Китай Выль ар 2025
| Китай Выль ар 2025 | |
|---|---|
 | |
| Валатонэз | Вылезлэн арлэн кутсконэз |
| Сям-йылолъёс | Выль ар но Толсур ярмаркаос, каръёсты но улон юртъёсты чеберман, кызъёсты чеберман |
| Герӟаськемын | Китай дырпус, Выль ар 2025, Китай зодиак, Китай Выль ар |
Китай Выль ар 2025 ӟуч Китайский Новый год 2025 — тол шунды берытскон бере выль толэзьлы сӥзем праздник (21-тӥ толсур бере кыкетӥез выль толэзь). Григориан дырпусын 21 толшор но 21 тулыспал вискысь одӥгезлы нуналлы тупа.
Китай гороскопъя, котькуд ар 12 пӧйшур пӧлысь одӥгезлы но 5 стихиос (тыл, му, корт, ву но пу) пӧлысь одӥгезлы тупа[1].
2025-тӥ ар китай дырпусъя Вож Пу Кыйлэн арезлы тупа. Со кутске 2025-тӥ арын 29-тӥ толшоре но йылпумъяськоз 2026-тӥ арын 16-тӥ тулыспалэ. Таиз ар 12 аръем Шундыӝужанпал гороскопын 6-тӥ интыын сылэ.
Историез
Китайын Выль арез пусъён сям трос дауръёс ӵоже кыстӥське ини. Китай толэзё-шундыё дырпусын та праздник тужгес кузез но валтӥсез луэ. Юнматэм дырыз солэн ӧвӧл. Арлэн кутсконэз тол шунды берытскем бере кыкетӥ выль толэзьлы тупа. Соин ик пусъён нуналыз 21-тӥ толсурысен 21-тӥ тулыспалозь вошъяське.
Дас кык китай зодиак пусъёс — со 12 арлэсь сузьет, котькуд ар со сузьетысь одӥгезлы пӧйшурлы тупа. Китай гороскопын со: комак, ош, тигр, лудкеч, дракон, кый, вал, гурткеч, маймыл, атас, пуны, парсь.
Котькуд китай мурт аслэсьтыз но ӵыжы-выжыезлэсь пӧйшурзэ тодаз возе[2].
Китай лулчеберетлэн валтӥсь люкетэз луэменыз, Китай Выль ар йӧскалык шулдыръяськон луэм сяна, пушказ мур социокультурной валатонзэ возе. Китайын толэзь дырпусъя Выль ар — семьяослэн валчеяськонзылы, анай-атаез но выжыосты сӥлы каронлы сӥзем праздник[3].
Вож Пу Кый пуслэн аслыкъёсыз
2025-тӥ ар Вож Пу Кыйлэн ареныз лыдъяське — тупаса улонлэн, визьнодлэн, шӧдонлыклэн но воштӥськонъёслы дась луонлэн тодметэз[4]. Солы уг тупа лек, вожпотон но пыриськон сям. Та арлэн стихиеныз лыдъяське будонэз, азинсконэз но выльдӥськонэз возьматӥсь писпу, солэн буёлэз вож.
Шундыӝужанпал лулчеберетын кый — ӟеч сямо лулос. Та нюжкыстӥськись маке улонлы шумпотыны но огшоры учыръёсысь ӟеч палъёссэ адӟыны быгатэ. Улонын кый кышкытлык кылдытэ ке но, солэсь лексэ поттытэк, сое вӧсь карытэк со ноку нокин вылэ ачиз юнме шорысь уг ожалскы[5].
Вож Пу Кыйлэн араз вордӥськем муртъёс ӝог валатскисесь луо но визьнодо решениос кутыны быгато. Соос туж умой шӧдо котырысь адямиосты. Соослы тупась интуицизылы луыса, луоно югдурез азьпал ик валаны быгато но ӝогак кулэ решениос куто. Писпу соослы аслэсьтыз кужымзэ, творческой энергизэ сётэ. Нош вож буёл каньыл сямо луэмзэс, кулэ дыръя воштӥськыны быгатэмзэс возьматэ.
