Репин, Иван Павлович

Рувикиын таӵе фамилиен мукет муртъёс сярысь гожтосъёс вань. Учке: Репин.

Иван Павлович Репин
Вордӥськем дырыз	23-тӥ куарусёнэ 1917(1917-09-23)
Вордӥськем интыез	Лыстэм гурт, Сьӧлта ёрос, Удмуртия
Кулэм дырыз	16-тӥ пӧсьтолэзе 2003(2003-07-16) (85 арес)
Кулэм интыез	Киев, Украина
Кунмуртлыкез	СССР СССР
Кыӵе войскоез	артиллерия
Служить карон аръёсыз	1938—1958
Званиез
Ожмаськонъёс/ожъёс	Быдӟым Атыкай ож
Данъетъёсыз

Иван Павлович Репин (1917-тӥ арын 23-тӥ куарусёнэ Сьӧлта ёросын —2003-тӥ арын 16-тӥ пӧсьтолэзе Киевын) — Совето Армилэн майорез, Быдӟым Атыкай оже пыриськем мурт, Совето союзлэн Героез (1943).

Улон сюресэз

Вордӥськиз 1917-тӥ арын 23-тӥ куарусёнэ Малмыж уездын Узи волостьысь Лыстэм гуртын (али Удмуртиысь Сьӧлта ёросэ пыре). Шоръёзо школаез йылпумъямез бере, административной интыужъёсын тыршиз: нырысь колхозын счетовод вал, собере Узи сельсоветлэн секретарез но Вуж Ӟатчалан судисполнитель луыса ужаз. 1938-тӥ арын Рабоче-крестьянской Горд Армие басьтӥзы. Службазэ Дальней Востокын ортчиз. 1941-тӥ арын 134-тӥ курсант бригадае выжтӥзы. 1942-тӥ арысен — фронтын ожмаськиз.

1943-тӥ арын куарусён толэзёзь старшой сержант Иван Репин Шор фронтысь 13-тӥ армилэн 74-тӥ стрелковой дивизилэн 6-тӥ артиллерийской полклэн орудиеныз командовать кариз ини. Орудилэн командирез чотын Брянск фронтын ожмаськиз, Орёл улосысь Малоархангельск карез мозмытонэ но Курской дугаын ожмаськонэ пыриськиз.

Подвигез

Украин ССР-ысь Чернигов улосэз мозмытыку, сэзь ожмаськеменыз висъяськиз. 12-тӥ куарусёнэ Репинлэн расчётэз Короп карлэсь уйпалагес Десна шурез выжиз но солэн ярдураз плацдармез басьтон но возён понна ожмаськонэ пыриськиз, 2 тушмон танкез но кык взвод мында немец солдат-офицерез быдтӥз. Днепрез ожмаськыса потон туж секытэн ортчиз. Кужымзыя огкадь луисьтэм ожмаськонын батареялэн командирез бырыны шедиз, соку Репин командованиез ас вылаз басьтӥз. 11 тушмон танкез но 400 пала солдат-офицерез быдтӥз. Ачиз юн сӧсырмыны шедиз. Госпитальын йӧнатскемез бере, Ленинградысь военно-политической училищее дышетскыны ыстӥзы. Сое йылпумъяса, Репинэз 3-тӥ Украин фронтысь гвардейской миномётъёслэн отдельной дивизионазы парторге юнматӥзы.

Боевой сюресэз 1945-тӥ арын Венаын йылпумъяськиз. Тылож йылпумъяськем бере, службазэ Совето Армиын азьланьтӥз. 1951-тӥ арын офицер составез умоятонъя курсъёсты ортчиз. 1958-тӥ арын майор званиен запасэ лэземын. Улӥз но ужаз Киевын.

Улонысь кошкиз 2003-тӥ арын 16-тӥ пӧсьтолэзе, ватэмын Берковцы шайвылын.

Данъетъёсыз

СССР-ысь Вылӥ Кенешлэн Президиумезлэн 1943-тӥ арын 16-тӥ коньывуонэ гожтэм Косэтэзъя «командованилэсь боевой заданиоссэ ӟеч быдэсъямез понна но сэзь геройлыко ожмаськемез понна» старшой сержант Иван Репин Совето Союзлэн Героез нимын пусъемын, Ленин орденэн но «Зарни Кизили» медален данъетамын (1686-тӥ номер).Озьы ик пусъемын куинь Горд Кизили орденъёсын, Горд Знамялэн но Быдӟым Атыкай ожлэн 1-тӥ степенё орденъёсыныз но мукет медальёсын.

Буре ваён

• И. Репинлэн нимыз Ижкарын Ялан ӝуась тыл азьысь мемориал стелаын гожтэмын.
• Сьӧлталан Геройлэн бюстэз пуктэмын.

Валэктонъёс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Кулёмин И. Г. Героев наших имена. Ижевск, 1975
• Кулёмин И. Г. и др. Герои Советского Союза — наши земляки. Устинов, 1985.