Мощевитинъёслэн кирпич поттон заводъёссы
| Мощевитинъёслэн кирпич поттон заводъёссы | |
|---|---|
 Иван Дмитриевич Мощевитин (15.08.1854—01.08.1942) — Сарапулысь кирпич поттонэз радъясьёслэн выжыысьтызы огез. | |
| Кылдытэмын | XVII даур |
| Дугдытэмын | 1917 |
 |
|
Мощевитинъёслэн кирпич поттон заводъёссы (ӟуч: Мощевитинские кирпичные заводы) — Сарапулысь нырысетӥ заводъёс но Удмуртиысь нырысетӥосыз заводъёс пӧлысь огез. Соосты мещанин Иван Мощевитин кылдытӥз.
Историез
XVII даурын Сарапул карын из коркаос пуктон рос-прос ӧръяськиз, но кирпич поттон завод котыраз ӧй вал. Соку Мощевитин купеч, кулэ луись материалъёс — ву, луо но горд сюй — кутыны быгатэменыз, нырысетӥзэ кирпич поттон завод усьтӥз но та удысын ХХ даурозь монополист луиз[1][2].
Иван Дмитриевич Мощевитин, Мускоысь вуж сямен вӧсяськись стрелец, семьяеныз Вознесенское (отӥяз — Сарапул) черкогуртэ пыраклы поселение келямын вал. Выль интые вуыса, Кам шур дуре корт липетэн но калориферен шунтӥськись ӝыныё из корка пуктӥз, черкогуртын таӵе юрт нырысетӥез луиз, солэн юртэз выль, Мещанской, урамлы кутскон сётӥз. Купеч лэсьтӥськонэн вырыны ӧдъяз: аслаз юртэз котыре хозяйствоын кулэ луись лэсьтосъёс пуктӥз, ӵыжы-выжыосызлы коркаос ӝутӥз. Собере заказъёс басьтылыны кутскиз, со вылын аслыз ваньбур люказ, сое гажаны ӧдъязы, Кар думае гласной луыса бырйизы[1].
Мощевитин кирпичъёслэсь коркаос ӝутыны ӧдъяз, соосты аслаз «кирпич сарайёсаз» лэсьтылӥз. Со юри лэсьтэм пу юртъёс вал, отын кирпичъёсты куасьтӥзы, сутӥзы но утьыса возизы. Ву, луо но горд сюй Кам шурысь поттӥзы, та ужлы нимысьтыз инты висъяськиз. Кирпич поттонын Мощевитинъёслэн быдэс бадӟым семьязы но кӧня ке медъям муртъёс ужазы: одӥгъёсыз уробоосын луо но горд сюй нуллӥзы, кыкетӥосыз вань суретъёсты пыдъёсынызы но лопатаосынызы месылӥзы, куинетӥосыз пӧрмем суретэз формаосы тач-тач тырмытъязы, ньылетӥосыз кирпичъёсты куасьтыны тырылӥзы, нош тужгес устоосыз но бадӟымъёсыз соосты сутылӥзы[1]. 1856-тӥ арын Сарапулын Мощевитинлэн куинь кирпич заводъёсыз вал ни, 1914-тӥ арлы лыдзы вить луиз[1][2]. XIX даурлэн шораз Мощевитинлэн выжыысьтыз потэм ньыль семьяослэн асьсэлэн кирпич поттонзы вал[3].
Дась кирпичъёс вылэ кузёосыз одно ик пус пуктылӥзы. Пӧртэм вакытъёсы МВП, МПМ, МКП, МИД, МГД, МГП, МПС аббревиатураосын лэсьтӥськон материалъёс потӥзы, озьы Мощевитинъёслэн выжыысьтызы кирпич сутӥсьёслэн инициалъёссы пусйиськизы. 2008-тӥ арын печатлам статьяяз шаерчи, психология наукаосъя кандидат Л. Колчина верамъя, кирпич поттэм аръёсты но соослэсь хронологизэс алигес гинэ тодыны-валаны луиз[1].
