Ижысь монтажъя техникум
| БПОУ УР «Ижысь монтажъя техникум» | |
|---|---|
 | |
| Ужъюртлэн типез | техникум[d] |
| Кивалтӥсьёсыз | |
| директор | Клименко Ирина Алексеевна |
| Кылдэмез | |
| Кылдон дырыз | 1-тӥ шуркынмонэ 1932 |
| Сайтэз | ciur.ru/imt/default.aspx |
Ижысь монтажъя техникум (вакч. — БПОУ УР «ИМТ»; ӟуч: Ижевский монтажный техникум) — Ижкарысь шоро-куспо дышетонъя ужъюрт. Удмуртиысь шор ёзэтысь огез вашкалаез дышетсконни.
Историез
1929-тӥ арын Ижын усьтӥськиз ужасьёсты дасянъя университет, бератаз сое ужасьёслэсь тодон-валанзэс будэтонъя комбинат (ӟуч: комбинат рабочего образования) нимазы.
1932-тӥ арын 1-тӥ шуркынмонэ нимзэ воштӥзы, со Ижысь коммунальной ужпумъёсъя но лэсьтӥськонъя техникум луиз. Нырысь-валысь со РСФСР-ысь Коммунальной хозяйствоя министерство чаклам улсын ужалляз. Дышетон кык факультетын радъяськиз: электротехникая но лэсьтӥськонъя. 1934-тӥ арозь техникум промышленностья удыслы техникъёсты-производственникъёсты дасялляз, собере лэсьтӥськись техникъёсты дышетӥз[1].
1934-тӥ арын Ижысь коммунальной ужпумъёсъя но лэсьтӥськонъя техникумез индустрияя но лэсьтӥськонъя техникум каризы, нош 1940-тӥ арын сое дышетонъя кык ужъюртлы люкизы: коммунальной ужпумъёсъя но лэсьтӥськонъя техникум но индустри техникум[2].
1940-тӥ арын 1-тӥ куарусёнэ коммунальной ужпумъёсъя но лэсьтӥськонъя техникумлэн ӝыт ёзэтэз ворсамын вал, 1941-тӥ арын 18-тӥ инвожое ассэ техникумез но пытсазы. Но 1941-тӥ арын куарусёнэ занятиосты выльысь нуыны ӧдъязы: 1941-тӥ арын 15-тӥ куарусёнэ Удмурт АССР-ысь Совнарком «1941-тӥ арын 18-тӥ пӧсьтолэзе юнматэм постановление воштонъёс пыртон сярысь» пуктэт поттӥз. Тодон-валан сётон уж дышетcконнилэн общежитияз радъяськиз, кык факультет усьтэмын вал[1].
1945-тӥ арын ӝыт ёзэтсэ выльысь кылдытӥзы.
1958-тӥ арын Ижысь коммунальной ужпумъёсъя но лэсьтӥськонъя техникумлэсь нимзэ Ижысь лэсьтӥськонъя техникумлы воштӥзы. Со Удмурт экономикая ёросысь Калык хозяйствоя кенешлэн огез ужъюртэз луиз, нош 1968-тӥ арысен СССР-ысь Монтажъя но нимысьтыз лэсьтӥськон ужъёсъя министерство чаклам улсын ужаз. Та аре ик техникум выль юртэ выжиз, нимзэ Ижысь монтажъя техникумлы воштӥзы. Со аръёсы дышетон ужъюрт дасялляз лэсьтӥськонъя техникъёсты, монтажникъёсты, сантехникъёсты но техник-механикъёсты, нош 1973-тӥ арын усьтэмын вал выль ӧр — «Лэсьтӥськон машинаос но тӥрлык»[1].
1975-тӥ арын техникумын ужаны ӧдъяз «Калык профессиосъя университет», татын студентъёслы ватсаса тодон-валан сётъязы: бордгазетэз поттыны редакторъёсты, лектор-политинформаторъёсты, фотокорреспондентъёсты, культмассовой ужъёсты радъясьёсты, спортъя судьяосты дасязы, озьы ик комсомолысь активлэн уженыз но экономикая ужпумъёсын тодматъязы[1].
