Владимир Путинлэн меӵак эфирез (2024)
| Владимир Путинлэн меӵак эфирез (2024) | |
|---|---|
 Россилэн Президентэз Владимир Путин меӵак эфир дыръя (2024) | |
| Нырысьсэ ортчытэмын | 24 толсуре 2001-тӥ арын |
| Ортчытъянлэн ӵемлыкез | арлы быдэ |
| Радъясез | Россилэн президентэзлэн администрациез |
| Сайтэз | москва-путину.рф |
Владимир Путинлэн меӵак эфирез (2024) — Россилэн президентэзлэн Владимир Путинлэн арлы быдэ меӵак эфирын ортчись пресс-конференциез. 2024-тӥ арын со 19-тӥ толсуре ортчиз но ньыль час но ньыльдон минут кыстӥськиз[1]. Калыклэн пӧртэм каналъёс пыр вуэм вазиськонъёсыз кык но ӝыны миллионлэсь ятыр люкаськизы[2].
Дасяськон
2024-тӥ арын 8-тӥ толсуре 00:00 часысен 19-тӥ толсурозь нимысьтыз мобильной приложение, СМС-иворъёс, телефон, мерлыко вотэсъёс «ВКонтакте» но «Одноклассники», moskva-putinu.ru (москва-путину.рф) сайт пыр Россилэн президентэзлы текст но видеоамалэн гожтэм юанъёсын вазиськыны луонлык кылдытэмын вал[3].
2024-тӥ арын «Калык фронтлэн» штабысьтыз call-центраз ужасьёс, вазиськонъёсты сэрттон-пертчон понна, ужазы нырысьсэ кутӥзы искусственной интеллект амалэз. GigaChat нейросеть мерлыко вотэсъёс пыр вуэм куараен гожтэм но SMS - вазиськонъёсты темаосъя висъяз[4].
2024-тӥ арын ИИ удысысь разработкаосын дасям адӟытонэн тодматскиз. GigaChat тодматӥз, кыӵе сюлмаськонъёсын тросгес вазиськиз калык:
Валамон, юанъёслы валэктон сётон понна азьпал дасяськыны кулэ. Вуэм вазиськонъёс пӧлын тужгес трос вал: улон юртъёслэн ӟечлыкез но солэн калыклы басьтымон луэмез, транспортной инфраструктура, эмъяськон, кунструктураос но организациос, пособиос сярысь юанъёс[5].
2024-тӥ арын 19-тӥ толсуре дасям тодэтъёсъя, пӧртэм каналъёс пыр кык но ӝыны миллионлэсь ятыр вазиськонъёс вуэмын[2]. Тужгес трос Шор, Уйпал но Шундыпуксён вискысь но Лымшор федерал округъёсысь[6].
2024-тӥ арлы йылпумъянъёс
Меӵак эфирлэн валтӥсь темаосыз пӧлын вал Россилэн мерлыко политикаез (20 % вазиськонъёс), улон юртъерен герӟаськем юанъёс (9 %), экономикаен (9 %), тазалыкез утёнэн (8 %), ЖКХ-ен (8 %), СВО-ен (6 %)[7].
Экономика
2024-тӥ арын экономикаын кылдэм югдур «вошъяськисьтэм но оскымон» шуыса вераз кунлэн тӧроез, ВВП-лэсь будэмзэ ог 3,9 % -лы дунъяз, нош 2025-тӥ арын со 2,5 %-лы будоз шуиз. Соку ик ЕС-ын кылдэм югдурен ӵошатӥз: 2024-тӥ арын ВВП-лэн йылэмез нулевой вал, нош США-ын со 6 % котыр луиз. Россиын ужтэк кылемъёслэн лыдзы кулэсмиз (2,3 %) шуыса пусйиз Владимир Путин. Озьы ик Росси Федерациын лэсьтӥсь-тупатъясь промышленность удысын производстволэн йылэмез сярысь ивортӥз , нош со кунлэсь суверенитетэзлэсь юнмамзэ возьматэ[7].
2024-тӥ арын инфляцилэн 9 %-озь вуэм мугъёсыз объективной но субъективной луыны быгато шуыса вераз президент[7]. Объективной мугъёс пӧлы пыртыны луэ:
- Россиын потребленилэн будэмез;
- Дуннеын дунъёслэн будэмзы.
