|---|
| Лиза | «Пиковая Дама» Пётр Чайковскийлэн |
| Аида | «Аида» Джузеппе Вердилэн |
| Тоска | «Флория Тоска» Джакомо Пуччинилэн |
| Сантуцца | «Сельская честь» («Amore. Vendetta. Morte») Пьетро Масканьилэн |
| Норма | «Норма» |
| Ларина | «Евгений Онегин» Пётр Чайковскийлэн |
| Нылкышно | «Ожидание» («На Тихорецкую состав отправится») |
| Марица | «Марица» Имре Кальманлэн |
| Турандот | «Турандот»[2] Джакомо Пуччинилэн |
| Джованна | «Риголетто»[3] Джузеппе Вердилэн |
Данъетъёсыз
- «Турандот» спектакльын Турандот партиез быдэстэмез понна «Онегин» нимо нырысетӥ йӧскалык операя премилэн номинантэз луиз (2016)[3];
- Театр искусствоын вормонъёсыз понна пусъемын «Удмуртиысь сиё-дано артист» дано нимын (1990)[3];
- Искусство удысын вормонъёсыз понна пусъемын «Росси Федерациысь сиё-дано артистка» дано нимын (2001)[6].
Валэктонъёс
- ↑ 1 2 3 4 Оксана Лукинская (07-03-2014) Татьяна Силаева: работала волочильщицей, а стала оперной певицей [ӟуч] udm.aif.ru. Эскеремын 02-12-2025 арын
- ↑ 1 2 3 Татьяна Силаева [ӟуч] Кино-Театр.Ру. Эскеремын 02-12-2025 арын
- ↑ 1 2 3 4 Оперная труппа [ӟуч] operaizh.ru. Эскеремын 02-12-2025 арын
- ↑ Знаменательные и памятные даты. 2018 год [ӟуч] dates.unatlib.ru. Эскеремын 02-12-2025 арын
- ↑ 1 2 Силаева Татьяна Ивановна [ӟуч] rmkudm.ru (07-04-2020). Эскеремын 02-12-2025 арын
- ↑ Силаева Татьяна Ивановна – Награды России [ӟуч] ru.nagrady.by. Эскеремын 02-12-2025 арын
Литература
- Новоселова Е. Огонь вечной любви: о премьере оперы «Норма» // Удмуртская правда. — 2007. — 12 января (№ 03). — С. 14.
- Попов А. Татьяна Силаева: «У меня нет сумасшедших поклонников» // Центр. — 2009. — 20 августа. — С. 10.
- Пузанова Н. Примадонна // Удмуртская правда. — 2006. — 29 декабря (№ 157). — С. 11.
- Илларионова Л. Татьяна Силаева: «Без куража нельзя» // Аргументы и факты в Удмуртии. — 2006. — № 10. — С. 8.
- Чудова А. Татьяна Силаева: Умение быть счастливой // Удмуртская правда. — 2014. — 25 февраля. — С. 3.
- Силаева Татьяна Ивановна // Женщина и успех. — 2003. — № 10. — С. 86—87.