2017-тӥ арын ивортонъёсъя, техникумын ог 1100 студент лыдъяськылӥз, соосты 70 дышетӥсьёс визьнодазы, таос пӧлысь 26 процентэзлэн вылӥ образованиез вал, нош 55 процентэз — квалификацияя нырысетӥ категория басьтэмъёс[2].
2021-тӥ арын абитуриентъёсты 8 ӧнеръя люказы. Дышетскыны пырон шоро-куспо балл 3,8-ен 4,5-озь вал[3].
2024-тӥ арын куарусёнэ ивортонъёсъя, техникумын дышетскон очно но заочно амалъя бюджет чотын но дунэн радъямын. Татчы 9-тӥ но 11-тӥ классъёсты йылпумъям муртъёсты куто.
Дасян ӧръёс
2024-тӥ арын куарусёнэ ивортонъёсъя, Ижысь монтажъя техникум укмыс удысъёсъя ӧнерчиосты дася:
- Юртъёсты но сооружениосты лэсьтон, соосты уже кутон;
- Сантехника тӥрлыкез, кондиционеръёсты пуктон-юнматон но уже кутон;
- Промышленной но граждан юртъёсы электро тӥрлык кыскон, юнматон но уже кутон;
- Ӝутъясь транспортэз, лэсьтӥськон но сюрес выльдон машинаосты но тӥрлыкез уже кутон но тупатъян (удысъёсъя);
- Архитектура;
- Газ сётӥсь сӧзнэтэз лэсьтон но уже кутон;
- Автомобиль сюресъёсты но аэродромъёсты лэсьтон но уже кутон;
- Трос квартираем юртэз уже кутон, чакласа-тупатъяса возён;
- Лэсьтӥськонын кутӥськись ивортодэтъя моделирование[4].
2021-тӥ арын ивортонъёсъя, кема дыр ӵоже ни тужгес даноез ӧнер удыс «Юртъёсты но сооружениосты лэсьтон, соосты уже кутон» луэ[3].
Кивалтӥсьёс
- Н. А. Габитов;
- В. П. Чирков;
- Г. В. Серова;
- И. А. Клименко[5].
Дано дышетскисьёсыз
- П. П. Берш — Ижкарлэн валтӥсь архитекторез (1968—1997);
- В. М. Пескишев — Россиысь Валтӥсь Спецстройлэн лэсьтӥськонъя 18 номеро управлениен азьвыл кивалтӥсь;
- В. Г. Гилёв — Удмурт Элькунысь лэсьтӥськонъя, архитектурая но улон-вылон политикая министрлэн воштӥсез, Росси Федерациысь дано лэсьтӥськись;
- А. С. Юрпалов — «Купол» ИЭМЗ-ысь лэсьтӥськонъя но выльдӥськонъя управлениен кивалтӥсь;
- А. А. Зинатуллин — Ижкар Думаысь депутат, «СТС-Ижевск» телеканаллэн валтӥсь продюсерез[2].
Данъетъёсыз но вормонъёсыз
- «РФ-ысь устоосыз техникумъёс — 2018» йӧскалык ӵошатсконлэн лауреатэз;
- «Россиысь Данъян книга» федерал реестре пыртэмын (2020)[3].
Валэктонъёс
- ↑ 1 2 3 4 Ижевский монтажный техникум Главного управления кадров и учебных заведений Министерства монтажных и специальных строительных работ [ӟуч] Фондовый каталог УР. Эскеремын 08.10.2025 арын
- ↑ 1 2 3 Ижевскому монтажному техникуму – 85 лет! [ӟуч] Региональный центр оценки качества образования. Эскеремын 08.10.2025 арын
- ↑ 1 2 3 Ижевский монтажный техникум осваивает стандарты WorldSkills [ӟуч] Деловая Репутация (11.10.2021). Эскеремын 08.10.2025 арын
- ↑ Специальности [ӟуч] Региональный центр оценки качества образования. Эскеремын 08.10.2025 арын
- ↑ БПОУ УР «ИМТ» [ӟуч] Региональный центр оценки качества образования. Эскеремын 08.10.2025 арын
Чӧлсконъёс
- БПОУ УР «ИМТ» [ӟуч]
 |
|---|