Кыйёс ӝог дышо воштӥськонъёслы но озьы ик ӝог кулэ луись сюресъёс шедьтыны быгато. Соос синмаськымонэсь, бордазы мукет адямиосты кыскыны быгато. Та тодмет пусъёс улсын вордӥськем муртъёс ӵемысь лидеръёс но бадӟым адямиос луо. Со амбициозной, целеустремлённой муртъёс, улонын азинлыко луон понна трос ужаны дасесь.
Соин валче ик кыйёс лушкем улыны дышемын, асьсэ малпанъёссэс шараяны уг дырто[6].
Мукет пусъёсын кусыпъяськемез
Китай зодиак Вить Кылдэтъёс сярысь теория вылэ инъяськемын, со сӧзнэтысь котькуд пуслэн вить классэз вань (пу, тыл, му, корт, ву), соос вань арбериослэсь но явлениослэсь ог-огенызы кусыпъяськемзэс возьмато. Со кусыпъёс быдэс Вселеннойын вошъяськонлэн огъя катъёсыз луо.
Со теорияя, Кыйлэн пусэз Кыйлэн, Атаслэн но Ошлэн пусъёсыныз тупа. Быгатэ кусыпъяськыны Дракон, Маймыл, Комак, Пуны, Тигр, Вал, Кеч но Гурткеч пусъёсын. Парсен гинэ уг тупа.
Таиз ар тужгес азинлыко луоз Кыйлэн, Драконлэнно Атаслэн араз вордӥськемъёс понна. Соос асьсэ быгатонлыкъссэс пайдалыко карыны быгатозы, уж дурын ӟеч азинсконъёс басьтозы но коньдон ужпумъёссэс умоятозы. Удалтоз творчество но визьбур удысын тыршисьтёслы[7].
Сям-йылолъёс
Китайын Выль ар пумитанэн трос сямъёссы но осконъёссы герӟаськемын. Кылсярысь, вашкала китай сямъя, Выль ар азьын вань мытэм ужъёсты одно ик йылпумъяны кулэ. Улон интыез чылкытатыны пырон азьысен кутсконо но коркалэн шор люкетаз быдэстоно, собере вань ужан арбериосты адсконтэм интыосы утялтоно.
Праздник вакытэ Китайын тужгес сӥлы каро горд буёлэз — шундылэсь но шумпотонлэсь буёлзэ.
Выль ар азьын вылӥ ӧс янак вылэ кагазлэсь вить кузь кур ошо, соос, пе, «вить пӧртэм шудбурез» возьмато: удалтон, дан, кема улон, узырлык но шумпотон[8].
Выль ар азьын Китайын зол шумето. Калык пӧлын таӵе веран вӧлмемын: та вакытэ, пе, ас каръёсысьтызы уллям убиръёс выль улон инты утчаса калго, шыпыт инты шедьто ке, кузёоссэс быдэс ар ӵоже курадӟытыса возё.
Выль ар пумитан арбериос пӧлысь валтӥсез луэ фонарь. Фонаръёс туж пӧртэмесь луыны быгато. Уката сӥлы каро ньыль-куать сэрего газ светильникъёсты. Кыз интые Китайын сяська тугокоосын но фонарикъёсын Тыло Писпуэз чебермало.
Выль ар азьысь уез «люкиськыса улэм бере пумиськон уй» шуыса нимало, малы ке шуоно, та праздникез семья пушкыын пумитало. Но вань ӵыжы-выжыос ог-огзы вылэ азьвыл куатаськонъёссэс, кӧтӝожъёссэс простить каро[3].
Озьы ик бадӟым саклык висъяло ӝыт сиськонлы, та дыре быдэс семья огазе одӥг ӝӧк сьӧры люкаське. Нимысьтыз инты кельто вуымтэ муртъёслы.