Субъективнойёсыз пӧлын:
- Центробанклэн ключевой ставкаен герӟаськымтэ но инфляция вылэ влиять карись тӥрлыкъёсты дырыз дыръя кутымтэез;
- РФ кивалтэтэзлэн куд-ог удысъёсты азинтон борды дырыз дыръя басьтӥськымтэез[7].
Президент нимысьтыз вераз Россилэн выль улосъёсаз кылдэм экономика югдур сярысь. Кылсярысь, вытъёс ЛНР-ын 90 %-лыйылӥзы , ДНР-ын — 79 %-лы, Херсон но Запорожье улосъёсын — 200 %-лы.
СВО
СВО зонаын кылдэм югдурен тодматэмезлэсь азьпал, Владимир Путин, зарезь пехоталэн 155-тӥ отдельной гвардейской бригадаысьтыз ожгарчиос солы асьсэлэсь боевой знамязэс сётӥзы но меӵак эфир мыныку сое студин вӧлъяны куризы шуыса вераз, озьы ик президент ожгарчиослы бадӟым удалтон, Вормон но гуртазы азинлыко берытскон сӥзиз. Кунлэн тӧроезлэн верамезъя, асьме ожгарчиос быдэсак фронт линия кузя нуналлы быдэ азьпал пото но интывылъёсты «квадрат иськемен» мозмыто[7]. Курск улосын улӥсь кышномуртлэн, ВСУ-эз Росси кунгожлэсь ку палэнтозы шуыса юамезлы , «пиос ӵапак али дыре ожмасько, ми соосты зэмзэ но палгытом» оскытӥз президент[7]. Курск улосын пушкытэм техникалэн лыдыз, 2023-тӥ ар ӵоже быдэс фронт линия кузя быдтэм танкъёслэн, БМП-ослэн но мукет техникалэн лыдыныз ӵошатыса, трослы уногес. Озьы ик Владимир Путин оскытӥз, ваньмыз куашкатэм граждан но мерлыко объектъёс выльдӥськозы, нош улон интытэк кылем муртъёслы, юртъер басьтон вылысь, сертификатъёс сётӥськозы, со понна 108 млрд манет висъямын. Озьы ик Херсон, Запорожье улосъёсты, ЛНР-ез но ДНР-ез выльысь тупатъян-лэсьтон сярысь ужпум ӝутэмын вал. Кылсярысь, куинь ар куспын та улосъёсын сюрес герӟетъёс тупатъямын луозы, нош Азов зарезь котыртӥ ньыль полосаем кольцевой трасса лэсьтозы[8]. Та дырлы 20 сюрслэсь уоно мерлыко но улон объектъёс тупатъямын ини[7].
СВО-е пыриськем военнослужащийёслы «ожгар действиосы пыриськем» инлык сётоно шуыса вераз Владимир Путин. Азьвыл «контртеррористической операцие пыриськем» инлык басьтэм муртъёслэн со одно ик воштэмын луоз, но ваньмыз кулэезъя басьтозы, шуыса пусйиз президент[7].
Владимир Путин «Время героев» программалы дунъет сётӥз, со программа улсын СВО-е пыриськем муртъёс пӧлысь кадровой резерв дасяське. Та выллем курсъёсты кылдытон сярысь малпанэ со специальной военной операцие пыриськем студентъёсын кенешемез бере вуиз. Солэн верамезъя, бадӟым компаниосын, муниципал кылдытэтъёсын, министерствоосын но ведомствоосын кивалтонэ военнослужащийёс пӧлысь бырйыны кулэ:
Алдаськонэз татын огпол но ӧй вал на…Тросэз дэмламъя ужбергатонэ но, тӧрлык ёзэтъёсы но шедизы ини[7].
Владимир Путин, СВО-ез кутскон сярысь решениез вазьгес кутыны, солы дасяськыны кулэ вал шуыса жалямзэ вераз но куинь ар куспын макем воштӥськемез сярысь тазьы ватсаз:
Мон ӧжытгес серекъяса вераськыны кутски но воксё серекъямысь дугдӥ[7].
Стратеги кышкыттэмлык
НАТО-лэн «Орешниклы» пумит шуккет сётонэз сярысь шундыпуксёнпал СМИ-ослэн ивортонъёссы пумысь Владимир Путин эксперимент ортчытыны дэмлаз:
Шундыпуксён но Украина асьсэлэсь вань ПВО сӧзнэтъёссэс Киевысь огаз ёросэ мед пуктозы но ми отчы «Орешникмес» лэзём, нош соос сое дугдытыны мед оскалтозы, соку адӟом, мар луоз[7].
