Кузебай Герд нимо йӧскалык премия
| Кузебай Герд нимо йӧскалык премия | |
|---|---|
| Кун | |
| Регион | Удмурт Элькун |
| Тип | премия[d] |
| Кин сётэ | Удмурт Кенеш |
| Статистика | |
| Ку кылдытэмын | 1992 |
Кузебай Герд нимо удмурт йӧскалык премия (ӟуч: Всеудмуртская национальная премия имени Кузебая Герда) — дано удмурт гожъяськисьлы, тодосчилы, этнографлы Кузебай Гердлы сӥзьыса, «Удмурт Кенеш» ассоциациен кылдытэм премия. Сётӥське 1992-тӥ арысен удмурт калыкез, солэсь лулчеберетсэ, сям-йылолъёссэ утён, улӟытон но азинтон, калыкъёслэсь эшъяськонзэс юнматон удысын бадӟым уж нуэм понна[1].
Премия сярысь
Премия арлы быдэ сётӥське Совето Союзысь вань удмуртъёслэн 1991-тӥ арын шуркынмонэ ортчем I ӧтчамзы котырын. Юнматэм положения лауреатъёс луыны быгато: «лулчеберет но искусство, эмъян но калыкез дышетон удысын тыршисьёс, тодосчиос, кибашлыос, мерлыко ужасьёс, удмурт калыкез, солэсь лулчеберетсэ, сям-йылолъёссэ улӟытӥсь но азинтӥсь, удмурт калыклэсь ужпумъёссэ сэрттыны-пертчыны, тунсыкъёссэ, конституцияя правооссэ утьыны юрттӥсь, калык эшъяськон кусыпъёсты юнматон понна сюлмаськись пӧртэм удысын тыршисьёс». Премилэн быдӟалаез вошъяськыны быгатэ, малы ке шуоно арлы быдэ юнматӥське[2][3].
Кандидатъёсты ӵекто удмурт калык центръёс, удмурт лулчеберетъя обществоос, творчествоя огазеяськонъёс, газет но журнал редакциос[3].
Герд лыдӟонъёс
Кузебай Герд нимо йӧскалык премиен лауреатъёсты ӵемысь пусъё Герд лыдӟонъёс дыръя. Герд лыдӟонъёс — Удмурт Элькунын арлы быдэ радъяськись наукая но практикая конференция, со Кузебай Гердлэн улон-вылонэзлы но творчествоезлы сӥземын. Таӵе ужрад нырысьсэ ортчиз 1988-тӥ арын дано удмурт югдытӥсьлы 90 ар тырмон улсын[4].
Вань удмуртъёслэн «Удмурт Кенеш» ассоциацизы кылдэм дырысен Герд лыдӟонъёслэн со валтӥсь радъясез луиз[4].
Конференциосысь материалъёс нимысьтыз бичетъёсын печатласько, 2014-тӥ арысен соос Финн-угор эскеронъёсъя ежегодниклэн (ӟуч: Ежегодник финно-угорских исследований) нимысьтыз номераз потазы[4].
Лауреатъёс
2016-тӥ ар кутсконысь ивортонъёсъя, Кузебай Герд нимо йӧскалык премиен пусъемъёс 48 кузя вал ни, соос пӧлын «Инвожо» ансамбль но «Удмурт дунне» газетлэн редакциез[5]. 2023-тӥ арын лауреатъёслэн лыдзы 70-озь вуиз.
Ёрос премия
2010-тӥ арын Кузебай Гердлэн вордскем Вавож ёросаз, дано аспалчизылы сӥзьыса, «Удмурт Кенеш» ассоциацилэн ёрос ёзэтэз но калыкез дышетонъя управление кичӧлтэмъя, кылдытэмын ёрос премия. Та премиен сӥлы каро йӧскалык дышетон удысын тыршись дышетӥсьёсты но нодъясьёсты[6].
Кузебай Герд нимо литературая премия
2007-тӥ арын Выжы калыкъёслэсь кылзэс но лулчеберетсэс утён но азинтон программаен кылдытэмын Кузебай Герд нимо литературая премия, соин данъяло гожъяськисьёсты, кылысь кылэ берыктӥсьёсты но литературоведъёсты — ас кунлыксы луисьтэм урал кыл семьяысь азьветлӥсьёсты[7][8].
Валэктонъёс
- ↑ Премии Герда и Батуева вручили представителям СМИ Удмуртии [ӟуч] udm.addnt.ru (04.02.2015). Эскеремын 05.10.2025 арын
- ↑ Всеудмуртская национальная премия имени Кузебая Герда (рус.) // Библиотечное краеведение Удмуртии. — 2010. — № 9. — С. 37—38.
- ↑ 1 2 Положение о Всеудмуртской национальной премии имени Кузебая Гердаru yarskij-r18.gosweb.gosuslugi.ru. Эскеремын 05.10.2025 арын
- ↑ 1 2 3 В. М. Ившина (2014) К истории республиканских Гердовских чтений [ӟуч] cyberleninka.ru. Эскеремын 05.10.2025 арын
- ↑ Мария Векшина (20.01.2016) Тодмо луизы Кузебай Герд нимо премилэн лауреатъёсыз [удм.] Удмурт дунне. Эскеремын 05.10.2025 арын
- ↑ Положение об учреждении премии имени Кузебая Герда [ӟуч] base.garant.ru (08.11.2019). Эскеремын 05.10.2025 арын
- ↑ Лауреаты [ӟуч] fennougria.ee. Эскеремын 05.10.2025 арын
- ↑ Литературная премия для финно-угорских писателей и переводчиков [ӟуч] fulr.karelia.ru (21.08.2020). Эскеремын 05.10.2025 арын