XIX—XX даурлэн кутсконаз Сарапулын пуктэм из коркаос пӧлысь уноез Мощевитинлэн кирпичъёсызлэсь ӝутэмын вал. Уноез со юртъёс пӧлысь али карлэн учкымон интыосыз луо: нылкышно гимназилэн азьвыл юртэз, кык классъем Николаевской училище, старообрядческой черк но мукетъёсыз[1][2].
2017-тӥ арын Сарапуллэсь шор люкетсэ выльдон улсын «КМ» но «1815» пусъёсын кирпичъёс шедьтӥзы. Историкъёс тодӥзы: лэсьтӥськон материал Кирилл Мощевитинлэн производствояз 1815-тӥ арын поттэмын. Пуктӥськон сярысь верано ке, со вузкарон радъёс вал, соосты пленэ кутэм французъёс 1813-тӥ арысен пуктылӥзы, вылды[4].
Мощевитинъёсын лэсьтэм кирпичъёсты сарапул коркаосты ӝутонэ гинэ ӧз кутэ, мукет каръёсы но вузазы. Озьы Иван Дмитриевичлэн агаез Григорий Дмитриевич Мощевитин ӵыжы-выжыосызлы гожтэтаз ивортылӥз: «Иван Дмитрич кирпичез Чусовойысь ӵужъем (солод) лэсьтон заводэ вузаз»[1].
Кирпич поттон амал
Революция бере Мощевитинъёслэн вань заводъёссы асэстэмын[1], нош кирпич поттон амал ыштэмын вал. 2021-тӥ арын тодосчиос сое выльысь шараяны ӧдъязы[5]. УрО РАН-лэн Удмурт федерал исследовательской центрезлэн директорез, профессор, физикая но математикая наукаосъя доктор Михаил Альес журналистъёслы ивортӥз:
Кирпичлэн химияя составез тодмо, номыр отын выльзэ уд малпа, но асьсэос пропорциос но технология — соос ыштэмын. Сарапулысь калык дурбасьтӥз ке, та кирпичъёслэсь кӧня ке образецъёссэс басьтомы, Мощевитин кирпичлэсь секретсэ усьтыны тыршомы. Со капчи ужпум ӧвӧл, уравнениослэн кылзыя — со мыдлань задача[6].
Альеслэн малпамезъя, РАН-ысь Удмурт ёзысьтыз тодосчиослэн ыштэм амалъёсты шараяны луонлыксы бадӟым[6].
Валэктонъёс
- ↑ 1 2 3 4 5 6 7 8 Колчина Л. П. Из истории кирпичного производства рода Мощевитиных в г. Сарапуле / Л. П. Колчина // Культура Урала в ХVІ-ХХІ вв.: исторический опыт и современность. Книга вторая: материалы докладов и сообщений Всероссийской научной конференции, посвященной 75-летию профессора В. Г. Чуфарова, Екатеринбург, 22 февраля 2008 г. — Екатеринбург: Банк культурной информации, 2008. — С. 278—281.
- ↑ 1 2 3 Объект культурного наследия «Дом Мощевитина, 1904 г.» МО "Город Сарапул".
- ↑ Шамтиева, Н. Пойду теперь в сказку, в детство…. Красное Прикамье.
- ↑ Альбина Шайхутдинова Кирпичи с клеймом 1815 года обнаружили во время реконструкции центра Сарапула - udmurt.media ИА "Удмуртия".
- ↑ Марина Цветухина Михаил Альес: «Наша главная задача - делать реальные конкретные дела». Общество Известия Удмуртской Республики.
- ↑ 1 2 Анна Торохова. Ученые из Удмуртии попытаются разгадать технологию производства «кирпича Мощевитина», ИА «Сусанин» (22 толсуре 2021). Эскеремын: 6 пӧсьтолэзе 2025 арын.
Литература
- Лигенко Н. П. Предпринимательские династии Камско-Вятского региона XVIII—XX вв. // Монографическое исследование. Научное издание. Отв. ред. и сост. — д.и.н. Лигенко Н. П.; Рец. — д.и.н., профессор Бехтерев С. Л., д.и.н., профессор Тронин А. А. — Ижевск: УИИЯЛ УрО РАН. — Ижевск, 2008. 260 с.