Малы шор дальностен баллистической ракеталы (БРСД) сыӵе ним сётэмын шуыса юанлы президент меӵак вераз: «Шонерзэ вераса, уг тодӥськы»[8].
Калыккуспо повестка
Меӵак эфир мыныку Владимир Путин калыккуспо повесткаен герӟаськем сюлмаськытӥсь юанъёслы но валэктон сётӥз. Кылсярысь, Муское лыктэм Сирилэн азьвыл президентэныз Башар Асадэн ӧй на пумиськылы, шуиз, но Россилэн Сириын пуктэм ужпумъёсыз быдэстэмын, малы ке шуоно, Росси Федерацилэн Ожгар кужымъёсыз отын «террорист анклав» кылдытонлы пыкъет кылдытӥзы[7]. NBC-ысь репортёрлэн «Россия СВО ужпумъёссэ ӧз быдэсты, ыштэ генералъёссэ, лябоме» шуыса ивортонэзлы, солы пумит, Россия берло аръёсы аслэсьтыз экономиказэ, асэриксэ но ассэ ачиз утьыны быгатонлыксэ юнматӥз шуыса вераз Владимир Путин:
Тӥледлы туж кулэ вылэм Россилэн лябӟемез, нош мынам со пумысен мукет малпанэ[8].
Озьы ик Владимир Путин американ репортёрлэсь генералэз Игорь Кирилловез Москваын виён учырез "покушение"шуыса нимамзэ лыдэ басьтытэк ӧз кельты[8]. Жаляса верано, со учырез спецслужбаос «дырыз дыръя чакланы ӧз быгатэ» кунлэн азьмуртэз[7].«Синьхуа» китай иворлыко агентстволэн огмуртэз РФ но КНР кусыпъёс сярысь вераны куриз. Солы валэктыса, кык кунъёслэн вузпӧрзы 200 млрд доллар тыр луиз, инвестпроектъёслэн лыдзы 600-озь вуиз, озьы ик улосъёсын кусыпъяськон будӥз, шуиз президент:
Валтӥсез озьы ик луэ улосъёслэн кивалтӥсьёссылэн китай огмуртъёсын кусып воземзы[7].
Мерлыко политика
Демографи ужпумез Владимир Путин Россиысь валтӥсь ужпумъёс пӧлы пыртӥз, малы ке шуоно, нылпи вордон учыръёслэн лыдзы туж зол усиз — 1,41 %-озь, нылпи вордыны быгатӥсь нылкышноослэн лыдзы 30 %-лы кулэсмиз. Солэн верамезъя, вордсконлыкез, самой ӧжытсэ, 2,3 %-озь ӝутыны кулэ[8]. Кун ласянь мер юрттэт сётон пумысен азьмурт пусйиз:
- материнской капиталъя программаез;
- семья ипотекая программаез;
- нылпиё семьяослы одӥгполъем пособи сётонэз[7].
Миграционной политика пумысь ужпумез президент «юн шӧдонлыко» нимаз. Мигрантъёслэсь лыдзэс кулэсмытон понна, уж азинлыкез ӝутыны кулэ, тужгес но вылӥ технологиос удысын. Озьы ик ужаны шуыса Россие лыктэмъёс азе чурытэсьгес куронъёс пуктоно. Кунсьӧр муртъёс Россилэсь лулчеберетсэ но кылзэ валаны мед быгатозы шуыса, соосты дышетыны кулэ[7]. Та пумысь нимаз вамышъёс лэсьтэмын ини. Кылсярысь, ӟуч кылэз валась нылпиосты школаосы кутон сярысь кат кутэмын, шуиз президент.
Тазалыкез утён
Нижний Новгородын улӥсьлэн поликлиникаосын эмчиослэн тырмымтэзы пумысен ӝожтӥськемезлы, интыысь тӧрлыкъёс азе поликлиникаосы егит ӧнерчиосты кыскон сярысь ужпум пуктэмын шуыса валэктӥз президент. Фармацевтической промышленностез азинтон, асьме препаратъёс поттон сярысь но вераз[7].