Кызьы, пе, Выль арез пумиталод, озьы ик сое ортчытод. Соин ик китай каклык ӝӧквылзэ пӧртэм сиён-юонъёсын тырмытыны тырше. Ӝӧк вылын одно ик луыны кулэ курег сӥльлэсь, чорыглэсь пӧраськемъёс но «доуфу» — соевой творог, мукет сямен «тофу» шуыса тодмо луэ. Китай кылын та прдуктъёслэн нимъёссы «шудбур» но «ваньбур» шуэмез возьматӥсь кылъёслы тупало.
Ӝыт ӝӧксьӧр одно ик «шудбуро уксё» люкылонэн йылпумъяське. Бадӟымъёс нылпиослы уксёен горд конверт кузьмало. Со уксй, пе, быдэс ар ӵоже удалтон ваёз. Сиськем бере соку ик изьыны выдыны уг яра, шудбурдэ вӧзысьтыд келялод, шуо.
Китайын кузьым парен дасяло, со ӵош луонэз но семья кусыпез юнматэ. Уг яра кузьманы час, уката ик арлыдо муртъёслы, яке нылпитэм муртъёслы шудон кузьманы уг яра. Ӵемысь куное лыктэмъёс кошкыкузы кузёослы кузьымъёссэс кузьмало яке лушкем ватыса кельто[9].
Кыйлэн араз вордӥськем тодмо муртъёс
- Одри Хепбёрн,
- Андрей Миронов,
- Том Харди,
- Дмитрий Медведев,
- Канье Уэст,
- Джоан Роулинг,
- Дэниел Рэдклифф,
- Тейлор Свифт,
- Александр Масляков,
- Боб Дилан,
- Ким Чен Ир,
- Чарльз Дарвин,
- Пабло Пикассо,
- Авраам Линкольн,
- Грета Гарбо,
- Мухаммед Али,
- Индира Ганди,
- Людмила Зыкина,
- Александра Пахмутова,
- Махатма Ганди,
- Джон Кеннеди,
- Кристиан Диор,
- Франс Шуберт,
- Анри Матисс,
- Гюстав Флобер,
- Эдгар Аллан По,
- Грета Гарбо,
- Николай Коперник,
- Аристотель Онассис,
- Джакомо Казанова.
Валэктонъёс
- ↑ Как встречать 2025 год, чтобы год был хорошим, Мой Санта (13 коньывуонэ 2024). Дата обращения: 13 шуркынмонэ 2024.
- ↑ Цзя Хуэйминь Лунный календарь и знаки зодиака в повседневной культуре Китая Манускрипт.
- ↑ 3,0 3,1 Цзя Хуэйминь Китайские новогодние праздники по лунному календарю в повседневной культуре современного Китая Общество: философия, история, культура.
- ↑ Козлова, Екатерина. Принесет удачу: каким будет 2025 год Зеленой Деревянной Змеи, Пятый канал (9 шуркынмонэ 2024). Дата обращения: 13 шуркынмонэ 2024.
- ↑ Зеленая деревянная змея - символ 2025 года: что важно знать о главном символе, КП.ру. Дата обращения: 13 шуркынмонэ 2024.
- ↑ Комарова, Валентина. Зеленая деревянная змея — символ 2025 года: что означает, характеристика символа, когда наступает, каким будет и как правильно встречать, Гороскопы Mail (30 гудырикошконэ 2024). Дата обращения: 13 шуркынмонэ 2024.
- ↑ Екатерина Стрелкова Как встретить год Змеи 2025: что приготовить, во что нарядиться - Zoon.ru(рус.)
- ↑ Евгения Григорьевна Белая Новый год в Китае, Корее, Японии и России Россия и АТР.
- ↑ История и традиции празднования Китайского Нового года, РИА Новости (31 толшоре 2014). Дата обращения: 13 шуркынмонэ 2024.
|
Та материаллэн правообладателез АНО «РУВИКИ» Интернет-энциклопедия». Мукет сайтъёсын тае АНО «РУВИКИ» Интернет-энциклопедия» лэземъя гинэ кутыны луэ |