Кузнецов, Геннадий Васильевич
| Геннадий Васильевич Кузнецов | |
|---|---|
 | |
| Быдэс нимыз | Геннадий Васильевич Кузнецов |
| Вордӥськем нуналыз | 7-тӥ гудырикошконэ 1955 (71 арес) |
| Вордӥськем интыез | Ципья гурт, Балтась ёрос, Бигер АССР |
| Кун | |
| Ужудысэз | кырӟась |
| Данъетъёсыз |
  |
Генна́дий Васи́льевич Кузнецо́в (вордӥськемын 1955-тӥ арын) — Россиысь кырӟась но крезьгурчи, Фольклор кырӟанъя но эктонъя «Айкай» кун театрысь валтӥсь солист. Россиысь дано артист, Удмурт Элькунысь калык артист. Кузебай Герд нимо йӧскалык премилэн лауреатэз.
Улон сюресэз
Вордскиз удмурт семьяын Бигер АССР-ысь Балтась ёросысь Ципья гуртын 1955-тӥ арын 7-тӥ гудырикошконэ. Атаез, Василий Иванович, кубызэн шудэ вал. Анаезлэн, Мария Семёновналэн, чебер куараез вал, со дораз кырӟалляз. Геннадий Кузнецов пичи дырысеныз крезьгурен но фольклорен тунсыкъяськиз, самодеятельной спектакльёсы пыриськылӥз, духовой оркестрын шудӥз, спектакльёсын бускель гуртъёсы вуылӥз[1][2][3]. Ципья гурт Татарстан но Марий Эл вискын интыяськемын, соин пияш бигер но пор эктонъёсты дышетӥз. Удмурт кылын сяна, вераське ӟуч но бигер кылъёсын[1].
Школаез йылпумъямез бере Казане крезьгуръя училищее пырыны мынӥз, но сое ӧз кутэ. Соин со «Сельхозтехника» предприятие слесаре интыяськиз. Ар ортчыса, дышетскыны пыриз Удмуртиысь культпросветучилищее. 1973-тӥ арын Геннадий Кузнецовез армие басьтӥзы. Службазэ ортчиз Латвиын, авиациын. Армиысен мукет ожгарчиосын ӵош вокально-инструментальной ансамбль кылдытӥз[1].
Демобилизация бере Кузнецов колледжын дышетсконзэ йылпумъяз, собере «Италмас» ансамбльлэн директорез Анатолий Мамонтов сое ужаны ӧтиз. Та ансамбльын Геннадий Кузнецов 1990-тӥ арозь тыршиз. Со вакытэ ик, 34 аресаз, РСФСР-ысь тужгес егит дано артист луиз, собере — Удмурт Элькунысь калык артист[1][2]. 1990-тӥ арын соку гинэ кылдытэм Фольклор кырӟанъя но эктонъя «Айкай» театре выжиз[1][4][5]. Со дырысен ужзэ ӧз вошъя[6]. Театрын со вал кичӧлтӥсез «Сюан», «Армие келян», «Айкай гурезьын шудонъёс» но мукет постановкаослэн[7].
Геннадий Кузнецов кӧня ке крезьгуро инструментъёсын шудэ: аккордеонэн, гитараен, флейтаен, варганэн[8]. Удмурт кылбуръёсъя крезьгуръёс кылдытэ. Солэн тужгес тодмо кырӟанэз, Михаил Федотовлэн кылъёсызъя, — «Мон бакчаям мертто пинал льӧмпу»[9]. Геннадий Ганьковен но Геннадий Бекмановен ӵош «Куинь Геняослэсь» концертъёссэ радъя (азьвыл, Геннадий Корепанов-Камский кулэмлэсь азьло, соос ньыль кузя концертъёсы ветлӥзы)[10][8].
Семьяез
Кышноез — Таисия Павловна Кузнецова, домраен шудӥсь, Удмурт Элькунысь дано артистка. Тодматскизы 1990-тӥ арын «Италмас» ансамбльын. Соослэн нылзы но пизы вань[11][12][13].
Валэктонъёс
- ↑ 1 2 3 4 5 Алексей Ельцов Кузнецов Геннадий Васильевич [удм.] Воршуд.
- ↑ 1 2 "Светӥ дорын куноын" Геннадий Кузнецов [удм.] Моя Удмуртия.
- ↑ Улон сюресъёс. Геннадий Кузнецов [удм.] Моя Удмуртия.
- ↑ Геннадий Васильевич Кузнецов // Удмуртская Республика. Культура и искусство : энциклопедия. — Ижевск, 2012. — С. 260.
- ↑ Удмуртский народный ансамбль «Айкай»: Ансамбли народной музыки играют большую роль в сохранении родного языка [рус.]
- ↑ Коллектив Театр «Айкай».
- ↑ Человек дела! Министерство культуры Удмуртской Республики.
- ↑ 1 2 Алексей Ельцов Кузнецов Геннадий Васильевич [удм.] Воршуд.
- ↑ Геннадий Васильевич Кузнецов // Удмуртская Республика. Культура и искусство : энциклопедия. — Ижевск, 2012. — С. 260.
- ↑ Любовь Тихонова Мылкыд кузьмазы Геняос [удм.] Удмурт дунне.
- ↑ "Светӥ дорын куноын" Геннадий Кузнецов [удм.] Моя Удмуртия.
- ↑ Галина Семёнова Учкись бурдъя. «Айкай» ансамбльлы тырме 25 ар [удм.] Удмурт дунне.
- ↑ Улон сюресъёс. Геннадий Кузнецов [удм.] Моя Удмуртия.