Интернет
Блогер Влад А4 Владимир Путинлэсь Россиын Google компания, Росси Федерациысь ёзэт луись ужъюртъёсызлы уксё висъямысь дугдэмен но выль техника вуттон луонлыкъёсты сюбегатэмен, сервислэн ужанназ шуг-секытъёс кылдӥзы, шуыса валэктӥз кунлэн азьмуртэз[7].
Политикъёс сярысь
Меӵак эфирын Владимир Путин Россиысь но кунгож сьӧрысь куд-ог политикъёс сярысь но вераз. Кылсярысь, кинэн соос пӧлысь чай юысал юанлы, президент Гельмут Коль сярысь тодаз вайиз:
Канцлер Колен пумиськысал…со туж бадӟым политик вал, трос кулэзэ лэсьтӥз Германиез азинлыко карон понна[7].
Владимир Жириновскийлэн Украина но Матысь Шундыӝужан пумысь верамъёсызлэсь зэмамзэс Путин тазьы валэктӥз:
Со куашетонъёсты яратылӥз ке но, туж визьмо но трос тодӥсь-валась мурт вал. Солэн веранъёсыз зэмлыко опыт но тодон-валанъёс вылэ пыкъяськемын, соин ик зэмаллязы[7].
Байденлэн пизэ Хантерез жалямез пумысен:
Котьку валаны кулэ, кин тон пушкын бадӟымгес: политик яке адями. Байден пушкын адямиез бадӟымгес вылэм.[7].
Борис Ельцин сярысь:
Ельцинэз Шундыпуксён палан яратылӥзы, озьы ке но, Белградэз пушкытъянлы пумит куаразэ поттэм бере, соку ик зӥбыны но тордосэн исаны кутскизы[8].
Зеленскийлэн азьланез сярысь:
Сое вордыны басьтозы со адямиос, кудъёсызлэсь кулэяськонъёссэс со али быдэсъя[8].
Президентлэсь анекдот
Меӵак эфирын вераськыкон дыръя Россилэн пуш шуг-сектъёсызлы тросгес саклык висъян сярысь тодаз уськытэмлы президент таӵе анекдот мадиз:
Семья ӝӧк сьӧрын пуке. Пияш анаезлэсь юа: «Кыӵе кыл кроссвордын ватэмын, куинь букваез?» Кымесаз соку ик пуньыен вуэ. Собере кышноезлы картэзлэсь кымысаз пуньыен вуэ. «Юрт сярысь малпано», — шуэ со[8].
Валэктонъёс
- ↑ Прямая линия Путина состоится 19 декабря, РИА Новости (06.12.2024). Дата обращения: 6 толсуре 2024.
- ↑ 2,0 2,1 На прямую линию с Путиным поступило более 1,8 миллиона обращений, РИА Новости (18.12.2024). Дата обращения: 19 толсуре 2024.
- ↑ 19 декабря в 12:00 по московскому времени в эфир выйдет программа «Итоги года с Владимиром Путиным», Президент России (07.12.2024). Дата обращения: 8 толсуре 2024.
- ↑ В call-центре прямой линии Путина рассказали об анализе обращений с помощью ИИ, Известия (10 толсуре 2024). Дата обращения: 10 толсуре 2024.
- ↑ ИИ подсказал Путину, к каким вопросам на прямой линии уже можно готовиться, РИА Новости (11.12.2024). Дата обращения: 11 толсуре 2024.
- ↑ Число обращений на прямую линию Путина превысило полмиллиона, РИА Новости (12.12.2024). Дата обращения: 12 толсуре 2024.
- ↑ 7,00 7,01 7,02 7,03 7,04 7,05 7,06 7,07 7,08 7,09 7,10 7,11 7,12 7,13 7,14 7,15 7,16 7,17 7,18 7,19 7,20 Итоги года с Владимиром Путиным, Президент России (19.12.2024). Дата обращения: 19 толсуре 2024.
- ↑ 8,0 8,1 8,2 8,3 8,4 8,5 8,6 8,7 Итоги года с Владимиром Путиным. Онлайн-репортаж, РИА Новости (19.12.2024). Дата обращения: 19 толсуре 2024.
|
Та материаллэн правообладателез АНО «РУВИКИ» Интернет-энциклопедия». Мукет сайтъёсын тае АНО «РУВИКИ» Интернет-энциклопедия» лэземъя гинэ кутыны луэ |