Варяг дружина
| Варяг дружина | |
|---|---|
 | |
| Интыяськемын | Удмуртия |
| Адресэз | Вотка ёрос, Кудрин гурт, Молодёжной урам, 10-тӥ номеро юрт |
| Кузёез | Николай но Ольга Сергеевъёс |
| Историез | |
| Усьтэмын | 2014-тӥ арын |
| Статистика | |
| Официальной сайтэз | moyadruzhina.ru |
Варяг дружина (ӟуч: Варя́жская дружи́на) — вашкала ӟуч тематикая кылдытэм комплекс. «Удмуртилы синмаськыса» туризмъя йӧскалык маршрутлэн одӥгез люкетэз. «Русь дружинная» огъяросси фестивалез радъясьёс пӧлысь валтӥсез луэ. Интыяськемын Удмуртиын, Вотка ёросысь Кудрин гуртын, Ижкарлэсь 20 иськемын.
Историез
«Варяг дружина» туристической комплекс усьтэмын 2014-тӥ арын Вотка ёросысь Кудрин гуртын. Кузпалъёс Николай но Ольга Сергеевъёс сое кылдытон бордын 4 ар тыршизы[1].
2023-тӥ арын туркомплекс «Удмуртилы синмаськыса» туризмъя йӧскалык маршрутэ пыртэмын[1][2].
Аръёс ортчемъя та инты юнгес но юнгес музейлы укшаны кутскиз: отын вашкала ожтӥрлык, доспехъёс но мукет тунсыко арбериос люкамын. Комлекслэн кузёез Николай Сергеев со пумысен вера:
Ожтӥрлыклэн но доспехъёслэн макетъёссы — ваньмыз зэмос арбериослы укшатэмын: вылтуссыя, секталазыя но быдӟалазыя. Татчы лыктэмъёс XII яке XIV даурысь арберилэсь секталазэ ас вылазы эскерыны, сое киязы кутыса бергатыны быгато. Тросэзлы со туж паймымон луэ. Кылсярысь, 16 килограммъем мечез киязы возьыса, адямиос но вашкала дыръя бадӟымесьгес но кужмоесьгес вылӥллям шуыса малпало. Ми шонертэм малпанъёслы зэмос валатон сётыны тыршиськом[1].
Программаос
Комплекслэн кузёоосыз пӧртэм арлыдо группаослы кӧня ке пумо программаос кылдытӥзы. Со тунсыко луэ дышетскисьёслы но, арлыдоослы но. Татчы лыктэмъёсты вашкала пӧраськон амалъя дасям пыжос нянен куноято. Комлексын ужась команда задор шудонъёс, исторической эктонъёс, шор даурысь ӝӧквыл шудонъёс ортчытэ[1].
«Русь Дружинная» нимо фестиваль
Комплекс усьтӥськем бере нырысь араз ик татын «Русь Дружинная» нимо фестиваль ортчытэмын. Отчы быдэс Россиысь историен тунсыкъяськись муртъёс люкаськылӥзы. Ужрадлэн инъетэз — крепостез штурмен басьтон — историын куке но вылэм ожмаськонэз шудон пыр улӟытон. Николай Сергеев маде:
Одӥг командаысь шудӥсьёс ӟезьы сьӧры интыясько. Мукетъёсыз — лучникъёс. Штурмын таранъёс но ожмаськон падӟаос кутӥсько. Татысь адӟыны луэ, кызьы зэмзэ но ожмаськизы алебардистъёс но сулечникъёс. Ыбылӥськыку, зэмлыкогес карон понна, ӵын поттӥсь шашкаос кутӥсько[1].
Со дырысен «Русь Дружинная» огъяросси фестиваль арлы быдэ ортчытъяське[1]. Фестивальлэн валтӥсь люкетэз — со мастер-классъёс. Отын пӧртэм вашкала ӧнеръёсты ас киын кутылыны, ас синмын адӟыны луэ: кольчуга керттыны, пулэсь пуньыос вӧлыны, гончарной круг вылын тусьты-пуньы лэсьтыны, ӟаӟег тылыен гожъяськыны, зэмос кебитын дуриськыны[3].
Фестивальлэн ӝыт программаез театрализованной тыл-шоуэн йылпумъяське. Бадӟым тылскем дурын ӝуась факелъёс югдытэмъя фолк-группалэн концертэз ортче [4].
Ужрадэз дасясьёс программаез арлы быдэ выльдыны, отчы мар ке но выдльзэ ватсаны тыршо. Озьы 2024-тӥ арын «Застенок Палача» нимо висъет кылдӥз. Отын вашкала дыръя пыткаосын кутӥськись тӥрлык люкамын: четлыкъёс, курикъёс, дыбаос но тӥръёс. Туристъёслы тужгес тунсыко потӥзы XVI—XVII дауръёсы кутӥськись алдаськись но юись муртъёслы чаклам маскаос. Мылкыд карисьёс понна котькуд тӥрлыклэн кутӥськемез сярысь тунсыко лекция дасямын вал[3].
Инфраструктураез
Турист комплекслэн интывылаз вашкала тематикая пӧртэм объектъёс пуктэмын:
- Крепостной стена;
- Кунокуа (ӟуч: Гостевой терем);
- Ладья выллем беседка;
- Пуэн эстӥськись мунчо;
- Пукыӵен ыбылӥськон но лэзьяськон ожтӥрлыкен тир[5][6][1].
Валэктонъёс
- ↑ 1 2 3 4 5 6 7 Алёна Селезнёва. Отпуск в Средневековье: доспехи, штурм крепости и лепешки из печи, Российская газета (31 южтолэзе 2024). Эскеремын: 28 шуркынмонэ 2024 арын.
- ↑ Национальный маршрут Официальный сайт Министерства по туризму Удмуртской Республики.
- ↑ 1 2 Алёна Селезнёва. Гостям фестиваля "Русь дружинная" предложили пощекотать нервы, Родина (06.08.2024). Эскеремын: 28 шуркынмонэ 2024 арын.
- ↑ Фестиваль "Русь дружинная" [ӟуч] Туристический комплекс "Варяжская дружина".
- ↑ Туристический комплекс «Варяжская дружина» [ӟуч] Центр развития туризма Удмуртской Республики.
- ↑ О нас [ӟуч] Туристический комплекс "Варяжская дружина".